ရေဝ်၊ ဒဳဇြေမ်ဗာ ၇
ပ္ဍဲကဵုဒေသသ္ကုတ်သၠုၚ်ကျာ တွဵုရးဍုၚ်မန် ပ္ဍဲပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်တံဂှ် ပေါဲဗ္တိုက်ဆေၚ်မုက်တံ ညိၚ်ဒၟံၚ်ကီုလေဝ် လ္ပာ်ကံၚ်ဇြဳပၞာန် ပပဵုပ္တိုန်ဇြဟတ်ဒပ်တုဲ ပလေဝ်ပလေတ်ဒၟံၚ်ပရေၚ်ပၞာန်တံ ကၠောန်ဒၟံၚ်ဂှ် ဒပ်ပၠန်ဂတးဍုၚ်မန် MSRF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် နွံဒၟံၚ်ပ္ဍဲသ္ကုတ်ဂၠံၚ်ကွဳစက် ဇြပ်ဗု−ရေဝ်−ထဝါဲ ပြဟ်ဟ်ဏံဂှ်ဝွံ ပ္ဍဲကဵုကွာန်ဗ္ဒါဲဗ္ဒါဲတံဂှ် ဂေတ်ကၚ်၊ ဂေတ်ကရောၚ်ပၞာန် ကေုာံ ၚးတးတိဍာ်တံဂှ် ကၠောန်ၜိုတ်ဒၟံၚ်ရောၚ် ညးမၞုံအခေါၚ်ဟီုဂး MSRF နာဲနဂါ သ္ဂးရ။
သ္အာၚ်နူဂှ်ပၠန် ဒက်ပ္တန်ဒၟံၚ် တမ်ဒပ်ဂမၠိုၚ် နကဵုဗီုပြၚ်ကၚ်စဵုဒၞါဂတဂှ်တုဲ နူကဵုဂၠံၚ်ဍာ်ဂှ်လေဝ် ပလံၚ်ဒၟံၚ် ကောန်ဒပ်တၟိတၟိတံဂှ်တုဲ ဗပေၚ်ကၠုၚ်ဇြဟတ်ဂှ် ညးဆက်ဟီုရ။
“တမ်ဒပ်ညးတံဂှ်လေဝ် သိုၚ်ဒၟံၚ် ဗီုဗာန်ကာတၟိတံ ဗီုပြၚ်သၞေဟ်ကၚ်စဵုဒၞါဂတတံကဵု ဗ္ဒိုပ်တၟိတံဂှ်နွံ။ ဆ္ဂး ထ္ပက်ကရောၚ်ပၞာန်တံဂှ်တှ်ေ တ္ၚဲဏံဂှ် ဟွံမွဲဏီပုဟ်။ ထပ်ဗပေၚ်ဒၟံၚ်ဇြဟတ်တံ နွံဒၟံၚ်တၟာဂလိုၚ်ရ။ ကောန်ဒပ်တၟိ စှ်ေနူတန်ဗ္တောန်ကွတ်ပၞာန်ညးတံဂှ် ပၠောပ်ကၠုၚ် နူကဵုဂၠံၚ်ဍာ်တံနွံ။ ဗပေၚ်ကၠုၚ်ဇြဟတ် ပ္ဍဲကဵုတမ်ဒပ်ညးတံဂှ် နွံ” သာ်ဝွံ သ္ဂးရ။
နကဵုကံၚ်ဇြဳပၞာန် သွက်ဂွံကလေၚ်ထိၚ်ဒက် ဂၠံၚ်ဇၞော်ပျဳထံၚ်သု စၟတ် ၈ ဂှ် စနူဂိတုအံက်တဝ်ဗာကြပ်အိုတ်ဂှ်တုဲ မွဲဟာန်ကေုာံကောန်ဒပ်တၟိတၟိတံဂှ် ဒပ်မၚ်ပယျဵု BGF တံ ပံၚ်တောဲချဳဒရာၚ်ဒၟံၚ်ရ။
ညးဒေသရေဝ်မွဲတၠဂှ်တှ်ေ ဒပ်ကံၚ်ဇြဳပၞာန်ဝွံ ဆက်ချဳဒရာၚ်ဒၟံၚ် အတိုၚ်တြေံရတုဲ ဗပေၚ်ဒၟံၚ်ဇြဟတ်တံဂှ် ဂွံမိၚ်ကေတ်ဒၟံၚ်ကီုလေဝ် ဟိုတ်နူသ္ၚောဲဒၟံၚ်ဂှ်တုဲ သ္ပဒတန်ဟွံမာန်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ပ္ဍဲကဵုသၞေဟ်ကၚ်စၟဳတ် ဂၠံၚ်လုပ်တိတ်ဍုၚ်တံဂှ် ပတေၚ်ဂြတ်ကၠုၚ် ပရေၚ်စၟဳတ်တံ နူကဵုကၠာတေံတုဲ စွံပွန်ကဵု သၟတ်တံကဵု ညးအဝဲလဒေါဝ်တံ ဗွဲအဓိကဂှ် ညးသ္ဂးရ။
လ္ပာ်ဒပ်မဟာမိတ်ပၠန်ဂတးတံဂှ် ပြဟ်ဟ်ဏံ ပ္ဍဲပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်တံဂှ် ချဳဒရာၚ်ဒၟံၚ်ပရေၚ်ပၞာန်တံ ဟွံဂွံဆဵုကေတ်ကွေံကွေံကီုလေဝ် လ္ပာ်ဂၠံၚ်ကွဳစက် ဇြပ်ဗု−ကျာ်ပိ လ္ပာ်အနာန်ကွေန်ဂှ်တှ်ေ ဆက်က္တဵုဒှ်ဒၟံၚ်ပေါဲဗ္တိုက် ကုကံၚ်ဇြဳပၞာန်ရ။
ပ္ဍဲကဵုဒေသဂှ်ဂှ် ကံၚ်ဇြဳပၞာန် ဗပေၚ်ဒၟံၚ်ဇြဟတ် နလၟိဟ်ဗွဲမဂၠိုၚ်ဂၠေၚ်တုဲ ဟိုတ်နူဇြဟတ်ဂရိုဟ်ဍုၚ်ကြုက်တုဲ စပ်ကဵုပေါဲဗ္တိုက်လ္ပာ်သ္ကုတ်သၟဝ်ကျာတံ ညိၚ်အာဂှ်တုဲ ကေတ်အခေါၚ်ခိုဟ်တုဲ ခြာဟွံလအ် သ္ဇက်ဂွံထ္ပက်ကၠုၚ်ကရောၚ်ပၞာန် လ္ပာ်သ္ကုတ်သၠုၚ်ကျာဏံနွံဂှ် ဂကောံဇြဟတ်ပၠန်ဂတးတံ သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ