ပ္ဍဲဍာ်ဗု ဗ္ဒိုပ်ဒပ်ပၞာန်ပိ ဒးဒုၚ်ဗ္တိုက်ကဵုဒရုၚ်တုဲ ဒ္စိတ်တၠ ချိုတ်အာ

ဍာ်ဗု၊ ဒဳဇြေမ်ဗာ ၈

ဗ္ဒိုပ်ဒပ်ကံၚ်ဇြဳပၞာန်ပိ ဖျေံသ္ဇိုၚ်ပွိုၚ်ဍုၚ်ဍာ်ဗု ရးတၞၚ်သဳဂှ် ဒးဒုၚ်ဗ္တိုက်ကဵုဒရုၚ်တုဲ သီုသၞာဲဒဴမွဲတၠမပါလုပ် ကောန်ဒပ်ကံၚ်ဇြဳပၞာန် ဒ္စိတ်တၠ ချိုတ်တုဲ ကလိဂွံလဝ်ဝပ် ဗွဲမဂၠိုၚ်ဂၠေၚ်ဂှ် ကရောၚ်ပၞာန်ဒဝ်ဏ လလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၆ တေံရ။

ဗ္ဒိုပ်ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် အပ္ဍဲတိဍာ်သၞေဟ်ဒမျိုဟ်ထဝါဲ ပွိုၚ်ဍုၚ်ဍာ်ဗုဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် နကဵုဒရုၚ် ပ္ဍဲဂိတုနဝ်ဝေမ်ဗာ ၂၁ တုဲကၠုၚ်တေံရ။

ကြဴနူဂှ်တုဲ ပ္ဍဲဂိတုနဝ်ဝေမ်ဗာ ၂၅ ဂှ်လေဝ် ထပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် နွံဗ္ဒါဲကျာ်(ပေါ်တော်မူ) လ္တူဍုၚ်ဍာ်ဗုဂှ်ကဵု တမ်ဒပ် ခမရ စၟတ် ၄၀၇ ဖျေံသ္ဇိုၚ်ဍာ်ဗုတံ နကဵုဒရုၚ်ရ။

အတိုၚ်ဗဳဒဳယောသ္ကုတ် နူလ္ပာ်ကရောၚ်ပၞာန်ဒဝ်ဏ မဒှ်ကရောၚ်ပၞာန်ဒပ်ပၞာန်စဵုဒၞါညးဍုၚ်ကွာန် PDF ဂှ်မ္ဂး မဗုမ်ဒရုၚ်တံဂှ်ဝွံ ဒတုံဗ္တိုဟ်ထ္ကးအာလဝ် အပ္ဍဲဗ္ဒိုပ်ဒပ်ကံၚ်ဇြဳပၞာန်တံဂှ် ဂွံဆဵုကေတ်ရ။

ပရေၚ်ဗ္တိုက်ဏံဂှ် တမ်ဒပ်ဒဝ်ဏ ဒပ်စြေက် (၆) ၊ ဒပ်စြေက် (၇) ကေုာံ ဂကောံတမ်ဒပ် ပၠန်ဂတးတံ ပံၚ်တောဲရေၚ်တၠုၚ်လဝ်ရောၚ် ကဵုသမ္တီလလောၚ်ပ္တိတ်လဝ်ရ။

သ္အာၚ်နူဂှ်ပၠန် နကဵုကောန်သ္ဂံၚ်၊ ကောန်ပၞာန်သၞာဲဒဴ လ္ပာ်ဒပ်ကံၚ်ဇြဳပၞာန် မဒတူလိုၚ်လဝ် လ္ပာ်ညးဍုၚ်ကွာန်တံဂှ် ကေတ်အဆက်ဖျေံလွဟ် ဇရေၚ်ဂကောံဒပ် တမ်ဒပ်ပၠန်ဂတးမစုက်လုက်တံမာန်ဂှ် ကရောၚ်ပၞာန်ဒဝ်ဏ ကဵုလဝ်သမ္တီရ။

ပရိုၚ်−သြၚ်လောန်တိုၚ်(မ်)

ဗီု−ကရောၚ်ပၞာန်ဒဝ်ဏ