နေဗျဳဒဝ်၊ ဒဳဇြေမ်ဗာ ၁၁
အလုံဍုၚ်မွဲ ဟိုတ်နူပရေၚ်ဟွံညိၚ်ဝတ်တံဂှ်တုဲ သွက်ပေါဲရုဲမာဲကၠုၚ်စိုပ်ဏံဂှ် ကေတ်အာဂီုကၠီု နကဵုဇြဟတ်ဂကောံဗ္တိုက်သရိုဟ်ပကီုပရာပ်တံ မွဲဠက်ဏောၚ်ဂှ် အခိၚ်ဆဵုဂဗကဵု ဗော်ပရေၚ်ဍုၚ်ကွာန်တံဂှ် ကံၚ်ဇြဳပၞာန် ဟီုပ္တိတ်ကၠုၚ်လဝ်ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ ၅ ကဵု ၆ ဂှ် ကဝ်မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ်ကံၚ်ဇြဳပၞာန် NSPNC ကေုာံ ဗော်ပရေၚ်ဍုၚ်ကွာန်ဂမၠိုၚ် သွက်ဂွံကၠောန်ဗဒှ်ပေါဲရုဲမာဲမာန်ဂှ် သီုဥက္ကဌ မပါလုပ် ကောန်ဂကောံကမ္မတဳတံကဵု ညးတာလျိုၚ်ဂမၠိုၚ် ဆဵုဂဗလဝ်ရ။
အပ္ဍဲပရေၚ်ဆဵုဂဗဏံဂှ် စပ်ကဵုပရေၚ်ဂီုကၠီုပေါဲရုဲမာဲဂှ်တုဲ သွက်ဂွံကၠောန်ဗဒှ်အာ သ္ကုတ်ဍေံကဵုဍေံဂှ်ကီု၊ ကောန်ဒပ်ပၞာန်တံ သွက်ဂွံမၚ်ရုၚ်မာဲဂှ် ဗော်လ္ၚဵုတံ ပ္တိုန်ထ္ၜးလဝ်တုဲ ဗော်လ္ၚဵုတံဂှ်လေဝ် ဒပ်ပၞာန်ပါတှ်ေ ဟွံဒှ်ပုဟ် လညာတ်သာ်ဏံတံဂှ်လေဝ် ပ္တိုန်ထ္ၜးလဝ်ဂှ် ဥက္ကဌ ဗော်တောတက်မန် နာဲမျဵုတေအ်လွေန် ဟီုရ။
စပ်ကဵုပရေၚ်ဏံတုဲ ဥက္ကဌ NSPNC ဂှ် ပြဟ်ဟ်ဏံ နူကဵုဂကောံဗ္တိုက်သအးပကီုပရာပ် လၟေၚ် (၁) ဇြဟတ်မွဲဠက်ဂှ် ကေတ်ကဵုအာဂီုကၠီု သီုပ္ဍဲသီုမ္ၚးဏောၚ် ဒဒှ်ရဟီုလဝ်ဂှ် ညးသောၚ်ကလးလဝ်ကဵု သာ်ဏံရ။
“လ္ပာ်ဂီုကၠီုပေါဲရုဲမာဲဂှ် အုပ်လဝ်နိဂီုဂှ်တှ်ေ ဥက္ကဌ NSPNC ဗိုလ်ဇၞော်ထောန်န်နံၚ် ဟီုလဝ်ဂှ်တှ်ေ ပြဟ်ဟ်ဏံ ပ္ဍဲကဵုညးတံဂှ် ဂကောံဗ္တိုက်သအးပကီုပရာပ် လၟေၚ် (၁) ဂှ် ဘာစှ်ေအာယျ။ ဒြဟတ် မွဲဠက်နွံ။ ဒြဟတ်မွဲဠက်ဏံဂှ် ဟွံရပ်လွဟ် ရပ်လေံဒုက် ရပ်စက်ယှတ်မၞိဟ်တံဂှ် ၇၀၀၀၊ ဗဂပ်ကဵုလဝ်လွဟ်ဂှ် ၃၀၀၀။ နကဵုဂကောံတံဏံဂှ် သ္ကုတ်ဍေံကဵုဍေံ မ္ၚးကီု၊ အပ္ဍဲကီုဂှ် ကေတ်အာဂီုကၠီုဏောၚ် ဟီုလဝ်ရ” သာ်ဝွံ သ္ဂးရ။
ဂကောံဗ္တိုက်သအးပကီုပရာပ် ဥက္ကဌ NSPNC ကံၚ်ဇြဳပၞာန် မဟီုဏာလဝ်ဂှ်ဝွံ ဒှ်ဂကောံဂီုကၠီုညးဍုၚ်ကွာန် ကေုာံ ကောပ်ကာဲပရေၚ်ဗ္တိုက်သ္အးပွပကီုပရာပ် ကဆံၚ်ဗဟဵု မဒက်ပ္တန်လဝ် အပ္ဍဲဂိတုအဝ်ဂါတ်ဂှ်ရောၚ် နကဵုသြၚ်လောန်တိုၚ်(မ်) ကၠိုဟ်ကေတ်သာ်ဏံရ။
ပ္ဍဲဂကောံကောပ်ကာဲဗဟဵုဂှ်တှ်ေ ပါဲနူကဵုဌာနကာစဵုဒၞါကဵု ကာအပ္ဍဲဍုၚ်တံဂှ် ပါလုပ်အာသီုကဵု ဌာနပရေၚ်အုပ်ဓုပ်ကာနာနာ ကေုာံ ဌာနသိုဟ်ပၠိုတ်ပၟတ်တံဏောၚ်တုဲ နူကဵုဏံမွဲကဆံၚ် ဒက်ပ္တန်လဝ် သီုကဵုရးဒေသ ကေုာံ တွဵုရး၊ ခရိုၚ်၊ ပွိုၚ်ဍုၚ် ကေုာံ စဵုကဵုအရာပ် ကွာန်တံရ။
ကောန်ဂကောံတံဂှ်တှ်ေ မၞိဟ်တြုံ နူအာယုက် ၃၅ စဵုကဵု ၆၅ သၞာံ ပါလုပ်တုဲ ကဵုတန်ဗ္တောန်ကွတ်ပၞာန် ကာလဇမၠေံတုဲ သွက်ဂီုကၠီုအရာပ်၊ ကွာန်တံဂှ် ဗဂပ်ကဵုလဝ်လွဟ်လက်နက် ဗွဲမလုပ်သၞောဝ်ရ။
ပြဟ်ဟ်ဏံ ညးမစုက်လုက်ကဵု ဒပ်ပၞာန်တံဂှ်ကီု ကောန်အရာပ် မစန်ဒက်လဝ်တံဂှ်ကီု ကဵုလဝ်တန်ဗ္တောန် နူဂိတုသေပ်တေမ်ဗာတေံတုဲ မၞိဟ်ပါလုပ်ပ္ဍဲဂကောံဗ္တိုက်သ္အးပွပကီုပရာပ်တံဂှ်တှ်ေ ပအပ်ဗဂပ်ကဵုလဝ်လွဟ်တံဂှ်ရောၚ် ဂွံတီကေတ် နူကဵုတမ်ရိုဟ်ပရိုၚ်ဗလးတိတံရ။
ကံၚ်ဇြဳပၞာန်ဂှ်တှ်ေ အပ္ဍဲပရေၚ်ဆဵုဂဗ NSPNC ကဵု ဗော်ပရေၚ်ဍုၚ်ကွာန်တံဂှ် သဳကၠဳလဝ် သီုကဵုပရေၚ်ပလေဝ်သၞောဝ်သ္ဇိုၚ်ဒက်ပ္တန် သီုကိစ္စစပ်ကဵုပရေၚ်ဂီုကၠီု ကေုာံ ပရေၚ်ပေါဲရုဲမာဲတံဂှ်ရောၚ် လလောၚ်ပ္တိတ်လဝ်ကီုလေဝ် ထ္မံက်ထ္ၜးလဝ် သောဲသောဲဗြောဲဗြောဲဂှ် ဟွံမွဲရ။
ပ္ဍဲဂိတုဒဳဇြေမ်ဗာ ၇ တေံဂှ်လေဝ် ကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် ခါန်ကၞက်လဝ်ဂှ်ကဵု ဗော်ပရေၚ်ဍုၚ်ကွာန် ဂွံလဝ်အခေါၚ်ဒက်ပ္တန်ဗော်တုဲ ၅၀ ပြၚ်တံ ဆဵုဂဗဳသဳကၠဳလဝ်ဏီရ။
ပ္ဍဲပရေၚ်ဆဵုဂဗဏံဂှ် ဥက္ကဌကဝ်မယှေန်ဂှ်တှ်ေ ဂးလဝ် ပ္ဍဲပေါဲရုဲမာဲဏံ ကဵုအခေါၚ်ဂကောံလ္ၚတ်မၚ်ရံၚ် အပ္ဍဲဍုၚ်မ္ၚးဍုၚ်တံ ဗွဲမဗဗွဲကဵုသၞောဝ်အစာံတံဂှ်ဏောၚ် မဒှ်ရ။
ဗော်ပရေၚ်ဍုၚ်ကွာန်တံဂှ်တှ်ေ အခိၚ်လဵု နကဵုသၞောတ်လဵု ကၠောန်အာပေါဲရုဲမာဲဂှ်တုဲ ဆလအ်ပ္တိတ်အာ သၞောဝ်စပ်ကဵုပေါဲရုဲမာဲတံဂှ်ရောဟီုဂှ် ပ္တိုန်ထ္ၜးလဝ်ရောၚ် နာဲမျဵုတေအ်လွေန် ဟီုရ။ သ္အာၚ်နူဂှ်ပၠန် နူကဵုဗော်မွဲ စပ်ကဵုပ္တိုန်ထ္ၜးကၠုၚ်လဝ် သွက်ဂွံဒစးဒုၚ်စၞောန်ပျးသၞောဝ် မကေတ်အရေဝ်တာဒၞါအာ ပြဝပလီုပေါဲရုဲမာဲတံဂှ်တုဲ လ္ပာ်ကဝ်မယှေန်ဂှ် ချပ်အာဏောၚ်ဂှ် သ္ဂးရ။
အပ္ဍဲပရေၚ်သဳကၠဳ ပွိုၚ်ပိတ္ၚဲအဆက်က် အကြာ NSPNC ကံၚ်ဇြဳပၞာန်၊ ကဝ်မယှေန်ပေါဲရုဲမာဲ ကေုာံ ဗော်ပရေၚ်ဍုၚ်ကွာန်တံဂှ် ဖျေံဂွံလဝ်သ္ဂုတ်သွာတ်မမိက်ကဵုမွဲမွဲ ဟွံမွဲဏီပုဟ်ဂှ် ဥက္ကဌ ဗော်ဒဳမဝ်ကရေတ်တေတ် ကောန်ဂကူကရေၚ် မာန်အံၚ်ပျေအ်သဵု ဟီုရ။
“နူကဵုဗော်နာနာဂှ် စပ်ကဵုပရေၚ်ဂီုကၠီု စပ်ကဵုပေါဲရုဲမာဲတုဲ ပ္တိုန်ထ္ၜးလဝ် ၜိုတ်လညာတ်ညိကီု။ တၚ်သ္ဂုတ်သွာတ် ဟွံသေၚ်ဏီပုဟ်။ ၇ တ္ၚဲဂတဏံ အခိၚ်ကလေၚ်ဆဵုကဵု UEC မ္ဂး တ္ၚဲကၠောန်အာပေါဲရုဲမာဲ ချိုတ်တ်ပၠိုတ်တ်၊ သၞောတ်လဵု ဒ္ဂေတ်ဗက်ကၠောန်အာရောဟီုဂှ် အခိၚ်သၟာန်သၟုက်သဳကၠဳဂှ် ညးတံလေဝ် သှ်ကဵုဟွံမာန်ဏီပုဟ်” သာ်ဝွံ သ္ဂးရ။
ပ္ဍဲကဵုလၟေၚ်ကမၠောန်အဓာန်ဂတ ကံၚ်ဇြဳပၞာန် ၅ သာ်ဂှ် တၚ်နၚ်လက္ကရဴအိုတ် ယဝ်ရကၠောန်အာ ဗွဲမဗဗွဲကဵုတၚ်စၞောန်ပျး စပ်ကဵုကာလကာမံက်တိုန်ဂှ်တုဲဒှ်မ္ဂး ကုအလဵုအသဳ ကၠောန်ဗဒှ်ပေါဲရုဲမာဲတုဲ မမံက်တိတ်ကၠုၚ်ဂှ် သွက်ဂွံပအပ်ကဵုအာအဝဵုမာန်ဂှ် ရေၚ်တၠုၚ်အာဏောၚ် ထ္မံက်ထ္ၜးလဝ်ရ။
ဆ္ဂး အခိၚ်လၟုဟ် ကြပ်အလုံဍုၚ်မွဲဂှ် ပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်တံ ဆက်က္တဵုဒှ်ဒၟံၚ်တုဲ ပ္ဍဲကဵုတိဍာ်ကံၚ်ဇြဳပၞာန် အုပ်ဓလီုလဝ်တံ ၈၆ ဍုၚ်ဂှ် ဂကောံဒပ်ပၠန်ဂတးရပ်လွဟ်တံ ထိၚ်ဂွံလဝ်ရ။
မွဲလ္ပာ်ဂှ်ပၠန် ပ္ဍဲကဵုလၟေၚ်ကမၠောန်ဒစးဒုၚ်ပေါဲရုဲမာဲဂမၠိုၚ် သွက်ဂွံဂွံစရၚ်မာဲသ္ဇိုၚ်တုဲ စရၚ်လၟိဟ်မၞိဟ် မကံက်ကေတ်လဝ် ပ္ဍဲဂိတုအံက်တဝ်ဗာဂှ်လေဝ် ပ္ဍဲဒေသလ္ၚဵုတံဂှ် ကံက်ဂွံလဝ်ပေၚ်ၚ်ဂှ် ဟွံမွဲရ။
ပ္ဍဲအကာဲအရာမက္တဵုဒှ်ဒၟံၚ်သာ်ဏံဂှ် ကံၚ်ဇြဳပၞာန်ဂှ်တှ်ေ ကသပ်ကၠုၚ်နူဗော်ပရေၚ်ဍုၚ်ကွာန်ဂမၠိုၚ် သွက်ဂွံကၠောန်ဗဒှ်ပေါဲရုဲမာဲမာန်ဂှ် သ္ပဇြိုဟ်နက်စွံအဓိကတုဲ ညံၚ်ဂွံဂွံပရေၚ်ဂီုကၠီုပေၚ်ၚ်၊ သွက်ပရေၚ်ဗဗွဲကဵုသၞောဝ် ကေုာံ ညံၚ်ညးဍုၚ်ကွာန်တံ ဟွံဂွံဆောံလေၚ်အခေါၚ်ကဵုမာဲတံဂှ် ပ္တဝ်အာက္ဍိုပ်ဏောၚ် ဟီုကြီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI