မတ်မလီု၊ ဂျောန် ၂၁
ပ္ဍဲတိဍာ်ဂကောံဇြဟတ်ပၠန်ဂတးနူတွဵုရးဍုၚ်မန်တအ် မထိၚ်ဒက်ဂွံလဝ်ဂှ် က္တဵုဒှ်ဒၟံၚ်ယဲဇွဟ်ဂစေံဂၠိုၚ်ဒၟံၚ်တုဲ ယဲဏံဝွံ အခိၚ်ကာလဗြဲမ္ဂး ဒှ်စဂၠိုၚ်လေပ်ဂှ် ညးတာလျိုၚ်တိဍာ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ယဲဇွဟ်ဂစေံဝွံ ဟိုတ်နူအကာဲအရာတိဍာ်တုဲ ပ္ဍဲကဵုဒေသဂကောံပၠန်ဂတးတအ် ထိၚ်ဒက်ဂွံလဝ်ဂှ် ကၠိုဟ်သၞာံဒှ်လေပ်ကီုလေဝ် အခိၚ်ကာလဗြဲလၟုဟ်ဏံမ္ဂး ဒှ်ဂၠိုၚ်ကၠုၚ်တီတီရ။
ဟိုတ်နူဒှ်ကၠုၚ်ယဲဇွဟ်ဂၠိုၚ်ကၠုၚ်သာ်ဏံတုဲ ပ္ဍဲကဵုကောန်ဂကောံဇြဟတ်ပၠန်ဂတးတအ်ကီု ပ္ဍဲညးဒေသတအ်ကီုဂှ် နွံပၟိက်ကၠုၚ် သွက်ဂွံလွဳလွတ်ယဲဘဲ ဗွဲမရုပ်ဂပ်တုဲ နွံပၟိက်ဒၟံၚ် သီုကဵုဂဥုဲဇဗ သီုစၞစဒှ်ဓတ်တံရ။
ဒံက်တာသဳရိမန်ဆာန် ဥက္ကဌကဝ်မတဳက္ဍိုက်ပ် ပရေၚ်ပၞာန်၊ ပရေၚ်ဍုၚ်ကွာန် နူကဵုဒပ်စဵုဒၞါဍုၚ်မန် MSDF ဂှ်တှ်ေ အခိၚ်လၟုဟ် ဟိုတ်နူဗြဲဂူဆက်ဒၟံၚ်တုဲ ဗွဲမဂၠိုၚ် ဒှ်ဒၟံၚ်ယဲဇွဟ်ဂစေံဂှ်တုဲ နွံပၟိက်ဒၟံၚ်ကဵု ဂဥုဲဇဗ ကေုာံ စၞစဂမၠိုၚ်ရောၚ် ဟီုရ။
“အရိုဟ်သၞာံ အခိၚ်ဗြဲစစှ်ေဏံ ပ္ဍဲကဵုဒေသဂကောံဇြဟတ်ပၠန်ဂတးတအ် ထိၚ်ဒက်ဂွံလဝ် ဒၞါဲဂြိုပ်ဂၞိၚ်တအ်ဂှ် ဒှ်စယဲဇွဟ်ဂစေံလေပ်ဒၟံၚ်ရ။ သၞာံဏံလေဝ် ဍုက်ကယျဳဒၟံၚ်တုဲ ဗြဲဂှ်လေဝ် ဂူဒၟံၚ်ဟွံသ္ကုတ်ဂှ်ရ ဗွဲမဂၠိုၚ် ဒှ်ဒၟံၚ်ယဲဇွဟ်ဂစေံအိုတ်ရ၊ သွက်ယဲဇွဟ်ဂစေံဏံဂှ် နွံပၟိက်ဂှ်တှ်ေ ကိရိယာအရၚ်ဂွံစမ်ၜတ် စၟယဲဇွဟ်ဂစေံဏံ ကဵု ဂဥုဲဍေံရဏောၚ်။ တုဲတှ်ေ ဒှ်ယဲတုဲမ္ဂး ဒးဒုၚ်ဘဲအာဟာရဟွံပေၚ် ဇၞော်ကဵုဇြဟတ်ဏောၚ်ဂှ်ရ စၞစမဒှ်ဓတ်တံဂှ်လေဝ် နွံပၟိက်ဒၟံၚ်ကီုရ”သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်ကာလလၟုဟ်ဂှ် ဒှ်စယဲဇွဟ်ဂစေံဏံ ဂၠိုၚ်ဒၟံၚ်တုဲ သ္ဂံၚ်ပၠန်ဂတးတအ်ကီု ညးဒေသတံကီု ညံၚ်ဟွံဂွံဂိယဲ စွံသတိမံၚ်စံၚ်အိုတ်ညိဂှ် ဖတိုက်ဖအောဝ်လဝ်တုဲ ပ္ဍဲကဵုညးဒှ်ယဲဇွဟ်ဂမၠိုၚ် ညံၚ်ယဲဟွံဂွံသ္ကာတ်မြဟ်ဂှ် ဒးလွဳလွတ်ကဵု ဗွဲမဂတာပ်အခိၚ်ဏောၚ် ညးဆက်ဟီုရ။
ဒှ်ကၠုၚ်ယဲဇွဟ် ဂၠိုၚ်ကၠုၚ်ဗီုလၟုဟ်ဂှ်ဝွံ ဒၟါနူဇၟိတ်အနဝ်ဖလိတ်ကိတ်တုဲ က္တဵုဒှ်လဝ်တုဲ ဇၟိတ်ဏံဝွံ ဂွံလဝ်စၟယဲဇွဟ်ဂစေံ ပလာတ်သမဝ်ဒဳယာမ် (Plasmodium) မပါ်က္ဍတ်ဂျိုၚ်တဴ အကြာဒဵုဂြိုပ် စောဝ်လ္ဂောဝ်တအ်ကီု သီုကဵုဒၞါဲဌာန်ဒေသတၞဟ်ဟ်ဂမၠိုၚ်ရ။
ပ္ဍဲတိဍာ်ဂကောံဇြဟတ်ပၠန်ဂတးတအ် ထိၚ်ဒက်ဂွံလဝ်ဂှ် နွံပၟိက်ဒၟံၚ်ကဵု ဂဥုဲယဲဇွဟ် ကေုာံ ဂဥုဲဇွဟ်ဂစေံ မက္တဵုဒှ်လေပ် အခိၚ်ကာလဗြဲတံဂှ်တုဲ ဂဥုဲခၞော်စော်တအ်ဂှ်လေဝ် နွံပၟိက်ဒၟံၚ်ကီုဂှ် ကိုဝ်အေမေန်ထောန် ညးဒုၚ်တာလျိုၚ် ဒပ်စဵုဒၞါညးဍုၚ်ကွာန်ခရိုၚ်သဓီု ဟီုရ။
ဒှ်ယဲဇွဟ်ဂစေံမ္ဂး ဂံက်ဂတဝ်တုဲ ဇကုဂမ္တဴ၊ ဂမ္တဴတိုန်၊ က္ဍိုပ်ဂိ၊ ဇကုဇကောဝ်ဂိ၊ ထအအ်၊ စံၚ်ပရံၚ်၊ ပဠက်တိတ်တုဲ ဍောၚ်၊ ဂၞဴအာ၊ ယီုထတ်ကၠုၚ်ဂှ် ဂွံတီကေတ်ရ။
သ္အာၚ်နူဂှ်ပၠန် ယဝ်ယဲဇွဟ်ဂစေံသ္ကာတ်မြဟ်ကၠုၚ်မ္ဂး ဖျုန်ဇကုဒှ်အရံၚ်သာ်မိတ်၊ စိပ်၊ တိုန်၊ အာပဿဴမ္ဂး ဆီပါ၊ ဆီဒှ်အရံၚ်ဗစံက်၊ လက္ချန်ယီုဂြက်တအ်လေဝ် နွံဂှ်ရ အခိၚ်အခါကာလဏံ ယဝ်ဂွံယဲကၠုၚ်မ္ဂး ဒးစွံသတိဏောၚ်ဂှ် အ္စာဂဥုဲဂမၠိုၚ် ဟီုရ။
ယဝ်ဟွံလွဳယဲဇွဟ်ဂစေံဏံ ဗွဲမဂတာပ်အခိၚ်မ္ဂး စၟယဲလုပ်ဂွံပ္ဍဲက္ဍဟ်ကီု၊ ကောန်တၟအ်လီု၊ ဇြဟတ်ဆီအောန်၊ ဂြိုဟ်လီု၊ ဍာ်လုပ်ဂွံကသအ်တုဲ ဍောၚ်ၜိုတ်ကီု၊ သၠကြုက်ဂုဟ်တုဲ ထကးအာတံဒှ်တမ် ဒှ်စဵုကဵုဒးဆောံလေၚ်လမျီု ဒှ်မာန်ဂှ် ဂွံတီကေတ်ရ။
ပ္ဍဲတွဵုရးဍုၚ်မန် ပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်သဓီု၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်ကျာ်ထဝ် မဒှ်ဒၞါဲတိဍာ်ဂကောံဇြဟတ်ပၠန်ဂတးတအ်ထိၚ်ဒက်လဝ်တအ်ဂှ် ဒှ်ယဲဇွဟ်ဂစေံဂၠိုၚ်ဒၟံၚ်ဂှ် ဂွံဆဵုကေတ်ရောၚ် ညးတာလျိုၚ် ဂကောံဇြဟတ်ပၠန်ဂတးတအ် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media