ဝါယှေန်တာန်၊ ဂျောန် ၂၁
အပ္ဍဲပွိုၚ်ၜါသတ္တာဟ သမ္မတဒဝ်နေဝ်ထြာမ် သ္ဂုတ်သွာတ်အာ ဒဒှ်ရပါလုပ်အာ ပ္ဍဲပေါဲပၞာန်အဳရာန်−အေဿရေဟာ ဟွံပါဟာဂှ် သ္ၚိဗု ဟီုကၠုၚ်ရ။
ပ္ဍဲပေါဲသောၚ်ကလးလိက်ပရိုၚ်သ္ၚိဗုဂှ် ဝန်ဇၞော်လလောၚ်ပရိုၚ် ဂဴရိုဝ်လေန် ဟီုလဴထ္ၜးလဝ် ဂလာန်ပရိုၚ်နူသမ္မတ ထြာမ် တိုက်ရိုက်ရ။
ဒုၚ်သ္ဇိုၚ်ကဵုအခေါၚ်အရာသ္ဂောံသဳကၠဳပညဳပညပ် နွံမံၚ်ဏီဟာ၊ ဟွံမွဲဟာဂှ်တုဲ သ္ဂုတ်သွာတ်အာ ဒဒှ်မအမေရိကာန် ပါလုပ်ပ္ဍဲပဋိပက္ခ အဳရာန်−အေဿရေ ထေက်၊ ဟွံထေက်ဂှ်ဏောၚ်ဂှ် ထြာမ် ဟီုကၠုၚ်ရ။
ယဝ်အမေရိကာန် ပါလုပ်ကၠုၚ်ပ္ဍဲပေါဲပၞာန်ဏံမ္ဂး အပ္ဍဲဒေသဂှ် ဒှ်ညံၚ်ရဴညးဒးနရက်ရဏောၚ်ဂှ် ဝန်ဇၞော်ကာဍုၚ်သ္အာၚ်အဳရာန် ကၠာတေံ ဟီုကၠုၚ်လဝ်တုဲ ပေါဲပၞာန်ဏံဝွံ ပေါဲပၞာန်အမေရိကာန်ဟွံသေၚ်ပုဟ်ဂှ် သ္ဂးလဝ်ရ။
ဝန်ဇၞော်လလောၚ်ပရိုၚ်သ္ၚိဗုဂှ်တှ်ေ သမ္မတ ရေၚ်တၠုၚ်လဝ် ညံၚ်အဳရာန် ဟွံဂွံပ္တိတ်လွဟ်နျူကလဳယျာရောၚ် သ္ဂးရ။
ဂလာန်ထံၚ်ပရိုၚ်အမေရိကာန်တအ် ဟီုကၠုၚ်လဝ် ဒဒှ်ရအဳရာန် စဳဇန်ဒၟံၚ်သ္ဂောံကၠောန်ပ္တိတ် လွဟ်နျူကလဳယျာဟွံသေၚ်ဂှ် အလဵုအသဳ တးပါဲထောံလဝ်ရ။
အစဳဇန်သ္ဂောံဗတိုက်အာ အဳရာန်ဂှ် ၜိုန်ရထြာမ် ကဵုလဝ်အခေါၚ်ကီုလေဝ် ဟွံဂွံဖျေံသ္ဂုတ်သွာတ် ပေၚ်ၚ်ဏီပုဟ်ဂှ် ဌာန်ပရိုၚ် CBS ထ္မံက်ထ္ၜးလဝ်ရ။
ပ္ဍဲဍုၚ်အဳရာန်ဂှ် ရုၚ်စက်နျူကလဳယျာသၟဝ်တိမွဲ ပလီုကၠေံနကဵုလွဟ်အေဿရေဟွံမာန် နွံမံၚ်မွဲတုဲ ရုၚ်စက်ဏံဂှ် ပလီုကဵုမခတိုဟ်အမေရိကာန်တအ်မှဟေၚ် ပလီုမာန်ရောၚ် ညးလ္ၚတ်ပရေၚ်ပၞာန်ဂမၠိုၚ် ဟီုရ။
အကြာဏံ ဆက်ရေၚ်တၠုၚ်ဒၟံၚ် ပရေၚ်သဳကၠဳ အကြာအမေရိကာန်ကဵု အဳရာန်တအ်ဂှ်ရောၚ် သ္ၚိဗု ဟီုရ။
ဝန်ဇၞော်ကာဍုၚ်သ္အာၚ်ယူရောပ်တအ်လေဝ် သဳကၠဳဒၟံၚ်ကဵု ဝန်ဇၞော်ကာဍုၚ်သ္အာၚ်အဳရာန်ရောၚ် သာ်ဝွံ ထ္မံက်ထ္ၜးလဝ် ပ္ဍဲပရိုၚ်ဗဳဗဳဇြဳရ။
အခိၚ်အေဿရေ ဟီုလဝ် ဒဒှ်ရဗတိုက်လဝ်အေဿရေ ဒၞါဲမဆေၚ်စပ်ကဵုလ္ပာ်ပၞာန် တၟာဂလိုၚ်ဂှ် အဳရာန်ဂှ်လေဝ် ကလေၚ်ဗ္တိုက်ဒၟံၚ်အေဿရေ နကဵုကမ်လှောဝ်ဂမၠိုၚ်ရ။
ဝန်ဇၞော်ကာဍုၚ်သ္အာၚ်ဗျိတိၚ် ဒေဗေတ် လာမ်မဳဂှ်တှ်ေ ဖတိုက်ဖ္အောဝ်လဝ် သွက်ဂွံသောၚ်ကလး ပဋိပက္ခဒှ်ဒၟံၚ်လၟုဟ်ဏံ နကဵုနဲကဲကလုတ်တမာန်ရ။
ပြဟ်ဟ်ဏံ မူရဴသာ်လဵုမွဲ ထြာမ်မဆက်ကၠောန်အာရောဟီုဂှ် ညးဂၠးတအ် မၚ်ရံၚ်ဒၟံၚ်ရ။
Ref: BBC/CBS