နေဗျဳဒဝ်၊ ဂျူလာၚ် ၉
ပ္ဍဲကဵုကောန်ဒပ်ကံၚ်ဇြဳပၞာန် အလုံဍုၚ်မွဲဂှ် မၞိဟ်ပြံၚ်ကၠုၚ်လ္ပာ်ဂကောံပၠန်ဂတးတအ် ဂၠိုၚ်တိုန်ကၠုၚ်ဒၟံၚ်ရောၚ် ဂွံတီကေတ် အတိုၚ်စၟစရၚ်တ်သမ္တီ ဂကောံပျဳတုယျေန်ခွေန် အပ္ဍဲသတ္တာဟတတိယကဵု သတ္တာဟစတုတ္ထရ။
အတိုၚ်စၟတ်သမ္တီဂှ်မ္ဂး ပ္ဍဲဂိတုဂျောန် သတ္တာဟတတိယဂှ် ကောန်ဂကောံဒပ်ကံၚ်ဇြဳပၞာန်ဂမၠိုၚ် မပ္တံကဵု ဗၠာဲသၟိၚ်၊ ကောန်ပၞာန် ကေုာံ ပၞာန်မၚ်ကွာန် ၃၁ တၠ လုပ်စိုပ်ဖျေံလွဟ်၊ ပြံၚ်ကၠုၚ်လ္ပာ် နဒဒှ်ဂၠုဲပၞာန်ရ။ ပ္ဍဲကဵုဏံ ပၞောဝ်ကဵုမၞိဟ်မလုပ်စိုပ်ဖျေံလွဟ် ၁၃ တၠဂှ် ၆ တၠဂှ်ဝွံ ဒှ်ကောန်ဒပ်ယိုက်လျိုၚ်ပၞာန်တၟိတၟိဂမၠိုၚ်ရ။
လအာတုပ်သာ်ဂှ်ကီု ပ္ဍဲဂိတုဂျောန် သတ္တာဟစတုတ္ထဂှ်လေဝ် ဗၠာဲသၟိၚ်၊ ကောန်ပၞာန် ကေုာံ ပၞာန်မၚ်ကွာန် ၆၃ တၠ နွံလဝ်တုဲ ပၞောဝ်ကဵုဏံ ၂၃ တၠဝွံ ဒှ်ညးလုပ်စိုပ်ဖျေံကၠုၚ်လွဟ်ဂမၠိုၚ်ရ။ ပ္ဍဲကဵုညးလုပ်စိုပ်ဖျေံကၠုၚ်လွဟ်ဂမၠိုၚ် ၁၈ တၠဂှ်ဝွံ ဒှ်ကောန်ဒပ်ယိုက်လျိုၚ်ပၞာန်တၟိတၟိဂမၠိုၚ်ရ။
ကိုဝ်နံၚ်ယော ညးဒုၚ်တာလျိုၚ် သုတေသနသွာၚ်ပၞာန် ဂကောံလ္ၚတ်ကေၚ်ကာပၞာန်ဗၟာ ကေုာံ ပရေၚ်ဂီုကၠီု MDSI ဂှ်တှ်ေ ဟိုတ်နူဒှ်မံၚ်ဗီုပြၚ်ကဵုဒုၚ်ချိုတ် ပ္ဍဲကဵုမုက်ပၞာန်တအ်ဂှ်တုဲ နူတမ်ဝါဒိတေံဂှ်လေဝ် ဆန္ဒဟွံပါမွဲသာ် ဒးဒုၚ်တံၚ်ဂြဲပၠောပ်နၚ် ပ္ဍဲဒပ်ပၞာန်ဂှ်ရ ဂွံအခေါၚ်ဗက် ဂ္စါန်ဂြိပ်တိတ် ပြံၚ်ကၠုၚ်လ္ပာ် ဂၠိုၚ်ကၠုၚ်ရောၚ်ဂှ် ဟီုရ။
“ဗ္တောန်ကဵုကောန်ဒပ်တအ်ဏံ ၜိုတ်မွဲၜါဂိတု ဃရက်ဃရက်တုဲ ဒှ်မံၚ်အကာဲအရာကဵုဒုၚ်ချိုတ် ပ္ဍဲမုက်ပၞာန်တံဂှ်တုဲ အခိၚ်ဒးဆေၚ်မုက်ဍာံဍာံမ္ဂး တုဲပၠန် ပ္ဍဲမုက်ပၞာန်ဂှ် ပရေၚ်ဟွံညဳသၟဟ် ပရေၚ်မဍဵုဍိုက် ပရေၚ်ပါ်ကဆံၚ်တံဂှ် နွံဒၟံၚ်တုဲ သၟတ်ယိုက်လျိုက်ပၞာန်တအ်ဂှ်တှ်ေ ဂွံအခေါၚ်ဗက် ဂ္စါန်ဂြိပ်တိတ်အိုတ်ရ။ ပြံၚ်ကၠုၚ်လ္ပာ်ဂှ်လေဝ်ဂၠိုၚ်ကၠုၚ်ရ” သာ်ဝွံ သ္ဂးရ။
အတိုၚ်စရၚ် နူကဵုဂကောံပျဳတုပါန်တိုၚ် ကံက်ကပှ်ဂွံလဝ်ဂှ်မ္ဂး နူသၞာံ ၂၀၂၅ ဂိတုဂျာန္နဝါရဳ စဵုကဵုဂိတုဂျောန် သတ္တာဟစတုတ္ထဂှ် ဒပ်ကံၚ်ဇြဳပၞာန် လုပ်စိုပ်ဖျေံကၠုၚ်လွဟ်ဂှ် ဂၠုဲပၞာန်ဒှ်ကၠုၚ် စဵုကဵု ၁၄၉၂ တၠရောၚ် ဂွံတီကေတ်ရ။
သ္ကိုပ်ဗိုလ်ဇၞော် ကျဝ်ဇြဲလေန် မဒှ်သ္ကိုပ်ကောပ်ကာဲ ဒပ်တိုက်၊ ဒပ်ဍာ်၊ ဒပ်ကျာဂှ် ယဝ်ရပံက်အာတန်ဗ္တောန်ကွတ်ပၞာန်တအ်ဏံ ဗွဲလၟေၚ်ၚ်မာန်မ္ဂး အစောံဇြဟတ်စဵုဒၞါ ကေုာံ ပရေၚ်ဂီုကၠီု မဆက်စပ်ကဵုကၟိန်ဍုၚ်တံ သာတုဲခိုဟ်ကၠုၚ်ဏောၚ်ဂှ် တုဲကၠုၚ်ဟွံလအ်တေံ ဟီုလဝ်ရ။
အခိၚ်လၟုဟ် တန်ဗ္တောန်ကွတ်ပၞာန်ဂှ် တုဲဒှ်အာ စဵုကဵုလၟေၚ် ၁၂ တုဲ ပံက်လဝ်ဂှ် ဒှ်ကၠုၚ်စဵုကဵုလၟေၚ် ၁၄ တုဲ တန်ဗ္တောန်ကွတ်ပၞာန် လၟေၚ်ဂတတံဏံဂှ်လေဝ် ညံၚ်ဂွံပံက်မာန် ဂကောံပကောံကောန်ဒပ်တၟိတအ် ပတိတ်ဒၟံၚ်ဇြဟတ်ရ။
ဟိုတ်ဂှ်ရ နကဵုညးဒးဒုၚ်ကော်ပၠောပ် အပ္ဍဲဒပ်ပၞာန် ဗွဲအဓမ္မတအ် ပြံၚ်ကၠုၚ်လ္ပာ်ဂကောံဒပ်ပၠန်ဂတးတအ်မာန်မှဟေၚ် ဟံၚ်ပြာ်ဘဝဇကုမာန်ဏောၚ်တုဲ ဂွံအခေါၚ်မ္ဂး လုပ်စိုပ်ဖျေံလွဟ်အိုတ်ညိဂှ် ဂကောံပျဳတုပါတိုၚ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media