ရေဝ်၊ ဂျူလာၚ် ၁၁
ဂကောံရီုဗၚ်ပရေၚ်မၞိဟ် (ရွှေဟင်္သာပရဟိတ) မဒှ်ဂကောံရီုဗၚ်ပရေၚ်မၞိဟ် ဖျေံသ္ဇိုၚ်ကွာန်တၟအ်ကၞေၚ် ဍုၚ်လၟိုၚ် တွဵုရးဍုၚ်မန်ဂှ် ကောန်ဂကောံၜါတၠ ဒးဒုၚ်ဗာ်လဝ်ကဵုမြ နကဵုဂကောံရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဂျူလာၚ် ၉ အခိၚ်ဇိုၚ်သဝ်တ္ၚဲ ၜိုတ် ၆ နာဍဳဂှ် ညးအုပ်ကာ ဂကောံရီုဗၚ်ပရေၚ်မၞိဟ်ဏံကဵု ကောန်ဂကောံမွဲတၠဝွံ နူဍုၚ်လၟိုၚ် အခိၚ်စဴကၠုၚ်ကွာန်တၟအ်ကၞေၚ် နကဵုကွဳလိုန်ဓာတ်မွဲဖ္ဍိုက် အခိၚ်စိုပ်အရာပ်(ကော့လဝဲ)ဂှ် ဒးဒုၚ်ဗာ်လဝ်ကဵုမြ ကဵုဂကောံရ။
အတိုၚ်ဂလာန်ညးဒေသတံဂှ်မ္ဂး မၞိဟ်တြုံပန်တၠ ဗက်ကၠုၚ်လက္ကရဴကောန်ဂကောံရီုဗၚ်ပရေၚ်မၞိဟ်ၜါတၠဏံ နကဵုကွဳလိုန်ဓာတ်ၜါဖ္ဍိုက်တုဲ ဗာ်ဏာလဝ်ကဵုမြရ။
ဟိုတ်နူဒးဒုၚ်ဗာ်လဝ်ကဵုမြတုဲ သၟတ်တြုံ အာယုက် ၂၅ သၞာံ မဒှ်ကောန်ဂကောံဂှ်ဝွံ ဒးအာဝပ်မြ ပ္ဍဲက္ဍိုပ် ၜါလစုတ်တုဲ ဒးတိုန်စိုပ်လွဳဒၟံၚ်ကာမံက်တိုန် လ္တူရုၚ်ဂဥုဲလၟိုၚ်ရ/
လၟေၚ်ဒဒှ်ဏံဝွံ ဟိုတ်နူဒှ်သၞဒက်လဝ်ဝဲ အကြာမၞိဟ်ဍောတ်တ်တုဲ ဗာ်ဏာလဝ်ကဵုမြ ဒှ်မာန်ရောၚ် ဂလာန်မသ္ၚဳဂၠိပ်ဒၟံၚ်သာ်ဏံ နွံကီုလေဝ် နကဵုသြၚ်လောန်တိုၚ်(မ်) သ္ပဒတန် တၞဟ်ခြာဟွံမာန်ဏီရ။
မၞိဟ်တြုံပန်တၠ ဒက်က္ဍိုပ်တုဲ ဗာ်ဏာလဝ်ကဵုမြဂှ်ဝွံ ဒှ်သၟတ်ဒေသဍုၚ်လၟိုၚ်တုဲ လ္ပာ်ဒပ်ဗၠာဲသၟိၚ် ဗက်ရပ်ဟွံဂွံဏီတုဲ ဂြိပ်ပါဲဒလေတ်ဒၟံၚ်ရောၚ် သ္ဂးရ။
ဂကောံရီုဗၚ်ပရေၚ်မၞိဟ် (ရွှေဟင်္သာပရဟိတဝွံ ) ဒှ်ဂကောံကၠောန်ၜိုတ်ရီုဗၚ်ကဵုဒၟံၚ် ပ္ဍဲအရာပလံၚ်ဗစိုပ်မၞိဟ်ယဲကာမံက်တိုန် ကေုာံ မၞိဟ်ပရေၚ်ထတ်ယုက်ဟွံခိုဟ် နူလ္တူဂၠံၚ်ရေဝ်−ဇြပ်ဗု ကဵု ကွာန်ဇိုင်ဍုၚ်လၟိုၚ် သွက်ဂွံတိုန်ရုၚ်ဂဥုဲဗ္ဒမ်ဂဥုဲရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ