နေဗျဳတဝ်၊ အဝ်ဂတ် ၈
သွက်ကလေင်ဂွံဒက်ပတန် အရာကိစ္စ ပရေင်ဆက်ဆောံကု ကၟိန်ဍုင်အမေရိကာန်မာန်ဂးတုဲ ဂကောံပၞာန်ဗမာ လိင်လဝ်ဂကောံလဝ်ဗဳ DCI Group အကွက်မွဲသၞာံ ဒးကဵုသြန်ဒဝ်ဠာအမေရိကာန် ပိပြကောဋိကိုတ်နွံမံင်ရောင် Justice For Myanmar (JFM) ပ္ဍဲအဝ်ဂတ် (၇) ဂှ် ချူပတိတ်နင်ရ။
လိင်လဝ်ဂကောံလဝ်ဗဳ DCI Group မကြပ်မံင်ကဵု ဗော်ရဳပက်ဗလေတ်ကာန် အမေရိကာန်တံတုဲ ဂကောံဏံဂှ် ပ္ဍဲဂျူလိုင် ၃၁ ချုက်လဝ်လိက်ကဵု ဌာနဝန်ဇၞော်ပရေင်လလောင်ပရိုင် ဒပ်ပၞာန်ဗၟာတုဲ လမျီုလိက်ကသုက် စလုပ်ကၠုင်ယျဂှ် ဂွံတီရ။
ပ္ဍဲတင်နင်လိက်ကသုက်ဏံ ညးချုက်လိက် အကြာၜါလပါ်ဂှ်တှ်ေ စၞးဂကောံ DCI Group ဂှ် Justin Peterson ကဵု စၞးဂကောံပၞာန်ဗၟာဂှ် နူဌာနဝန်ဇၞော်လလောင်ပရိုင် သ္ကိုပ်ဝန်လၟိုန် ကေင်ကာအပ္ဍဲ ဥူကျဝ်ဝေန်အံင် တံ ထပက်လဝ်စၟတ်တဲ သာ်ဝွံ JFM သ္ဂးလဝ်ရ။
ပ္ဍဲတင်နင်လိက်ကသုက်ဂှ်မ္ဂး စပ်ကဵုပရေင်ကူသာန်၊ သဘာဝသယံဇာတတံကဵု ပရေင်ကဵုအရီုဗင် စပ်ကဵုပရေင်ဓဝ်ဗစာရဏာနာနာတံ သွက်ဂွံကၠောန်သ္ပရေင်တၠုင်အာမန် င္ရုဟ်မးလိင်သွက်မွဲသၞာံ သြန်ဒဝ်ဠာအမေရိကာန် ၃ ပြကောဋိကိုတ်နွံရ။
သွက်ဂကောံလဝ်ဗဳ DCI Group အလန်ပထမသ္ကုတ်ကၠာအိုတ်ဏံ ဒးသောင်ကဵုဏာသြန်င္ရုဟ်မး လိင်ဂကောံလဝ်ဗဳ ဒဝ်ဠာအမေရိကာန် မွဲပြကောဋိကိုတ်ဘာ်ဂှ် ပတိတ်ကဵုဏာသြန် ပ္ဍဲဂျူလိုင် ၃၁ ဂှ် ဒှ်မံင် တ္ရဲပၠုပ်လမျီုကဝ်မယှေန်ပၞာန် မပလီုကၠေံထောံ ဂကောံကံင်သဳပၞာန်ရဂှ် သာ်ဝွံ ချူလဝ်နွံရ။
နဒဒှ် ညးစၞးဍုင်သအာင် လိက်စၟတ်သမ္တီကေင်ကာဥပဒေနာနာ အဓိက မ္ဒးဆက်ဆောံအာကဵု DCI Group ဂှ် စုတ်လဝ် စရင်ကု ဒုသ္ကိုပ်ဝန်လၟိုန် ကေင်ကာအပ္ဍဲ ဥူမျေတ်ကျဝ် ဌာနဝန်ဇၞော်လလောင်ပရိုင်ရ။ ညးတေံဂှ်တှ်ေ ပ္ဍဲကဵုဂကောံတြးဝါဒ ဂကောံလလောင်ပရိုင်အလဵုအသဳပၞာန်ဂှ် ဒှ်မံင်ညးအုပ်ကာ မွဲတၠရောင် ဂွံတီရ။
ဌာနဝန်ဇၞော်လလောင်ပရိုင် ဂကောံပၞာန်ဗမာဂှ်တှ်ေ ဂကောံပၞာန်တံ အရာဖန်ဗဒှ်ကၠောန်ကေတ်မံင် ပရိုင်ဟွံဍာံ ပရိုင်ပတောအ် လ္တူညးဍုင်ကွာန်တံ နကဵုပရေင်လဝေင်ပၞာန်ပရေင်စိုတ်ဓါတ် မွဲဒကုတ်မွဲသကူတုဲ ညးတံဖန်ဗဒှ်ကၠောန်မံင် ပရေင်လုလောန်ၜက်ၜေတ်နာနာသာ်နွံမံင်ရောင် JFM ထံက်ထၜးလဝ်ရ။
ကလေင်ရံင်အာ ဂကောံ DCI Group ဏံမ္ဂး လောန်ကၠုင်သၞာံ ၂၀၂၀ တေံ အပိုင်အခြာကာလပထမ အယုက်ဂကောံအလဵုအသဳ ဒဝ်နေဝ်ထရတေံဂှ်တှ်ေ သွက်ဍုင်ပူအာတိုရီကို နဒဒှ်ညးစၞးသမ္မတ ခါန်ကၞက်ကဵုလဝ်တာလျိုင် ကု Justin Peterson နဒဒှ်ညးတာလျိုင် ဂကောံဘုက် စဳရေင်ပြုပြေင်ဖန်ဖက်ပရေင်နာနာကဵု ကောပ်ကာဲပရေင်ဘဏ္ဍာတံ ကေင်ဒှ်ကၠုင်လဝ်နွံရ။
တုဲပၠန် ဂကောံဏံဂှ် ပ္ဍဲသၞာံ ၂၀၀၂ တေံလေဝ် အကြာအလဵုအသဳဗမာ ဂကောံပၞာန်ကၠာကၠာတေံဂှ် လိက်ကသုက်မွဲ ကေင်နွံကၠုင်တုဲ သွက်ဂွံဇိုတ်သအး သၞိင်ဗီုရုပ်ဂကောံပၞာန်တံကဵု သွက်ဂွံပတဝ်အာကု ဂၠံင်တရဴဆဵုဂဗတက်ကျာ အရာဒက်ပတန်ပရေင်ဍုင်ကွာန်တံဂှ် သွက်ဂွံ ဟရိုဟ်ပတိုန်ဏာ ကေင်ကၠောန်ကၠုင်လဝ် ပရေင်လဝ်ဗဳကု အလဵုအသဳအမေရိကာန်တံ နွံရ။
အတိုင် လဟီု JFM ဂှ်တှ်ေ နကဵုဂကောံလဝ်ဗဳဏံ ၜိုန်ရ ဇိုတ်သအးပလေအ် သၞိင်ဗီုရုပ်ဂကောံပၞာန်ပရေအ်ပရေအ် တံဏံ တဲကလအ်တိတ်အာမာန်ကီုလေဝ် ထနှဟ်ဆီ ဒပ်ပၞာန်ဗၟာဗာန်စွံလဝ်တံဂှ် ကလေင်ဇွိတ်ဇိုတ်သပေါတ်သအးဏာ ဟွံမာန်ရောင် ပရေင်ဆက်ဆောံကဵု အမေရိကာန် ဂွံပြေပြံင်ဟီုဂှ် လ္တူလိက်ကသုက်ဏံ ပါ်ပါဲဟီုဂးလဝ်ရ။
ပရေင်ကြာန်ဓဇန်လဝ်နာနာသာ်တံ ညံင်ဂွံတိတ်ဗၠးအာ ပရေင်ကဵုဒုဟ်ဒဏ်ကေတ်အရေဝ်ကီု ဒုဟ်ဒဏ်အိုဿီု အလဵုလဵုဂွံဗၠးတိတ်အာမာန် သွက်ဂွံကဵုအရီုဗင်ဇြဟတ် ရုဲစှ်ဏာလဝ် ဂကောံ DCI Group ဂှ်လေဝ် JFM ပျုတ်ဗဒေက်စဵုစးလဝ်ရ။
ပရိုင်- သြန်လောန်တိုင်မ်
Photo – Justice For Myanmar