သဓီု၊ အံက်တဝ်ဗာ (၂၄)
ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် ဗ္ဒိုပ်ဒပ် BGF၊ ကံၚ်ဇြဳပၞာန်တံ နူကွာန်ညံၚ်တုၚ်၊ ပွိုၚ်ဍုၚ်ဘာအၚ်၊ ခရိုၚ်သဓီု တိဍာ်ထိၚ်ဒဝ် ဒပ်မဟာ (၁) ဗော်သွးကောန်ဂကူကရေၚ် KNU ဂှ်ရောၚ် လျိုၚ်ခရိုၚ်သဓီု KNU တံ ဟီုရ။
တုဲကၠုၚ် ဂိတုအံက်တဝ်ဗာ (၂၀) ဗ္တံ ၜိုတ် (၇) နာဍဳဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် ဗ္ဒိုပ်ဒပ်ပံၚ်ကောံ BGF ကေုာံ ကံင်ဇြဳပၞာန် မၞုံကွာန်ညံၚ်တုၚ်တံ သီုကဵုဒရုၚ်၊ သဵုကဵုလွဟ်လက်နက်ဇၞော်ဍောတ်တံရ။
ဟိုတ်နူဗ္ဒိုပ်ဒပ်ပံၚ်ကောံ ကံၚ်ဇြဳပၞာန် ဒးဒုၚ်ဗ္တိုက်ဂှ်တုဲ မွဲလ္ပာ်ကုမွဲလ္ပာ် ဒှ်လဝ်ပန်ပှော် လလအ်ဗၞတ် (၂၀) မိနေတ်ရ။
အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် အောန်အိုတ် (၅) တၠ ဟွံက ဇီုကပိုက်ချိုတ်မာန်ရောၚ် ဥက္ကဌ ကမ္မတဳကောပ်ကာဲ ကေၚ်ကာအဖဝ်မိတ်ခရိုၚ်သဓီု သ္ကိုပ်ဗိုလ်သဝ်ကျဝ်မျေအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ဗ္တိုက်ၜါလ္ပာ်ဏံဂှ် ဒပ်ပံၚ်ကောံ BGF၊ ကံၚ်ဇြဳပၞာန်တံ ကလေၚ်ပန်ပှော်လဝ် နကဵုလွဟ်လက်နက်ဇၞော် ၊ လွဟ်လက်နက်ဍောတ်တံကီုလေဝ် ဂကောံဒပ်ပံၚ်ကောံ KNLA ဂှ် ဇီုကပိုက်ကလိဂွံလဝ်ဝပ်တံ မွဲမွဲသာ် ဟွံမွဲတုဲ ဆုတ်ကလေၚ်လဝ် ဗွဲမအံၚ်ဇၞးမာန်ရောၚ် သ္ဂးရ။
ဗ္ဒိုပ်ဒပ်ညံၚ်တုၚ် ဒပ်ပံၚ်ကောံ BGF ၊ ကံၚ်ဇြဳပၞာန်ဂှ်ဝွံ ဒှ်ဒၟံၚ်ဒပ် ရပ်ဒက်ညးဒေသတံတုဲ ဘပဠအာတ်ဒၟံၚ်သြန်တံ မွဲဏှမွဲဏှကီု၊ သီုကဵုစကာ ကဵုဗာ်ဒၟံၚ်ဆုဒုန်တံ အတေၚ်အဓမ္မ သွက်ဂွံပလေဝ်ဗ္ဒိုပ်ပၞာန်တံရ။
ပ္ဍဲပွိုၚ်ဍုၚ်ကျာ်ထဝ် ၊ ခရိုၚ်သဓီု တိဍာ်ထိၚ်ဒဝ် ဒပ်မဟာ (၁) KNU ဂှ်လေဝ် စနူဂိတုအံက်တဝ်ဗာ (၁၄) တုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ပေါဲဗ္တိုက်ၜါလ္ပာ်တံ ဆက်သ္ကာတ်မြဟ်ဒၟံၚ်တုဲ ဟိုတ်နူပေါဲဗ္တိုက်ဏံတုဲ ညးဍုၚ်ကွာန်ဒေသ (၈၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)