မတ်မလီု၊ အံက်တဝ်ဗာ (၂၈)
နကဵုဍုၚ်သ္အာၚ်တံ သွက်ဂွံကေတ်အရေဝ်ကၟာတ်ဆိုအ် စပ်ကဵုကၠေၚ်ပရက် ကုဒပ်ပၞာန်ဗၟာ မဗ္တိုက်ဒၟံၚ် ကဵုက္ၜၚ်ကျာ လ္တူကောန်အရာပ်တံ ဟွံပိုတ်သ္ကုတ်ဂှ် ညးချဳဒရာၚ် ကတိုၚ်ကၟဟ် ပရေၚ်ဒဳမဝ်ကရေဇြဳတံ အာတ်မိက်လဝ်ရ။
ဒပ်ပၞာန်ဗၟာဝွံ လက္ကရဴဏံ သာကၠောန်သ္ပကၠုၚ် ပွမဗ္တိုက်ကဵုက္ၜၚ်ကျာတံတုဲ ဒၞါဲညးဍုၚ်ကွာန်တံ မံၚ်တန်တဴဂှ်လေဝ် ဆက်ကလိလောန်ဒၟံၚ် ပွမထောံမခတိုဟ်တံ နကဵုတၚ်ရန်တၟံနွံနွံတံဂှ်ရ ညးဍုၚ်ကွာန်ကောန်အရာပ်တံ ဒးချိုတ်ဒၟံၚ် ကဵုဂအုံဗွဝ် မဒှ်ရ။
ဟိုတ်ဂှ်ရ ပွမဂစိုတ်ဂယိုၚ်ဒၟံၚ် ကောန်အရာပ်တံ နကဵုက္ၜၚ်ကျာတံ ဂွံအောန်စှ်ေအာဂှ် နကဵုဍုၚ်သ္အာၚ်တံ သွက်ဂွံကေတ်အရေဝ်ကၟာတ်ဆိုအ်ကဵု ကၠေၚ်ပရက် ကုဍုၚ်ဗၟာ လွာဲဂှ်ဂှ် အာတ်မိက်လဝ်ရ။
သွက်ဂွံထပိုတ်ကၠေံ ကၠေၚ်ပရက် လ္တူဒပ်ပၞာန်ဗၟာမာန်ဂှ် ဂၠံၚ်ဍာန် မပလံၚ်ပ္တိုန်ဒၟံၚ် ကၠေၚ်ဍေန်အဓိက နူကဵုရုယှာ တံဂှ်လေဝ် နွံပၟိက်ဒးထပိုတ်ကၠေံကီုဂှ် ညးချဳဒရာၚ်ကတိုၚ်ကၟဟ် အခေါၚ်အရာမၞိဟ် ကေုာံ ဒဳမဝ်ကရေဇြဳတံ ဟီုရ။
“သွက်ဂွံကၟာတ်ဆိုအ်ကံၚ်ဇြဳပၞာန် နကဵုကၠေၚ်ပရက်တံဂှ် ပိုယ်တံ အာတ်မိက်ချဳဒရာၚ်ဒၟံၚ် တၟာလအ်ရ၊ ဆ္ဂး ဍုၚ်သ္အာၚ်တံဂှ် ကေတ်အရေဝ်ဟွံမာန်ဏီရ၊ ဂကောံဇြဟတ်ပၠန်ဂတးတံဂှ် က္ၜၚ်ကျာဟွံပါမ္ဂး ညံၚ်ဂွံဇၞး ဗ္တိုက်မာန်ဒၟံၚ်၊ ဒပ်ပၞာန်ဗၟာ ဗ္တိုက်ဒၟံၚ်ကဵုက္ၜၚ်ကျာရ ဒှ်ဒၟံၚ်အခက်အခုဲ၊ နကဵုဍုၚ်သ္အာၚ်တံ မၞိဟ်ချိုတ်ဒၟံၚ် တၟာဂလိုၚ်ဖိုဟ်ဂှ် ကၟာတ်ဆိုအ်ကေတ်ကဵုအရေဝ် ဗိုန်န်ဗတ်တ် ဟွံမာန်ဂှ် သ္ဇက်ဒးဂွခိုဟ်ရ၊ အေဂှ်တှ်ေ အခေါၚ်အရာမၞိဟ်၊ ပရေၚ်ဗ္စာရဏာမၞိဟ် ဍေံတံ မဟီုဂးဒၟံၚ်တံဂှ် ဒှ်ကၠုၚ်သ္ဂောံဒးကလေၚ်သၟာန်ရ” ဂှ် ညးချဳဒရာၚ် ကတိုၚ်ကၟဟ် အခေါၚ်အရာမၞိဟ် ကေုာံ ဒဳမဝ်ကရေဇြဳ ကိုဝ်တက်ဇြိုဲဝေန်တံ ထံက်ထ္ၜးဟီုဂးလဝ်ရ။
ကၠေၚ်က္ၜၚ်ကျာ ဒပ်ပၞာန်ဗၟာတံဝွံ လုပ်စိုပ်ကၠုၚ်ဒၟံၚ် နကဵုဂၠံၚ်ဍာန်နာနာ နူကဵုကြုက် ကေုာံ အိန္ဒိယတံတုဲ ပွမကေတ်အရေဝ်ကၟာတ်ဆိုအ် နူကဵုဍုၚ်သ္အာၚ်တံ နွံကၠုၚ်မ္ဂးလေဝ် နကဵုဒပ်ပၞာန် ဂၠံၚ်တရဴ ဂွံဂွံကၠေၚ်ဍေန်ဂှ် နွံဒၟံၚ်ဏီရောၚ် ညးချဳဒရာၚ်ကတိုၚ်ကၟဟ် ပရေၚ်ဍုၚ်ကွာန်မွဲတၠ ထံက်ထ္ၜးဟီုဂးလဝ်ရ။
ဟိုတ်ဂှ်ရ သွက်ဂွံကေတ်အရေဝ်ကၟာတ်ဆိုအ် ကုကမၠောန်ကၠေၚ်ဍေန် ကေုာံ သၟုဟ်ဓာတ်သဘာဝ ကံၚ်ဇြဳပၞာန်ပိုၚ်တံဂှ်ကဵု ကမၠောန်မဆက်စပ်ဒၟံၚ်တံ ဗွဲမစိုပ်တရဴမာန် ထေက်ကဵုဒးကၠောန်ၜိုတ် ပ္တိတ်ဇြဟတ်ရောၚ်ဂှ်လေဝ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်မွဲတၠ ဟီုရ။
“ ဒပ်ပၞာန်ဗၟာဂှ် ကၠေၚ်ရုယှာ ၚုဟ်တန်န်တံဂှ် ပၠောပ်ဒၟံၚ် လ္ပာ်အိန္ဒိယရ၊ အေညအ်ဂှ် ဍုၚ်သ္အာၚ်တံ သာ်လဵုဟီုဟီု ရုယှာတံ၊ အိန္ဒိယတံဂှ် ဂွံဟွံသေၚ်ပုဟ်၊ အရာမအာတ်မိက် သွက်ဂွံထပိုတ်ကၠေၚ်ဍေန်ဂှ် သွက်ကံၚ်ဇြဳပၞာန် မုမှ ဇီုကပိုက်ဟွံမာန်ပုဟ်၊ အဓိကဂှ်တှ်ေ ဒးကၠောန်သ္ပ ကၟာတ်ဆိုအ်ကုကမၠောန် ကၠေၚ်ဍေန် ကေုာံ သၟုဟ်ဓာတ်သဘာဝ ကၟိန်ဍုၚ်ဗၟာဏောၚ်၊ ကမ္ပဏဳ Asia Sun Puma Energy ဒုဝန်ဇၞော်ဥူတဇြေန် မပိုၚ်ပြဳလဝ်ဂှ်ဏောၚ်၊ မဏံရ ပ္တိုန်ဒၟံၚ် ကၠေၚ်က္ၜၚ်ကျာအဓိကရ၊ ကၟာတ်ဆိုအ်ကၠေံ ပရေၚ်ပိုန်ဒြပ် ကုမၞိဟ် မက္ဍိုက်ဒၟံၚ်က္ဍိုပ် ပ္ဍဲကမၠောန်ကၠေၚ်ဍေန် ကေုာံ သၟုဟ်ဓာတ်သဘာဝ ကၟိန်ဍုၚ်ဗမာဂှ်မ္ဂး သွဟ်မစှ်ေကဵု နတဲမွဲ မံက်ကၠုၚ်မာန်ရောၚ် ထေၚ်ကေတ်ရ” သာ်ဝွံ ညးဟီုရ။
တုဲကၠုၚ် ဂိတုအံက်တဝ်ဗာ (၁၇) တေံ အခိၚ်ကလုတ်တၟေၚ် စပ်ကဵုကၟိန်ဍုၚ်ဗၟာ သ္ကိုပ်ညးအုပ်ကာ ကုလသမဂ္ဂ မေဿနဝ်လေန်ဟေဇြာတံ မဆဵုဂဗကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ဖ္တိုက်ဖ္အောဝ်လဝ် ကံၚ်ဇြဳပၞာန်တံ သွက်ဂွံဒေါအ်ဒေၚ်ကဵု ပွမထောံမခတိုဟ် နူကဵုက္ၜၚ်ကျာကီု၊ ပွမစံၚ်ပလီုပလာ် သ္ၚိဒၟံၚ်ညးဍုၚ်ကွာန်ကောန်အရာပ်တံကဵု စမြိုၚ်သ္ဇိုၚ်တံ မပါလုပ် သီုကဵုသ္ဂောံရေၚ်တၠုၚ် ပွမဖအောန်ဖျေံ ပရေၚ်ပကီုပရာပ်တံ လွာဲဂှ်တံ ဒှ်တမ် တၚ် (၆) တၚ် မဒှ်တဴရ။
သ္အာၚ်နူဂှ်ပၠန် ပ္ဍဲကဵုတၚ်တုပ်စိုတ်အာဇြဳယာန် စပ်ကဵုပရေၚ်ကၟိန်ဍုၚ်ဗၟာ (၅) တၚ်ဂှ် ဒေါအ်ဒေၚ် ပရေၚ်ပကီုပရာပ် ပ္ဍဲကၟိန်ဍုၚ်ဗၟာတုဲ ညးမဆက်စပ်အိုဿီု ချိၚ်ဆတုဲ သွက်ဂွံရေၚ်တၠုၚ်အာအိုတ်ဂှ်ကီု၊ သွက်ဒတုဲဖဵု ညးဍုၚ်ကွာန်တံတုဲ ညံၚ်သ္ဂောံဂွံသွဟ် မၜိုဟ်လလမ်မွဲ ညးမဆက်စပ်အိုဿီု သွက်ဂွံသဳကၠဳအာ သဘဴဂွံဒှ်ကမၠောန်အိုတ်ဂှ်လေဝ် ဖ္တိုက်ဖ္အောဝ်လဝ်ကီုရ။
ဆ္ဂး ဒပ်ပၞာန်ဗၟာဂှ် မွဲတၚ်မှ ဟွံဒ္ဂေတ်ဗက်လဝ်တုဲ စွံပွန်ကုညးဍုၚ်ကွာန်ကောန်အရာပ်တံတုဲ ဆက်လုတ်လောန်ဒၟံၚ် ပွမဗ္တိုက် ကဵုက္ၜၚ်ကျာတံဖိုဟ်ရ။
ပ္ဍဲကဵုဂှ် ပ္ဍဲဂိတုသေပ်တေမ်ဗာ (၁၆) တုဲကၠုၚ်တေံဂှ် ပွမဗ္တိုက်ကဵုက္ၜၚ်ကျာ ထောံလဝ်မခတိုဟ် ပ္ဍဲဘာဗ္တောန်လိက် ဒေသဒဳပေဝ်ယေန်တေံဂှ်ကီု၊ ပ္ဍဲဂိတုအံက်တဝ်ဗာ (၂၃) ဏံ ပွမဗ္တိုက်လဝ်ကဵုက္ၜၚ်ကျာ ပ္ဍဲသ္ဘၚ်ဂဳတ ကၠောံသၞာံ ဂကောံဗၠးၜးကချေၚ် KIO တံဂှ်ဝွံ ဒှ်ပြဝဒပ်ပၞာန်ဗၟာ မဗ္တိုက်လဝ်ကဵုက္ၜၚ်ကျာ ဓဇန်အိုတ် အပ္ဍဲသၞာံဏံ မဒှ်ရ။
ပရိုၚ်−သြၚ်လောန်တိုၚ်(မ်)