မူဇြေဝ်၊ နဝ်ဝေမ်ဗာ ၂၃
သၞေဟ်ကၚ်ပယျဵု နူကဵုတိဍာ်ထိၚ်ဒက် ဂကောံရပ်လွဟ်ကောန်ဍုၚ်အရၚ် EAO ပ္ဍဲကဵုပယျဵုၜါဍုၚ်တံဂှ် ဆက်ကၟာတ်ဏာဏောၚ်ဂှ် သၞာဲဒဴဌာနဝန်ဇၞော်ပရေၚ်ဂီုကၠီုညးဍုၚ်ကွာန်ကြုက်တံ ကဵုလဝ်ကတိရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပ္ဍဲကဵုသၞေဟ်ကၚ်ပယျဵု ဍုၚ်ယှိုဲလဳ တွဵုရးယူနာန် ဍုၚ်ကြုက်ဂှ် ဟိုတ်နူပရေၚ်ဂီုကၠီုတုဲ စပ်ကဵုညးဍုၚ်ကွာန်ပယျဵုၜါဍုၚ်တံ တတ်ကၠောံအာကၠုၚ်ဂှ်တုဲ ပ္ဍဲဂိတုနဝ်ဝေမ်ဗာ ၂၁ တေံ ဂကောံဥူမျေတ်ကျာၚ် ဝန်ဇၞော်လဝက ကံၚ်ဇြဳပၞာန်ဂှ် အာစိုပ်ပ္ညဳပ္ညပ်သဳကၠဳလဝ်ရ။
သၞေဟ်ကၚ်ပယျဵု EAO တံ ထိၚ်ဒက်လဝ် ပါလုပ်သီုကဵု ဂကောံကဝ်ကတံဂှ် ကၟာတ်လဒဵုလဝ် အခေါၚ်လုပ်တိတ်တုဲ အလဵုအသဳၜါဍုၚ် ပ္ညဳပ္ညပ်တုဲမှဟေၚ် နွံပၟိက်မ္ဂး ကဵုအာအခေါၚ်ကလေၚ်ပံက်ဏောၚ်ဂှ် သ္ကိုပ်ဌာနပရေၚ်စၟဳတ်မၞိဟ်လုပ် တွဵုရးယူနာန်၊ သ္ကိုပ်ဌာနစၟဳတ်ပရေၚ်မၞိဟ်လုပ် ယှိုဲလဳ ကျာန်ပေန်ဂှ် ဟီုရ။
ညးတာလျိုၚ် ဂကောံမၚ်ရံၚ်အခေါၚ်အရာမၞိဟ်ကချေၚ်မွဲတၠဂှ် ကၟာတ်လဒဵုလဝ် ဂၠံၚ်တရဴသွံရာန်ဗၞိက်ပယျဵု ပ္ဍဲကဵုကချေၚ်ကဵု ပ္ဍဲရးသေံသ္ကုတ်သၟဝ်ကျာဂှ်ဝွံ ရံၚ်ကေတ်ပရေၚ်ဗ္စာရဏာမၞိဟ်မ္ဂး ကၠောန်သ္ပလဝ် လ္တူညးဍုၚ်ကွာန်တံ ဟွံမွဲကဵုပွမရှ်ေသှ်ေရဴဂဴတံဂှ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အလဵုအသဳကြုက်ဂှ်တှ်ေ စနူဂိတုနဝ်ဝေမ်ဗာ သၞာံ ၂၀၂၄ ဏံတုဲ ကၟာတ်လဝ် ဂၠံၚ်သွံရာန်ဗၞိက် ပ္ဍဲကဵုပယျဵုရးသေံသၟဝ်ကျာတေံကဵု ပယျဵု တွဵုရးကချေၚ်တံဂှ်ရ။ ကၠောန်ကၠုၚ်သာ်ဏံဂှ်တှ်ေ ပထုဲကၠုၚ်ညးဍုၚ်ကွာန်တံ စပ်ကဵုပရေၚ်ဗ္စာရဏာမၞိဟ်ဂှ်ရဏောၚ်။ ပါဲနူဏံတုဲ ဟွံမွဲပုဟ်။ ညးဍုၚ်ကွာန်ပိုယ်တံဂှ်တှ်ေ အကာဲအရာ ဒးဒုၚ်ဖံက်ပ္ကဝ်ဒၟံၚ်အခေါၚ်အရာမၞိဟ် နူကဵုကံၚ်ဇြဳပၞာန်တံ အရိုဟ်ဒဒှ်တ္ၚဲဂှ် ကြုက် ကၟာတ်ကၠုၚ် ဂၠံၚ်သွံရာန်ဗၞိက်တံဂှ်တှ်ေ ရံၚ်အာလ္ပာ်ပရေၚ်ဗ္စာရဏာမၞိဟ်ဍုၚ်နာနာတံဂှ်မ္ဂး ဒှ်ပွဟွံရှ်ေသှ်ေလ္တူညးဍုၚ်ကွာန်တံရဏောၚ်” သာ်ဝွံ သ္ဂးရ။
ဟိုတ်နူကၟာတ်ကၠုၚ် သၞေဟ်ကၚ်ပယျဵုတံဂှ်တုဲ ဗၞိက်စၞစသုၚ်သ္ဇိုၚ်တံ ၚုဟ်သၠုၚ်တိုန်ကၠုၚ် အကာဲအရာသာ်ဏံနွံကၠုၚ်ဂှ်ရ အကြာညးဍုၚ်ကွာန်တံ ပရေၚ်ဒးဒုၚ်ဖံက်ပ္ကဝ်အခေါၚ်အရာမၞိဟ်တံ ဒှ်ကၠုၚ်ဂှ် ဂွိၚ်ဒၟံၚ်ရောၚ် ညးဆက်ဟီုရ။
ဒုသ္ကိုပ်စၞောန်ပ္ညုၚ် ဌာနထိၚ်ဒဝ်ဒေသပယျဵု ကေုာံ ပရေၚ်ကောပ်ကာဲပရေၚ်မၞိဟ်လုပ် ဍုၚ်ကြုက်ဂှ်တှ်ေ ယဝ်ရဒေသပယျဵုညိၚ်ဝတ်မ္ဂး သၞေဟ်ကၚ်ကၟာတ်လဝ်တံ ဂွံကလေၚ်ပံက်အာ သွက်ညးဍုၚ်ကွာန်ၜါဍုၚ်တံဂှ် ရေၚ်တၠုၚ်အာဏောၚ် ဒဒှ်ရဟီုလဝ်ဂှ် ကံၚ်ဇြဳပၞာန် သ္ဂးရ။
ပရေၚ်ညိၚ်ဝတ်ဒေသပယျဵု အကြာၜါဍုၚ်ဂှ် ပံၚ်တောဲကၠောန်အာမွဲစွံတုဲ သွက်ဂွံသၠုၚ်ပ္တိုန်အသိၚ်ဂှ် အပ္ဍဲလၟေၚ်တရဴဍုၚ်ကြုက် အခိၚ်က္ဍိုပ်သ္ကိုပ်ပၞာန် ဆဵုဂဗကဵု မေဿတာ ဝါန်နေန် ညးအုပ်ကာကမ္မတဳဗော် တွဵုရးယူနာန်ဂှ် ဟီုလဝ်ရ။
ကြဴနူဌာန်ဂအုပ်ပၞာန်ရးဨသာန် ကံၚ်ဇြဳပၞာန် ဒးစှ်ေအာတုဲဂှ် သွက်ဂွံဒေါအ်ဒေၚ်ပေါဲဗ္တိုက်တံဂှ် အလဵုအသဳကြုက် ကဵုလဝ်ဇြဟတ်ဂရိုဟ် ကု MNDAA မပါလုပ် သီုကဵုဒပ်ပၞာန်ဗၠးၜးကချေၚ် KIA ကေုာံ ဒပ်တအာၚ် TNLA မပၠန်ဂတးဒၟံၚ် ကုဒပ်ပၞာန်ဗၟာတံဂှ်ရ။
ကြဴနူဂှ်တုဲ သၞေဟ်ကၚ်ပယျဵုၜါဍုၚ်သီုဖအိုတ် နူကဵုဂကောံသၟဝ်ကျာတံ မထိၚ်ဒက်လဝ်ဂမၠိုၚ် မပ္တံကဵု ချေန်ယှိုဲဟဝ်၊ လောဲဂျေဝ်တံဂှ် လ္ပာ်အလဵုအသဳကြုက် ကၟာတ်လဝ် အခေါၚ်လုပ်တိတ်အာကၠုၚ် ကေုာံ အခေါၚ်သွံရာန်ဗၞိက်တံရ။
မွဲလ္ပာ်ဂှ်ပၠန် ဇြဟတ်ဂရိုဟ်သာ်ဏံ နွံဒၟံၚ်ကီုလေဝ် ဒပ်ပၞာန်ဗၠးၜးကချေၚ် KIA ဝွံ တုဲကၠုၚ်တ္ၚဲအကြာတံဏံ သီဂွံလဝ် ဍုၚ် (ကန်ပိုင်တည်) ဒၞါဲသၞေဟ်ကၚ်သွံရာန်ဗၞိက်ပယျဵု ကြုက်−ဗၟာ တံနွံ ပ္ဍဲကဵုတွဵုရးကချေၚ်ဂှ်ရ။
ကံၚ်ဇြဳပၞာန်ဂှ်တှ်ေ နူကဵုသၞေဟ်ကၚ်ပယျဵုပံက်လဝ်တံဂှ် သ္ပဂရုကဵုပရေၚ်ဂီုကၠီုဗွဲတၟေၚ်တုဲ ညံၚ်မၞိဟ်မတာဒၞါလဝ်တံ ဟွံဂွံအခေါၚ်လုပ်တိတ် အပ္ဍဲဍုၚ်၊ မ္ၚးဍုၚ်ဂှ် သွက်ဂွံစၟဳတ်ချိုတ်တ်ပၠိုတ်တ်ဂှ် စၞောန်ပ္ညုၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ