လ္ဂုၚ်၊ အံက်တဝ်ဗာ (၂၈)
ကြဴနူဒပ်ပၞာန်သီအဝဵုတုဲ ဟိုတ်နူပဋိပက္ခ မသာသ္ကာတ်မြဟ်ကၠုၚ်တံ ကေုာံ ဒပ်ကံၚ်ဇြဳပၞာန်တံ မပ္ဍဵုပ္ဍိုက်ဒၟံၚ်တံဂှ်ရ သ္ကဵုက္တဵုဒှ်လဝ် ပရေၚ်ဆုဲပြံၚ်ဇၞော်ဇၞော် ကေုာံ အကြေပ်အဂြတ်ပရေၚ်ဗ္စာရဏာမၞိဟ်တၟိတၟိ ပ္ဍဲသ္ကုတ်ဗၟံက်သၠုၚ်ကျာ ကၟိန်ဍုၚ်ဗၟာတံဂှ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ဇာဇၞိက်အထံက်အရီု ပရေၚ်ၜိုဟ်လလမ်ကရေၚ် (KPSN) လလောၚ်ပ္တိတ်လဝ် ပ္ဍဲဂိတုအံက်တဝ်ဗာ (၂၆) ဂှ်ရ။
အတိုၚ်လိက်ဒုၚ်စဳရေၚ်ဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲသ္ကုတ်ဗၟံက်သၠုၚ်ကျာ ကၟိန်ဍုၚ်ဗၟာဂှ် လၟိဟ်ညးပါဲဒဴဘဲပၞာန် မဆုဲပြံၚ်တၟိတံဂှ် ပ္ဍဲခရိုၚ်တံၚ်ဥူဂှ် (၇၅၀၀) ပြၚ်၊ ပ္ဍဲခရိုၚ်ညံၚ်လေဝ်ပေန်ဂှ် (၆၀၀၀၀) ပြၚ်၊ ပ္ဍဲခရိုၚ်ဘာပန်ဂှ် (၉၆၀၀၀) ပြၚ်၊ ပ္ဍဲခရိုၚ်သဓီုဂှ် ဗ္ဒါဲ (၇၅၀၀၀) ၊ပ္ဍဲခရိုၚ်ဒူပလာယာဂှ် (၈၅၀၀၀) ပြၚ် ကေုာံ ပ္ဍဲရးတၞၚ်သဳဂှ် (၂၀၀၀၀) ပြၚ် အပံၚ်ဖအိုတ် စဵုကဵု (၃၄၀၀၀၀) ပြၚ် နွံလဝ်ဂှ် သ္ဂးလဝ်ရ။
သ္အာၚ်နူဂှ်ပၠန် ကြဴနူဒပ်ပၞာန်သီအဝဵုတုဲ ဂကောံမှာဇန်ကရေၚ် မဖျေံသ္ဇိုၚ်ပယျဵုဒၞက်တံဝွံ သွက်ဂွံသောၚ်ကလး တၚ်နွံပၟိက်ကာမံက်တိုန်တံဂှ် ဒုၚ်ဒါန်သြန်ဗွဝ် နူကဵုဂကောံနာနာ ကေုာံ နူကဵုညးတၠဒါန်ဍုၚ်သ္အာၚ်တံတုဲ နူစဂိတုဖေဖဝ်ဝါရဳ (၂၀၂၁) စဵုကဵု ဂိတုဂျူလာၚ် (၂၀၂၂) ဂှ် ပအပ်ကဵုလဝ် သြန်ထံက်ပၚ်ဇွောံမစၞစ အမေရိကာန်ဒဝ်ဠာ (၈.၇) မဳလျာန် ကုအပံၚ်မၞိဟ် (၃၈၈,၀၀၀) ပြၚ်မာန်ဂှ် သ္ဂးလဝ်ရ။
ကံၚ်ဇြဳပၞာန်တံ ဟိုတ်နူရပ်စပ်စကာဒၟံၚ် အရီုအဗၚ်ပရေၚ်ဗ္စာရဏာမၞိဟ်တံ နဒဒှ်လွဟ်လက်နက်တံ မပါလုပ် သီုကဵုကၟာတ်ဆိုအ်ကၠုၚ် အရီုအဗၚ်သာ်ဏံတံ၊ သ္ကဵုပြံၚ်ကၠေံ ဂၠံၚ်ဍာန်တံ ကေုာံ သီုကဵုပလီုပလာ်ကၠုၚ်တံဂှ်ရ အရီုအဗၚ် ကၠုၚ်နူအပ္ဍဲကၟိန်ဍုၚ်ဗၟာတံလေဝ် ဒးဒေါအ်ဒေၚ်အာတုဲ အရီုအဗၚ် မကၠုၚ်နူပယျဵုဒၞက်တံဏံဝွံ ပၟိက်ဇၞော်တဴ ဗွဲမလောန်ရဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဝွံရ။
ဒၟါနူပဋိပက္ခတံဏံတုဲ သၟာဗ္ၚတံ တဵုပၠောမ်သြောံသ္ၚုတံ ဟွံမာန်ရတုဲ တၚ်နွံပၟိက် သွက်ဂွံရီုဗၚ်ထံက်ပၚ်ဍာ်ဇမၠိၚ် သ္ဂောံဗပေၚ် တၚ်နွံပၟိက်စၞစတံဂှ် အခါလၟုဟ် သောၚ်ကၠးဒၟံၚ်တုဲ ပြဟ်ဟ်ဏံ ဂကောံမှာဇန်ကရေၚ်တံဝွံ သွက် (၁၂) ဂိတု မကၠုၚ်စိုပ်ဏံရဟေၚ် ဒးဆေၚ်ဒၟံၚ်မုက်ကဵု တၚ်နွံပၟိက် သြန်ဗွဝ်ထံက်ပၚ်စၞစတံ စဵုကဵု ဒဝ်ဠာအမေရိကာန် (၁၇) ပြကောဋိကိုဋ်ရောၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ဟိုတ်ဒှ်သာ်ဂှ်ရ နကဵုညးတၠဒါန်ဍုၚ်သ္အာၚ်တံ ဆဵုဂဗကဵု ဂကောံမှာဇန်ကောန်ဂကူကရေၚ်တံတုဲ ညံၚ်ညးဍုၚ်ကွာန်ဇကုတံ ဂွံဆက်မံၚ်တန်တဴအာ အပ္ဍဲဍုၚ်ဗၟာမာန် သွက်ဂွံသၠုၚ်ပ္တိုန်ကဵု အရီုအဗၚ် သ္ဂောံဗပေၚ် တၚ်နွံပၟိက်ပရေၚ်ဗ္စာရဏာမၞိဟ်ကာတၟေၚ်တံဂှ် အာတ်မိက်လဝ်ရောၚ် ဂွံတီကေတ် နူကဵုတၚ်ထ္မံက်ထ္ၜး လိက်ဒုၚ်စဳရေၚ်ဝွံရ။
ပရိုၚ်−သြၚ်လောန်တိုၚ်(မ်)