အလုံတွဵုရးဍုၚ်မန်မွဲ အပ္ဍဲကာလဒပ်ပၞာန်သီအဝဵု ပွိုၚ် (၂၂) ဂိတုဂှ် ပၟတ်ဓာတ်လလဳ ပိုတ်ပၠိုတ်ဂၠိုၚ်ကၠုၚ်

မတ်မလီု၊ နဝ်ဝေမ်ဗာ (၁၉)

အလုံတွဵုရးဍုၚ်မန်မွဲ အပ္ဍဲကာလဒပ်ပၞာန်သီအဝဵု ပွိုၚ် (၂၂) ဂိတုဂှ် ပၟတ်ဓာတ်လလဳ ပိုတ်ပၠိုတ်ဂၠိုၚ်ကၠုၚ်ဂှ်ရ ဒးဆေၚ်ဒၟံၚ်မုက်ကဵု အခက်အခုဲနာနာရောၚ် ညးဒေသတံ ကေုာံ တၠကမၠောန် SME တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပၟတ်ဓာတ်လလဳဝွံ ကြဴနူဒပ်ပၞာန်သီအဝဵုတုဲဂှ် နူကဵုတြးကၠုၚ်ပၟတ် ခြာ (၃) နာဍဳ မွဲအလန်ဂှ် ဗက်ကဵုအရာပ်၊ ကွာန်တံဂှ်တုဲ အခိၚ်လၟုဟ် ကဵုကၠုၚ်ပၟတ်ဓာတ်လလဳ ဟွံမှာန်ကၠုၚ်ရတုဲ ပၟတ်ပိုတ်ပၠိုတ် အခိၚ်လအ်လကၠုၚ်ရ။

ဒၟါနူပၟတ်ဓာတ်လလဳ ပိုတ်ပၠိုတ်ကၠုၚ် အခိၚ်လအ်လအာဂှ်ရ ပ္ဍဲကဵုကမၠောန်တံဂှ် စကာဒၟံၚ် ပၟတ်စက်တံ အဓိကတုဲ သီုကဵုဒးဆေၚ်ကၠုၚ်မုက် ကုခရိတ်အိုတ်နာနာ မက္ဍၚ်တံရဂှ် တၠကမၠောန် SME မွဲတၠ ဟီုရ။

“အရာရာအိုဿီုခက်ခုဲဒၟံၚ်တံ နွံဂှ် တၟာဂလိုၚ်ရ၊ ဒးဟီုသောၚ်ၚ်မ္ဂး ဂွံပၠောပ်ဇြဟတ်ဖုၚ်ရဂှ် အခိၚ်ဟွံပြေပြံၚ်တံ၊ လဆောဝ်လဆောဝ်တှ်ေ ကောန်ကမၠောန်တံ ဟွံဂွံပၟတ်မှာန်န်တုဲ ပၟတ်ဟွံကၠုၚ်တုဲ ဟွံဂွံဍုန်ပုၚ်သွးဂးတုဲ ဟွံဂွံစှ်ေကမၠောန်၊ ကမၠောန်လီုတံလေဝ် နွံ၊ ဒှ်ဒၟံၚ် စဵုကဵုကဆံၚ်ဏံရ၊ အခိၚ်ပၟတ်ပၠိုတ်ဂှ် ဂၠိုၚ်ကၠုၚ်ကွေံကွေံ၊ ပိုယ်တံဂှ်တှ်ေ စက်ပၟတ်နွံတုဲ သုၚ်စောဲဒၟံၚ်ကဵု ပၟတ်စက်တံရ၊ အခိၚ်ပၟတ်စက်ဟွံမွဲတံတှ်ေ ဇကုဂွံပြံၚ်ဏာ ပြံၚ်နၚ် စက်ပၟတ်ဏံ ဒၞါဲကမၠောန် (၂) ၊ (၃) ဒၞါဲတံဟီုဂှ် ဟွံပြေပြံၚ်ပုဟ်” သာ်ဝွံ သ္ဂးရ။

ဒၟါနူပၟတ်ဓာတ်လလဳ ပိုတ်ပၠိုတ်ဂၠိုၚ်ကၠုၚ်ဂှ်ရ ကမၠောန် SME ဗွဲမဂၠိုၚ် ဖအောန်ဖျေံကၠုၚ် ကမၠောန်တံအိုတ်တုဲ ကမၠောန်လ္ၚဵုတံမ္ဂးလေဝ် ဒေါအ်ဇူကၠုၚ်တံ နွံဒၟံၚ်ဂှ် သ္ဂးရ။

မွဲလ္ပာ်ပၠန်ဂှ် ပြသၞာပၟတ်ဓာတ်လလဳ ပိုတ်ပၠိုတ်တံဂှ် တုပ်ကဵုကမၠောန် SME တံကီု၊ ညးဍုၚ်ကွာန်တံလေဝ် ဒးဒုၚ်စသိုၚ်ဒၟံၚ် ဇၞော်ကဵုဇြဟတ်ရ။

“ပုၚ်ဂွံစိန် ကၠုၚ်ကဵု ၜိုတ် (၁၀) မိနေတ်၊ (၁၅) မိနေတ်မ္ဂး ၜိုတ်ဏံလေဝ် ပြေဒၟံၚ်စိုတ်ရ၊ လၟုဟ်ဂှ် ကၠုၚ်တုဲ မွဲလစုတ် ပၠိုတ်အာဟဂှ်၊ သွက်ဂွံပၠောပ်ဇြဟတ်ဖုၚ်ကီု၊ လၟုဟ်ပၟတ်ဟွံကၠုၚ်တုဲ Wi-fi ဂှ်လေဝ် ဟွံဂွံ၊ ဟွံဂွံ Wi-fi တုဲ ဒးသုၚ်စောဲကဵု လာၚ်မ္ၚးဏံတှ်ေ သၠဲထပ်အိုတ်ပၠန်၊ အတိုၚ်မွဲတ္ၚဲလေဝ် ဟွံကၠုၚ်ပုဟ်၊ မွဲတ္ၚဲဂှ် ကြပ်စိုပ်အခိၚ်တိက်တေံ ၜိုတ် (၂) နာဍဳကၠုၚ်တုဲမ္ဂး မံၚ်မွဲလစုတ် ကလေၚ်ပၠိုတ်ပၠန်၊ ပၟတ်ဂှ်တှ်ေ အရိုဟ်တ္ၚဲရ၊ ဗ္တံဗ္တံလေဝ် ဟွံဂွံတိက်ခိုဟ်ဟ်ပုဟ်၊ ဍောၚ်ၜိုတ်အိုတ်ဇိုၚ်ကၠုၚ် အတိုၚ်မွဲတ္ၚဲဂှ် တိက်မ္ဂးလေဝ် ပၟတ်ဂှ်ဟွံကၠုၚ်၊ ပၟတ်ဟွံကၠုၚ်တှ်ေ ဒးတိက်ဒၟံၚ်ကဵု ပၟတ်ပၞာၚ်တံ ဒှ်ဒၟံၚ်ဗီုပြၚ်ဏံရ” သာ်ဝွံ သ္ဂးရ။

သ္အာၚ်နူဂှ်ပၠန် ဟိုတ်နူဟွံဂွံပၟတ်လၟေၚ်ၚ်တုဲ ညးဍုၚ်ကွာန်ဒေသတံဝွံ စနူကဵုဍုန်တိုပ် အှော်၊ ချး၊ သၟုဟ်ဓာတ်တံဂှ် ဒးသုၚ်စောဲဂၠိုၚ်ကၠုၚ်တုဲ ပ္ဍဲကဵုကမၠောန်တံလေဝ် ဟွံဒေါအ်ဟွံဂွံ ရာန်စက်ပၟတ်တုဲ ဒးသုၚ်စောဲကၠုၚ်ဂှ်ရ ဒးဆေၚ်ဒၟံၚ်မုက်ကဵု ခရိတ်အိုတ်နာနာ ဇၞော်သၠုၚ်တံ ဗွဲမဇၞော်ကဵုဇြဟတ်ရ။

အကာဲအရာ ပၟတ်ဓာတ်လလဳ ပိုတ်ပၠိုတ်ဂၠိုၚ်ကၠုၚ်ဂှ် လ္ပာ်ကံၚ်ဇြဳပၞာန် ထ္မံက်ထ္ၜးဟီုဂးကၠုၚ် မွဲမွဲဂှ် ဟွံမွဲဏီရ။

ပၟတ်ဓာတ်လလဳဝွံ နူလက်ထက်အလဵုအသဳ NLD တေံဂှ် ပ္ဍဲအခိၚ်က္ညၚ်ဟေၚ် ပၟတ်ပၠိုတ်တံ နွံလဝ်ကီုလေဝ် ပ္ဍဲလက်ထက်ကံၚ်ဇြဳပၞာန်ဂှ် ညးဍုၚ်ကွာန်တံ ဒးဒုၚ်စသိုၚ်ဒၟံၚ် ဘဲဒဏ်ပၟတ်ဓာတ်လလဳ ပိုတ်ပၠိုတ်တံ ကၠိုဟ်သၞာံရ။

ပရိုၚ်−သြၚ်လောန်တိုၚ်(မ်)