ပ္ဍဲရးဒေသဇၞော်မဂွေ ကောန်အညာဂမၠိုၚ်တအ်ဂှ် တံၚ်ဂြဲကေတ်လွဟ် ဆဒှ်ကဵုဒှ်တုဲ ဒစဵုဒစးပၠန်ဂတးကၠုၚ်ဒၟံၚ်ကဵု ဂကောံဒပ်ပၞာန် စိုပ်ကၠုၚ်ပွိုၚ် ကရပ် ၂ သၞာံရ။ ဂကောံဒပ်ပၞာန် ကၠောန်သ္ပကၠုၚ် ပရေၚ်ပ္ဍဵုပ္ဍိုက် လတူညးဒေသမဂွေဂမၠိုၚ် သ္ကာတ်တ်မြဟ်ဟ်ကီု သီုကဵုစံၚ်ပလီုသ္ၚိဌာန်၊ ပရေၚ်ပွမပြိုက်ဂစိုတ် ဗွဝ်ကဵုဗွဝ် ကလိလောန်ကၠုၚ်ဒၟံၚ် အဆက်ကဵုအဆက်ရ။ ဟိုတ်ဂှ်ရ ပ္ဍဲမွဲကာလပၞာန်သီအဝဵု ပွိုၚ် ၂၂ ဂိတု ပ္ဍဲရးဒေသဇၞော် မဂွေ အကာဲအရာသာ်လဵု ဆက်နွံဒၟံၚ်ရော။ လပါ်ဂကောံပၞာန် ဗီုပြၚ်လဵု ဆက်ဍဵုဍိုက်ကၠုၚ် လတူကောန်ညးဍုၚ်ကွာန်တအ်ရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ညးတာလျိုၚ်ကဝ်မတဳ ပေါဲဗတိုက်ညးဍုၚ်ကွာန် ကိုဝ်ချေတ်ဝေန်မောၚ်ရ။
-ကၠာအိုတ်ဏံ ကြဴနူဒပ်ပၞာန်သီအဝဵုတုဲ စပ်ကဵုအကာဲအရာမက္တဵုဒှ်ဒၟံၚ် ပ္ဍဲရးဒေသဇၞော်မဂွေတုဲ ဟီုထ္ၜးကဵုညိ။
ယဝ်ရဒးဟီု အကာဲအရာက္တဵုဒှ်ဒၟံၚ် ပ္ဍဲရးမဂွေပိုဲ ပြဟ်ဟ်ဏံတှ်ေ ယဝ်ဒးဟီုအတိုၚ်ပရေၚ်ဍုၚ်ကွာန်တှ်ေ အလုံညးဍုၚ်ကွာန် နွံမံၚ်ပ္ဍဲရးမဂွေသီုဖအိုတ်ဂှ် တုပ်ကဵုညးဍုၚ်ကွာန် နွံမံၚ် အလုံမွဲကၟိန်ဍုၚ်ရ။ အခေါၚ်ဗၠးၜး စပ်ကဵုပရေၚ်ဍုၚ်ကွာန်၊ ဒှ်အကာဲအရာ ဒးဂၠုဓီုဒၟံၚ် အရာအိုဿီုရ။ အခေါၚ်ဟီုပတိတ် ဗွဲမဗၠးၜး ညးဍုၚ်ကွာန်၊ အခေါၚ်ပါ်ပါဲ အခေါၚ်အရာသ္ဇိုၚ် မပ္တမ်ဗီုဏံဂှ် ဒှ်ကၠုၚ်အကာဲအရာ ဒးလ္ၚုသ္ၚိတ်ဇြအာအိုတ်ရ။ တုဲပၠန် ပရေၚ်ကြေပ်ဂြတ် စပ်ကဵုပရေၚ်စသုၚ်မံၚ်စံၚ်ညးဍုၚ်ကွာန်တအ်လေဝ် သာတုဲ အကာဲအရာ သၠုၚ်တိုန်မံၚ်ဏီရ။ ယဝ်ရပိုဲဒးဟီု ပရေၚ်ပၞာန်တှ်ေ ပ္ဍဲရးမဂွေဂှ် စုက်လုက်မံၚ်ကဵု ရးဒေသ တွဵုရးတၞဟ် မပ္တမ်ကဵု ရးသေတ်ကိုၚ်၊ ရးမာန္တလေဝ်၊ တွဵုရးကချေၚ် ဒှ်ဒၞာဲစုက်လုက်မံၚ်ကဵုဒေသဗီုဏံရ။ ပ္ဍဲဍုၚ်ကွာန်ဒေသ နွံမံၚ်ကရပ် ခရိုၚ်ပခုက္ကူ၊ ခရိုၚ်ကဂဝ်ဂှ်တှ်ေ ဒှ်ဒေသပရေၚ်ပၞာန် သာတုဲကြံၚ်မ္ၚိုဟ် ဒးသ္ၚဳဂၠိပ်ရ။ ပ္ဍဲဒေသတအ်ဂှ်တှ်ေ ဒပ်ပ္ကီုပရာပ်ကဵု ဒပ်စဵုဒၞာညးဍုၚ်ကွာန်တအ် ပေါဲဗတိုက်ဆေၚ်မုက်၊ ပေါဲဗတိုက်ဇီုဓဗတ်တအ် ဟွံလအ်ဟွံလအ် က္တဵုဒှ်ဒၟံၚ်ရ။ ပရေၚ်ကြံၚ်မ္ၚိုဟ်နွံဒၟံၚ်ဏောၚ်ဂှ် ပိုဲဂွံတီကေတ်လဝ်ရ။ တုဲပၠန် ဂကောံပၞာန်ဂှ် လုပ်စိုပ်ကၠုၚ် ပ္ဍဲကွာန်မုဟွံဆေၚ်ဆက်မွဲသာ်တုဲ ပလီုပလာ်သ္ၚိဌာန်ညးဍုၚ်ကွာန်။ တုဲပၠန် ရပ်ဒက်ပြိုက်ဂစိုတ်။ တုဲပၠန် စံၚ်ကၠုၚ်သီုမွဲကွာန်လေဝ် ဂွံမိၚ်ဒၟံၚ်မွဲဒမြိပ်ရ။ အခိၚ်လၟုဟ်ဏံတှ်ေ ပ္ဍဲဂၠံသြိုဟ်ကောန်ညးဍုၚ်ကွာန်အညာတအ် မံၚ်ဒၟံၚ်ၜိုဟ်ဟ်သြိုဟ်ဟ်ယျဵုယျဵုလ္ဂူလ္ဂူတအ်ဂှ် ဒးတတ်ကၠောံဒၟံၚ် ဟိုတ်နူဂကောံပၞာန်စံၚ်တုဲဒးကတူက္တာန် ကတူက္တာန်နာနာရ။ ဒးဟီုစပ်ကဵုပရောပရေၚ်ပၞာန်တှ်ေ ဗီုဟီုလဝ်တုဲကၠုၚ်ဂှ်ရ ပရေၚ်ပၞာန်ကြံၚ်မ္ၚိုဟ်သ္ကာတ်မြဟ်ဂှ် နွံမံၚ်ဂၠိုၚ်အိုတ်ရ။ ဆဂး ပ္ဍဲဍုၚ်၊ဒၞာဲ ဌာန်ဒေသ၊ နွံပ္ဍဲရးမဂွေတၞဟ်သ္အာၚ်တအ်ဂှ် စပ်ကဵုပရေၚ်ပၞာန်သ္ၚိတ်ဇြဒၟံၚ်ဟာ။ ဗီုဂှ်လေဝ် ဟွံသေၚ်ပုဟ်။ ဒေသတၞဟ် ဍုၚ်တၞဟ်ကီု သီုကဵုဍုၚ်မဂွေ ဒၞာဲတၞဟ်တအ်လေဝ် တုဲတဴကဵုအကာဲအရာတုဲ သ္ဂံၚ်ပိုဲကၠောန်ဒၟံၚ် ပရေၚ်ချဳဒရာၚ် ၜိုတ်ထေက်ကြိုက်ရ။ ပ္ဍဲပရိုၚ်လေဝ် ဂွံဗှ်ဗဵုကေတ်ရ။ ဂွံတီရ။ ရးမဂွေဂှ် ဒှ်ဒၞာဲတမ်ဂကောံပၞာန်လေဝ် ဟီုဂးမာန်ရ။ ကဵုနေပျဳဒဝ်လေဝ် ဒှ်ဒေသ နွံမံၚ်ကြပ်ပ်ရ။ သေဒ ကပစတအ် နွံဂၠိုၚ်အိုတ်လေဝ် ဟီုဂွံရ။ တုဲပၠန် ပ္ဍဲရးမဂွေ သ္ဇိုၚ်ဗ္ဒပ်ကျာလေဝ်နွံမံၚ်။ ဟီုတှ်ေ ပ္ဍဲကဵုအကြာဗလးဏံဂှ် ပရေၚ်ချဳဒရာၚ်သ္ဂံၚ်ပါလုပ်ဒၟံၚ် ပ္ဍဲပၞာန်ပၠန်ဂတး ပ္ဍဲကဵုရးမဂွေဏံဂှ် နွံမံၚ် အကာဲအရာဒးရုန်ဂစာန် ဒးစွံလဝ်သတိဇၞော်ဇၞော်တုဲ ဒးဆေၚ်ဒၟံၚ်မုက် ခက်ခုဲကြေပ်ဂြတ် ဗွဲမလောန်ရ။
-ပေါဲဗတိုက်ၜါလ်ပါ် သာတုဲသ္ကာတ်မြဟ်ကၠုၚ် ပ္ဍဲရးဒေသဇၞော်မဂွေဗီုလၟုဟ်ဏံဂှ် ပ္ဍဲလတူကံၚ်ဇြဳပၞာန်ပ္တိတ်ကၠုၚ်ဇြဟတ် သွက်ဂွံကၠောန်ဗဒှ်ပေါဲရုဲဂှ် ဗီုလဵုညာတ်ကေတ်ရော။ ပ္ဍဲလတူဏံ တၚ်လစွံစိုတ် ဗီုပြၚ်လဵုနွံရော။
ယွံ။ အခိၚ်ကာလလၟုဟ်ဏံတှ်ေ ပ္ဍဲကၟိန်ဍုၚ်ပိုဲ ဒှ်ကာလ ဒးဆေၚ်မံၚ်မုက်ကဵု ဘဲဒဒိုက်ဇၞော်ကဵုဇြဟတ်ရ။ ပရေၚ်ပၞာန်သ္ကာတ်မြဟ် ကြံၚ်မ္ၚိဟ်တအ်လေဝ် နွံဒၟံၚ်ဇၟာပ်ပ်ဒၞာဲရ။ ပေါဲရုဲမာဲဟီုဂှ် ဗော်ပရေၚ်ဍုၚ်ကွာန်၊ ပူဂိုလ်ဂမၠိုၚ် ညးဍုၚ်ကွာန်နွံမံၚ်အလုံမွဲဍုၚ် ဒးစိုတ် သ္ပရှ်ေသှ်ေ ဂွံဇြဟတ် ရုဲစှ်တုဲ ဒှ်တာလျိုၚ် လၟေၚ်ကမၠောန် ဒဳမဝ်ကရေဇြဳ ညးဍုၚ်ကွာန်တအ်ကဵုကၠုၚ်မွဲဂကူရ။ ဒှ်ဂၠံၚ်တရဴ ဇက်တိုန်အာကဵု ဒဳမဝ်ကရေဇြဳရ။ ဆဂးဂှ် အရာဏံဂှ် ၜိုန်ရဟီုဂး ဂၠံၚ်တရဴဇက်တိုန်အာကဵု ဒဳမဝ်ကရေဇြဳကီုလေဝ် ပေါဲရုဲမာဲ တၠအဝဵုပၞာန်ကၠောန်ဗဒှ် နွံဒၟံၚ်လပါ်ဒစဵုဒစးဒၟံၚ်ကဵု ဒဳမဝ်ကရေဇြဳပေၚ်ၚ်ဏံဂှ် ဒှ်လၟေၚ်ကမၠောန် ဟွံဆေၚ်စပ်ကဵု ဒဳမဝ်ကရေဇြဳ လၟေၚ်ကမၠောန် ဇက်တိုန်အာကဵု ဒဳမဝ်ကရေဇြဳဟွံသေၚ်။ ဒှ်ဆၜိုတ်ပရေၚ်လီၜန် ဂကောံပၞာန်သက်က်မွဲဂကူဓဝ်ရ။ ဂကောံပၞာန်ဂှ် ညံၚ်အဝဵုဍေံတအ် ဂွံတန်ကြန်။ ဆက်တုဲ ညံၚ်ဂွံပလှ်ေညးဍုၚ်ကွာန်တအ် အတိုၚ်ပၟိက်စိုတ်။ ညံၚ်ဂွံဍဵုဍိုက်ဂှ်ရ ဒှ်ပရေၚ်ချဳဒရာၚ် သွက်ဒတုဲဖိုလ်ဍေံတအ်သက်က်ရ။ အရာဏံဂှ်တှ်ေ ညးဍုၚ်ကွာန်ပိုဲဂှ် ပရေၚ်ချဳဒရာၚ်၊ ပြဝ ဂကောံပၞာန်ဗီုပြၚ်လဵုလေဝ် ဒုၚ်တဲဟွံသေၚ်ပုဟ်။ နူကဵုအခိၚ်သီအဝဵုတုဲ စဵုကဵုအခိၚ်လၟုဟ်ဏံ ပိုဲဒစဵုဒစး လုပ်ကၠုၚ်ဒၟံၚ် ပေါဲဗတိုက်ဖိုဟ်ရ။ အရာဏံလေဝ် ဂၠးကဝ်တီ ဍုၚ်တီ ကွာန်ညာတ်ရ။ ဍုၚ်နာနာကီု သီုကဵုညးဍုၚ်ကွာန်ပိုဲလေဝ် ပေါဲရုဲမာဲတၠအဝဵုပၞာန် ကၠောန်ဗဒှ်ဏံဂှ် ညိလေဝ်ဟွံထေက်ကဵုဒုၚ်တဲရ။ ညိဓဝ်လေဝ် ဒုၚ်တဲဟွံဂွံပုဟ်။ ပရေၚ်ပါလုပ်ချဳဒရာၚ်တအ်၊ ပရေၚ်လုက်စုက်တအ် ဟွံထေက်ကဵုသ္ပပုဟ်ဂှ် ပိုဲမိက်ဂွံကဵုတီရ။ ပိုဲဂှ် ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳ ဟၟဲကဵု သၞောတ်တၠအဝဵုပၞာန် မဒှ်တၚ်ရန်တၟအ် ပရေၚ်ပၠန်ဂတးနွေဥူအတိုၚ်ဏံဂှ် သွက်ဂွံ ဆက်တုဲဇက်ဂၠောဲတိုန်အာ ဟွံစိုပ်ညံၚ်ဂွံစိုပ်ဂှ် ပိုဲမိက်ဂွံဗတိုက်ဖအောဝ်ရ။
-မွဲပၠန်ဂှ် ဂကောံပၞာန်ဂှ် သာ်လဵုဆက်တုဲကလိလောန်ကၠုၚ် ပရေၚ်ပ္ကီုပရာပ် ပ္ဍဲလတူညးဍုၚ်ကွာန် ပ္ဍဲရးဒေသဇၞော်မဂွေရော။ ဗွဲအဓိက ဗီုပြၚ်လဵုဂွံညာတ်ကေတ်ရော။
ယွံ။ ပ္ဍဲရးမဂွေဂှ် ပရေၚ်ပ္ကီုပရာပ်နွံဒၟံၚ်ရ။ ဗီုလဵုပရေၚ်ပ္ကီုပရာပ်နွံရောတှ်ေ အရာဏံ ပရောဒဒှ်ညးဂမၠိုၚ်တီလဝ်ဂှ် ယဝ်ရပိုဲ ဒးဟီုထ္ၜးဏောၚ်တှ်ေ ပ္ဍဲရးမဂွေဂှ် ကောန်ၚာ်အာယုက်ဟွံပေၚ်ဏီ ကၠောန်ဒၟံၚ်ကိစ္စပရေၚ်ပၠန်ဂတးဂးတုဲ ဂကောံဒပ်ပၞာန် ရပ်ဏာတုဲ ပရောဒဒှ် ပျဲပျာံတအ်လေဝ် နွံကၠုၚ်မံၚ်မွဲဒမြိပ်ရ။ တုဲပၠန်ဂှ် ပလီုပလာ်ကောန်ဗြဴဂစိုတ်ကၠုၚ် ညးဗြဴတအ်ကီု၊ ဂစိုတ်ကၠုၚ်ညးဇၞော်တအ်ကီု၊ ကောန်ၚာ်သၟတ်တအ်လေဝ်ဟွံသှ်ေ ဂစိုတ်ဂယိုၚ်ကၠုၚ် ဖံက်ပကဝ်ကၠုၚ်အခေါၚ်အရာမၞိဟ် ဗီုဏံဂှ်လေဝ် နွံမံၚ်ဂၠိုၚ်ဂၠေၚ်ရ။ တုဲပၠန် ပလီုပလာ် သ္ၚိဌာန်ညးဍုၚ်ကွာန်ကီု၊ တုဲတှ်ေ ကိစ္စစံၚ်ထောံအလုံကွာန်ကီု ကိစ္စတအ်ဏံလေဝ်နွံကၠုၚ်ဒၟံၚ်မွဲဒမြိပ်ရ။ ပရေၚ်ပ္ကီုပရာပ်ဗီုဏံဂှ် နွံဒၟံၚ်အဆက်က်ရ။
-စပ်ကဵုပွပ္ကီုပရာပ် ဂကောံပၞာန် ပ္ဍဲလတူညးဍုၚ်ကွာန်တအ်တုဲ ဗီုလဵုမိက်ဂွံပလန်တဲနွံကီုရော။
ပရေၚ်ပ္ကီုပရာပ်ဂှ် နဲလဵုလေဝ်ဒုၚ်တဲဟွံမာန်ပုဟ်၊ ဒှ်ကိစ္စ ညိလေဝ် ဒှ်ဟွံထေက်ရ။ လၟုဟ်ဏံတှ်ေ ညးဍုၚ်ကွာန်အညာဂမၠိုၚ်ဂှ် က္တဴက္တာန်ဒေသဇေတ်တ်၊ က္တဴက္တာန်ဂကောံဒပ်ပၞာန်တအ်ကဵုကၠုၚ် ပတမ်ဗီုဏံလေဝ်။ က္တဴက္တာန်သီုဖအိုတ် ဒှ်အခိၚ်ကာလဒးစံၚ်တူဒၟံၚ်ရ။ ဟိုတ်ဂှ်ရ ပိုဲဒးပဒေါံထောံ ပရေၚ်ပ္ကီုပရာပ်သီုဖအိုတ်ဏောၚ်။ ဂွံပဒေါံထောံ ပရေၚ်ပ္ကီုပရာပ်ဟီုဂှ်လေဝ် ပိုဲဒးသုၚ်စောဲ နဲမွဲနဲရနွံမံၚ်။ မုရောတှ်ေ ပရေၚ်ပ္ကီုပရာပ်ဏံဂှ် ဒှ်ကၠုၚ် နူသၞောတ်တၠအဝဵုပၞာန်ရ။ ဒၟာနူဂှ်ရ ပဒေါံထောံသၞောတ်တၠအဝဵုပၞာန်မာန်ဟေၚ်မှ ပရေၚ်ပ္ကီုပရာပ်ဏံ ဂွံဒေါံအာမာန်ဏောၚ်။ ဟိုတ်ဂှ်တုဲ ညံၚ်သၞောတ်တၠအဝဵုပၞာန် ဂွံအိုတ်အးအာနူကဵုကၟိန်ဍုၚ်ပိုဲမာန်ဂှ် ပါဲနူပၠန်ဂတးဆေၚ်မုက်တုဲ နဲတၞဟ်ဟၟဲရ။ သွက်ဂွံဆေၚ်မုက် ဆက်လုပ်အာပေါဲဗတိုက်ကဵုပရေၚ်ပၠန်ဂတးဂှ် ပိုဲမိက်ဂွံဗတိုက်ဖအောဝ်ရ။ တိုၚ်ပ္ကဴပရေၚ်ပၠန်ဂတးနွေဥူ ပိုဲစၟဳလဝ်ဂှ် ဟွံစိုပ်ညံၚ်ဂွံစိုပ်မာန် သွက်ဂွံဆက်ဇက်ဂၠောဲတိုန်အာဟေၚ်ရ။ မိက်ဂွံဗတိုက်ဖအောဝ်ဏာရ။
-ပ္ဍဲရးဒေသဇၞော်မဂွေ ပရေၚ်ချဳဒရာၚ် သ္ပသ္ဇိုၚ်ကဵုညးဍုၚ်ကွာန် ဂၠံၚ်တရဴရပ်လွဟ်ဟွံသေၚ်ဂှ် နွံဒၟံၚ်ဏီဟာ။ ချဳဒရာၚ်ဒၟံၚ် ဗီုပြၚ်လဵုရော။
ပ္ဍဲရးဒေသမဂွေဂှ် သ္ဂံၚ်လုပ်ဒၟံၚ်ပေါဲဗတိုက် နကဵုဂၠံၚ်တရဴရပ်လွဟ် ပၠန်ဂတးတဝ်စၞေဟ်ဒၟံၚ်လေဝ်နွံရ။ ဗီုဂှ်ကီုရ ပၞာန်တဝ်စၞေဟ်ပၠန်ဂတးဟွံသေၚ် ဗီုပြၚ်ပၞာန်ပၠန်ဂတးဟွံသေၚ် နကဵုနဲကဲတၞဟ် ဂကောံဇြဟတ်ပၠန်ဂတးပိုဲ ရုန်ဂစာန်လုပ်ဒၟံၚ်ပေါဲဗတိုက်လေဝ် နွံရ။ ဟီုတှ်ေ ဂကောံက္ဍိုက်က္ဍိုပ် ပရေၚ်ချဳဒရာၚ်ညးဍုၚ်ကွာန် ဂကောံဓမံက်ပတိုန် ပရေၚ်ချဳဒရာၚ်ညးဍုၚ်ကွာန်ဂှ် ယဝ်ရဒးဟီုတှ်ေ ကဝ်မတဳပေါဲဗတိုက်ညးဍုၚ်ကွာန် ရးမဂွေပိုဲသၟးဟွံသေၚ်ပုဟ်။ ဂကောံညးဍုၚ်ကွာန် တၞဟ်တအ်လေဝ် နွံမံၚ်ဏီရ။ ဥပမာ ကဝ်မတဳပေါဲဗတိုက်ညးဍုၚ်ကွာန် ပခုက္ကူကီု၊ ကဝ်မတဳပေါဲဗတိုက်ညးဍုၚ်ကွာန် ယျဝ်ကီု၊ ကဝ်မတဳသ္ဇိုၚ်ပေါဲဗတိုက်ညးဍုၚ်ကွာန် ပွိုၚ်ဍုၚ်မျာၚ်။ ဗီုပြၚ်ဏံလေဝ်နွံမံၚ်ရ။ ဟီုတှ်ေ ပ္ဍဲဒေသလ္ၚဵုသ္ဂံၚ်ပိုဲအုပ်ဓလီု ဗီုဟီုနူကၠာဂှ်တှ်ေ သာတုဲ ဂွံဆဵုကေတ်ပရေၚ်ချဳဒရာၚ် ဗဗေၚ်ညးဍုၚ်ကွာန်တအ်ရ။ ဆဵုလေဝ်ဂွံဆဵုကေတ်ရ။ ဆဂး ဒၞာဲတၞဟ်တအ်၊ ဍုၚ်ကွာန်တၞဟ်တအ်လေဝ် တုဲတဴကဵုအကာဲအရာတုဲ ပိုဲဇက်တိုန်ဗဗေၚ်တုဲ ရေၚ်တၠုၚ်မံၚ်လေဝ်နွံရ။ ညးဍုၚ်ကွာန်တအ်လေဝ် ပါလုပ်ပံၚ်တောဲ ပ္ဍဲကဵုပရေၚ်ချဳဒရာၚ်ပိုဲလေဝ် ဂွံညာတ်ကေတ်ရ။ ဗွဲတၟေၚ် ယဝ်ဒးဟီုတှ်ေ ပေါဲဗတိုက်ဗဗေၚ်ကော်ဘိက်လဝ် ညံၚ်ဂွံပါလုပ်ရေၚ်တၠုၚ် အလုံမွဲကၟိန်ဍုၚ်ရ။ ဗွဲတၟေၚ်တှ်ေ ဗဗေၚ်ရမျာၚ်သ္ၚိတ်တအ်၊ ပေါဲဒုၚ်သစ္စညးဍုၚ်ကွာန်တအ် ပ္ဍဲအကာဲအရာဗီုဏံဂှ် ညးဍုၚ်ကွာန် ပ္ဍဲကဵုရးမဂွေဂှ် ပံၚ်တောဲပါလုပ်ကၠုၚ် မွဲဒမြိပ် ပိုဲဂွံညာတ်ကေတ် သီုဂွံဇြဟတ်ကဵုစိုတ်ရ။ သွက်ဏံလေဝ် တၚ်ဂုဏ်သ္ပရှ်ေသှ်ေ ကဵုညးဍုၚ်ကွာန်တအ် လၟိုန်အခိၚ်ရ။ ဆက်တုဲပၠန် နွံပၟိက်ဒၟံၚ်ကဵု ဇြဟတ်ညးဍုၚ်ကွာန်တအ်၊ အထံက်အပၚ် နူညးဍုၚ်ကွာန်တအ် ဗွဲမဂၠိုၚ်ဏီရ။ ပါဲနူပရေၚ်ပၠန်ဂတးတုဲ တၞဟ်သ္အာၚ်ဟၟဲဂှ်ရ သ္ဂုတ်သွာတ် ပရေၚ်ပၠန်ဂတးဂှ်လေဝ် ဒှ်အလဵုမိမညးဍုၚ်ကွာန်တအ်ရ။ ဟိုတ်ဂှ်ရ ညးဍုၚ်ကွာန်တအ်ဂှ် ဆက်ပံၚ်တောဲ ပါလုပ်အာပ္ဍဲပရေၚ်ပၠန်ဂတးညိဂှ် ပိုဲအာတ်မိက်ဏာဗွဲတၟေၚ်ရ။
– ပ္ဍဲရးဒေသဇၞော်မဂွေ ဂွံဆဵုညာတ်ကေတ်ဒၟံၚ် ဂကောံပၞာန်ဂှ် ကလိလောန်ဒၟံၚ် ပွစံၚ်ပလီုသ္ၚိဌာန်၊ ပြိုက်ဂစိုတ်ကဵုဂကောံ ဗွဝ်ကဵုဗွဝ် အဆက်က်ရ။ ပ္ဍဲလတူဏံ တၚ်လစွံစိုတ်သာ်လဵုနွံရော။
ပ္ဍဲရးဒေသမဂွေဂှ်တှ်ေ ဂကောံပၞာန် စံၚ်ပလီုဒၟံၚ်တအ်၊ ရပ်ကော်ဂစိုတ်ဂယိုၚ်ဒၟံၚ်တအ် ကၠောန်ကၠုၚ်အဆက်က်ရ။ အကြာမွဲၜါတ္ၚဲဏံရဂှ် ဒေသ ဒးပါဲဓလေတ်ပၞာန်၊ ကွာန် ဒးပါဲပၞာန်ဂမၠိုၚ် နွံဗွဲမဂၠိုၚ်ရ။ ဒေသ ဒးပါဲဓလေဝ်ဘဲပၟတ်လေဝ် နွံဗွဲမဂၠိုၚ်ရ။ ကံၚ်ဇြဳပၞာန်ဂှ် ဂကောံဇြဟတ်သ္ပကၠုၚ် ညံၚ်ဍေံတအ် ဇြဟတ်ဂွံဍိုန်စှ်ေကီု ဒၞာဲဒစဵုဒစးပၠန်ဂတး ထ္ၜးဒၟံၚ်ဒဒှ်ဟွံဒုၚ်တဲပရေၚ်အုပ်ဓုပ်ဍေံတအ်ဂှ်ဟီုတှ်ေ သာတုဲ ပလီုပလာ်ကၠုၚ်ဂှ် ပိုဲဂွံညာတ်ကေတ်ရ။ ဟီုတှ်ေ ကၠောန်သ္ပဒၟံၚ်ကမၠောန် စံၚ်ပလီု ဂကောံဇြဟတ်ပရေၚ်ပၠန်ဂတး ရပ်ဒက်ပြိုက်ဂစိုတ် ညးဍုၚ်ကွာန်တအ်ဂှ် ပိုဲဂွံဆဵုကေတ်မံၚ်မွဲဒမြိပ်ရ။
ပိုဲဂှ် ဍဵုခ္ဍၚ် ကြံၚ်ခ္ဍၚ်ရ။ ပရေၚ်ပၠန်ဂတးဏံဂှ် ဆက်တုဲသှ်ေဂျိုၚ်အာမံၚ်ဏီရ။ ဂကောံပၞာန်ဂှ် ကၠောန်ကၠုၚ် ပွရပ်ဒက်၊ ပြိုက်ဂစိုတ်၊ စံၚ်ကၠုၚ်ပိုဲခ္ဍၚ် ပိုဲကြံၚ်တိုန်ခ္ဍၚ်ရ။တၚ်ဒုၚ်ဂိုၚ်ကေတ် ပရေၚ်ပၠန်ဂတးပိုဲလေဝ် သာတုဲသ္ကာတ်မြဟ်ကၠုၚ်ခ္ဍၚ်ရ။ ဟိုတ်ဂှ်ရ ပိုဲဂှ် နွံမံၚ်ကရောံ ညးဍုၚ်ကွာန်ပိုဲမွဲစွံရ။ ပိုဲဂှ် ဇက်ဂၠောဲအာ လအိတ်တိုၚ်ပ္ကဴပရေၚ်ပၠန်ဂတးပိုဲ ဟွံစိုပ်ညံၚ်ဂွံစိုပ်ရ။
-အလန်လကြဴအိုတ်ဏံ စပ်ကဵုအကာဲအရာက္တဵုဒှ်ဒၟံၚ် ပ္ဍဲရးဒေသဇၞော်မဂွေတုဲ မုမိက်ဂွံထပ်ဟီုဗပေၚ်နွံဏီရော။ စပ်ကဵုအကာဲအရာမဂွေတုဲတှ်ေ ပ္ဍဲကဵုရးမဂွေပိုဲ ဒုၚ်ဗတိုက် ပၠန်ဂတးဒၟံၚ်ကဵုဂကောံပၞာန်တုဲ သ္ဂံၚ်ပၠန်ဂတးလုပ်ဒၟံၚ်ပေါဲဗတိုက်ဂမၠိုၚ်ကီု၊ ဂကောံပၠန်ဂတးသီုဖအိုတ်ကီုဂှ် ပိုဲသ္ပဏာရှ်ေသှ်ေ သီုဖအိုတ်ရဂှ် မိက်ဂွံဟီုဏာရ။ ရးဒေသမဂွေပိုဲဂှ် တုပ်ညံၚ်ကဵုရးဒေသ တွဵုရးတၞဟ်သ္အာၚ်ကီုရ ပရေၚ်ပံၚ်ကောံရေၚ်သ္ကအ်တအ်၊ ပရေၚ်ပံၚ်တောဲရေၚ်တၠုၚ်တအ် သာတုဲညံၚ်ဂွံခိုၚ်ဗိုန်တိုန်အာမာန် မိက်ဂွံကဵုရေၚ်တၠုၚ်ရ။ ပိုဲလေဝ် ပတိတ်ဒၟံၚ်ဇြဟတ် သွက်ဂွံရေၚ်တၠုၚ်ရ။ တုပ်ဗီုဂှ်ကီုရ ညးဍုၚ်ကွာန် ရးဒေသမဂွေတအ်လေဝ် ညံၚ်ဂွံပါလုပ်ရီုဗၚ်ရေၚ်တၠုၚ် ကဵုဇြဟတ်ရီုဗၚ် ပ္ဍဲပရေၚ်ချဳဒရာၚ်ပရေၚ်ပၠန်ဂတးပိုဲဂှ် ပိုဲမိက်ဂွံဟီုရ။ ပိုဲကၠောန်ရေၚ်တၠုၚ်ဒၟံၚ်ဗီုပြၚ်ဏံ ပရေၚ်ပၠန်ဂတးသ္ဂံၚ်ညးဍုၚ်ကွာန် ပ္ဍဲရးမဂွေဂှ် ဒှ်သွက်ညးဍုၚ်ကွာန် ရးမဂွေသၟးဟေၚ် ဟွံသေၚ်ရ။ ဟိုတ်နူဒှ် ပရေၚ်ပၠန်ဂတးရန်တၟံညံၚ်ဂွံက္လိဂွံ ဖေတ်ဒရေဝ်ဒဳမဝ်ကရေဇြဳ အလုံမွဲဍုၚ်ဂှ်ရ သာတုဲ ညံၚ်ဂွံပါလုပ်ရေၚ်တၠုၚ်ကဵု ညံၚ်ဂွံရီုကဵု သၠးကဵု ထံက်ပၚ်ကဵု သ္ဂံၚ်အညာ သ္ဂံၚ်ပ္ဍဲရးမဂွေဂှ် ပိုဲမိက်ဂွံဟီုဏာရ။