ပေါက် – ဒဳဇြေန်ဗာ(၃)
ပ္ဍဲရးမဂွေ ပွိုၚ်ဍုၚ်ပေါက်ဂှ် ဒပ်ကံၚ်ဇြဳပၞာန် သွက်ဂွံပလေဝ် ဇုက်ဓာတ် တောဲဗစပ်လဝ်ကဵု က.ပ.စ(ရုၚ်စက်ကၠောန်ပ္တိတ်လွဟ်လက်နက်ပၞာန်) ဂှ် ဟိုတ်နူဒပ်ပရေၚ်စဵုဒၞာညးဍုၚ်ကွာန် ကြတ်ဗတိုက်လဝ်ဂှ်ရ (၅) တၠ ဒးချိုတ်အာလဝ်တုဲ ဒးလဝ်ဘဲဝပ် မွဲတၠရောၚ် ဂွံတီကေတ် နူဒပ်ပရေၚ်စဵုဒၞာ မျာၚ်ရ။
တုဲကၠုၚ် ဂိတုနဝ်ဝေမ်ဗာ စၟတ်တ္ၚဲ (၃၀) ပ္ဍဲအခိၚ်ဇိုၚ်သဝ်တ္ၚဲဂှ် ပေါဲဗတိုက်က္တဵုဒှ်လဝ်တုဲ ပ္ဍဲပွိုၚ်(၁)နာဍဳ ကောန်ဒပ်ကံၚ်ဇြဳပၞာန်(၃) တၠ ကေုာံ ပျူသဝ်ထဳ (၂)တၠ ဒးချိုတ်လဝ်တုဲ ကောန်ဒပ်ကံၚ်ဇြဳပၞာန်မွဲတၠ ဒးလဝ်ဘဲဝပ် နွံရ။
“ဗတိုက်လဝ် ကွဳစက်ဖဝ် ကံၚ်ဇြဳပၞာန် ပိဖ္ဍိုက် ဃောတိတ်ကၠုၚ် သွက်ဂွံဆက် ဇုက်ပၟတ် ပ္ဍဲပွိုၚ်ဍုၚ်ပေါက် သ္ကုတ်သၟဝ်ကျာ ပ္ဍဲခရာလ္ပာ်ဗၟံက် ကွာန်ချောၚ်ကူ ၜိုတ်တြဴဖာလုၚ်ဂှ်ရ” ဂှ် ဗိုလ်လေတ်ကျာ နူ မျာၚ်ပကဖ တံဒပ်-၁ ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
ဇုက်ပၟတ်တောဲလဝ် က.ပ. စ ၂၄ ကဵု ကျဝ် က.ပ.စ သၟဝ်တဲကံၚ်ဇြဳပၞာန်ဂှ် ဂကောံဒပ်ပရေၚ်စဵုဒၞာတအ် ခတိုဟ်မာၚ် ကုတ်ဗပိုတ်လဝ်တုဲ ကောန်ဒပ်ကံၚ်ဇြဳပၞာန် ကၠုၚ်ပလေဝ်ဇုက်ပၟတ်ဂှ် ဒးဒုၚ်ဗတိုက်လဝ်ရ။
ပရေၚ်ဗတိုက်ဂှ် မျာၚ် ပ.က.ဖ တံဒပ် – ၁၊ ဒပ်ဒမၠုက်မွေပွေ၊ ဂကောံကွာန် Local ဂမၠိုၚ်တအ် ပံၚ်တောဲကြတ်ဗတိုက်လဝ်ရောၚ် ဂွံတီကေတ်ရ။
ပ္ဍဲပွိုၚ်ဍုၚ်ပေါက် ကရောၚ်ပၞာန်ပံၚ်တောဲကံၚ်ဇြဳပၞာန် ဟိုတ်နူဂကောံဒပ်ပရေၚ်စဵုဒၞာညးဍုၚ်ကွာန်တအ် ဗတိုက်ကၠုၚ်ဒၟံၚ် ခြာဟွံလအ်ဟွံလအ်ဂှ်ရ ဒပ်ကံၚ်ဇြဳပၞာန်ဂှ် ဒးဂိလဝ်ရ။
တုဲကၠုၚ်ဂိတုနဝ်ဝေမ်ဗာ စၟတ်တ္ၚဲ (၂၆)ဂှ်လေဝ် ဂကောံဒပ်ပံၚ်တောဲ လုပ်ဗတိုက်သီကေတ်လဝ် ဗ္ဒပ်ဗၠာဲသၟိၚ်ကိုၚ်ဠေဝ်တုဲ စံၚ်ပလီုလဝ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)