ပ္ဍဲတွဵုရးဍုၚ်ကယာ ကြဴနူဒပ်ပၞာန်သီအဝဵုတုဲ ပေါဲဗတိုက် အကြာဒပ်ကံၚ်ဇြဳပၞာန်ကဵု ဒပ်ပရေၚ်စဵုဒၞာတအ် သ္ကာတ်မြဟ်ကၠုၚ်လဝ်ကီု ဟိုတ်နူပေါဲဗတိုက်တုဲ ညးဒေသဂမၠိုၚ် ၂ ကိုတ်ပြၚ် ဒးပါဲအောပ်ဒၟံၚ် ပ္ဍဲဂြိုပ်ဒဵု ကေုာံဒၞာဲဗၠးဘဲ ကြပ်ညောန်တအ်ကီုရ။ ဟိုတ်ဂှ်ရ အကာဲအရာပရေၚ်ပၞာန်ၜါလ္ပာ် သာ်လဵု ဆက်နွံဒၟံၚ်ရော။ ပရေၚ်ထိၚ်ဒဝ်ကၠုၚ်တိဍာ်မာန်ကီု သီုစပ်ကဵုအကာဲအရာ ညးဍုၚ်ကွာန် ပါဲဘဲပၞာန်တုဲ သၟာန်သွဟ်လဝ် ကေုာံခူထဳဘူ ညးနွံအခေါၚ်ဟီုဂး ကံၚ်ဇြဳကဵုကသပ်တွဵုရးကရေၚ်ဍာဲ KSCC ရ။
-ကိုပ်ကၠာအိုတ်ဏံ ပရေၚ်ပၞာန် ပ္ဍဲတွဵုရးကရေၚ်ဍာဲ အကာဲအရာဗီုလဵု ဆက်နွံဒၟံၚ်ရော။ စပ်ကဵုအကာဲအရာဏံတုဲ ဟီုထ္ၜးကဵုညိ။
တၚ်သ္ၚဳဂၠိပ်အဲဂှ်တှ်ေ ဗီုလဵုဂွံဟီုရောတှ်ေ တီလဝ်တုဲဒၟံၚ် သီုညးဖအိုတ်ရ။ ပ္ဍဲရာသဳယးတၟးဏံ နူလ္ပာ်ကံၚ်ဇြဳပၞာန် သၠုၚ်ပတိုန် ပရေၚ်ပၞာန်ဏောၚ် သ္ၚဳဂၠိပ်ကေတ်လဝ် ဗီုဏံရ။ အဓိကဂှ် သွက်ဂွံကလေၚ်ထိၚ်ဒဝ် တိဍာ်ဍေံတအ်ကီု၊ တုဲပၠန် နဒဒှ် ပရဟ်ဒုၚ်ပလေဝ်ပလေတ် သွက်ပေါဲရုဲမာဲ ၂၀၂၃ ဏံကီု ဂွံမိၚ်ကေတ်လဝ်ဗီုဏံရ။ ဗီုလဵုဍေံတအ် ပလေဝ်ပလေတ် ပလေဝ်ပလေတ်ရ။ ဂကောံဇြဟတ် ပရေၚ်ပၠန်ဂတးလ္ပာ်ဏံဂှ် ဒုၚ်ဆေၚ်ဒၟံၚ်မုက် ခိုၚ်ၚ်ဗိုန်န်ဂှ်ရ အခက်ခုဲသွက်ဍေံတအ် ဇၞော်ကဵုဇြဟတ် နွံဒၟံၚ်ရ။ နွံဒၟံၚ် ဗီုပြၚ်ဂှ်ရ။ ဇြဟတ် ပ္ဍဲဍေံတအ်ဂှ် နွံဒၟံၚ်ရ။ ပန်ရီုကဵု လွဟ်ဇၞော်ကီု၊ တုဲတှ်ေ ပရေၚ်ပန်ဖျေံ နူလတူက္ၜၚ်ကျာဂှ်လေဝ် ဗီုလဵုဒှ်ဒှ်ရ ညးရပ်လွဟ် ပရေၚ်ပၠန်ဂတးညးဒေသတအ် စဵုဒၞာကဵု အရာဏံ ဟွံမာန်ပုဟ်လေဝ်။ ဣဏံမွဲဓဝ်ရ။ အရာဏံဂှ်လေဝ် အကာဲအရာသီုဖအိုတ် အာဒၟံၚ် အတိုၚ်ဏံဏောၚ်ဟီုတှ်ေ တုဲပၠန် TARGET ဍေံတအ်လေဝ် ဒှ် PDF တအ်ဏံ၊ ဂကောံဇြဟတ်ရပ်လွဟ်ဏံရ ဗတိုက်ကၠုၚ်ဒၟံၚ် ညးဍုၚ်ကွာန်ကီု ညးရပ်လွဟ်ကီု ဟွံပါ်ပါဲတုဲ ဗတိုက်ကၠုၚ်ဒၟံၚ် အရိုဟ်ရိုဟ်တ္ၚဲဂှ်ရ ညးဍုၚ်ကွာန်ရ ဆက်တုဲဒးဒုၚ်ဂိဒၟံၚ်။ ဗီုဏံရ အဲလေဝ်ကၠိုဟ်ကေတ်ဒၟံၚ်ရ။ မုဒှ်ရောတှ်ေ လၟုဟ်ဏံ ဒေါံဇူလဝ် ပေါဲဗတိုက်ဟီုဂှ် ဒှ်အခိၚ် ရတ်သီသြောံဂှ်ရ နူကဵုလ္ပာ်ဏံလေဝ် အတိုၚ်ညးဍုၚ်ကွာန် အာတ်မိက်ကၠုၚ်လဝ်ရလေဝ်။ ညးတအ် က္လၚ်ဗက်ဒၟံၚ်။ လၟုဟ်ဟီုတှ်ေ စိုပ်ကၠုၚ် ရာသဳယးတၟးပၠန်ယျဏောၚ်တှ်ေ ပေါဲဗတိုက်တအ် သာတုဲက္တဵုဒှ်ကၠုၚ်ဏောၚ်ဂှ် ပိုဲကၠိုဟ်တီကေတ်လဝ်ရ။
-ပရေၚ်ထိၚ်ဒဝ်တိဍာ် အခိၚ်လၟုဟ်ဏံ အကာဲအရာဗီုလဵုနွံဒၟံၚ်ရော။
ပရေၚ်ထိၚ်ဒဝ်တိဍာ်လၟုဟ်ဂှ် ဒးဟီုဗီုဏံရ။ ယဝ်သၟာန်ကၠုၚ်အဲ မွဲနှေံမွဲနှေံလေဝ် သွဟ်ဗီုဏံရ။ လ္ပာ်ကံၚ်ဇြဳပၞာန်ပ္ကီုပရာပ်ဂှ် ပရေၚ်ထိၚ်ဒဝ် တိဍာ်ဍေံတအ်ဂှ် ဟၟဲရပုဟ်။ ဟၟဲရဟီုဂှ် ဍေံတအ်ဂ္ဇအ်ဒၟံၚ် ပ္ဍဲဗ္ဒပ်ဍေံတအ်တုဲတှ်ေ မံၚ်ဒၟံၚ်ရ။ ပန်ကၠုၚ်ကဵုလွဟ်ဇၞော် ကဵုက္ၜၚ်ကျာတအ်လေဝ် ဍေံတအ်ဟွံအံၚ်ဇၞးပုဟ်။ ဍေံထိၚ်လဝ်ဂှ်တှ်ေ ၜိုတ်လတူဍုၚ်ရ။ လတူဍုၚ်ဂှ်တှ်ေ လတူဍုၚ်လွိုၚ်ကဝ်ကဵု ကွာန်ကရပ်ဂှ် ပ္ဍဲတိဗလးရ ထိၚ်လဝ်မာန်ရ။ ဆဂးဂှ် ပွိုၚ်ဍုၚ်တၞဟ်တှ်ေ ပွိုၚ်ဍုၚ်ယှာ မွဲပွိုၚ်ဍုၚ်ကီု၊ လတူဍုၚ်ဖာသောၚ်ကီု၊ လတူဍုၚ်ဘဝ်လခေဝ်ကီု။ ဍုၚ်ဒဳမအ်သိုဝ် သှ်ေနူဂှ်တှ်ေ လီုလာ်အာအိုတ်ယျ။ ဒှ်ကၠုၚ်ဗီုဏံဟီုတှ်ေ သီုဖအိုတ်ဂှ် အာကၠုၚ်ချဳဒရာၚ်မာန်။ ထိၚ်ဒဝ်ကၠုၚ်တိဍာ်မာန်ရ။ နွံမံၚ်ကရောံညးဍုၚ်ကွာန်ရ။ ၜိုန်ဂှ်ကီုလေဝ် နွံမွဲဂှ် ယဝ်ရဍိုက်ပန်ကၠုၚ်ကဵု လွဟ်ဇၞော် ပန်ရီုကၠုၚ်ကဵုက္ၜၚ်ကျာတှ်ေ ညးတအ်လေဝ် ဒးကလေၚ်ဆုတ်ထောံဂှ်ရ။ ဒးပါဲဓလေတ်ဂှ်ရ ဒှ်ဒၟံၚ်ဗီုပြၚ်ဂှ်တှ်ေ ဍာံဍာံတေံ ဒပ်ပ္ကီုပရာပ်ကံၚ်ဇြဳပၞာန် ထိၚ်ဒဝ်လဝ် ဒေသကွာန်ရးမာန်ဂှ် ဟၟဲရပုဟ်။ ၜိုတ်လတူဍုၚ်ဓဝ်ရ။
-ဟိုတ်နူ ပေါဲဗတိုက်ကယာတုဲ ညးဍုၚ်ကွာန်ဒးပါဲဓလေတ်ဒၟံၚ်ပၞာန် အကာဲအရာ နွံဗီုလဵုရော။
အကာဲအရာဂှ်တှ်ေ ပရေံကၠုၚ်ဒၟံၚ်။ ဟိုတ်နူကံၚ်ဇြဳပၞာန်တုဲ ဒးဒုၚ်ဂိဂၠိုၚ်ကၠုၚ်ဒၟံၚ်ယျ။ လၟိဟ်သ္ၚိလေဝ် ဒးလီုလာ်လဝ် ကဵုလ္ၚီ ကဵုလက်တုဲ ညးဍုၚ်ကွာန်တအ်လေဝ် လၟိဟ်မၞိဟ်ကဵုကိုတ် ဒှ်ညးဒးပါဲဓလေတ်ဒၟံၚ်ပၞာန်ရ။ လၟုဟ်ဂှ်ညးဍုၚ်ကွာန် မံၚ်ဒၟံၚ်ပ္ဍဲကွာန်ရးကဵု ညးမနွံလတူဍုၚ်တအ်လေဝ် ပါဲဓလေတ်ကၠုၚ်ပၞာန်အိုတ်ယျတှ်ေ ညးဒေသသၟာကၠအ် သၟာဗ္ၚတအ်လေဝ် တဵုလွဳ စသုၚ်ကၠုၚ်မာန် ဟၟဲရ။ တုဲပၠန် သၞာံဏံလေဝ် ဟိုတ်နူဟွံဂွံတဵုလွဳ ခိုဟ်ဟ်ဂှ်ရ ဗ္ၜတ်တိတ်လေဝ် ဟွံခိုဟ်။ ဒဵုကဵုသၞာံဏံ မညးတအ် ပကောံပကေဝ်လဝ်ဂှ် ဗ္ဒဗ္ဒာဲစဂွံကီုလေဝ် သွက်သၞာံဂတဏံဂှ် ဗီုလဵုလေဝ် ပြေပြံၚ်ကၠုၚ်ဟွံသေၚ်ရ။ လၟုဟ်ဏံလေဝ် နူကဵုဍုၚ်သ္အာၚ် ပရေၚ်ရီုဗၚ်ရေၚ်သ္ကအ် နွံမံၚ်ကီု။ ရီုဗၚ်ဒၟံၚ်ညးသ္ကအ် ဂတးဂတန်ကီုတုဲ ဃောဒးဗ္ဒာဲဒလာဲဒၟံၚ်ဏီဖိုဟ်ဂှ်ရ ၜိုတ်လဵုဒုၚ်ဒဝ်မာန်ရောဂှ် ဟွံတီရ။ ဟီုဟွံမာန်ရ။ ဆဂးဂှ် ယဝ်ရ ဆက်ဒှ်အာ အတိုၚ်ဏံတှ်ေ ပရေၚ်ဂီုကၠီုဂှ် အောန်စှ်ေကၠုၚ်ဏော။ နွံၚ်ကၠုၚ်ပၟိက်ဏောၚ်။ နူကဵုလၟုဟ်ဂှ် စတမ်နူ သၞောတ်ပရေၚ်ထတ်ယိုတ် လီုလာ်ကၠုၚ်ဒၟံၚ်ယျ။ CDM ဂမၠိုၚ် ၜိုတ်သ္ပမာန် ပါလုပ်ရီုဗၚ်ထ္ၜလဘာ်ဒၟံၚ်။ ဒက်ပ္တန်ကဵုဒၟံၚ်ရ။ ပရေၚ်ထတ်ယိုတ်၊ ပရေၚ်ပညာ ၜိုန်ရဒှ်ကီုလေဝ် အရာသီုဖအိုတ်ဂှ် ဒးဒုၚ်ပလီုဒၟံၚ် ဟွံလအ်ဟွံလအ်တုဲ ဒးဆုဲပြံၚ်ဒၟံၚ်ဂှ်ရ အရာဏံဂှ် သွက်ညးတအ် ဂွံစသုၚ်ဂှ်လေဝ် ဒးစဳရေၚ်ကဵုတုဲ အခက်ခုဲ သာနွံကၠုၚ်ရ။ အဲ ဟီုစမာန်ဒၟံၚ်ရလေဝ်။
-လ္ပာ်ကံၚ်ဇြဳပၞာန် ယဝ်ရဟီုကၠုၚ် ပရေၚ်ပ္ညဳပ္ညပ်တှ်ေရော ပရေၚ်သဳကၠဳ ပ္ဍဲတွဵုရးဍုၚ်ကယာ နွံကၠုၚ်မာန်ဟာ။
လၟုဟ်ပြဟ်ဟ်ဏံတှ်ေ ဟီုကၠုၚ် သွက်ဂွံဆဵုဂဗသဳကၠဳဂှ် မိၚ်ဂှ် ပိုဲဟွံမိၚ်လဝ်ဏီရ။ ဟီုဟွံမာန်ရ။ ပရေၚ်ခက်ခုဲ နွံဒၟံၚ်သီုညးဖအိုတ်ဂှ်ရ ဒုၚ်ခဳ ပ္ဍဲလတူအခက်ခုဲဏံဟွံမာန်ပုဟ်ဂှ် ဟီုဟွံမာန်ဂှ်ရ ဆဂး အဲကၠိုဟ်ကေတ်လဝ်ဂှ် ဂကောံဂှ်လေဝ် ဂၠိုၚ်ဒၟံၚ်ဏောၚ်။ မွဲမွဲဂကောံတှ်ေ ဟီုဟွံမာန်ပုဟ်။ ဆဂးဂှ် ၜိုတ်ဂွံတီကေတ်လဝ်ဂှ်တှ်ေ ပ္ဍဲကဵုဂကောံရပ်လွဟ်ဂှ် ပြဟ်ဟ်ဏံ PDF တအ်ရ။ လတူနူPDF ဂှ်ပၠန် KNDF တအ်၊ ဒပ်ပၞာန်ကရေၚ်ဍာဲတအ်ဂှ် ဟီုကၠုၚ်ဟွံသေၚ်ရ။ ဂကောံသှ်ေနူဂှ်တအ်လေဝ် ဟီုဟာ၊ ဟွံဟီုဟာဂှ် သ္ပစၞးတုဲ ပိုဲဟီုဟွံမာန်ရ။ ဆဂးဂှ် အဲကၠိုဟ်ကေတ်မံၚ်ရ။ ဂကောံမဟာမိတ်ပံၚ်တောဲရေၚ်တၠုၚ်ဒၟံၚ် ပ္ဍဲဂကောံရပ်လွဟ်ဂှ် ဗီုလဵုမှ သွက်ဂွံဆဵုဂဗသဳကၠဳကဵု ကံၚ်ဇြဳပၞာန်ဏံ ဂကောံသ္ပစၞးကဵု ညးဍုၚ်ကွာန်တအ်ဂှ် ညးတအ်ဟီုဟွံသေၚ်ပုဟ် ထေၚ်ကေတ်ရ။ ဒးဂိလဝ် ဂၠိုၚ်လောန်အာယျ။ အလဵုကောန်ညးဍုၚ်ကွာန်ပိုဲလေဝ် ပၟိက်ဆန္ဒဟၟဲရ။ နကဵုအဲတှ်ေ ကၠိုဟ်ကေတ်ဒၟံၚ်ရ။ အဲလေဝ် အခိၚ်ဆဵုဂဗကဵု ညးစၞးကောန်ညးဍုၚ်ကွာန်ဂှ် အရေဝ်ညးတအ် သွက်ဂွံဒးဟီု ဟၟဲရပုဟ်။ သွက်ညးတအ်ဂွံမံၚ်၊ စံၚ်လေဝ် ဟၟဲရ။ ကလေၚ်စဴဏောၚ်ဟီုလေဝ် သ္ၚိအရၚ်ဂွံကလေၚ်စဴဂှ် ဟၟဲရ။ လီုလာ်အာ ဟွံအောန်ရပုဟ်လေဝ်။ တုဲပၠန် မိမ၊ ကောဒေံ၊ ကောန်ဇာတ်တအ် ချိုတ်အာအိုတ်ယျတှ်ေ အတိုၚ်မၞိဟ်ဆဵုဂဗဒၟံၚ်ကဵုအဲ လ္ၚဵုဂှ်တှ်ေ အစဳဇန် သွက်ဂွံဟီုဂးကဵု ဂကောံသ္ပစၞးညးဍုၚ်ကွာန်ဂှ် ဟၟဲရဂှ် အဲကၠိုဟ်ကေတ်လဝ်ဗီုဏံရ။
-ပ္ဍဲလတူဏံ ဗီုလဵုညာတ်ကေတ်ရော။ အလန်လကြဴအိုတ်ဏံ စပ်ကဵုတွဵုရးဍုၚ်ကယာတုဲ မုမိက်ဂွံထပ်ဟီုဗပေၚ် နွံမံၚ်ဏီရော။
ယွံ။ ပေါဲအံၚ်ဇၞးဂတတေံ ညံၚ်ဂွံချိုတ်ပၠိုတ်ဂှ် ဒးကၠောန်ဏောၚ်။ ဟွံအံၚ်ဇၞး ဟွံဂွံပုဟ်။ နွံမွဲဂကူဂှ် ညံၚ်ဂွံဒုၚ်ကေတ် ပေါဲအံၚ်ဇၞးဏံမာန်၊ ညံၚ်ပိုဲဂွံလောန်ၜက်အာမာန်၊ ညံၚ်ကံၚ်ဇြဳပၞာန် ဂွံခရိုဟ်စှ်ေမာန်ဟီုဂှ် ကောန်ညးဍုၚ်ကွာန်ပိုဲသီုဖအိုတ် ဒးနွံကဵု ပရေၚ်ညဳသာဏောၚ်။ ဂကောံရပ်လွဟ်တအ် ဒးလုပ်အာပေါဲဗတိုက် ညဳညဳသာသာဏောၚ်။ ဂကောံဗော်သီုဖအိုတ်၊ ဂကောံရပ်လွဟ်သီုဖအိုတ်၊ ညးဍုၚ်ကွာန်သီုဖအိုတ်ဂှ် လုပ်အာပေါဲဗတိုက် အတိုၚ်ရန်တၟံတိုၚ်ပ္ကဴ ကောံကောံကလောံကလောံဏောၚ်တှ်ေ ပ္ဍဲသၟဝ်အသံပၟိၚ်မွဲ၊ ပ္ဍဲသၟဝ်တၚ်ရန်တၟအ်မွဲ ယဝ်ရပိုဲဘိုၚ်အာဏောၚ်တှ်ေ ဂွံပေါဲအံၚ်ဇၞးမာန်ဏောၚ် အဲပတှ်ေကေတ်လဝ်ရ။ ဆဂး ဒကးကးပရးပရး ဂၠံၚ်ညးကဵုညး ဗက်ကၠောန် ဗက်သ္ပဒၟံၚ်ဏောၚ်တှ်ေ ပရေၚ်ပၠန်ဂတးပိုဲ အဓါန်ဂၠိၚ်သ္ၚောဲမံၚ်ဏီရ။ ဒးဍောၚ်ၜိုတ်ဏောၚ်။ ဍောၚ်ၜိုတ်ကၠုၚ်တှ်ေ ဇိုၚ်တဲဇြိုၚ်၊ စိုတ်ဓာတ်စှ်ေ၊ ဒှ်ကၠုၚ်ဗီုဂှ်မာန်မံၚ်ရ။ ပ္ဍဲလတူဏံဂှ် ညံၚ်ဂွံဒှ်ကၠုၚ်ဗီုပြၚ်ဏံလေဝ် နူလပါ်ကံၚ်ဇြဳပၞာန် ကၠောန်သ္ပကၠုၚ်တွဵုရ။ အရာဏံလေဝ် အဲမိက်ဂွံဟီုထ္ၜးကဵုကီုရ။