ပဠဝ်၊ ဒဳဇြေမ်ဗာ (၃)
ကောန်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ထမေန်မသာ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳတံ ဟိုတ်နူဒးဒုၚ်ဗ္တိုက်ဂှ်ရ ချိုတ်အာ (၇) တၠဂှ် ညးမကြပ်ကဵု ဂကောံဒပ်စဵုဒၞါညးဍုၚ်ကွာန်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ (၁) တုဲကၠုၚ်လဒေါဝ်တ္ၚဲ ၜိုတ် (၁၂) နာဍဳဂှ် သီုတမ်ဒပ်(၁) ခရိုၚ်ဗိက် သီုဂကောံဒပ်ပံၚ်ကောံစဵုဒၞါဒေသတံ လုပ်ဗ္တိုက်လဝ် ပ္ဍဲဒၞါဲကံၚ်ဇြဳပၞာန်ကဵု ကောန်ဂကောံဗျူသဝ်ထဳ ဇြဟတ်ဗၞတ် (၂၀) တၠ မဖျေံလဝ်ဒပ်ဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ် (၅) နာဍဳတုဲ လ္ပာ်ဒပ်ကံၚ်ဇြဳပၞာန် ကြဴနူဒးဂိတုဲ ဆုတ်ကလေၚ်ဂြိပ်တိတ်အာလဝ်ဂှ် ဂွံတီကေတ်ရ။
အပ္ဍဲပေါဲဗ္တိုက်တံဂှ် ကောန်ဒပ်ကံၚ်ဇြဳပၞာန် (၇) တၠ ချိုတ်တုဲ (၄) တၠ ကလိဂွံလဝ်ဝပ်ဂှ် ညးမစုက်လုက်ကဵု ဂကောံဒပ်စဵုဒၞါညးဍုၚ်ကွာန်ဒေသမွဲတၠ ဟီုရ။
ကြဴနူပေါဲဗ္တိုက်တုဲဂှ် လ္ပာ်ဂကောံဒပ်စဵုဒၞါညးဍုၚ်ကွာန်တံ အခိၚ်ၚးတးဒၟံၚ်တိဍာ်ဂှ် ဂွံဆဵုကေတ်လဝ် ဇွကောန်ဒပ်ကံၚ်ဇြဳပၞာန်မွဲတၠ ကေုာံ သေနာတ် (၁) ဇကိုအ်၊ ဖျေဲလွဟ် (၅) ဂှ်ရ ဇွဂှ် စံၚ်ကဵုလဝ်တုဲ လွဟ်လက်နက်တံဂှ် သီဂိုၚ်ကၠုၚ်လဝ်ဂှ် ဂွံတီကေတ်ရ။
ပ္ဍဲပွိုၚ်ဍုၚ်ပဠဝ်ဂှ် ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်ဒေသတံဂှ် ပေါဲဗ္တိုက်တံ က္တဵုဒှ်လဝ် မွဲဏှမွဲဏှဂှ်ရ သီုၜါလ္ပာ် ဒးဝပ်ဇီုကပိုက်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)