ဒဳမအ်သိုဝ် – ဒဳဇြေန်ဗာ(၄)
တွဵုရးဍုၚ်ကယာ ပ္ဍဲပွိုၚ်ဍုၚ်ဒဳမအ်သိုဝ် ကွာန်ကုမ်တာ ကဵုကွာန်တေသူဠေဝ်ဂှ် ဂကောံ ဒပ်ပံၚ်ကောံဒပ်စဵုဒၞာညးဍုၚ်ကွာန်တအ် ကလေၚ်သီကေတ်လဝ် နူကံၚ်ဇြဳပၞာန်မာန်ကၠုၚ်လဝ်ရဂှ် ဒပ်ပံၚ်ကောံ ပရေၚ်ပၠန်ဂတးကရေၚ်ဍာဲ KRU ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တုဲကၠုၚ် ဂိတုနဝ်ဝေမ်ဗာ ပ္ဍဲစၟတ်တ္ၚဲ(၃၀) ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲကွာန်တေသူဠေဝ်ဂှ် PDF ဒဳမအ်သိုဝ်ကီု သီုကဵု ဒပ်ပံၚ်ကောံ KNDF ကေုာံ KAတအ် ပံၚ်တောဲ ဗတိုက်ကၠုၚ်လဝ်တုဲ ဒပ်ကံၚ်ဇြဳပၞာန် ဒးဆုတ်တိတ်အာလဝ် နူကွာန်ဂှ်ရ။
ကွာန်တေသူဠေဝ် စှ်ေအာတုဲဂှ် ကောန်ဒပ်ကံၚ်ဇြဳပၞာန် ၝောံဒပ်(၆၆) မဖျေံလဝ်ဗ္ဒပ်ပ္ဍဲကွာန် ကုမ်တာ ပ္ဍဲလပါ်ပလိုတ်ပွိုၚ်ဍုၚ်ဒဳမအ်သိုဝ် စတမ်နူဂိတုမာတ်ချ်မံက် ဂှ် KRU၊ KZG ကေုာံ KA တအ် ပံၚ်တောဲဗတိုက်လဝ်တုဲ ဒးဆုတ်တိတ်အာလဝ် နူကွာန်ဂှ်ရောၚ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန် ဒးတိတ်အာလဝ် နူဒၞာဲဖျေံလဝ်သ္ဇိုၚ်ဗ္ဒပ်တုဲ စဵုကဵုဂိတုဒဳဇြေန်ဗာ စၟတ်တ္ၚဲ(၃) ပယာံနူဂယးဏံ ပန်ကၠုၚ်ဒၟံၚ် နကဵုလွဟ်ဇၞော် အဆက်က်ရဂှ် ညးတာလျိုၚ်လလောၚ်ပရိုၚ် KRU ဟီုသ္ဂးလဝ်ရ။
“တ္ၚဲတၞေံတေံတှ်ေ ပန်မံၚ်ကွေံကွေံရ။ တ္ၚဲတၞေံတေံဟီုတှ်ေ ပန်ဒၟံၚ်ကုမ်တာသၟးဂှ် ၜိုတ် ၁၅ ၊ ၂၀ မ နွံဏောၚ်။ တ္ၚဲဏံအခိၚ်နူဂယး ၜိုတ် ၅ နာဍဳဂှ် ပန်ဒၟံၚ်ကဵု ကမ်လှောဝ်တောဲ အဆက်အဆက်ရ။ နူဂယးဏံဂှ် ပန်ဒၟံၚ်ကွေံကွေံ ဟဂှ်ရ။ လၟုဟ်ဏံ ပိုဲဂွံလဝ်တိဍာ်ဏံရ။ တိဍာ်ဏံ ထိၚ်ဒဝ်လဝ် လအ်လအ်ဟွံသေၚ်ပုဟ်။ ထိၚ်လဝ်ဂွံဏောၚ်ဂှ်လေဝ် ဟွံထေၚ်ပုဟ်။ မုဒှ်ရောတှ်ေ မွဲအခိၚ်ဟွံသေၚ်တှ်ေ မွဲအခိၚ် ယဝ်ရဍေံတအ် ထ္ပက်ကၠုၚ်ကရောၚ်ပၞာန်တှ်ေ ဇြဟတ်ဟွံကြိုက်တုဲ ပိုဲဒးကလေၚ်ကဵုဏာပၠန်ရ” ဂှ် ညးတာလျိုၚ်လလောၚ်ပရိုၚ် KRU ကိုဝ်လေန်လေန် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် တိဍာ် ဒပ်ပရေၚ်စဵုဒၞာတအ် သီဂွံလဝ်ဂှ် ညံၚ်ဟွံဂွံကလေၚ်စိုပ်အာ သၟဝ်တဲကံၚ်ဇြဳပၞာန်ဂှ် ပ္တိတ်မံၚ်ဇြဟတ်ကီု သွက်ပရေၚ်ဂီုကၠီု ကောန်ကွာန်တအ်ဟၟဲတုဲ ညံၚ်ဟွံဂွံက္လေၚ်စဴကၠုၚ်သ္ၚိဌာန်ဇကုဂှ် တာဒၞာလဝ်ရဂှ် ညးကလေၚ်ဟီုလဝ်ရ။
သ္ၚိညးဍုၚ်ကွာန် ဇိုၚ်ကရပ်ဘာဗ္တောန်လိက်ကဵု ဘာလေံကျာ် ကုမ်တာ ဒၞာဲဒပ်ကံၚ်ဇြဳပၞာန်ဖျေံလဝ်ဗ္ဒပ် ပွိုၚ်(၆)ဂိတုပြၚ်ဂှ် ပလီုပလာ်လဝ်ကီု သ္ၚိဌာန်လၟိဟ်ၜိုတ် (၁၃၀) ဂှ်လေဝ် ဒးဒုၚ်စံၚ်ပလီုလဝ်ရောၚ် ဂွံတီကေတ်ရ။
ပ္ဍဲပေါဲဗတိုက် ဒပ်ပရေၚ်စဵုဒၞာကေုာံ ကံၚ်ဇြဳပၞာန်ဂှ် ၜိုန်ရ ဗ္ဒပ်ဒပ်ကံၚ်ဇြဳပၞာန် ပ္ဍဲဒဝ်ၚာန်ခါ၊ ဒပ်ကံၚ်ဇြဳပၞာန် ဖျေံသ္ဇိုၚ်မိုဝ်ဗျာ၊ ဒဳမအ်သိုဝ်ၚိုဲတောၚ် ကေုာံ ဖျေံသ္ဇိုၚ်လွိုၚ်ကဝ်တအ် ပန်ရီုကဵုကၠုၚ်လဝ်ကီုလေဝ် သ္ဂံၚ်လ္ပာ် KRU ဂှ် ဇီုကပိုက်ဒးလဝ် ဟၟဲရောၚ် ဂွံတီကေတ်ရ။
သီကေတ်ဂွံလဝ် မကမ် (၃၀)၊ ရိုက်သ္ၚု၊ ဗုမ်ဂရောပ် ကေုာံ ပိုဝ်ယာမ် သုၚ်စောဲပ္ဍဲအခိၚ်ပန်လွဟ်ဇၞော် နူဒပ်ကံၚ်ဇြဳပၞာန် ဆုတ်တိတ်အာလဝ် နူကွာန်ၜါကွာန်ဂှ်ရ ဂှ် KRU ဟီုသ္ဂးလဝ်ရ။
ပ္ဍဲတွဵုရးဍုၚ်ကယာ ဟိုတ်နူပေါဲဗတိုက် အကြာဒပ်ပရေၚ်စဵုဒၞာ ကေုာံဒပ်ကံၚ်ဇြဳပၞာန်တုဲ ကောန်ညးဒေသဂမၠိုၚ် (၂)ကိုတ်တၠပြၚ် ဒးဂြိပ်ဒဴဒၟံၚ် ပ္ဍဲဒၞာဲဗၠးဘဲတုဲ တၚ်နွံပၟိက် ပရေၚ်ထတ်ယိုတ် ကေုာံဇွောံမစၞစ သွက်ညးတအ် နွံဒၟံၚ်ရောၚ်ဂှ် ဂွံတီကေတ်လဝ်ရ။
ပရိုၚ် – သြၚ်လောန်တိုၚ်