ဂျာကာတာ – ဒဳဇြေန်ဗာ(၄)
ပါလဳမာန်အေန်ဒေါနဳယှာဂှ် သွက်ဂွံသ္ပအာဒ္တန် သၞောဝ်ဥပဒေလၟေတ်တၟိ မဖျေံအာဒုဟ်ဒဏ် ပွမဆက်ဆောံလိၚ် မ္ၚးနူထပ်လဝ်တဲ ထံၚ်စဵုကဵုပွိုၚ်မွဲသၞာံမာန် ကၠောန်သ္ပရေၚ်တၠုၚ်ဒၟံၚ်ရောၚ်ဂှ် ညးနွံတာလျိုၚ်ဂမၠိုၚ် ဟီုသ္ဂးလဝ်ရ။
ပ္ဍဲသၞောဝ်ဥပဒေတၟိဂှ် ပွမပျုတ်ဗ္ဒေက် သမ္မတ ဟွံသေၚ်မ္ဂး ဂကောံကၟိန်ဍုၚ် စဵုဒၞာအာဒှ်တုဲ ပွမထ္ၜးဓမံက်ပ္တိတ် ပ္ဍဲလပါ်မ္ၚး မဒစဵုဒစးကဵု တၚ်စၞောန်ကၟိန်ဍုၚ်အေန်ဒေါနဳယျာဂှ် တာဒၞာအာကီု သီုအခေါၚ် မံၚ်စံၚ်မွဲစွံ ကၠာဟွံဂွံထပ်တဲဂှ်လေဝ် ကၟာတ်လဒဵုအာရောၚ် ဂွံတီကေတ်ရ။
သၞောဝ်ဥပဒေလၟေတ်ရာဇဝတ်တၟိ ပလေဝ်ကၠုၚ်လဝ် ဂၠိုၚ်ကဵုဗွဝ်စှ်သၞာံဂှ် ပ္ဍဲဂိတုဒဳဇြေန်ဗာ စၟတ်တ္ၚဲ(၁၅)ဏံမ္ဂး သ္ပဒ္တန်မာန်ကၠုၚ်ရောၚ်ဂှ် လစှ်ေဝန်ဇၞော် ပရေၚ်သၞောဝ်ဓဝ် အေန်ဒေါနဳယှာ ဟီုကဵုဌာန်ပရိုၚ် ရိုက်တာရ။
“ဒၟာနူ ကုဒ်ရာဇဝတ် ကိတ်ညဳကဵု ၚုဟ်မးအစာံအေန်ဒေါနဳယှာ နွံဒၟံၚ်မွဲတုဲ ကေတ်ဒၟံၚ်ဂုဏ်စရာဲရ” ဂှ် လစှ်ေဝန်ဇၞော် ပရေၚ်သၞောဝ်ဓဝ် အေန်ဒေါနဳယှာ ဟီုလဝ် ပ္ဍဲအေန်တာဗျူ မွဲဒၞာဲရ။
မူအပြောံဂှ် ပ္ဍဲသၞာံ ၁၉၉၈ က္ဍိုပ်သ္ကိုပ်တၠအဝဵု ဇြူဟာတိုဝ် ပြဟ်လလုဲအာတုဲ ဒစဵုဒစးဒၟံၚ်ကဵု ပရေၚ်ပြံၚ်သၠာဲ လေဝ်ဗရေယ် မသ္ပလဝ်ဒ္တန်ဂှ်ရောၚ်ဂးတုဲ ၜိုန်ရညးဒစဵုဒစးဂမၠိုၚ် ဟီုဂးကယျာန်ဓဝါတ်ဒၟံၚ်ကီုလေဝ် ကၟိန်ဍုၚ် ကောန်သာဗေတေတ်ဝါဒဳ မဂဵုလဟဵုဒၟံၚ်ဂှ် က္လိဂွံလဝ် ပရေၚ်ထံက်ဂလာန် နူဂကောံအေဿလာမ္မေတ်လ္ၚဵုဂှ်ရ။
ပ္ဍဲသၞာံ ၂၀၁၉ လောန်ကၠုၚ်တုဲတေံ သွက်ဂွံသ္ပဒ္တန် မူအပြောံတြေံဂှ် ၜိုန်ရစၟတ်သမ္တီလဝ်ကီုလေဝ် မၞိဟ်ဂၠိုၚ်ကဵုလ္ၚီ ထ္ၜးကၠုၚ်လဝ်ဆန္ဒ ကၠောန်ကၠုၚ်လဝ် ပရေၚ်ဒစဵုဒစး အလုံမွဲကၟိန်ဍုၚ်ရဂှ် ဂွံတီကေတ်လဝ်ရ။
အလဵုအသဳဂှ် သွက်ဂွံကဵုတၚ်ဂၞၚ်ပရိုၚ် စပ်ကဵုပရေၚ်ပြံၚ်သၠာဲတုဲ ၜိုန်ရကၠောန်ကၠုၚ်လဝ် ပရေၚ်ပ္ညဳပ္ညပ် က္သပ်ညးဍုၚ်ကွာန် အလုံကၟိန်ဍုၚ်ကီုလေဝ် ကၠောန်ကၠုၚ် ပရေၚ်ပြံၚ်သၠာဲ သၞောဝ်ဥပဒေ ဆၜိုတ်ညိည ဇြိုၚ်သာဟေၚ်ရဂှ် ညးပါ်ပါဲဂမၠိုၚ် ထံက်ထ္ၜးကၠုၚ်လဝ်ရ။
ပ္ဍဲပရေၚ် ပြုပြေၚ်ပြံၚ်သၠာဲလ္ၚဵုတအ်ဂှ် စဵုကဵုပွိုၚ်(၁၀) သၞာံ ဒ္ဂေတ်စရိုတ်ခိုဟ်ပြဲကၠုၚ်တုဲ တၚ်ပြဌာန် ဒဏ်ဂစိုတ်ဂှ် ယှအ်ဖျေံကဵု ဒဏ်ထံၚ်မွဲအာယုက်မာန်လေဝ် ပါလုပ်ဒၟံၚ်ရောၚ် ဂွံတီကေတ်ရ။
ဟိုတ်နူ ပရေၚ်ပြုပြေၚ်ပြံၚ်သၠာဲဏံတုဲ ဒှ်ကၠုၚ်ပရေၚ်ဟုတ်ယုတ် သွက်ဒဳမဝ်ကရေဇြဳ ကၟိန်ဍုၚ်အေန်ဒေါနဳယှာ ဇၞော်ကဵုဇြဟတ် မွဲမာန်ရောၚ်ဂှ် ဂကောံမၚ်ရံၚ်ခါတ်အကာဲ အခေါၚ်အရာမၞိဟ် ဟီုသ္ဂးလဝ်ရ။
ဒု-ဝန်ဇၞော်ပရေၚ်သၞောဝ်ဓဝ်ဂှ် ဒ္ဂေတ်ဗက်ရေၚ်တၠုၚ်အာ သၞောဝ်ဥပဒေ မဆေၚ်စပ်ကဵုဒေသ တုပ်သၟဟ်ကဵု သၞောဝ်ဥပဒေကၟိန်ဍုၚ်ကီု ဟိုတ်နူ ပရေၚ်ပြုပြေၚ်ပြံၚ်သၠာဲတုဲ ဟွံဇီုကပိုက်ဒး ပရေၚ်ဗၠးၜးဒဳမဝ်ကရေဇြဳရကီုဂှ် ကလေၚ်ဟီုပလန်လဝ် ကုညးမပါ်ပါဲဂမၠိုၚ်တအ်ရ။
။
ကၟိန်ဍုၚ်အေန်ဒေါနဳယှာဂှ် လၟိဟ်မၞိဟ်မဿလေန်အလုံဂၠးကဝ် ဂၠိုၚ်အိုတ်မံၚ်တန်တဴဒၟံၚ် ဗွဲမဂၠိုၚ်တုဲ ပြဌာန်လဝ် စေဝ်ပၞောန်ဂၠိုၚ်ကဵုကၠံ ပါ်ခြာဆက်ဆောံ ပ္ဍဲလတူညးဗြဴ၊ လတူဂကောံဇြဟတ်မၞိဟ်အောန် ဆေၚ်ကဵုပရေၚ်ဘာသာ ကေုာံ LGBT တအ်ရောၚ်ဂှ် ဂွံတီကေတ်ရ။
Ref; CNA