သၞောတ် ကေတ် QR Code တုဲ ပတိုန်စရၚ် ပါတ်သပေါတ်ဂှ် ဒေါံဇူကၠုၚ်

လဂုၚ် – ဒဳဇြေန်ဗာ (၆)

ပ္ဍဲဍုၚ်လဂုၚ် သွက်ဂွံပတိုန် စရၚ်ကၠောံဍုၚ် သၞောတ် QR Code ပရဟ်ဒုၚ် ကေတ်တ္ၚဲချိၚ် သုၚ်စောဲဒၟံၚ် နူအောန်လာၚ်ဂှ် စတမ်နူ ဂိတုဒဳဇြေန်ဗာ စၟတ်တ္ၚဲ(၅) ဏံတုဲ ဒေါံဇူအာရဂှ် ရုၚ်ပ္တိတ်ကဵု လိက်စၟတ်တဲကၠောံကၟိန်ဍုၚ်ဗၟာ(လဂုၚ်)ဂှ် လလောၚ်ပ္တိတ်လဝ်ပရိုၚ်ရ။

သၞောတ်တြေံဂှ် နကဵုညးကေတ်လဝ် တ္ၚဲချိၚ် နကဵု QR Code တုဲတအ် အတိုၚ် တ္ၚဲချိၚ်ဂွံလဝ်ဂှ် ဆက်ကၠောန်ရေၚ်တၠုၚ်အာ မာန်ရဂှ် ဟီုလဝ်ရ။

ဟိုတ်နူ ညးစအကြာ(ပွဲစား) ပ္ဍဲရုၚ်ပ္တိတ်လိက်စၟတ်တဲကၠောံဍုၚ်တအ် သွံရာန်ဒၟံၚ် တ္ၚဲချိၚ်ပရဟ်ဒုၚ် နကဵုၚုဟ်မး ဟွံထေက်ကြိုက် က္ဍၚ်လောန်ၜက် နွံကၠုၚ်ဒၟံၚ်တုဲ ပဒေါံဗျူလဝ် သၞောတ်ကေတ် စၟတ်တ္ၚဲပရဟ်ဒုၚ်ချိၚ်ရဂှ် ဂွံတီကေတ်ရ။

သ္အာၚ်နူဏံပၠန် နကဵုညးမိက်ဂွံကေတ်စၟတ်တ္ၚဲချိၚ်ဂမၠိုၚ်ဂှ် သွက်ဂွံပတိုန်စရၚ် အလဵုဇကု ပွိုၚ် (၂၄) နာဍဳ တ္ၚဲကၟာတ်ဟၟဲမာန်ဂှ် ကလေၚ်ချူဓဇက် ပလေဝ်ပလေတ်ဒၟံၚ် သၞောတ် Online Booking ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ရုၚ်ပ္တိတ်ကဵု တၞးလိက်စၟတ်တဲကၠောံဍုၚ်ဗၟာ(လဂုၚ်)ဂှ်ရ။

တ္ၚဲကလေၚ်သုၚ်စောဲ သၞောတ်ပြံၚ်သၠာဲတၟိဏံမာန်ဂှ် လလောၚ်လဝ် ဟၟဲဏီတုဲ ထပ်တုဲ လလောၚ်တြးအာပၠန်ရောၚ်ဂှ် ဟီုသ္ဂးလဝ်ရ။

သွက်ဂွံပတိုန်စရၚ် တၞးလိက်စၟတ်တဲကၠောံဍုၚ်ဗၟာဂှ် သၞောတ်ကေတ် Online Booking ကေုာံ ကေတ် QR Code တုဲ သၞောတ်ပတိုန်စရၚ်ဂှ် စတမ် သုၚ်စောဲကၠုၚ်လဝ် ပ္ဍဲဂိတုမာတ်ချ် စၟတ်တ္ၚဲ(၃) တုဲကၠုၚ်ဏံရ။

ပရိုၚ် – သြၚ်လောန်တိုၚ်(မ်)