မတ်မလီု – ဒဳဇြေန်ဗာ(၇)
မျာန်မဇြဳပွာယျေ ဥူပိုၚ်လဳမိတေတ်ကေုာံ မျာန်မဇြဳပွာယျေ ကဝ်ပိုဝ်ရေယှေန် ဒပ်ပၞာန်ပိုၚ်ပြဳလဝ်ဂှ် အလဵုအသဳပရေၚ်ညဳသၟဟ်ကောန်ဂကူ ပရေၚ်ဗတိုက်သရိုဟ် ပွပ္ကီုပရာပ်ဗဟဵု လလောၚ်တြးကၠုၚ် ဒဒှ်ဂကောံပ္ကီုပရာပ် ပ္ဍဲဂိတုဒဳဇြေန်ဗာ စၟတ်တ္ၚဲ(၆) ဏံရ။
မျာန်မဇြဳပွာယျေ ဥူပိုၚ်လဳမိတေတ် ကေုာံမျာန်မဇြဳပွာယျေ ကဝ်ပိုဝ်ရေယှေန်တအ်ဂှ် ညံၚ်အာယုက်ဂကောံပၞာန်ဂွံဂၠိၚ်တုဲ အုပ်လဝ်ဂတာတဲ ပလှ်ေဒၟံၚ် ကမၠောန်ပရေၚ်ပိုန်ဒြပ် ဂကူဂၠိုၚ်စုၚ်တုဲ ဂၠာဲထံက်ပၚ်ကဵုဒၟံၚ် သြန်ဂအုံဘဏ္ဍာဇၟာပ်ပ်သၞာံ စၟဳစၟတ်ဂွံညာတ်ကေတ်လဝ်ဂှ်ရ လလောၚ်တြးကၠုၚ် ဒဒှ်ဂကောံပ္ကီုပရာပ်ရောၚ် သ္ဂးလဝ်ရ။
ဟိုတ်ဂှ်ရ ပရေၚ်ပိုၚ်ပြဳ ဂကောံပ္ကီုပရာပ်အလုံအိုဿီုဂှ် အတိုၚ်သၞောဝ်ပရေၚ်ဗတိုက်သရိုဟ် ပွပ္ကီုပရာပ် ဂဂွံကဵုၝောံပိုဒ် ၃၊ ၝောံပိုဒ်လစှ်ေ (ဃ) ဂှ်တုဲ စၟတ်သမ္တီအာ ဒဒှ်ကပေါတ်ဂကောံပ္ကီုပရာပ်ပိုၚ်ပြဳတုဲ တၞဟ်နဖဵုဒတုဲမြမောဝ်ညးဍုၚ်ကွာန် ဗွဲမသၟဟ်ညဳကဵု သၞောဝ်ဥပဒေဗတိုက်သရိုဟ် ပွပ္ကီုပရာပ်ၝောံပိုဒ် ၆၊ လစှ်ေၝောံပိုဒ်(ဌ) တုဲ ထိၚ်ဒဝ်ဖန်ဇန်အာရောၚ်ဂှ် ဓမံက်ထ္ၜးလဝ်ပ္ဍဲတၚ် လလောၚ်တြး ဂကောံဗတိုက်သရိုဟ်ပွပ္ကီုပရာပ်ဗဟဵုဂှ်ရ။
သြန်ဂအုံဘဏ္ဍာ မျာန်မဇြဳပွာယျေ ဥူပိုၚ်လဳမိတေတ် ကေုာံမျာန်မဇြဳပွာယျေ ကဝ်ပိုဝ်ရေယှေန်တအ် ဂၠာဲကဵုဒၟံၚ်ဂှ် သွက်က္ဍိုပ်သ္ကိုပ်ပၞာန် ကဆံၚ်လတူ ကေုာံညးမၞုံကဆံၚ်ဂမၠိုၚ်တအ်ဟေၚ် ဒှ်ဒၟံၚ်ဒတုဲဖဵုတုဲ ကောန်သ္ဂံၚ်ကဆံၚ်သၟဝ်ဂမၠိုၚ်တအ်ဂှ် အခေါၚ်ဂွံဒုၚ်စသိုၚ် စဵုကဵုဟၟဲ အောန်လောန်ဒၟံၚ်ဂှ် ဂွံတီကေတ် နူကဵုတၞးလိက် တၚ်ဂၞၚ်ပါ်ပရအ်ပရဲတအ်ရဂှ် ဟီုသ္ဂးလဝ်ရ။
ပရဲတိတ်ကၠုၚ်တအ်ဂှ် သုၚ်စောဲတုဲ ဇၟာပ်ဒဒှ်တ္ၚဲ ကလိလောန်ကၠုၚ်ဒၟံၚ် ပွပ္ကီုပရာပ်ပြိုက်ဂစိုတ် ဟွံတုပ်သၟဟ်ကဵုမၞိဟ် ပ္ဍဲလတူညးဍုၚ်ကွာန် အလုံမွဲကၟိန်ဍုၚ်ဂှ်ရ အထံက်တိုၚ်ဂကောံပၞာန်ဂှ် စၟတ်သမ္တီကေတ် ဒဒှ်ဂကောံပ္ကီုပရာပ်ရဂှ် လလောၚ်တြးလဝ်ရ။
ဂကောံပရေၚ်ဗတိုက်သရိုဟ် ပွပ္ကီုပရာပ်ဗဟဵုဂှ် ဒ္ဂေတ်ဗက် အတိုၚ်လၟေၚ်သၞောဝ်ဥပဒေ ဗတိုက်သရိုဟ်ပွပ္ကီုပရာပ် ၝောံပိုဒ် ၆၊ လစှ်ေၝောံပိုဒ် (ၚ) ကေုာံ ၝောံပိုဒ် ၇၂၊ လစှ်ေၝောံပိုဒ်(ခ) အခေါၚ်ကၠောန်ပါလုပ်တုဲ နကဵုတၚ်တုပ်စိုတ် ဂကောံအလဵုအသဳကၟိန်ဍုၚ်ဂှ် လလောၚ်တြးလဝ် ဒဒှ်ဂကောံပ္ကီုပရာပ်ရ။
ပရိုၚ် – သြၚ်လောန်တိုၚ်(မ်)