ထဝါဲ၊ ဒဳဇြေမ်ဗာ (၇)
ဒဒန်ကမျောကေန် ဂၠံၚ်လုပ်ဍုၚ်ထဝါဲ၊ ရးဒေသဇၞော်တၞၚ်သဳ ကြဴနူမာၚ်ဗ္တိုဟ်တုဲဂှ် လ္ပာ်ကံၚ်ဇြဳပၞာန် ပတေၚ်ဂြတ်ပရေၚ်ဂီုကၠီုတုဲ ကၠောန်သ္ပစၟဳစၟတ်သၟာန်သၟုက်ဒၟံၚ် ဇၟာပ်ပ်ညးဍုၚ်ကွာန်အာတရဴတံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဒဳဇြေမ်ဗာ စၟတ်တ္ၚဲ (၄) အခိၚ်ဗ္တံ ပ္ဍဲသၟဝ်ဂတဵုမုက် ကဵုသတိမာၚ်ဂှ် ဗ္ဒိုပ်ဗၠာဲသၟိၚ်ဒေသ မံၚ်မကာန် ဒးဒုၚ်ဗ္တိုက်တုဲ ဒပ်ကံၚ်ဇြဳပၞာန် စၟဳစၟတ်ဒၟံၚ် ပ္ဍဲဂၠံၚ်လုပ်ဍုၚ်ထဝါဲဂှ် ဗွဲမတေၚ်ဂြတ်ရ။
ဒပ်ကံၚ်ဇြဳပၞာန်ဝွံ ဇၟာပ်မၞိဟ်မကၠုၚ်နူပွိုၚ်ဍုၚ်လံၚ်လုၚ် လုပ်စိုပ်အပ္ဍဲဍုၚ်ထဝါဲဂှ် ပကိတ်စၟဳစၟတ်ကဵု ဗီုဓာတ်တံတုဲ မၞိဟ်ဟွံသၚ်္ကာတံဟီုမ္ဂး ကော်ပ္ဍဲသၞေဟ်ကၚ်တုဲ စၟဳစၟတ်သၟာန်သၟုက်တံဂှ် ကၠောန်သ္ပဒၟံၚ်ရ။
အတိုၚ်ဂလာန်ညးဒေသတံဂှ်မ္ဂး ဒပ်ကံၚ်ဇြဳပၞာန်ဝွံ သၟာန်သၟုက်စၟဳစၟတ်ဒၟံၚ် ကုညးဍုၚ်ကွာန်အာတရဴတံ သၟာန်နာနာသာ်တုဲ သီုကဵုကညာၚ်လက်ဒေါန်ဒၟံၚ် မၞိဟ်ကၠုၚ်နူလ္ပာ်ကွာန် သှ်ဟွံလေပ်တံလေဝ် နွံဂှ် သ္ဂးရ။
ဟိုတ်နူပရေၚ်စၟဳစၟတ်ကၟာတ်ဒၞါကံၚ်ဇြဳပၞာန်တံဂှ်တုဲ ဗ္ဒါဲဒဒန်ကမျောကေန်ဂှ် ကွဳစက်၊ ကွဳလိုန်ဓာတ် အာတရဴတံ ဂၠိုၚ်ကဵုကၠံ ဆိုအ်ဗဒၟံၚ်တုဲ ညးဍုၚ်ကွာန်တံ သီုကဵုဒးဆေၚ်ဒၟံၚ်မုက် ကုတရဴလအ်လတံရ။
ပ္ဍဲကဵုဒဒန်ကမျောကေန် ဒၞါဲမာၚ်ဗ္တိုဟ်ဂှ် သၟတ်ဗြဴ (၂) တၠ ဇီုကပိုက်ဂွံလဝ်ဝပ်တုဲ ပ္ဍဲကဵုပရေၚ်ပန်ပှော် ဗ္ဒိုပ်ဗၠာဲသၟိၚ်ဒေသ မံၚ်မကာန်ဂှ် ကောန်ဂကောံဒပ်ကံၚ်ဇြဳပၞာန်တံ (၃) တၠပြၚ် ဇီုကပိုက်ချိုတ်မာန်ဂှ် ညးမစုက်လုက်ကဵု ဂကောံဒပ်စဵုဒၞါတံ ဟီုရ။
ကြဴနူဗ္ဒိုပ်ဗၠာဲသၟိၚ်ဒေသ မံၚ်မကာန် ဒးဒုၚ်ဗ္တိုက်တုဲဂှ် ဒပ်ကံၚ်ဇြဳပၞာန်ဝွံ ပ္ဍဲကဵုမွဲဒမြိပ် ပွဳပွူဗ္ဒါဲကွာန်မံၚ်မကာန်တံဂှ် ဗက်ဂၠိုက်ဂၠါဲဒၟံၚ် PDF တံ ပြးဇး ဒၞါဲသှ်ေဟွံမွဲရ။
ပရိုၚ်−သြၚ်လောန်တိုၚ်(မ်)