တၚ်သၟာန်သွဟ် ကေုာံဗိုလ်ဇၞော်သဝ်ကျဝ်ညောအ် ဂကောံက္ဍိုက်က္ဍိုပ် ကမၠောန်လၟေၚ်ပရေၚ်ၜိုဟ်လလံ (PPST)

ကၠာနူသၞာံ ၂၀၂၂ ဟွံအိုတ်ဏံ ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲဒေါံပန်ပှော်ကီု သီုဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲဂမၠိုၚ် PPST ပ္တိတ်ဇြဟတ်ရေၚ်တၠုၚ်ဒၟံၚ် သွက်ဂွံကၠောန်ဗဒှ် ပေါဲသဳကၠဳဆေၚ်မုက် ပရေၚ်ဍုၚ်ကွာန် EAOs သီုဖအိုတ်ပါလုပ် မွဲတန်ရ။ ဟိုတ်ဂှ်ရ သွက်ဂွံဒှ်ကၠုၚ် ပေါဲသဳကၠဳဆေၚ်မုက် ပရေၚ်ဍုၚ်ကွာန် EAOs သီုဖအိုတ်ပါလုပ်ဂှ် စိုပ်ဒၟံၚ်အကာဲအရာလဵုရော။ လစွံစိုတ် ဂကောံရပ်လွဟ်ကောန်ဍုၚ်အရၚ်ဂမၠိုၚ် နွံသာ်လဵုရော။ ပေါဲသဳကၠဳကောံဓရီုဏံဂှ် ၜိုတ်အခိၚ်လဵု စကၠောန်ဗဒှ်မာန်ရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ် ကေုာံဗိုလ်ဇၞော် သဝ်ကျဝ်ညောအ် ဂကောံက္ဍိုက်က္ဍိုပ် ကမၠောန်လၟေၚ်ပရေၚ်ၜိုဟ်လလံရ။

-အလန်ကိုပ်ကၠာအိုတ်ဏံတှ်ေ ကၠာနူသၞာံဏံဟွံအိုတ်ဏီ စပ်ကဵုအကာဲအရာ ရေၚ်တၠုၚ်ဓမံက်ဒၟံၚ်ရုပ်ရဴ သွက်ပေါဲသဳကၠဳ ပရေၚ်ဍုၚ်ကွာန် ဂကောံရပ်လွဟ်ကောန်ဍုၚ်အရၚ်သီုဖအိုတ်ပါလုပ်တုဲ ဟီုထ္ၜးကဵုညိ။

ပိုဲရန်လဝ် ကၠာနူသၞာံ ၂၀၂၂ ဟွံအိုတ်ဂှ် နွံဒၟံၚ်ရ။ ဣဏံဂှ် ဒှ်တၚ်ရန်တၟံရ။ ဒဵုကဵုအခိၚ်လၟုဟ်ဏံဂှ်တှ်ေ ဃောပိုဲဂစာန်ဒၟံၚ်ဖိုဟ်ရ။ ပ္ဍဲကဆံၚ်ဃောဂစာန်ဒၟံၚ်ဟီုဂှ် နကဵုအလဵု PPST ပ္တိတ်ဇြဟတ်လေဝ်နွံ နကဵုအလဵု ဂကောံရပ်လွဟ်ကောန်ဍုၚ်အရၚ် ပါလုပ်ဒၟံၚ်ပ္ဍဲ PPST ကီု၊ နကဵုအလဵု ဂကောံရပ်လွဟ်ကောန်ဍုၚ်အရၚ် စုက်လုက်ကဵုပိုဲကီု နကဵုအလဵု ဂကောံညးတအ်မွဲမွဲဂကောံလေဝ် ညံၚ်ပေါဲသဳကၠဳဆေၚ်မုက် ပရေၚ်ဍုၚ်ကွာန် EAOs သီုဖအိုတ်ပါလုပ် ဗီုဟီုနူကၠာဂှ်မွဲတန် ဂွံဒှ်ကၠုၚ်မာန် ဗီုညးကဵုညး ပ္တိတ်ဒၟံၚ်ဇြဟတ် နွံရ။

ယဝ်ဒးဟီုဍန်န်တှ်ေ ဗီုကဵုပိုဲရန်လဝ်အခိၚ်ကၠာတေံကီုရ။ သွက်ပိုဲဂွံၜက်ကၠောံအာ အကြေပ်အဂြတ် ပရေၚ်ဍုၚ်ကွာန်ပစ္စုပ္ပန်ဏံမာန်ဂှ် ပ္ဍဲကဵုဂကောံရပ်လွဟ် ကောန်ဍုၚ်အရၚ်တအ်လေဝ် သွက်ဂွံကၠောန်ဗဒှ် ပေါဲကောံဓရီုဆေၚ်မုက်စုၚ်ညဳ EAOs ပိုဲ သီုဖအိုတ်ပါလုပ်ဂှ် ပ္ဍဲတၚ်ရန်တၟံဂှ် နကဵုအလဵု PPST ကီု၊ ဂကောံရပ်လွဟ်ကောန်ဍုၚ်အရၚ်ပါလုပ်ဒၟံၚ်ပ္ဍဲ PPST မွဲမွဲဂကောံကီု ဗီုညးကဵုညး ပိုဲပ္တိတ်ဒၟံၚ်ဇြဟတ် ရေၚ်တၠုၚ်ဒၟံၚ်ဖိုဟ်ရ။

-ပ္ဍဲလတူတၚ်ကော်ဘိက် PPST သွက်ပေါဲသဳကၠဳပရေၚ်ဍုၚ်ကွာန်ဂွံဒှ်ဂှ် ဗီုလဵုဂကောံရပ်လွဟ်ကောန်ဍုၚ်အရၚ်တအ် ဂတးပလန်ကၠုၚ်လဝ် နွံရော။

ဗီုကဵုဟီုလဝ် နူကၠာဂှ်ရလေဝ်။ ပိုဲဂှ်လေဝ် အတိုၚ်က္ဍိုပ်လိက် ပရေၚ်ဒးဗ္ဒာဲလုပ်ရေၚ်တၠုၚ်ကဵု ဂကောံPPST တအ်နွံဒၟံၚ်ကီု ပ္ဍဲကဵုဒၞာဲတၞဟ်လေဝ် အတိုၚ်ဗလး ပရေၚ်ဍုၚ်ကွာန်က္တဵုဒှ်ဒၟံၚ် အခိၚ်လၟုဟ်ပြဟ်ဟ်ဏံရ။ နူကဵုဂကောံပိုဲမွဲမွဲဂကောံ ညးစုက်လုက်ကဵုဍေံ ညးဆက်စပ်ကဵုဍေံ မွဲမွဲဂကောံ  ပ္တိတ်ဇြဟတ်ရေၚ်တၠုၚ်ဒၟံၚ် နွံရ။ ကဵုက္ဍိုပ်သ္ကိုပ်ကေအေန်ယူတအ်လေဝ် ပိုဲစတမ်ပ္တိတ်ဇြဟတ် ပ္ညဳပ္ညပ်ကၠုၚ်နွံရ။ ၜိုန်ရနကဵုဂကောံမွဲမွဲဟွံသေၚ်ကီုလေဝ် ဗွဲအစောံပလးလေဝ်။ ပရေၚ်ဆက်ဆောံဍုက်ကေဝ်ကဵု ပူဂဵုနွံတုဲလေဝ် ပိုဲစတမ်တုဲ ပ္တိတ်ဇြဟတ်ရေၚ်တၠုၚ်ဒၟံၚ် ဗွဲပလးလေဝ် နွံရ။ သွက်ဂွံဟီုဂး ပရေၚ်ဟီုဂတးပလန်ဂှ် အခိၚ်ပြဟ်မံၚ်ဏီရ။ လၟုဟ်ပိုဲဆဂွံကြပ်လုပ်ပ္တိတ်ဇြဟတ်ဂှ်တှ်ေ သွက်ဂွံဟီုထ္ၜးကဵု သောဲသောဲဗြောဲဗြောဲဂှ် ပိုဲလေဝ် နွံဒၟံၚ်ဆၜိုတ်ကဆံၚ် စဂွံကၠောန်သ္ပဏီဓဝ်ရဂှ် မိက်ဂွံဟီုရ။

-ဟီုတှ်ေ အကာဲအရာလၟုဟ်ဏံဂှ် ပေါဲကောံဓရီုဏံဂှ် နွံဒၟံၚ်ကဆံၚ် ၜိုတ်ဂွံဗ္ဒာဲလုပ်ညိကွေံရ ဟီုဂွံဟာ။ ပ္ဍဲလတူဏံ ဗီုလဵုညာတ်ရော။

လတူနူပရေၚ်ဗ္ဒာဲလုပ် နကဵုအလဵု PPST ဂှ် ဂကောံရပ်လွဟ် ကောန်ဍုၚ်အရၚ်တအ်ဂှ်လေဝ် အတိုၚ်အကာဲအရာ တိဍာ်ညးတအ်ဗျာပ်တြးတုဲ ပ္ဍဲလတူအကာဲအရာ ပိုဲနွံတန်တဴဒၟံၚ်ဂှ် ဒၞာဲကြပ်ဂှ်ရလေဝ်။ ပရေၚ်ပ္တိတ်ဇြဟတ် မွဲမွဲဂကောံလေဝ်နွံရ။ ဗီုကဵုဟီုလဝ်နူကၠာဂှ်ရ။ ပိုဲရန်လဝ် သွက်ဂွံဒှ်ဆေၚ်မုက်စုၚ်ညဳဂှ်ရ တၚ်ရန်တၟံပိုဲဂှ်တုပ်မံၚ်ရ။ ပ္ဍဲအရာရေၚ်တၠုၚ် ကၠောန်ဗ္ဒလုပ်ကၠုၚ်ဂှ်တှ်ေ နကဵုက္ဍိုပ်လိက် PPST ဟွံသေၚ်တုဲ ပ္ဍဲလတူနွံကဵု ပရေၚ်ဍုက်ကေဝ်ဆက်စပ်ကဵု ဂကောံနူကၠၚ်ဂှ်မွဲမွဲလေဝ် ဟီုဒၟံၚ် ပရေၚ်ကၠောန်ရေၚ်တၠုၚ်ဒၟံၚ်ဂှ်ရ။

-ပေါဲသဳကၠဳဆေၚ်မုက်ပရေၚ်ဍုၚ်ကွာန် EAOs သီုဖအိုတ်ပါလုပ်ဂှ် ၜိုတ်အခိၚ်လဵု ဒှ်ကၠုၚ်မာန်ရော။ ပ္ဍဲလတူဏံ သ္ၚဳဂၠိပ်ပါ်ပါဲကဵုညိ။

စပ်ကဵုအခိၚ်အခါတုဲလေဝ် ဂွံဟီုဂှ် ယဝ်ဒးဟီုကၠးကၠးတှ်ေ ချိုတ်တ်ပၠိုတ်တ်ဂှ် ဟီုဟွံမာန်ဏီရဂှ် ဍာံဍာံရ။ သွက်ကောံဓရီု ဆေၚ်မုက်စုၚ်ညဳ EAOs သီုဖအိုတ်ပါလုပ် ဂွံဒှ်ဂှ်လေဝ် ဟိုတ်နူ PPST ဘိက်စိုပ်တုဲ ဒးကၠုၚ်တိုန်ဂှ် ဟွံမိက်ကဵုဒှ်ရ။ ပိုဲနွံပၟိက်ဒၟံၚ်ဂှ်တှ်ေ ဆေၚ်စပ်ဒၟံၚ်ကဵု ကောန်ဂကူကောန်ဍုၚ်အရၚ် မံၚ်တန်တဴဒၟံၚ် ပ္ဍဲကဵုကၟိန်ဍုၚ်ဏံ သီုဖအိုတ် ဂကောံရပ်လွဟ် ကောန်ဍုၚ်အရၚ်တအ်ဂှ်တှ်ေ သွက်ဂွံဂၠာဲသွဟ်တတ်ကၠောံအာ အခက်ခုဲအကြေပ်အဂြတ် ပရေၚ်ဍုၚ်ကွာန်ဗီုဏံမာန်ဂှ် နဒဒှ်သ္ပတမ်တုဲ ဂကောံရပ်လွဟ် ကောန်ဍုၚ်အရၚ်တအ် ဗလးပံၚ်ကောံ ဆဵုဂဗ ညံၚ်ကဵုဟီုလဝ်နူကၠၚ်ဏံဂှ်ရလေဝ်။

သွက်ဂွံဒှ်ပံၚ်တောဲပါလုပ် သီုညးဖအိုတ်ဂှ် ပိုဲကၠိုဟ်ကေတ်လဝ်ဗီုဏံဂှ်ရ ဂကောံပိုဲဗ္ဒာဲကြပ်လုပ် မွဲမွဲဂကောံ လၟုဟ်ဏံကီု အကာဲအရာဒုၚ်တဲမာန် သီုၜါလ္ပာ် ဒှ်ကၠုၚ်နူပရေၚ်ဆက်ဗစိုပ် ပ္ညဳပ္ညပ်ပ္တိတ်ဇြဟတ်ကီု၊ ပ္ဍဲလတူဗလး ဒုၚ်တဲမာန်သီုညးဖအိုတ်၊ ဒၞာဲဒေသ ဒုၚ်တဲသီုညးဖအိုတ်မာန် ပ္ဍဲလတူတၚ်ဒှ်သ္ဇိုၚ်ဏံရ သွက်ပိုဲဂွံရေၚ်တၠုၚ်အာ ပ္ဍဲလတူနွံကဵုပရေၚ်ကၠိုဟ်ခၠၚ်ဂှ် စနူအခိၚ်လၟုဟ်တုဲ ကော်ဘိက်အာ၊ ဆုဲလုပ်အာတုဲတှ်ေ ပ္ဍဲမွဲကာလပ္တိတ်ဒၟံၚ်ဇြဟတ်ဏံဂှ် အခိၚ်လဵုဒှ်မာန်ရော၊ ဒၞာဲလဵုဒှ်မာန်ရော၊ ဗလးဗီုပြၚ်လဵုဒှ်မာန်ရော သွက်ဂွံဟီုဂးမာန်ဂှ် ယဝ်ရဒးဟီုတပ်ပ်တှ်ေ အခိၚ်ပြဟ်လောန်ဒၟံၚ်ဏီဏောၚ် အဲမိက်ဂွံဟီုရ။

-အလန်လကြဴအိုတ်ဏံတှ်ေ ပ္ဍဲဂိတုဒဳဇြေန်ဗာဏံ က္ဍိုပ်သ္ကိုပ်ပၞာန် သ္ကိုပ်ဗိုလ်ဇၞော် မေန်အံၚ်လှာၚ်လေဝ် စၟဳမၚ်ဒၟံၚ် သွက်ဂွံထ္ပက်စၟတ်တဲ တၚ်တုပ်စိုတ်ကဵု ဂကောံသဳကၠဳလဝ် ပရေၚ်ၜိုဟ်လလံတအ်ဏောၚ် ဟီုဂးလဝ်ဂှ် ဂွံဆဵုကေတ်ရ။ အခိၚ်လၟုဟ်ဏံရော နူလပါ်ဂကောံပၞာန် ကော်ဘိက်ကၠုၚ်လဝ် မုနွံရော။

ယွံ။ ဟၟဲဏီရ။ အတိုၚ်ပိုဲအာဆဵုဂဗလဝ်ကဵု စကစဂှ် ဂကောံရပ်လွဟ် ထ္ပက်လဝ်စၟတ်တဲ NCA တုဲ အပံၚ်သီုဖအိုတ် (၇) ဂကောံနွံရ။ ဣဏံဂှ် ပရေၚ်ဆဵုဂဗ စဵုကဵုအလန်ဒုတိယနွံရ။ ပ္ဍဲဂိတုဒဳဇြေန်ဗာ ကၠုၚ်စိုပ်ဏံတှ်ေ ဓမံက်ထ္ၜးဟီုပ္တိတ်ကၠုၚ် တၚ်ရန်တၟံ ညးတအ်မိက်ဂွံကၠောန် စပ်ကဵုပရေၚ်ၜိုဟ်လလံဏောၚ်ဂှ် ပိုဲဂွံမိၚ်လဝ်နွံရ။ ၜိုန်ဂှ်လေဝ် အတိုၚ်မွဲမွဲဂကောံ အာဒၟံၚ် အတိုၚ်ဗီုပြၚ်လၟုဟ်ဏံကီု၊ အတိုၚ်ဗလးအလန်ဒုတိယ ပိဂကောံပံၚ်တုဲအာဒၟံၚ်ကီု တၚ်ဓမံက်ပတိုန်ဟီုဂး ပ္ဍဲသ္ကုတ်လကြဴဏံဂှ် သွဟ်ဆေၚ်စပ်ကဵု ပရေၚ်ၜိုဟ်လလံအကြာ ပိုဲမွဲဂကူဟီုဂှ် သွက်ပရေၚ်ၜိုဟ်လလံရ။

ပရေၚ်ဆဵုဂဗသဳကၠဳ ပရေၚ်ဍုၚ်ကွာန်နွံပၟိက်ဒၟံၚ်ဂှ် ဒှ်လေဝ်ဒှ်မာန်ဒၟံၚ်ရ။ ဟီုမွဲနဲပၠန်တှ်ေ ပရေၚ်ၜိုဟ်လလံပိုဲဟီုဂှ် ဒၟာနူဒှ် ပရေၚ်ၜိုဟ်လလံကၟိန်ဍုၚ်ဂှ်ရ နကဵုပိုဲတအ် ပရေၚ်သဳကၠဳပရေၚ်ဍုၚ်ကွာန် ညးဆေၚ်စပ်သီုဖအိုတ်ပါလုပ်ဂှ် ဒှ်အဓိကသွက်ပိုဲရ။ ၜိုန်ဂှ်လေဝ် ပ္ဍဲကဵုအကာဲအရာ ပရေၚ်ဍုၚ်ကွာန် ပကတိဟွံသေၚ် ပ္ဍဲဗလးပိုဲဒးအာဆဵုဂဗဒၟံၚ် နကဵုမွဲမွဲဂကောံဂှ် တၚ်ဒုၚ်ကဵုလျိုၚ်ပရေၚ်ၜိုဟ်လလံကၟိန်ဍုၚ် ကိစ္စဖေတ်ဒရေဝ်ဒဳမဝ်ကရေဇြဳဂှ်လေဝ် ကေတ်အခိၚ်တုဲ ပ္တိတ်ဇြဟတ်ဓမံက်ရုပ်ရဴ ပ္ဍဲဗလး သီုညးဖအိုတ်ဂွံပါလုပ်မာန်ဏောၚ် ဒးထေၚ်ခယျကေတ်ရ။

နကဵုအလဵုဥက္ကဌ နစကဂှ် ပ္ဍဲဂိတုဒဳဇြေန်ဗာဏံ တၚ်သ္ဂုတ်သွာတ်ဆေၚ်စပ်ကဵု ပရေၚ်ၜိုဟ်လလံမွဲမွဲဂှ် အတိုၚ်ဗလး ပရေၚ်ဍုၚ်ကွာန် မၞုံဒၟံၚ်ပကတိဂှ် နကဵုပိုဲစၟဳညာတ်ကေတ်အာဂှ်တှ်ေ ပေါဲဆဵုဂဗသဳကၠဳ ပါလုပ်သီုညးဖအိုတ် ဟွံသေၚ်တှ်ေ ပေါဲသဳကၠဳပရေၚ်ၜိုဟ်လလံကၟိန်ဍုၚ် သွက်ဂွံဒက်ပ္တိန်ကၟိန်ဍုၚ်ဖေတ်ဒရေဝ်ပံၚ်ကောံ သွက်ပရေၚ်ၜိုဟ်လလံ ပါလုပ်သီုညးဖအိုတ် ဗလးစတမ်ကၠောန်ဗဒှ်လေဝ် ဒှ်မာန်ရ။ အဲဂှ်ကၠိုဟ်ကေတ်လဝ်ဗီုဏံရ။