တၞၚ်သဳ၊ ဒဳဇြေမ်ဗာ (၈)
ကရောၚ်ပၞာန် မကၠေုၚ်ကေတ်ပရေၚ်ဂီုကၠီု သွက်လၟေၚ်တရဴ သ္ကိုပ်ဝန်ဇၞော်ရးတၞၚ်သဳ ဥူမျာတ်ကိုဝ် ကံၚ်ဇြဳပၞာန် မခါန်ကၞက်လဝ် မအာစိုပ်စှ်ေလ္ၚတ် ကိုန်စဳမာန်ဇြဟတ်ဍာ်ဓာတ်လလဳ (ဖောၚ်တောကြီး) ဂှ် ဂကောံဒပ်ပၠန်ဂတးဒမၠုက်ထဝါဲ ( DGRF) တံ ကြတ်ဗ္တိုက်လဝ်ရောၚ် လလောၚ်ပ္တိတ်လဝ်ရ။
ကရောၚ်ပၞာန်တွာ်တိုက် ဇြဟတ်ဒပ် (၃၀၀) ပြၚ်ပါလုပ် မကၠုၚ်ကေတ် ပရေၚ်ဂီုကၠီု သွက်လၟေၚ်တရဴ သ္ကိုပ်ဝန်ဇၞော်ကံၚ်ဇြဳပၞာန် ပ္ဍဲဂိတုဒဳဇြေမ်ဗာ (၅) တုဲကၠုၚ်တေံ ပ္ဍဲအခိၚ်စိုပ် ကွာန်တယိတ်ၚပ် (သရက်ငုတ်) ဂှ် ဂကောံဒပ်ပံၚ်ကောံစဵုဒၞါဒေသတံကဵု ဂကောံပၠန်ဂတးဒပ်ဒမၠုက်ထဝါဲ (DGRF) တံ ကြတ်ဗ္တိုက်လဝ်ရ။
ဟိုတ်နူဒးဒုၚ်ကြတ်ဗ္တိုက်အကြာဂၠံၚ်ဂှ်ရ မွဲလ္ပာ်ကုမွဲလ္ပာ် က္တဵုဒှ်လဝ် ပရေၚ်ပန်ပှော် လလအ်ဗ္ဒါဲ (၁၅) မိနေတ်တုဲ လ္ပာ်ကံၚ်ဇြဳပၞာန် (၅) တၠ ချိုတ်တုဲ ကလိဂွံဝပ်ဇီုကပိုက်တံလေဝ် နွံလဝ်ဂှ် ညးတာလျိုၚ် ဂကောံဒပ်ပၠန်ဂတးဒပ်ဒမၠုက် ထဝါဲ (DGRF) မွဲတၠ ဟီုရ။
အပ္ဍဲပရေၚ်ဗ္တိုက်ဏံဂှ် လ္ပာ်ဂကောံဒပ်ပၠန်ဂတးဒပ်ဒမၠုက်ထဝါဲ (DGRF) ဂှ် ကောန်သ္ဂံၚ် PDF မွဲတၠ ကလိဂွံလဝ်ဝပ်ကီုလေဝ် ဆုတ်ကလေၚ်လဝ် ဗွဲမအံၚ်ဇၞးမာန်ဂှ် သ္ဂးရ။
သ္ကိုပ်ဝန်ဇၞော် ဥူမျာတ်ကိုဝ် မကၠုၚ်စိုပ် ကိုန်စဳမာန်ဇြဟတ်ဍာ်ဓာတ်လလဳ (ဖောၚ်တောကြီး) ဂှ်ဝွံ ပ္ဍဲဂိတုဒဳဇြေမ်ဗာ (၆) ဂှ် ကလေၚ်တိတ်စ္ဍးအာကီုလေဝ် ကောန်ဂကောံဒပ်ကံၚ်ဇြဳပၞာန်တံ ဆက်ကေတ်လဝ် ပရေၚ်ဂီုကၠီုဖိုဟ်ဂှ် ဂွံတီကေတ်ရ။
ကောန်ဂကောံဒပ်ကံၚ်ဇြဳပၞာန် မကေတ်လဝ်ပရေၚ်ဂီုကၠီု ဂၠံၚ်တရဴ သ္ကိုပ်ဝန်ဇၞော်ကံၚ်ဇြဳပၞာန်ဂှ်ဝွံ ပ္ဍဲဂိတုဒဳဇြေမ်ဗာ (၇) ဂှ် ကၠောန်သ္ပလုပ်စိုပ်ဂၠိုက်ဂၠါဲဗ္တးဗ္တန်လဝ် သ္ၚိဒၟံၚ်ညးဒေသဂမၠိုၚ် နူကဵုကွာန်ဝကုန်တံဂှ် ညးဒေသတံ သ္ဂးအိုတ်ရ။
ပ္ဍဲရးတၞၚ်သဳဂှ် ဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဝွံ စနူဂိတုမံက်တုဲကၠုၚ်ဏံဂှ်တုဲ ပေါဲဗ္တိုက်ၜါလ္ပာ်တံ သာက္တဵုဒှ်ကၠုၚ်တုဲ ဟိုတ်နူပေါဲဗ္တိုက်တံဏံတုဲ ညးဒေသ (၁၀၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)