ဂျာကာတာ – ဒဳဇြေန်ဗာ(၁၀)
ပါလဳမာန်ကေုာံ အလဵုအသဳအေန်ဒေါနဳယှာဂှ် သွက်သၟာပရေၚ်ဍုၚ်ကွာန်တြေံဂမၠိုၚ် ဂွံပါလုပ်ဒဒှ်ညးအုပ်ဓုပ် တိုက်သြန်ဗဟဵုမာန်ဂှ် သွက်ဂွံပၠုပ်အာ လိက်စံၚ်မဆေၚ်စပ် ပ္ဍဲမူဝါဒတၟိ ဆေၚ်စပ်ကဵု ပရေၚ်ဘဏ္ဍာဂှ် တုပ်ကၠုၚ်လဝ်စိုတ်ရဂှ် တမ်ရိုဟ်တၚ်ဂၞၚ်ပရိုၚ် ပါလုပ်ဒၟံၚ် ပ္ဍဲပေါဲသဳကၠဳဂှ် ဟီုသ္ဂးလဝ်ရ။
ပါလဳမာန် ကေုာံအလဵုအသဳတအ်ဂှ် ပ္ဍဲသ္ကုတ်ကြဴ နူဂိတုဒဳဇြေန်ဗာ စၟတ်တ္ၚဲ(၈)ဂှ် သ္ပလဝ်ဒ္တန် သၞောဝ်ဥပဒေမူအပြောံလကြဴအိုတ်တုဲ ပ္ဍဲပွိုၚ်အကြာမွဲၜါတ္ၚဲဏံမ္ဂး ဖျေံသ္ဂုတ်သွာတ်ဗစိုပ်ဒတုဲ နကဵုသၞောတ်ကဵုမာဲရောၚ်ဂှ် ညးပါလုပ်ပ္ဍဲဗော်ဒုၚ်ကာ ပါလဳမာန်ကောပ်ကာဲ သၞောဝ်ဥပဒေအပြောံဂှ်မွဲတၠ ဟီုသ္ဂးလဝ်ရ။
ဥပဒေအပြောံ ဟွံလုပ်သၞောဝ်ဏီဏံ လတူနူပရေၚ်ဖန်ဇန် ၚုဟ်မးရူပဳယာဂှ် စပ်ကဵုပရေၚ်တဴတက်ပရေၚ်ပိုန်ဒြပ်တုဲ သွက်ဂွံထ္ၜလဘာ်အာဂှ် သၠဲပ္တိတ်အာ အခေါၚ်ကၠောန်တိုက်သြန်ဗဟဵုအေန်ဒေါကီု သီုကဵုအာအခေါၚ်ရာန်လိက်ကသုက်ဇက်ဂလေံသြန် နူအလဵုအသဳတိုက်ရိုက် အတိုၚ်သမ္မတ သ္ပလဝ်စၟတ်သမ္တီ ကဵုလဝ်အခေါၚ်ကီုရောၚ်ဂှ် တမ်ရိုဟ်တၚ်ဂၞၚ်ပရိုၚ်မွဲတၠ ဟီုသ္ဂးလဝ်ရ။
နကဵုညးနုက်တိတ်အာလဝ် နူကဵုဗော်ပရေၚ်ဍုၚ်ကွာန်နာနာဂှ် ပရေၚ်ရေၚ်တၠုၚ်ဘဏ္ဍာ မဆေၚ်စပ်ကဵု ပရေၚ်ဗ္ဂေတ်ကမၠောန်တိုက်သြန် အေန်ဒေါနဳယှာဂှ် ဒးဍိုက်ပေၚ်ကဵုစရာဲဍာ်ဒကေဝ်က္ဍိုက်က္ဍိုပ် ဂကောံပိုၚ်ပြဳအာဏာ ကေုာံကဝ်ပိုဝ်ရေယှေန် ဒုၚ်လျိုၚ်သြန်ပ္အပ်ရောၚ်ဂှ် ဂွံတီကေတ်လဝ်ရ။
“သၟာပရေၚ်ဍုၚ်ကွာန်တအ် ဂွံဒုၚ်ရုဲစှ် သွက်ဌာနန္တရဏံဂှ် အခေါၚ်အရာ တုပ်သၟဟ်ကဵုညးသ္အာၚ်တအ် နွံဒၟံၚ်တုဲ အတိုၚ်စရာဲဍာ်ဒကေဝ် ညးတအ်ကၠောန်မာန်ဏောၚ်ဂှ်” တမ်ရိုဟ်တၚ်ဂၞၚ်ပရိုၚ်ဂှ် ဟီုသ္ဂးလဝ်ရ။
သမ္မတဂျိုဝ်ဂိုဝ်ဒိုဝ်ဒိုဝ်ဂှ် နကဵုတိုက်သြန်ဗဟဵု အေန်ဒေါနဳယှာဂှ် ဒှ်သ္ကုတ်လစှ်ေ တန်တဴတၞဟ်ခြာ မွဲလစှ်ေရဂှ် ဟီုသ္ဂးလဝ်ရ။
ပ္ဍဲသိပ္ပံပရေၚ်တဴတက် ဆေၚ်ကဵုပရေၚ်ပိုန်ဒြပ် ကေုာံပရေၚ်ဘဏ္ဍာ (INDEF)ဂှ် တၠပညာဘောဂဗေဒ မာဿတာ တောၚ်ဟဳအာဟမေတ်ဂှ် သွက်သၟာပရေၚ်ဍုၚ်ကွာန်မွဲမွဲတၠ ဂွံပါလုပ်ပ္ဍဲဌာနန္တရ တိုက်သြန်ဗဟဵုမွဲမွဲဂှ် ပြဟ်ဟ်ဏံ ပရေၚ်ဆေဝ်တာ တာဒၞာလဝ် ချိုတ်တ်ပၠိုတ်တ် ၜိုန်ဟၟဲဏီကီုလေဝ် “ဒ္ဂေတ်ဝတ် သိက္ခာပိုဒ်” ဂှ် ညးတအ် ဒးတာဒၞာအာဏောၚ်ဂှ် ဟီုသ္ဂးလဝ်ရ။
“တိုက်သြန်ဗဟဵု အေန်ဒေါနဳယှာဂှ် ပရေၚ်ဒတူလာၚ်ဗၠးၜး ဇြဟတ်ဍိုန်လျစှ်ေကၠုၚ်တုဲ ပရေၚ်ဘပဠတအ် နွံကၠုၚ်ဏောၚ်” ဂှ် တၠပညာဘောဂဗေဒ မာဿတာ တောၚ်ဟဳအာဟမေတ်ဂှ် ဟီုသ္ဂးလဝ်ရ။
သ္အာၚ်နူဂှ်ပၠန် နကဵုသၟာပရေၚ်ဍုၚ်ကွာန်မွဲမွဲတၠ သွက်ဌာနန္တရ အလံၚ်ညးစၞးတိုက်သြန်ဗဟဵုဂှ် ၜိုန်ရဒးနုက်တိတ် နူကဵုဗော်ကီုလေဝ် ပရေၚ်ဆက်ဆောံ ကဵုဗော်ဂှ် ခိုၚ်ကၠိုက်မာန်ဒၟံၚ်ဏီရဂှ် ညးဟီုလဝ်ဏီရ။
ပ္ဍဲပရေၚ်ဒက်ပ္တန် ဂကောံတိုက်သြန်ဗဟဵု အခိၚ်ပြဟ်ဟ်လၟုဟ်ဏံဂှ် ပရေၚ်အုပ်ဓုပ်ဂမၠိုၚ် သမ္မတထံက်ကဵုလဝ်ဂလာန် ညးလုပ်ဂကောံ(၆)တၠ ကၠတ်ထဝ်ရုဲစှ်ပတိုန်ကဵုလဝ်ပါလုပ် ဂကောံဗုက် နွံဒၟံၚ်မွဲဂကောံတုဲ ပ္ဍဲဂှ် ညးလုပ်ဂကောံ (၅)တၠဂှ် ကၠုၚ်နူဂကောံလဵုဟွံဟီု အခိၚ်လၟုဟ်ဏံ ဒှ်ညးရေၚ်တၠုၚ်ဒၟံၚ် ဒဒှ်ညးအုပ်ဓုပ်တိုက်သြန်ဗဟဵုတုဲ ပ္ဍဲကဵုညးတအ်မွဲတၠဂှ်မ္ဂး ဒှ်တၠပညာပရေၚ်ပိုန်ဒြပ်ရောၚ် ဂွံတီကေတ်ရ။
စပ်ကဵုအကာဲအရာဏံတုဲ ၜိုန်ရအာတ်မိက်လဝ် တိုက်သြန်ဗဟဵုအေန်ဒေါနဳယှာ ကေုာံဂကောံလစှ်ေဗော်ဒုၚ်ကာ ကၠတ်ထဝ်ဒုၚ်လျိုၚ် သၞောဝ်ဥပဒေအပြောံ သွက်ဂွံကဵု တၚ်စၟတ်သမ္တီမမိက်ကဵု မွဲမွဲကီုလေဝ် ပွမဟီုဂးသွဟ်ကဵုလဝ် ဟၟဲလဝ်ရောၚ်။
Ref; Straits Times