ပဠဝ်၊ ဒဳဇြေမ်ဗာ (၁၀)
ပ္ဍဲပွိုၚ်ဍုၚ်ပဠဝ်၊ ရးတၞၚ်သဳ ပရေၚ်ပၞာန်ၜါလ္ပာ် မကြံၚ်မ္ၚိုဟ်ဒၟံၚ်ဂှ် ပေါဲဗ္တိုက်တံ သာသ္ကာတ်မြဟ်ကၠုၚ်မာန်ဂှ်ရ နကဵုညးဍုၚ်ကွာန်တံ ပၟိက်ဟွံမွဲမ္ဂး သွက်ဟွံဂွံကၠောန်သ္ပ အာကၠုၚ်အိုတ်ဂှ်ကီု သွက်ဂွံဒ္ဂေတ်ဗက်ကဵု စေဝ်ပၞောန် မလလောၚ်ပ္တိတ်လဝ်တံဂှ် တမ်ဒပ် (၁) ခရိုၚ်ဗိက် ကဵုလဝ်သတိရ။
စနူဂိတုဒဳဇြေမ်ဗာ သတ္တာဟပထမ တုဲကၠုၚ်တေံတုဲ ဂကောံဒပ်ပံၚ်ကောံစဵုဒၞါညးဍုၚ်ကွာန်ဒေသတံ လုပ်စိုပ်ဗ္တိုက်ကၠုၚ် ဗ္ဒိုပ်ဒပ်ကံၚ်ဇြဳပၞာန် ကေုာံ ဒၞါဲမဖျေံလဝ်ဒပ် မၞုံအပ္ဍဲပွိုၚ်ဍုၚ်ပဠဝ်တံ အဆက်က်ရ။
ကြဴနူ PDF ဒေသတံ လုပ်စိုပ်ဗ္တိုက်တုဲဂှ် လ္ပာ်ကံၚ်ဇြဳပၞာန် ဟိုတ်နူပလေဝ်ပလေတ်လဝ် ပရေၚ်ပၞာန်ဂှ်ရ ပရေၚ်ပၞာန်ၜါလ္ပာ် သာသ္ကာတ်မြဟ်ကၠုၚ်ရ။
ဟိုတ်ဂှ်ရ နကဵုညးဍုၚ်ကွာန်တံ ညံၚ်ဂွံဒ္ဂေတ်ဗက်ကဵု စေဝ်ပၞောန် မလလောၚ်ပ္တိတ်လဝ် ဗွဲမဗဗွဲကဵုအခိၚ်တံဂှ် ညးဒုၚ်တာလျိုၚ် လလောၚ်ပရိုၚ် တမ်ဒပ် (၁) ခရိုၚ်ဗိက် ဒုၚ်လဝ်ဂုဏ်နမေတ္တာရ။
ပ္ဍဲဂိတုဒဳဇြေမ်ဗာ (၈) တုဲကၠုၚ်တေံဂှ်လေဝ် တမ်ဒပ် (၁) ခရိုၚ်ဗိက်၊ ဂကောံဇြုံဇာတ်ဂြိုပ် (တောကြီး မြွေဟောက်အဖွဲ့) ၊ဂကောံဒပ်ဒမၠုက်သၞိၚ် (အရိပ်ပြောက်ကျားအဖွဲ့) တံ ပံၚ်တောဲဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ပဝတ်ကုန် ကေုာံ ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲၝောံခန်ပွိုၚ်ဍုၚ်ပဠဝ်ဂှ်ရ။
အပ္ဍဲပရေၚ်ဗ္တိုက်ဏံဂှ် ပရေၚ်ဇီုကပိုက်ချိုတ်ဂျိုၚ် လ္ပာ်ဂကောံဒပ်ကံၚ်ဇြဳပၞာန်တံဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် တမ်ဒပ်(၁) ခရိုၚ်ဗိက် သ္ဂးလဝ်ရ။
ပ္ဍဲပွိုၚ်ဍုၚ်ပဠဝ်ဂှ် ကြဴနူဒပ်ပၞာန်သီအဝဵုတုဲ ဟိုတ်နူကဵုပေါဲဗ္တိုက် ဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်ဒေသတံဂှ်တုဲ ညးဒေသ (၅၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ပရိုၚ်−သြၚ်လောန်တိုၚ်(မ်)