ဇိုၚ်ကျာ်၊ ဒဳဇြေန်ဗာ(၁၁)
တွဵုရးဍုၚ်မန်၊ ဍုၚ်ဇိုၚ်ကျာ်၊ နူဗ္ဒပ်ဗၠာဲသၟိၚ်တိဍာ်ရးဇိုၚ်ကျာ် သ္ကိုပ်ထိၚ်ရးကီု သီုဗၠာဲသၟိၚ် ညး(၂ )တၠဂှ် ဒဳဇြေန်ဗာ တ္ၚဲစၟတ်တ္ၚဲ (၁၀) ဏံ သဝ်တ္ၚဲ အခိၚ်ၜိုတ် (၃) နာဍဳဂှ် ဟိုတ်နူဒးဒုၚ်ပန်လဝ်ကဵုလွဟ်တုဲ ဒးချိုတ်အာလဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဗၠာဲသၟိၚ်ထိၚ်ရး မောၚ်ကိုဝ်ကိုဝ် ကေုာံကောန်ဒပ်ဗၠာဲသၟိၚ် ခိုၚ်ဇြဝ်ထောန်တအ်၊ ပ္ဍဲအခိၚ်က္လေၚ်စဴကၠုၚ် ဗ္ဒပ်ဇိုၚ်ကျာ် နူကဵုကွာန်ဒဒန်တာ (ဥတ္တံတာ) ၊ ပွိုၚ်ဍုၚ်ပံၚ် ပ္ဍဲလတူဂၠံၚ် မတ်မလီု – လဂုၚ်ဂှ် သၟာရပ်လွဟ် ဟွံတီယၟုၜါတၠ ဗက်ကၠုၚ် ကဵုကွဳလိုန်ဓာတ်တုဲ ပန်လဝ်နကဵုလွဟ်ရ။
ဟိုတ်နူဒးဒုၚ်ပန်လဝ်ကဵုလွဟ်ဂှ်ရ ဗၠာဲသၟိၚ်ထိၚ်ရး မောၚ်ကိုဝ်ကိုဝ်ကဵု ကောန်ဒပ်ခိုၚ်ဇြဝ်ထောန်တအ် ဂွံလဝ်ဘဲဝပ် ပ္ဍဲက္ဍိုပ် ကေုာံပ္ဍဲဗုၚ် (၄)လစုတ်ဇဳဇဳတုဲ ပ္ဍဲကဵုဒၞာဲ ဒှ်ပရေၚ်ပရောဂှ်ဟေၚ် ဒးချိုတ်အာလဝ်ရ။
ဇွကောန်ဒပ်ဗၠာဲသၟိၚ်ကံၚ်ဇြဳပၞာန် ချိုတ်အာဂှ် ပလံၚ်ဗစိုပ်ဏာလဝ် ရုၚ်ဂဥုဲညးဍုၚ်ကွာန် ဍုၚ်ပံၚ်ရောၚ် ဂွံတီကေတ်ရ။
ကြဴနူဗၠာဲသၟိၚ်(၂)တၠ ဒးဒုၚ်ပန်ဂစိုတ်လဝ် နကဵုလွဟ်ဂှ် ဒပ်ကံၚ်ဇြဳပၞာန် ကၠောန်သ္ပကၠုၚ်ဒၟံၚ် ပွမကၟာတ်ဂၠံၚ်ဂၠိုက်ဂၠာဲ ပွမဖံက်ပန်လွဟ် ပ္ဍဲဂၠံၚ်ဇၞော် မတ်မလီု-လဂုၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
နူဂကောံလဵု ပန်ပသောၚ်လဝ် ကောန်ဒပ်ဗၠာဲသၟိၚ်ၜါတၠရောဂှ် စဵုကဵုလၟုဟ်ဏံ ဟွံဂွံဆဵုကေတ်လဝ် ပရေၚ်လလောၚ်တြးဏီရ။
ဗ္ဒပ်ဗၠာဲသၟိၚ်တိဍာ်ဇိုၚ်ကျာ်ဂှ် တုဲကၠုၚ်မွဲၜါတ္ၚဲတေံလေဝ် ဒးဒုၚ်ဗတိုက်လဝ်ကဵု ဒရုမ်တုဲ ပ္ဍဲပရေၚ်ဗတိုက်ပန်ဂှ် ကောန်ဒပ်ဗၠာဲသၟိၚ် (၂) တၠ ဂွံလဝ်ဘဲဝပ် ဟွံဒးဒှ်ဂဝိၚ်နွံလဝ်ရဂှ် ဂွံတီကေတ်ရ။
ပရိၚ် – သြၚ်လောန်တိုၚ်(မ်)