လဳမာ – ဒဳဇြေန်ဗာ(၁၃)
ဗက်ပၟိက် တၚ်ညးထ္ၜးဆန္ဒဂမၠိုၚ် အာတ်မိက်လဝ်ဂှ်တုဲ တၚ်ပတိုန်ဂလာန် သွက်ဂွံပဆုဲပြံၚ် ပေါဲရုဲစှ်ကောန်ကရေတ်မွဲတၚ်ဂှ် သမ္မတပဳရူတၟိ ဒဳနာဘိုဝ်လာတဳ ဟီုသ္ဂးလဝ် ပ္ဍဲဂလာန်ပၟိၚ်ရုပ်ဒမျိုၚ်ကၟိန်ဍုၚ်ရ။
ညးထ္ၜးဆန္ဒ ကဵုလ္ၚီတၠဂမၠိုၚ်တအ်ဂှ် အာတ်မိက်ကၠုၚ်လဝ် သွက်ဂွံနုက်တိတ် နူကဆံၚ်ဌာနန္တရ သွက်ဂွံကၠောန်ဗဒှ် ပေါဲရုဲမာဲထပ်အဇာ ကၠတ်ထဝ်ကောန်ကရေတ်ရ။
အလုမ်မွဲကၟိန်ဍုၚ်ပဳရူဂှ် သၟာထ္ၜးဆန္ဒဂမၠိုၚ် ဂၠိုၚ်ကဵုလ္ၚီ တိတ်စိုပ်လတူဂၠံၚ်တုဲ သွက်ဂွံထပ်အဇာ နာဲဗြဴဂှ် ကေုာံကၠတ်ထဝ်ကောန်ကရေတ်ဂှ် အာတ်မိက်ကၠုၚ်လဝ် သွက်ဂွံကၠောန်ဗဒှ်ပေါဲရုဲစှ်မာဲတုဲ တၚ်သ္ဂုတ်သွာတ်သာ်ဏံ မံက်တိတ်ကၠုၚ်ရ။
စရၚ်အၚ် အခိၚ်ကၠောန်ဗဒှ် ပေါဲရုဲစှ်နာနာ သွက်သၞာံ ၂၀၂၄ ကၠုၚ်စိုပ်ဏံဂှ် ကြဴနူဟီုသ္ဂးကၠုၚ် သမ္မတပတိုန်ဂလာန်တုဲဂှ် သၟာထ္ၜးဆန္ဒဂမၠိုၚ် ပ္ဍဲပရေၚ်အကြေပ်ဂြတ် ပရေၚ်ဍုၚ်ကွာန် က္တဵုဒှ်ဒၟံၚ်လၟုဟ်ဏံဂှ် ကၠောန်သ္ပဒၟံၚ်ပရေၚ်အာတ်မိက် သွက်ဂွံဗလးပ္တိတ်ကဵု သမ္မတဗဟဵုလ္ပာ်ပါဲ သၟာပရေၚ်ဍုၚ်ကွာန်ဂမၠိုၚ် ပလှ်ဖျေံနူကဆံၚ်တုဲ ရပ်ထိၚ်ဒဝ်လဝ်ဂှ်ရောၚ် ဂွံတီကေတ်ရ။
ပ္ဍဲရးဒေသ မသ္ပကဵု ပရေၚ်ကလိုက်ကၟဵု ကၟိန်ဍုက်ပဳရူ ခရိုၚ်လတူကုန်ဒဵု နဒဒှ်ပေါဲထ္ၜးဆန္ဒ မဆောတ်ယောၚ်ဂှ် ဒၞာဲသ္ဇိုၚ် သွက်သမ္မတတြေံ ကေၚ်ဒှ်လဝ်အာစာဘာလေဝ် ဒှ်ရ။
သၟာထ္ၜးဆန္ဒဂမၠိုၚ် စံၚ်လဝ်ဗ္ဒပ်ဗၠာဲသၟိၚ်ကီု သီုကဵုပလီုပလာ်လဝ် သၞေဟ်က္ၜၚ်ကျာသၟတ် ဂကောံရပ်လွဟ်ဂမၠိုၚ်သုၚ်စောဲဒၟံၚ်ဂှ်တုဲ ဇက်ဂၠောဲတိုန်အာ လတူဂၠံၚ်တုဲ ဗၠာဲသၟိၚ်လၞိန်ဗပိန်အဓိကိုရ်တအ်ဂှ် သုၚ်စောဲဗုမ်ဍာ်ရမတ်ပြဟ် လၞိန်ဗပိန်လဝ် ညးထ္ၜးဆန္ဒတုဲဂှ် ပ္ဍဲဍုၚ်ဇၞော်လဳမာလေဝ် မၞိဟ်ထ္ၜးဆန္ဒ နွံကဵုကၠံရ။
ပ္ဍဲပေါဲထ္ၜးဆန္ဒ ပ္ဍဲဒေသအေန်ဒိတ်(သ်)ဂှ် အောန်အိုတ် မၞိဟ်ၜါတၠ ဒးချိုတ်အာလဝ်နွံမံၚ်ရဂှ် ညးမၞုံတာလျိုၚ်ဂမၠိုၚ် ဟီုသ္ဂးလဝ်ရ။
မာဿဘိုဝ်လာတဳ အာယုက်(၆၀)သၞာံဂှ် သ္ပကဵု အံသဝ်ကၟိန်ဍုၚ် နကဵုအသံပၟိၚ် သွက်ဂွံပလီုကၠတ်ထဝ်ကောန်ကရေတ်တုဲ ခရာအကြာကဵုနာဍဳဂှ် သွက်ဂွံစုတ်အဇာ ဒၞာဲသမ္မတတြေံ မာဿတာကေတ်စတေဲလိုဝ်ဂှ် ဟီုယဵုကၠုၚ်လဝ်သစာရ။
သမ္မတပဳရူတြေံ မာဿတာ ကေတ်သတေဲလိုဝ်ဂှ် ဒးဒုၚ်ရပ်လဝ် နကဵုတၚ်စောတ်စောဲ ပရေၚ်ပၠန်ဂတးတုဲ ပေါဲထ္ၜးဆန္ဒ အလုံမွဲကၟိန်ဍုၚ် သိၚ်ၚ်ကြဳကြဳဂှ် ဆက်က္တဵုဒှ်ဒၟံၚ် လုကဴတ္ၚဲ မဂၠိၚ်သ္ၚောဲရဂှ် ဂွံတီကေတ်လဝ်ရ။
Ref;CNA