ဗုက်ပျေန်၊ ဒဳဇြေမ်ဗာ (၁၄)
ဒပ်ကံၚ်ဇြဳပၞာန်တံ ကြဴနူဘပဠ ထဍေၚ်ပ္တိတ် ညးဒေသကွာန်ယတနာပုၚ်၊ ပွိုၚ်ဍုၚ်ဗုက်ပျေန်၊ ရးဒေသဇၞော်တၞၚ်သဳ အတေၚ်အဓမ္မတုဲဂှ် ဖျေံလဝ်ဒပ် အပ္ဍဲကွာန်ဂှ်ရောၚ် ညးတာလျိုၚ် PDF ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဒဳဇြေမ်ဗာ (၃) တုဲကၠုၚ်တေံ ဂကောံဒပ်ပံၚ်ကောံ PDF ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် ကုန်ဗ္ဒိုပ်ပယျဵု ကံၚ်ဇြဳပၞာန် မၞုံကွာန်ယတနာပုၚ်၊ ပယျဵုသေံ−ဗၟာဂှ်တုဲ ပ္ဍဲကဵုပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန် (၃) တၠ ချိုတ်တုဲ (၈) တၠ ကလိဂွံလဝ်ဝပ်ရ။
ပ္ဍဲကဵုပရေၚ်ဗ္တိုက်ဏံတုဲဂှ် ဒပ်ကံၚ်ဇြဳပၞာန် ပန်ပှော်ဒၟံၚ် လွဟ်ဇၞော် နကဵုဇြဟတ်ဒပ် လၟိဟ်ဗွဲမဂၠိုၚ်ဂၠေၚ် ဟွံပိုတ်သ္ကုတ်တုဲ ကြဴနူလုပ်စိုပ်ကၠုၚ် အပ္ဍဲကွာန်တုဲဂှ် ကဵုလဝ်ဇြဟတ်ဂရိုဟ် ကုညးဒေသတံ သွက်ဂွံတိတ်စ္ဍးအာ နူကဵုကွာန်ဂှ်ရ။
လ္ပာ်ကံၚ်ဇြဳပၞာန် ဟိုတ်နူကဵုကၠုၚ်ဇြဟတ်ဂရိုဟ်ဂှ်ရ ညးဒေသကွာန်ယတနာပုၚ်တံဝွံ ဂြိပ်ဒဴပါဲဒလေတ်အာ လ္ပာ်ကွာန်ခံၚ်လှဲ လ္ပာ်ဍုၚ်သေံတေံဂှ်တုဲ ညးဒေသသၟေဟ်တံဂှ် ဆုဲပြံၚ်အာ ဒၞါဲဗၠးဘဲတံအိုတ်ဂှ် ဂွံတီကေတ်ရ။
ညးတာလျိုၚ် PDF ဒေသမွဲတၠဂှ် ယဝ်ရပေါဲဗ္တိုက်ၜါလ္ပာ် သ္ကာတ်မြဟ်ကၠုၚ်မ္ဂး နူကဵုဒပ်ကံၚ်ဇြဳပၞာန် သွက်သ္ဂောံထိၚ်ကၠေံ ကုကွာန်ယတနာပုၚ် မဒှ်ဒတန်ဗြိုဟ် လ္ဂောံကဵုရေၚ်ပၞာန်တံ ကၠာတဲဂှ်တုဲ ထဍေၚ်ပ္တိတ်ဒၟံၚ် ညးဒေသတံ နူကဵုအပ္ဍဲကွာန်ဂှ်ရောၚ် ဟီုရ။
ကွာန်ယတနာပုၚ်ဝွံ ဒှ်ကွာန်ဒုၚ်သ္ဇိုၚ်ကဵု ကတိုၚ်ရတ်တိတံတုဲ ဒးဂၠါဲစသုၚ်ဒၟံၚ်တုဲ သီုကဵုဒှ်ကွာန် လၟိဟ်သ္ၚိအပံၚ် (၂၀၀) ပြၚ်နွံတုဲ လၟိဟ်မၞိဟ် (၈၀၀) ပြၚ် နွံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)