လ္ဂုၚ်၊ ဂျူလာၚ် (၁၁)
ပေါဲရုဲမာဲ ကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်သီအဝဵု မပဠေဝ်ဒၟံၚ် သွက်ဂွံကၠောန်ဗဒှ်ဂှ် ဟွံဒုၚ်တဲ သ္ပစၟတ်သမ္တီလးလးရဂှ် ဗော်ဒဳမဝ်ကရေဇြဳကောန်ဂကူ NLD လလောၚ်ပ္တိတ်လဝ် ပ္ဍဲဂိတုဂျူလာၚ် (၉) ဂှ်ရ။
ကံၚ်ဇြဳပၞာန်ဝွံ ဗွဲကြဴသီအဝဵုတုဲ ဟိုတ်နူကၠဟ်ပါဲလဝ် သွဟ်ပေါဲရုဲမာဲ ၂၀၂၀ ဂှ်ရ အခိၚ်ညးဍုၚ်ကွာန်မှာဇန်တံ ဒစဵုဒစးပၠန်ဂတးဒၟံၚ်ဂှ် သွက်ဂွံဗဂေတ်မတ် ညးဍုၚ်ကွာန်တံကဵု ဍုၚ်ဂၠးတိတံတုဲ သွက်ဂွံကၠောန်ဗဒှ် ပေါဲရုဲမာဲမွဲပၠန်ဂှ် ပ္တိတ်ကသပ်ဂိုတ်ဂ္စါန်ဒၟံၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကံၚ်ဇြဳပၞာန် ဒဒှ်မသီကေတ်အဝဵု အဓမ္မဂှ်ဝွံ ပွမကိတ်ညဳကဵု သၞောဝ်သ္ဇိုၚ်ဒက်ပ္တန် အလဵုဍေံတံ မသ္ပဒတန်စၞောန်ပျးလဝ်ဂှ် ဟွံမွဲသၟးဟွံက သီုကဵုသီပလီုလဝ် ကဝ်မယှေန်ပေါဲရုဲမာဲကၟိန်ဍုၚ်မလုပ်သၞောဝ် သမ္မတကၟိန်ဍုၚ်ဟေၚ် အခေါၚ်ဒက်ပ္တန်နွံတုဲ ကၠတ်ထဝ်ကၟိန်ဍုၚ် မသ္ပဒတန်လဝ်ရဂှ် သ္ဂးလဝ်ရ။
ကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်သီအဝဵု မဒက်ပ္တန်လဝ်ဂှ်ဝွံ ဒဒှ်မဗဗွဲဓဝ် ဟွံမွဲတုဲ ဇၟာပ်ပ်ဍေံတံ ရေၚ်တၠုၚ် သၞောဝ်ဥပဒေ၊ သၞောဝ်ဥပဒေဒေသ ကေုာံ ပေါဲရုဲမာဲ မပါလုပ် လၟေၚ်ကမၠောန်အိုဿီုဂှ် သ္ပစၟတ်သမ္တီ ဟွံဒုၚ်တဲလးလးရဂှ် ဗော် NLD လလောၚ်ပ္တိတ်လဝ်ရ။
ဟိုတ်ဂှ်ရ သွဟ်ပေါဲရုဲမာဲ ၂၀၂၀ ဂှ်ဟေၚ် ဗွဲမကိတ်ညဳကဵု ဆန္ဒညးဍုၚ်ကွာန်ဂှ် တန်တဴဒၟံၚ် ဗွဲမလုပ်သၞောဝ်ဖိုဟ်တုဲ ဗော်ဂအုပ်ဒဳမဝ်ကရေဇြဳကောန်ဂကူဝွံ ပတှ်ေဒုၚ်တဲ ရပ်စပ်လဝ် အဝဵုညးဍုၚ်ကွာန် ဍိုက်က်ပေၚ်ၚ်ရဂှ် NLD သ္ဂးရ။
ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ် ကၠုၚ်စိုပ်ပေါဲရုဲမာဲ သၞာံ ၂၀၂၃ ဏံ အလုံမွဲကၟိန်ဍုၚ် သွက်ဂွံကၠောန်ဗဒှ် စၟအ်အ်ဒၞါဲမာန်ဂှ် ရေၚ်တၠုၚ်ဒၟံၚ် လၟေၚ်ကမၠောန် ပကောံပကေဝ် စရၚ်မာဲသ္ဇိုၚ် ကေုာံ စရၚ်လၟိဟ်မၞိဟ်ယျဂှ် ထ္မံက်ပ္တိတ် ဟီုဂးလဝ်ရ။
ဗော်ဂအုပ်ဒဳမဝ်ကရေဇြဳကောန်ဂကူ NLD ဂှ် တုဲကၠုၚ် ပ္ဍဲပေါဲရုဲမာဲ ၂၀၂၀ ဂှ် ဂွံဇၞးလဝ် (၈၂%) ပြၚ်တုဲ ညးစၞးကၠတ်ထဝ် (၉၂၀) တၠ ဒးဒုၚ်ရုဲစှ်လဝ်ရ။
ပရိုၚ်−သြၚ်လောန်တိုၚ်(မ်)