ညံၚ်ညးဍုၚ်ကွာန်ဂမၠိုၚ် ဂွံဗကပ်ဗဗေၚ်ကဵု PPTကေုာံကပေါတ်ကၠောန်ပ္တိတ်ဆက်စပ် မဒှ်အထံက်တိုၚ်ဒပ်ပၞာန်ဂှ် ဂကောံကုတ်ဗပိုတ်သြန်ဆီဍံက်စောန် ဗတိုက်ဖ္အောဝ်

မတ်မလီု – ဒဳဇြေန်ဗာ(၁၃)

သွက်ဂွံဗကပ်အာဗဗေၚ်ကဵု ကပေါတ်ဗၞိက်ကုမ္ပဏဳ PPT ကၠောန်ပ္တိတ် သေံပိုၚ်ပြဳ မပိုၚ်ပြဳလဝ်ဂကောံယှေဝ်ယာ ကမၠောန်ကၠေၚ်ဍေန် ကေုာံသၟုဟ်ဓာတ်သဘာဝ မဒှ်ပၞော်ဂွံသြန်ဍုၚ်သ္အာၚ် ထံက်ပၚ်ကဵုဒၟံၚ် ဒပ်ပၞာန် ကေတ်ဇြဟတ်နကဵုလွဟ်တုဲ သီကေတ်လဝ်အဝဵု ညံၚ်ဂွံဆက်ကၠောန်ပွပ္ကီုပရာပ်မာန် ဂၠိုၚ်အိုတ်ဂှ် ဂကောံကုတ်ဗပိုတ်သြန်ဆီဍံက်စောန် ဗတိုက်ဖ္အောဝ်ကၠုၚ်ရ။

သွက်ပရေၚ်ကေတ်အရေဝ်ကၟာတ်လဒဵု နူကၟိန်ဍုၚ်နာနာ ဟိုတ်နူလဇုဲလဇဒၟံၚ်တုဲ အလဵုညးဍုၚ်ကွာန်ဂမၠိုၚ် ဗကပ်ဗဗေၚ်ဒစဵုဒစးကဵု ကပေါတ်ဗၞိက် PPTကၠောန်ပ္တိတ်လဝ်ဂှ်တုဲ သွက်ဂွံကၟာတ်လဒဵုအာဂှ် ဟီုသ္ဂးလဝ်ရ။

“ပ္ဍဲဂိတုဒဳဇြေန်ဗာဂှ် ညံၚ်ဂွံဗကပ်ဗဗေၚ်ဒစဵုဒစးအာကဵု ကပေါတ် ကၠောန်ပ္တိတ် နူ PPT ကဵု ကုမ္ပဏဳပံၚ်တောဲဒၟံၚ်ဂှ် စကၠောန်ရေၚ်တၠုၚ်ဒၟံၚ်ရ။ သ္ကုတ်လကြဴဏံလေဝ် ကပေါတ်ဍေံတအ်ကၠောန်ပ္တိတ်တိုက်ရိုက်ကီု၊ ကပေါတ်ကၠောန်ပ္တိတ်တိုက်ရိုက်ဟွံသေၚ်ကီု ဆက်ဂၠိုက်ဂၠာဲစၟဳစၟတ်တုဲ ညးဍုၚ်ကွာန်တအ်လေဝ် ကဵုဂွံပါလုပ် မွဲဒပ်မွဲဇြဟတ်ညိဂှ် ဗတိုက်ဖ္အောဝ်ဏာရ” ဂှ် ဂကောံပရေၚ်ကုတ်ဗပိုတ်သြန်ဆီဍံက်စောန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကုမ္ပဏဳ PPT ဂှ် ပံၚ်တောဲကဵုခရိုဝ်နဳပ္ဍဲကၟိန်ဍုၚ်ဗၟာတုဲ ပံၚ်ကဵုကုမ္ပဏဳ Brighter Energy၊ Brighter Energy Retail၊  Tunn Starတအ်တုဲ ကၠောန်သ္ပပ္တိတ်ဒၟံၚ် အေဂျေန်ဝိုၚ် PPT၊ ကၠေၚ်စက်-ကၠေၚ်ကလိတ်နာနာ ကေုာံ Cafe Amazonတအ်ရဂှ် ဂွံတီကေတ်ရ။

တုဲကၠုၚ် ပ္ဍဲသၞာံ ၂၀၂၁ ဂှ် ကုမ္ပဏဳ PPT  ဒုၚ်ကဵုလဝ် ဂကောံပၞာန် သြန်ဒဝ်ဠာအမေရိကာန် အပံၚ်တာန်(၄၅၈.၉) တာန်တုဲ ကြဴနူ Total စ္ဍးတိတ်အာတုဲဂှ် ဒှ်ကၠုၚ်ညးက္ဍိုက်က္ဍိုပ် ကမၠောန်ကၠေၚ်ဍေန် ကေုာံသၟုဟ်ဓာတ်သဘာဝဗၟာ အဓိကကီု သွက်သၞာံ ၂၀၂၂လေဝ် အပံၚ်ဒဝ်ဠာ ကရပ် (၁၀၀၀)တာန် ဒုၚ်ကဵုမာန်ရောၚ်ဂှ် ဂွံတီကေတ်ရ။

ကုမ္ပဏဳ Brighter Energy , Brighter Energy Retail တအ်ဂှ် ဒှ်ကုမ္ပဏဳပါ် ဂကောံဗွဝ် KBZ တုဲ စတမ်နူသၞာံ ၂၀၁၉ ဂှ် ပံၚ်တောဲကဵု ကုမ္ပဏဳ PTTOR ပါ် PPT တုဲ ပံက်ကၠုၚ်လဝ် ဆေၚ်ကၠေၚ်သုၚ်စောဲစက် ကေုာံ ဆေၚ် Cafe Amazon တအ်ရဂှ် ဂွံတီကေတ်ရ။

သ္အာၚ်နူဂှ်ပၠန် ကုမ္ပဏဳ Tunn Star လေဝ် စတမ်နူသၞာံ ၂၀၁၈ ဂှ် ပံၚ်တောဲကဵု PPT တုဲ ဒှ်ညးစၞးသွံတြးဒၟံၚ်ကၠေၚ်စက် တဆိပ် PPT ကၟိန်ဍုၚ်ဗၟာမွဲတၠရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)