သၟာကမၠောန်ဆုဲပြံၚ်ကၟိန်ဍုၚ်ဗၟာဂမၠိုၚ် ကြဴနူဒပ်ပၞာန်သီအဝဵုတုဲ ဟိုတ်နူအခေါၚ်အရာကမၠောန်ပ္ဍဲဍုၚ် အောန်ကြဳစှ်ေကၠုၚ်တုဲ ဇၟာပ်ဒဒှ်တ္ၚဲ လုပ်စိုပ်ဒၟံၚ်ဍုၚ်သေံ နကဵုဂၠံၚ်တရဴလုပ်သၞောဝ်ကီု သီုကဵုဂၠံၚ်တရဴ ဟွံလုပ်ကဵုသၞောဝ်ရ။ ဟိုတ်ဂှ်ရ သၟာကမၠောန်ဆုဲပြံၚ် လုပ်စိုပ်ဒၟံၚ်ဍုၚ်သေံ နကဵုဂၠံၚ်တရဴ ဟွံလုပ်ကဵုသၞောဝ်ဂမၠိုၚ် ပ္ဍဲကာလလၟုဟ်ဏံ ဒးဆေၚ်ဒၟံၚ်မုက်ကဵု အခက်ခုဲဗီုပြၚ်လဵုရော။ အခေါၚ်အရာ က္လိဂွံကမၠောန်ကီု သီုကဵုပရေၚ်အလဵုအသဳသေံပ္တိတ်ကဵုဒၟံၚ် တၞးကာဒ်သာ်ပ္ကဴဂှ် အကာဲအရာ နွံသာ်လဵုရော။ စပ်ကဵုအကာဲအရာဏံတုဲ သၟာန်သွဟ်လဝ် ကေုာံညးမၞုံတာလျိုၚ် ဇာနှိက်ပရေၚ်အခေါၚ်အရာသၟာကမၠောန်ဆုဲပြံၚ် ဥူအံၚ်ကျဝ်ရ။
-အလန်ကၠာအိုတ်ဏံ အကာဲအရာ ပရေၚ်သၟာကမၠောန်ဆုဲပြံၚ်ကၟိန်ဍုၚ်ဗၟာတအ် လုပ်စိုပ်ကၠုၚ်ဒၟံၚ် နူကဵုပယျဵုမွဲကဆံၚ်၊ အကာဲအရာလုပ်စိုပ်ကၠုၚ်ဒၟံၚ် နကဵုသၞောတ် MOU ဆက်နွံဒၟံၚ်ဗီုပြၚ်လဵုရော။ ပရေၚ်ဒးဒုၚ်ရပ် ပ္ဍဲကဵုပယျဵုဂမၠိုၚ်ဂှ် နွံဒၟံၚ်ဏီဖိုဟ်ရဟာ။
နူကဵုကၟိန်ဍုၚ်ဗၟာပိုဲ လုပ်စိုပ်ကၠုၚ်ဍုၚ်သေံ လုပ်ကၠုၚ်ဒၟံၚ် နသၞောတ် MOU လုပ်ကဵုသၞောဝ်ကီု၊ ဟွံလုပ်ကဵုသၞောဝ်ကီု နွံဒၟံၚ် အတိုၚ်ပကတိဏီရ။ ယဝ်ရကၠုၚ် လ္ပာ်ဍာန်လုပ်သၞောဝ်တှ်ေ အကာဲအရာဂွံဖျေံစိုတ် နွံဒၟံၚ်ရ။ ယဝ်ရကၠုၚ် ဍာန်ဟွံလုပ်ကဵုသၞောဝ်တှ်ေ အန္တရာယ်နွံရ။ ဂွံဗၠးတိတ်အာဂှ်လေဝ် နွံမံၚ်ကီု ဒးဒုၚ်ရပ်ကေတ်အရေဝ်တုဲ ဒးဒုၚ်ကလေၚ်ပလံၚ်ဏာ ဌာန်ဒၟံၚ်ဇကုလေဝ် နွံဒၟံၚ်ရ။
-တုဲပၠန် လၟိဟ်မၞိဟ်ဒးဒုၚ်ရပ် ဒးဒုၚ်ကလေၚ်ပလံၚ်ဖျဴ ၜိုတ်ဂလိုၚ်လဵု နွံကၠုၚ်ယျရော။
အလဵုအသဳသေံ ပ္ဍဲမွဲကာလပြံၚ်သၠာဲကၠောံ နူကဵုသၞာံ ၂၀၁၁ ၂၀၂၂ ဂှ် ရပ်ဂွံလဝ် နူကဵုကၟိန်ဍုၚ်ဝုတ်ဒိုဟ် ဗၟာ၊ ကမ္ဘောဒဳယျာ၊ သေံလဴတအ်ဂှ် တြဴလက်ပြၚ်တုဲ ကလေၚ်ပလံၚ်ဖျဴလဝ် ဌာန်ဒၟံၚ်ရဂှ် ကေၚ်လလောၚ်တြးကၠုၚ်လဝ် မွဲဝါရ။ သွက်သၞာံ ၂၀၂၂ ပ္ဍဲကာလလ လောၚ်တြးကၠုၚ်လဝ်ဗီုဏံဟၟဲဂှ် ပိုဲဂွံဟီု ပရေၚ်ရပ်ဂွံ ပရေၚ်ဗၠးတိတ်အာ ချိုတ်တ်ပၠိုတ်တ်ဂှ် ဝါတ်ဂါတ်လောန်ရ။
-ပရေၚ်လုပ်စိုပ် ဟွံလုပ်ကဵုသၞောဝ်ဂှ် လတူနူဂိတုတုဲကၠုၚ်တေံ ဂၠိုၚ်တိုန်ဒၟံၚ်ဟာ။ အကာဲအရာဗီုလဵုဆက်နွံဒၟံၚ်ရော။
ယဝ်ရ ရံၚ်ကဵုပရေၚ်တတ်ကၠောံပယျဵု ဟွံလုပ်ကဵုသၞောဝ်တှ်ေ ကြဴနူ ၂၀၁၁ ဂိတုဖေဖဝ်ဝါရဳဂှ် ဇၟာပ်ဒဒှ်တ္ၚဲ ဆက်ဂၠိုၚ်တိုန်ဒၟံၚ်ရ။ သ္ကုတ်လကြဴဏံ ပရေၚ်ရပ်စပ်လေဝ် ဂုဏ်နူဂၠိုၚ်တိုန်ဒၟံၚ်တုဲ ဒေါံအာဂှ် ဟွံသေၚ်ပုဟ်။ ကၠုၚ်ဂှ် ကၠုၚ်ဒၟံၚ်ရ။ ဆဂး ဒုၚ်တဲ ဗီုအခိၚ်ကၠာတေံဂှ် ဟွံဂွံဆဵုကေတ်ရ။ သၟာကမၠောန်ဆုဲပြံၚ် လုပ်ကၠုၚ် ဂၠံၚ်ဍာန်ဟွံလုပ်သၞောဝ် ဟွံဂွံကမၠောန်တအ်ဂှ် နွံဒၟံၚ်ရ။
-အခေါၚ်အရာကၠောန်ကမၠောန်တအ်ရော ဂွံဂၠာဲဂွံဂှ် ဝါတ်ဒၟံၚ်ဟာ။ နွံဗီုပြၚ်လဵုရော ပါ်ပါဲသ္ၚဳဂၠိပ်ကဵုညိ။
အေဂှ်တှ်ေ ဗီုဏံရ။ အလဵုအသဳသေံဂှ် မၞိဟ်ၜိုတ်လုပ်ကၠုၚ် သီုဖအိုတ်ဂှ် ကၠောန်ကဵုလိက်တၞးလုပ်သၞောဝ်ဂှ် ဟွံသေၚ်ပုဟ်။ ပ္ဍဲညးတအ်ဂှ် ဌာနဝန်ဇၞော်အလဵုအသဳညးတအ်ကေုာံ ဂကောံအလဵုအသဳကဆံၚ်ကၟိန်ဍုၚ်တအ် ချပ်ဂၞန်ဖျေံသ္ဂုတ်သွာတ်တုဲမှ ပ္တိတ်ကဵု စၟတ်တဲအခေါၚ် အခိၚ်အခါမံၚ်တန်တဴကီု၊ စၟတ်တဲအခေါၚ် ကၠောန်ကမၠောန်ကီုရ။ အခိၚ်ဍေံ ကဵုဍေံ၊ ဗ္ၜတ်ဍေံ ကဵုဍေံ ညးတအ် ပ္တိတ်ကဵုရ။ အလဵုအသဳသေံ ကဵုကၠုၚ်စၟတ်သမ္တီ တုဲကၠုၚ်လကြဴအိုတ်ဏံဂှ် နူကဵုဂိတုဩဝ်ဂေတ် စၟတ်တ္ၚဲ (၁) စဵုကဵုပ္ဍဲစၟတ်တ္ၚဲ (၁၅)ဂှ် သၟာကမၠောန် မပ္တမ်ကဵုဗၟာ၊ ကမ္ဘောဒဳယျာ၊ သေံလဴ၊ ဗဳယာတ်နာမ်၊ စိုပ်ကၠုၚ်ဒၟံၚ် ပ္ဍဲကဵုဍုၚ်သေံဂမၠိုၚ် ဟိုတ်နူဟိုတ်နာနာတုဲ ယဝ်ရတၞးလိက်စၟတ်တဲ အခေါၚ်မံၚ်တန်တဴဟၟဲမ္ဂး ပ္ဍဲကဵုကာလဂှ်ဟေၚ်ရ ကဵုစရၚ်ကု ဌာနဝန်ဇၞော်သၟာကမၠောန်တုဲ ဒးဂရၚ်ပတိုန်ဏောၚ်ဂှ် စၟတ်လဝ်ရ။
အေဂှ်တှ်ေ မိက်ဂွံဟီုဂှ် နူဂိတုဩဝ်ဂေတ် စၟတ်တ္ၚဲ (၁) စဵုကဵုဂိတုဩဝ်ဂေတ် စၟတ်တ္ၚဲ(၁၅) ပ္ဍဲကဵုဂှ်ဟေၚ်ရ ညးကဵုပတိုန် တၞးလိက်ဂရၚ်ပ္တီရ။ ဆဂးဂှ်မၞိဟ်စိုပ်ဒၟံၚ် ကၠာတေံဂှ်တှ်ေ ဟိုတ်နူလိက်အသံပၟိၚ် နွံဒၟံၚ်ဂှ်ရ အာဂရၚ်ပတိုန်ဗက်ဂှ် ဂွံကၠုၚ်စၟတ်တဲ မံၚ်တန်တဴဗွဲသၞောဝ်၊ စၟတ်တဲအခေါၚ် ကၠောန်ကမၠောန်တအ်ရ။
ဆဂးဂှ် အခိၚ်လကြဴဏံရ။ ကြဴနူဂိတုဩဝ်ဂေတ်ဂှ် သေတ်တေမ်ဗာ၊ အံက်တဝ်ဗာ၊ နဝ်ဝေမ်ဗာ လၟုဟ်တှ်ေ ဒဳဇြေန်ဗာရ။ ပ္ဍဲကဵုတ္ၚဲဗီုဂှ်တအ်ဏံ ညးလုပ်စိုပ်ကၠုၚ်လဝ်ဂမၠိုၚ် ဒးဆဵုဂဗလဝ်ကဵုဒဒိုက် ပ္ဍဲကဵုအခိၚ်ကၠာတေံဟီုဂှ် ဨဗီုဂှ် အလဵုအသဳသေံလေဝ် ဟွံကဵုစၟတ်တဲ အခေါၚ်မံၚ်တန်တဴရ။ ဒၟာနူဂှ်ရ ဍေံဂှ် ဒးပါဲဓလေတ်အောပ်မံၚ်တုဲမှ ဒးမံၚ်ဒၟံၚ်ပ္ဍဲဒၞာဲထေက်ကြိုက်တုဲတှ်ေ သွက်ဂွံဂွံကမၠောန်လေဝ် အခေါၚ်ဟၟဲရ။ ဨဂှ်တှ်ေ ဒှ်ဒၟံၚ်ဒိုက်ဂှ်တှ်ေ မၞိဟ်တအ်ဏံရ။ ယွံ။
-နောက်ပြီး မှတ်ပုံတင်(ပန်းရောင်ကဒ်)မရှိတဲ့လူတွေ အလုပ်အကိုင်အခွင့်အလမ်းသိပ်မရှိဘူးပေါ့နော်။ သူတို့မှာ ဘယ်လို အခက်အခဲတွေ ကြုံနေရလဲ။အလုပ်အကိုင်မရှိတဲ့လူတွေရဲ့ အကျိုးသက်ရောက်မှုတွေကရော ဘယ် လိုမျိုးရှိပါသလဲ။
-တုဲပၠန် သွက်မၞိဟ်လိက်တၞးစၟတ်သမ္တီ(ကာဒ်အရံၚ်သာ်ပ္ကဴ) ဟၟဲတအ် အခေါၚ်ဂွံကၠောန်ကမၠောန် ဟၟဲစကွေံပုဟ်ဏး။ ပ္ဍဲကဵုညးတအ် ဒးဆဵုဂဗဒၟံၚ် အခက်ခုဲဗီုလဵုရော။ ပရေၚ်ဒးဇီုကပိုက်ကဵု မၞိဟ်ကမၠောန်ဟၟဲတအ် ဗီုပြၚ်လဵုနွံရော။
လတူနူအခေါၚ်အရာ ကၠောန်ကမၠောန်ဟၟဲဟီုဂှ် အတိုၚ်သၞောဝ်ဥပဒေလေဝ် သွက်ဂွံမံၚ်တန်တဴ ဂွံလုပ်ကဵုသၞောဝ်ဂှ် ဒၟာနူ ဟွံဒှ်ဂှ်ရ စဒှ်ဒဒိုက် နူကဵုဂှ်ရ။ လတူနူ ဟွံဂွံကမၠောန်ဂှ် အခေါၚ်မံၚ်တန်တဴ ဗွဲမလုပ်သၞောဝ် ဟိုတ်နူဟၟဲတုဲ ဂွံအာကၠုၚ် ဗၠးဗၠးၜးၜးလေဝ် ဟၟဲပုဟ်။ တုဲပၠန် မံၚ်လေဝ် ဟွံဂွံမံၚ်ကဵု စိုတ်ၜိုဟ်ဟ်ပုဟ်။ အခိၚ်ဟွံရုဲ ဒးဒုၚ်ရပ်ကေတ်အရေဝ်တုဲ အကာဲအရာ ဒးကလေၚ်ပလံၚ်ဖျဴဂှ် နွံမာန်ဒၟံၚ်ရ။ ဟိုတ်ဂှ်ရ မုက်ဂၞန် (၁) ပၟိက်ဇၞော်ဂှ် အခေါၚ်အရာကမၠောန်ဟီုဂှ် အခေါၚ်မံၚ်၊ အခိၚ်ပ္တိတ်ကဵုလဝ် စၟတ်တဲအခေါၚ် ကၠောန်ကမၠောန်ဂှ် ဂွံလဝ်ဟေၚ်မှ ဍေံဂွံဒှ်မာန်ရ။ တၞးလိက်တအ်ဂှ် မုလေဝ်ဟွံဂွံလဝ်တှ်ေ အကာဲအရာပရေံကၠုၚ်မာန်ရ။ ယွံ။ နူကၠာမွဲအံၚ်ဂှ် ကောန်ကမၠောန်ဗၟာတအ် ဂစိုတ်ထောံဇကုဇကုလေဝ် နွံရ။
-အဆက်ဖိုလ် ပရေၚ်ဒးဇီုကပိုက်လကြဴဂှ် ဗီုပြၚ်လဵုနွံဒၟံၚ်ရော။ အရာဏံဂှ် ပ္ဍဲမဳဒဳယာသေံလေဝ် ဓမံက်ထ္ၜးလဝ်ရ။
ကောန်ကၟိန်ဍုၚ်ဗၟာ ဒၞာဲမံၚ်လေဝ်ဟၟဲ၊ သ္ဇက်စလေဝ်ဟၟဲ၊ ကမၠောန်လေဝ်ဟၟဲ မုလေဝ်ဟၟဲဂှ်ရ ဟွံတၟေၚ်ရပုဟ်။ အခိၚ်ဖျေံကၠုၚ်စိုတ် ညံၚ်ဂွံစဳရေၚ်ဖအိုတ်ထောံလမျီု ဘဝမၞိဟ်ဂှ် ဒၟာနူကဵုဗၠာဲသၟိၚ်သေံတအ် ဆဵုကေတ်တုဲတှ်ေ လ္ၚဵုဂှ် ရီုဂွံလဝ်လေဝ် နွံဒၟံၚ်ရ။ အေဗီုဏံလေဝ် နွံရ။ တအ်ဏံဂှ် တိုန်ကၠုၚ် ပ္ဍဲမဳဒဳယာ နွံဒၟံၚ်ရ။ ဟွံတိုန်ကၠုၚ်တုဲ ကောန်ဍုၚ်ကၟိန်ဍုၚ်ဗၟာ ဒးဟဳဒၟံၚ်ပ္ဍဲၜဳသောကတအ်ဂှ် ပ္ဍဲကဵုဒၞာဲလဵု နွံမံၚ်ဂလိုၚ်လဵုရောဂှ် ပိုဲတီကေတ်ဟွံမာန်ရ။ မိက်ဂွံဟီုဂှ် ကမၠောန်ပ္ဍဲဍုၚ်ဇကု အောန်ကြဳကၠုၚ်မံၚ်။ ကၟိန်ဍုၚ်လေဝ် ဟွံပြေပြံၚ်ပုဟ်။ ကၠတ်လုပ်စိုပ်ကၠုၚ် ဍုၚ်မွဲလပါ်တေံရ။ တုဲပၠန် ယဝ်ရတၞးလိက်လုပ်သၞောဝ်လေဝ် ဟၟဲပုဟ်တှ်ေ ပြသၞာသ္ကုတ်လကြဴတေံဂှ် ဖိုလ်ပရေံပရေံ ဟၟဲပၟိက်တအ် ဒးဆဵုဂဗဗွဲမဂၠိုၚ်မာန်ရဂှ် တော်ချကေတ်မာန်ရ။
-မၞိဟ်တၞးလိက်တၚ်ဂၞၚ်ဟၟဲ မနၞိဟ်တၞးကာတ်စၟတ်သမ္တီ (ကာဒ်အရံၚ်သာ်ပ္ကဴ) ဟၟဲဂှ် အခေါၚ်အရာကမၠောန်ဟၟဲပုဟ်ဏး။ မုဟိုတ်ဗီုလဵုရော သ္ၚဳဂၠိပ်ကဵုညိ။
ပ္ဍဲကဵုဍုၚ်သေံဂှ်တှ်ေ ဟွံတုပ်ကဵုဍုၚ်ဗၟာရ။ ရုၚ်စက်၊ ရုၚ်ကမၠောန်တအ် နွံဂၠိုၚ်ဒၟံၚ်။ တုဲပၠန် သွက်ကမၠောန်ပၠန်လေဝ် ကော်ဒၟံၚ်နကဵု MOU လုပ်ကဵုသၞောဝ် အရိုဟ်ဟ်တ္ၚဲ လုပ်ကၠုၚ်ဒၟံၚ်ဗွဲမဂၠိုၚ်ရ။ အခေါၚ်အရာကမၠောန် ပ္ဍဲဍုၚ်သေံဂှ် နွံမံၚ်ရ။ ညံၚ်ဂွံဂွံကမၠောန် ဒးသ္ၚောဲမံၚ်ဂှ် ဂုဏ်နူအခေါၚ်မံၚ်တန်တဴ ပ္ဍဲဍုၚ်ဍေံဗွဲမလုပ်သၞောဝ် ဟၟဲဏောၚ် ဟီုမံၚ်ရ။
-မၞိဟ်လုပ်ကၠုၚ်ကဵုMOUလ္ၚဵုဂှ် ဟွံပြေပြံၚ်နွံမံၚ်ရ။ ပ္ဍဲလတူဏံ ဗီုလဵုညာတ်ကေတ်ရော။
ဟွံပြေပြံၚ်ပုဟ်ဟီုဂှ် အရာဏံတုဲတဴကဵု ပရေၚ်ကေတ်လျိုၚ်၊ ပရေၚ်ဒုၚ်လျိုၚ်ရ။ ဣဏံဂှ် ယဝ်ရ ပိုဲဒးဟီုကၠးကၠးတၟးတၟးတှ်ေ အဓိပ္ပါယ် MOU ဗီုဗၟာဂှ်တှ်ေ ဌာနဝန်ဇၞော် သၟာကမၠောန်ဍုၚ်ဗၟာကီု၊ ဌာနဝန်ဇၞော် သၟာကမၠောန်ဍုၚ်သေံကီု ကိစ္စကော်လိၚ် ကောန်ကမၠောန်လုပ်ကဵုသၞောဝ်ရ။ နူတၠကမၠောန်ဍုၚ်သေံ ကော်ကေတ်သၟာကမၠောန် နွံပ္ဍဲဍုၚ်ဗၟာဂှ်လေဝ် ရုၚ်ကလုတ်မဆေၚ်စပ်တအ်ဂှ် ဒးအာတ်ပၟိၚ်ကဵုအခေါၚ် ဇရေၚ်ဌာနဝန်ဇၞော် သၟာကမၠောန်သေံဍေံတအ်ရ။ မၞိဟ်တြုံၜိုတ်မူစိတၠ၊ မၞိဟ်ဗြဴမူစိတၠ ကော်ကောန်ကမၠောန်ဟီုဂှ် ဂွံပၟိၚ်ကဵုအခေါၚ်ဂှ်တုဲတှ်ေ ဆက်စၠောံကဵုအေဂျေန်ဇြဳကၟိန်ဍုၚ်ဗၟာတုဲ ပ္ဍဲကဵုဂတမုက်ဌာနဝန်ဇၞော် သၟာကမၠောန်ဂှ် ထ္ပက်စၟတ်တဲ နကဵုဘာသာအေၚ်္ဂလိက်၊ ဗၟာ၊ သေံပိဘာသာတုဲ ဒးကော်နၚ်ရ။ နကဵု ဌာန်ဒၟံၚ်၊ ဂၞန်သ္ၚိ၊ ဂၞန်ကၠအ်ချိုတ်တ်ပၠိုတ်တ်ဂှ် ဒးကၠောန်ကမၠောန် ပ္ဍဲဗ္ဒမ်ဂံက်က် ရုၚ်စက်ဂှ်ဏောၚ်ဂးတုဲ ဍေံဂှ် အာကဵုသၞောတ် MOU ရ။
ဆဂးဂှ် ကိစ္စပိုဲဒးဆဵုဒၟံၚ် ပ္ဍဲဍုၚ်သေံမွဲအံၚ်ဏံဂှ် မုဒှ်ဗီုလဵုရောတှ်ေ ဟိုတ်နူအေဂျေန်ဇြဳ ပရေၚ်ကေတ်လျိုၚ်၊ ပရေၚ်ဒုၚ်လျိုၚ် ဟၟဲမွဲသာ်တုဲ ပ္ဍဲကဵုလိက်ကသုက်လေဝ် အခေါၚ်အရာကမၠောန်ဟၟဲပုဟ်။ ကမၠောန်လေဝ်ဟၟဲပုဟ်။ လစိုပ်ကၠုၚ်အဏံတုဲမှ နူကဵုအေဂျေၚ် ဒုၚ်လဝ်ယၟုချုက်လဝ်လိက်ဂှ် ကဵုဍေံတအ် လိက်တိတ်နူကမၠောန်ရ။ အရာဏံဂှ် အလဵုအသဳဗတိုက်သရိုဟ်ထောံ ပိုတ်တ်သ္ကုတ်တ်မှ ဂွံကၠေံအာမာန်ရ။ MOUဂှ် စိုပ်ကၠုၚ်လပါ်ဏံရ။ ကမၠောန်ဂှ်ဟၟဲပုဟ်။ ဒးအာတ် လိက်တိတ်နူကမၠောန်ဏောၚ်။ ဒးဂရၚ်အာတ် ဒၞာဲတၞဟ်မွဲဒၞာဲပၠန်ဏောၚ်ဟီုဂှ် ပ္ဍဲကဵုသဘာဝ MOU ဂှ် ဟွံပါလုပ်ပုဟ်။
-အလန်လကြဴအိုတ်ဏံတှ်ေ စပ်ကဵု အခေါၚ်အရာသၟာကမၠောန်တုဲ ယဝ်တၚ်မိက်ဂွံထပ်ဟီုဗပေၚ်နွံတှ်ေ ဟီုကဵုညိ။
အဓိကဂှ်တှ်ေ ပရေၚ်ပိုန်ဒြပ်ခက်ခုဲကဵုဒှ်၊ ဟိုတ်နူအကာဲအရာမွဲမွဲတုဲ ခက်ခုဲကဵုဒှ် ယဝ်ရပိုဲအာဍုၚ်မွဲလ္ပာ်တေံဏောၚ်တှ်ေ အကာဲအရာဍုၚ်မွဲလ္ပာ်တေံ၊ အခိၚ်အခါ၊ ပရိုၚ်တၚ်ဂၞၚ်၊ တၚ်ဂၞၚ်ဍာံဍာံတအ်ဂှ် ဒးလ္ၚတ်လဝ်သီုဖအိုတ်ဏောၚ်။ တုဲတှ်ေ အခိၚ်လၟုဟ်ဏံ စိုပ်အာဍုၚ်သေံတှ်ေ ဂွံကမၠောန် ဍာံဍာံရဟာ၊ အလဵုအသဳသေံဂှ် ပ္တိတ်ကဵု တၞးလိက်စၟတ်တဲ အခေါၚ်မံၚ်တန်တဴဟာ ဒးလ္ၚတ်လဝ်ထေက်ဏောၚ် မိက်ဂွံကဵုကသပ်ရ။