မျာၚ် – ဒဳဇြေန်ဗာ(၂၀)
ပ္ဍဲပွိုၚ်ဍုၚ်မျာၚ် ရးမဂွေ ကွဳစက်ကောန်ဒပ်ကံၚ်ဇြဳပၞာန် ပါဗက်ကၠုၚ်ဂှ် ဒၟာနူဂကောံပရေၚ်စဵုဒၞာဂမၠိုၚ် တံၚ်ခတိုဟ်ဗတိုက်လဝ်ကဵုမာၚ်တုဲ ပရေၚ်ဇီုကပိုက်ချိုတ်လဝ် နွံမာန်ရဂှ် ဗိုလ်လေတ်ကျာ ပ.က.ဖ မျာၚ် တမ်ဒပ်(၁) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဒဳဇြေန်ဗာ တုဲကၠုၚ် စၟတ်တ္ၚဲ (၁၇) ပ္ဍဲအခိၚ်နူဂယးဂှ် ကွဳစက် ကံၚ်ဇြဳပၞာန် ကေုာံပျူသဝ်ထဳ ဖျေံလဝ်ဗ္ဒပ်ပ္ဍဲကွာန်တယျေတ်ကွ ဍိုက်ပါဗက်ကၠုၚ်ဂှ် တံၚ်ခတိုဟ်လဝ် နကဵုမာၚ်ရ။
ကွဳစက်ကံၚ်ဇြဳပၞာန် ကေုာံပျူသဝ်ထဳတအ်ပါဗက်ကၠုၚ်ဂှ် ဒးဒုၚ်ဗတိုက်လဝ် နကဵုပၠံၚ်တိတ်ဂတ ပ္ဍဲဗ္ဒာဲကွာန်ဝေတ်ကျုၚ်တုဲ နူလပါ်ကံၚ်ဇြဳပၞာန် ဟိုတ်နူဒဒုၚ်ဗတိုက်လဝ်ဂှ်ရ ဗက်ပန်ပှော်ဒၟံၚ်ကြာန်န် ပွိုၚ်ၜိုတ် (၃၀) မိနေတ် နွံရဂှ် ဗိုလ်လေတ်ကျာ ဟီုသ္ဂးလဝ်ရ။။
သ္အာၚ်နူဂှ်ပၠန် ဟိုတ်နူ ကရောၚ်ပၞာန်ဏံ ဒးဒုၚ်ဗတိုက်လဝ် နကဵုမာၚ်ပေပါတုဲ အကာဲအရာ ကွဳစက်ဂှ် ဆက်အာဂတတေံဟွံဂွံ နွံမံၚ်ရဂှ် ညးဆက်ဟီုလဝ်ဏီရ။
ဟိုတ်နူ ဂကောံပရေၚ်စဵုဒၞာဒေသဂမၠိုၚ် ဗတိုက်ပန်ပှော်လဝ်ဂှ်ရ ကွဳစက်ကၠုၚ်ကဵုပၞာန်ရီု နူမျာၚ် မပ္ဍိုက်ဏာ ညးဇီုကပိုက်ချိုတ်လဝ် နူလပါ်ကံၚ်ဇြဳပၞာန်တုဲ ဒးဒုၚ်တံၚ်ခတိုဟ်လဝ်မာၚ်ဂှ်ရ ကွဳစက်လီုအာဂှ် စွံလဝ် ပ္ဍဲ အ.ထ.က မျာၚ် စၟတ်(၁) ရဂှ် ဂွံတီကေတ်ရ။
ပရေၚ်ပန်ပှော်ဏံ ပ.က.ဖ မျာၚ် တမ်ဒပ်(၁) ဗတိုက်ပန်လဝ်ကြပ်ပ်တုဲ ၜိုန်ရသီကေတ်လဝ် လွဟ်မကမ် နူကံၚ်ဇြဳပၞာန်မာန်ကီုလေဝ် ဟိုတ်နူကရောၚ်ပၞာန်ရီုတုဲ ဒးဆုတ်ကလေၚ်လဝ်ရဂှ် ဂွံတီကေတ်ရ။
ပ္ဍဲရးမဂွေ ဟိုတ်နူဒပ်ကံၚ်ဇြဳပၞာန် ကၠောန်သ္ပဒၟံၚ် ပွမစံၚ်ပလီုကွာန် ကောန်ညးဍုၚ်ကွာန်တအ် အရိုဟ်ဒဒှ်တ္ၚဲဂှ်ရ ဒပ်ပရေၚ်စဵုဒၞာဂမၠိုၚ် ကၠောန်သ္ပကၠုၚ် ပရေၚ်တံၚ်ခတိုဟ်မာၚ် ပန်ဗတိုက် ကရောၚ်ပၞာန်ကံၚ်ဇြဳ ကြပ်ပ်ရ။
ဟိုတ်နူပေါဲဗတိုက်ဂမၠိုၚ်တုဲ နူလပါ်ကံၚ်ဇြဳပၞာန် ပရေၚ်ဒးဇီုကပိုက်ချိုတ် နွံဒၟံၚ်အရိုဟ်ဒဒှ်တ္ၚဲကီု ညးဍုၚ်ကွာန် (၁) ကိုတ်ပြၚ်တအ်လေဝ် ဒးဓလေတ်ပါဲဒၟံၚ် ဘဲပၞာန်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီုဓာတ် – CJ