ဘာပန်၊ ဒဳဇြေမ်ဗာ (၂၁)
ပ္ဍဲခရိုၚ်ဘာပန် ဗော်သွးကောန်ဂကူကရေၚ် KNU ဂှ် ကံၚ်ဇြဳပၞာန် ဟိုတ်နူကၠောန်သ္ပကၠုၚ် ပရေၚ်ပြုပြေၚ်ပၞာန်တရဴကျာတံဂှ်ရ သ္ၚိဒၟံၚ်ညးဒေသ ဗွဲမဂၠိုၚ်ဂၠေၚ် ဇီုကပိုက်လီုလာ်လဝ်တုဲ ဒးဆေၚ်ဒၟံၚ်မုက်ကဵု အခက်အခုဲတံဂှ် ဒပ်မဟာ (၅) လလောၚ်ပ္တိတ်လဝ်ပရိုၚ်ရ။
တုဲကၠုၚ်ဂိတုဒဳဇြေမ်ဗာ (၁၉) အခိၚ်နူဂယး (၈) နာဍဳဂှ် ဒပ်ကံၚ်ဇြဳပၞာန် ထပ်ထောံလဝ်မခတိုဟ် (၂) မ နကဵုက္ၜၚ်ကျာဗ္တိုက် အပ္ဍဲဒၞါဲကမၠောန်ဝါဗ္ၚ ကွာန်ခဝ်ဝဝ်၊ ဂကောံကွာန်မေဝ်ဝိုၚ်၊ ပွိုၚ်ဍုၚ်ဒွါလော၊ ခရိုၚ်ဘာပန် KNU ဂှ်တုဲ ပ္ဍဲအခိၚ် (၁၀) နာဍဳ (၄) မိနေတ် ပယျာံဂယးဂှ်လေဝ် ထပ်ကၠုၚ်ထောံလဝ်မခတိုဟ် (၂) မပၠန်ဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲဂိတုဒဳဇြေမ်ဗာ (၁၈) ၊ အခိၚ်ဗ္တံ (၇) နာဍဳဂှ် ဒပ်ကံၚ်ဇြဳပၞာန် ထပ်ထောံကၠုၚ်မခတိုဟ် နကဵုက္ၜၚ်ကျာဗ္တိုက် ပ္ဍဲကွာန်ဝါတဝ်လဝ်၊ ဂကောံကွာန်မေဝ်ဝိုၚ်၊ ပွိုၚ်ဍုၚ်ဒွါလောဂှ်တုဲ သ္ၚိဒၟံၚ် (၁၁) မကဵု စာတ်သြောံ (၁) မ ဒးမခတိုဟ်လီုလာ်အာလဝ်တုဲ ပ္ဍဲတ္ၚဲဂှ် အခိၚ်ဗ္တံ ၜိုတ် (၇) နာဍဳဂှ်လေဝ် က္ၜၚ်ကျာဗ္တိုက် ကေုာံ ခမတိုဟ်ဂမၠိုၚ် ထပ်စိုပ်ကၠုၚ်လဝ်တုဲ သ္ၚိဒၟံၚ် (၈) မကဵု စက်ဗုတ်သ္ၚု (၁) မ လီုလာ်အာလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန် ဟိုတ်နူကၠုၚ်စိုပ်ထောံလဝ်မခတိုဟ် အပ္ဍဲဒေသမေဝ်ဝိုၚ်၊ ခရိုၚ်ဘာပန် (၂) တ္ၚဲအဆက်က် ဗီုလၟုဟ်ဂှ်ရ သ္ၚိဒၟံၚ်ညးဒေသ ဒးလီုလာ်ဆောံလေၚ်အာ ဗွဲမဂၠိုၚ်ဂၠေၚ်တုဲ ကောန်ကွာန်တံဝွံ ဒးဆေၚ်ဒၟံၚ်မုက်ကဵု အခက်အခုဲတံရောၚ် ဒပ်မဟာ (၅) သ္ဂးလဝ်ရ။
ပ္ဍဲခရိုၚ်ဘာပန်ဂှ် အပ္ဍဲအကြာတ္ၚဲတံဏံ အကြာဒပ်ကံၚ်ဇြဳပၞာန်ကဵု ဒပ်မဟာ (၅) ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်တံ ဆက်က္တဵုဒှ်ဒၟံၚ်တုဲ အပ္ဍဲပေါဲဗ္တိုက် မက္တဵုဒှ်လဝ် နူဂိတုဒဳဇြေမ်ဗာ (၁၅) စဵုကဵု ဂိတုဒဳဇြေမ်ဗာ (၁၇) တံဂှ် လ္ပာ်ဒပ်ကံၚ်ဇြဳပၞာန် အောန်အိုတ် ဗၞတ် (၄) တၠ ချိုတ်အာလဝ်နွံဂှ် ဂွံတီကေတ် အတိုၚ်တၚ်လလောၚ်တြးတံရ။
ပရိုၚ်−သြၚ်လောန်တိုၚ်(မ်)