ပလ၊ ဒဳဇြေမ်ဗာ (၂၂)
ပ္ဍဲဍုၚ်ပလ၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ် စနူဂိတုဒဳဇြေမ်ဗာ (၂၁) လဒေါဝ်တ္ၚဲဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ လ္ပာ်ကံၚ်ဇြဳပၞာန် ဟိုတ်နူပန်ပှော်လဝ်လွဟ်ဇၞော်တုဲ ကောန်အရာပ် (၅) တၠ ဇီုကပိုက်ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အဃော ဂကောံဒပ်စဵုဒၞါညးဍုၚ်ကွာန်တံ စိုပ်ဒၟံၚ်လ္ပာ်အရာပ် စၟတ် (၁) ကဵု စၟတ် (၂) ၊ ဍုၚ်ပလဂှ် စနူဒပ်ကံၚ်ဇြဳပၞာန်တံ ပန်ပှော်ကဵု လွဟ်လက်နက် (၄) မဂှ်တုဲ ပေါဲဗ္တိုက်ၜါလ္ပာ်တံ စက္တဵုဒှ်လဝ်ရ။
လွဟ်ဇၞော်၊ မကမ် လ္ပာ်ဒပ်ကံၚ်ဇြဳပၞာန်တံ မပန်ပှော်ဏာ အပ္ဍဲပေါဲဗ္တိုက်ဂှ်ဝွံ ဒၟါနူဒတုံစှ်ေ ဗ္တိုဟ်ထ္ကးအာလဝ် အရာပ်စၟတ် (၁) ကဵု စၟတ် (၂) ဂှ်ရ ညးဍုၚ်ကွာန်ကောန်အရာပ် (၅) တၠ ကလိဂွံဝပ်ဇီုကပိုက်လဝ်ရ။
အခိၚ်ပလံၚ်ဗစိုပ် မၞိဟ်ယဲ မကလိဂွံလဝ်ဝပ် ဒးအာလဝ်လွဟ်ဇၞော်တံ ပ္ဍဲရုၚ်ဂဥုဲပဠဝ်ဂှ် ၜါတၠချိုတ်အာလဝ်ရောၚ် ပရိုၚ်ဂမၠိုၚ် မံက်တိတ်ဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ဒၟါနူပေါဲဗ္တိုက် လ္တူဍုၚ်ပလတုဲ ညးဍုၚ်ကွာန်ဒေသ (၃၀၀) ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ညးဍုၚ်ကွာန်ဒေသလ္ၚဵုတံလေဝ် ကၟာတ်ဒးဒၟံၚ် အပ္ဍဲပေါဲဗ္တိုက်ဂှ်ရောၚ် သ္ဂးရ။
အပ္ဍဲပေါဲဗ္တိုက်ၜါလ္ပာ်ဂှ် လာၚ်ဖုၚ်ပရေၚ်ဆက်စၠောံဂမၠိုၚ် ဒးဒုၚ်ထပိုတ်လဝ်တုဲ အကာဲအရာပေါဲဗ္တိုက် လစှ်ေဂှ်လေဝ် ဟွံဂွံတီကေတ်ဏီရ။
တုဲကၠုၚ် ပ္ဍဲဂိတုဒဳဇြေမ်ဗာ (၈) တေံဂှ်လေဝ် ဂကောံဒပ်ပံၚ်ကောံ စဵုဒၞါညးဍုၚ်ကွာန်တံ ကၠုၚ်စိုပ်ဗ္တိုက်လဝ် ဒပ်ကံၚ်ဇြဳပၞာန် ကဵု ဗ္ဒိုပ်ဗၠာဲသၟိၚ်ပလတံရ။
ပရိုၚ်−သြၚ်လောန်တိုၚ်(မ်)