တၚ်ဆက်စၠောံ သၟာန်သွဟ်လဝ် ကေုာံညးမၞုံအခေါၚ်ဟီုဂး ဒပ်ပၞာန်စဵုဒၞာဍုၚ်မန် (MSDF) သ္ကုတ်သၠုၚ်ကျာ နာဲနဂါ။
ဒပ်စဵုဒၞာဍုၚ်မန် (MSDF) ဂှ် ညံၚ်တၠအဝဵုပၞာန်ဂွံကျဗြီု ကေုာံသွက်ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳ ဂွံမံက်တိုန်မာန်ဂှ် ဒှ်ဒပ်ဂကောံရပ်လွဟ် ဒက်ပ္တန်လဝ် နကဵုကောန်ဂကူမန် မွဲဒပ်ရ။ ဟိုတ်ဂှ်ရ တၚ်ဒတူလာၚ် ဒပ်စဵုစဵုဒၞာဍုၚ်မန် (MSDF)၊ ဂှ် အကာဲအရာရေၚ်တၠုၚ်ဒၟံၚ် ညံၚ်ဇြဟတ်ဂွံဇၞော်တိုန်၊ စပ်ကဵုအကာဲအရာ ရန်တၟံလဝ် နကဵုဂကောံရပ်လွဟ် သ္ပစၞးကဵုကောန်ဂကူမန် မွဲဂကောံ တုဲဆက်စၠောံသၟာန်သွဟ်လဝ် ကေုာံညးမၞုံအခေါၚ်ဟီုဂး ဒပ်စဵုဒၞာဍုၚ်မန် (MSDF) သ္ကုတ်သၠုၚ်ကျာ နာဲနဂါရ။
-ကိုပ်ကၠာအိုတ်ဏံ တၚ်ဒတူလာၚ် ဒပ်စဵုဒၞာဍုၚ်မန် (MSDF) ကဵုဂကောံပရေၚ်စဵုဒၞာညးဍုၚ်ကွာန် PDF တၞဟ်တအ် ဗီုလဵုတၞဟ်ခြာရော၊ ဟီုထ္ၜးကဵုညိ။
ဒပ်ပၞာန်ဗၠးၜးဍုၚ်မန် ဒပ်စဵုဒၞာဍုၚ်မန် သ္ကုတ်သၠုၚ်ကျာ၊ သၟဝ်ကျာဂှ် ဗီုလဵုတၞဟ်ခြာ နူကဵုဒပ် PDF တၞဟ်တအ်ရော ယဝ်ရဒးဟီုတှ်ေ သွက်ဂွံဗတိုက်သရိုဟ်ပ္တိတ်ထောံ သၞဒ္တန်ကဝ် ကၠဵုပၞာန်တအ်ပြဟ်ဟ်မာန်ဂှ် ဟိုတ်နူတၚ်ပ္တဝ်က္ဍိုပ် နွံမံၚ်မွဲဓဝ်ဂှ်ရ ပိုဲဂှ် ၜိုတ်လဵုဟွံတၞဟ်ခြာပုဟ်ဂှ် အလန်ကိုပ်ကၠာ မိက်ဂွံဟီုဏာရ။ ပ္ဍဲဒၞာဲဏံဂှ် တၚ်တၟေၚ် ဒပ်စဵုဒၞာဍုၚ်မန် သ္ကုတ်သၠုၚ်ကျာမွဲဂှ်တှ်ေ ဒပ်ပိုဲဂှ် ဒှ်ဒပ် ဒက်ပ္တန်လဝ်ကဵု ကောန်ဂကူမန် ကောန်ညးဍုၚ်ကွာန်မန် မွဲဒပ်ရ။ အရာဏံဂှ် တၟေၚ်တိတ်နူကဵုဂကောံတၞဟ်မွဲဂကောံရ။
-ပ္ဍဲကဵုတွဵုရးဍုၚ်မန်ဟီုတှ်ေ ပ္ဍဲဍုၚ်ရေဝ် ကောန်ဂကူမန် နွံတန်တဴဒၟံၚ်ဂၠိုၚ်အိုတ် မွဲပွိုၚ်ဍုၚ်ဓဝ်ရဂှ် ဒပ်ဂကောံ PDF တအ် ဇြဟတ်ခိုဟ်ဒၟံၚ်ရ။ ဟီုတှ်ေ နကဵုဒပ်စဵုဒၞာဍုၚ်မန် (MSDF) ညံၚ်ဇြဟတ်ဒပ် ဂွံဇၞော်တိုန် ဗီုလဵုဂွံဒက်ပ္တန်အာ နွံဒၟံၚ်ရော။
ပ္ဍဲကဵုလတူတၚ်သၟာန် ဗီုလဵုဂွံဒက်ပ္တန်အာ ဇြဟတ်ဒပ် MSDF ဂွံဇၞော်တိုန်ဂှ် ယဝ်ရ အဲဒးဟီုတှ်ေ PDF ဟီုလဝ်နူကၠၚ်ဏံ ကြပ်သီုဖအိုတ်ဂှ် ဒှ်ညးဍုၚ်ကွာန်မန် သ္ပသ္ဇိုၚ်ကဵု ညးဍုၚ်ကွာန် ကောန်ဂကူမန်ပိုဲရ။ ဒှ်ဒပ် ကောန်ဂကူမန်ဗွဲမဂၠိုၚ် ကဵုဟွံဗၠးတိတ်နူကဵု ဆီမန်ရ။ ဒပ်စဵုဒၞာဍုၚ်မန် သ္ကုတ်သၠုၚ်ကျာ (MSDF) တၟေၚ်တၟဟ်မွဲဂှ်တှ်ေ သ္ပသ္ဇိုၚ်ကဵုဍုၚ်မန်၊ သ္ပသ္ဇိုၚ်ကဵု ညးဍုၚ်ကွာန်မန်တုဲ ဒက်ပ္တန်ကၠုၚ်လဝ်ဂှ်ရ ပ္ဍဲပရေၚ်ပၠန်ဂတးဇၞော်ဏံ နကဵုကောန်ဂကူမန်မွဲဂကောံ ပါလုပ်လဝ်ဂှ် နဒဒှ်သက်သဳသာဓကကီု နကဵုတၚ်ရန်တၟံတၞဟ်သ္အာၚ်ကီု ပိုဲဒက်ပ္တန်ကၠုၚ်လဝ်ရ။ ဟိုတ်ဂှ်ရ ညံၚ်ညးဍုၚ်ကွာန်ဂမၠိုၚ် ဂွံဘိုၚ်ပါလုပ်ရီုဗၚ်ကၠုၚ်မာန်ဂှ် ပိုဲဒးထ္ၜးသက်သဳ နကဵုကမၠောန်ဏောၚ်။ ဒးထ္ၜးသက်သဳပၠန်ဂတးဏောၚ်။ ဒးလုပ်ထ္ၜးကဵုပေါဲဗတိုက်ဏောၚ်။ ဒးဒုၚ်ဂိ ဒးဂံၚ်သၠးပွးဏောၚ်။ လကြဴအိုတ်ဂှ် ပရေၚ်စန်ဒက်လေဝ် ဒးစှ်ေကဵု ပ္ဍဲမွဲအခိၚ်ဓဝ်ရ။ နကဵုနဲကဲစုၚ်ဗီုဏံ ပိုဲစဳမာန်စှ်ေသၞောတ်ချိုတ်ပၠိုတ်တုဲ ညံၚ်ဇြဟတ်ပိုဲဂွံဇၞော်တိုန်အာ ချဳဒရာၚ်အာဏောၚ် အဲမိက်ဂွံဟီုရ။
-ပ္ဍဲလတူဂကောံပၠန်ဂတး လုပ်ဒၟံၚ်ပေါဲဗတိုက်ရပ်လွဟ် သွက်ဂွံဗတိုက်သရိုဟ်ဖျေံ တၠအဝဵုပၞာန်ဂှ် ဗီုလဵုညာတ်ကေတ်ရော။ ပ္ဍဲလတူဏံ သ္ၚဳဂၠိပ်ပါ်ပါဲကဵုညိ။
ဂကောံပၠန်ဂတး ဗတိုက်သရိုဟ်ဒၟံၚ် တၠအဝဵုပၞာန် အခိၚ်တ္ၚဲဏံဂှ် နကဵုအဲ သရောပ်ထောံတုဲ ယဝ်ရဒးသ္ၚဳဂၠိပ်တှ်ေ မွဲ-ပရေၚ်ကုတ်ထပိုတ် ရိုဟ်ကၞက်တၠအဝဵုပၞာန်၊ ၜါ-ဂှ် အဝဵုညးဍုၚ်ကွာန် ညံၚ်ဂွံက္လေၚ်စိုပ် သ္ကေံတဲညးဍုၚ်ကွာန် ၜါတၚ်ဏံဂှ် တုပ်ဒၟံၚ်ညးသ္ကအ် သီုဖအိုတ်ရ။ ဆဂးဂှ် ပ္ဍဲပရေၚ် အဝဵုညးဍုၚ်ကွာန် ညံၚ်ဂွံကလေၚ်စိုပ် သ္ကေံတဲညးဍုၚ်ကွာန် ဒှ်တၚ်မရနုက်ကဵုၜါဂှ် ပိုဲဂွံညာတ်ကေတ် လညာတ်ဟွံတုပ် တၞဟ်ခြာဒၟံၚ်ညိရ။ ဂကောံပၠန်ဂတးညိညလ္ၚဵုဂှ်။ အဝဵုညးဍုၚ်ကွာန် ယဝ်ရစိုပ်သ္ကေံတဲ NLD တှ်ေ ဣဏံဂှ် ဒှ်စိုပ်သ္ကေံတဲညးဍုၚ်ကွာန်ရဂှ် ဂွံညာတ်ကေတ် လညာတ်ညးတအ်၊ လဟီုညးတအ်၊ ပ္ဍဲအေန်တာဗျူညးတအ်ရ။ ဂကောံရပ်လွဟ်ကောန်ဂကူ ကောန်ဍုၚ်အရၚ်ပိုဲဂှ် အရာဏံဂှ် အဝဵုညးဍုၚ်ကွာန် စိုပ်သ္ကေံတဲညးဍုၚ်ကွာန်ရဂှ် ပိုဲဟွံညာတ်ကေတ်ရ။ မုဒှ်ရောတှ်ေ ပ္ဍဲပရေၚ်ဒက်ပ္တန် ကၟိန်ဍုၚ်ဖေတ်ဒရေဝ်ဇေတ်ဇေတ် ၜိုဟ်လလံ ညးဍုၚ်ကွာန်တအ် နွံဒၟံၚ်ပၟိက်ဂှ် နကဵု NLD မွဲဓဝ်အာကေတ်ကေတ် ဟွံဂွံရ။ ဟီုတှ်ေ ယဝ်ရ တၠအဝဵုပၞာန်သရိုဟ်စှ်ေအာတုဲဏောၚ်တှ်ေ ကောန်ညးဍုၚ်ကွာန်မန်ပိုဲ စၟဳမၚ်ဒၟံၚ် နွံဒၟံၚ်ပၟိက် သၞာံဗွဲမလအ်လဂှ် ယဝ်ရဒးဟီုသောၚ်ၚ်တှ်ေ ပရေၚ်ဗၠးၜးလေဝ် ဟီုစဂွံရ။ သွက်ဂွံဒက်ပ္တန် တွဵုရးဍုၚ်မန် မၞုံကဵုအခေါၚ် ကမ်ကုသိုလဝ်ဇကု ဇကုဖန်ဖက်ကေတ်မာန်၊ သွက်ဂွံဒက်ပ္တန်ကၟန်ဍုၚ်ပံၚ်ကောံမာန်ဂှ် ပိုဲဆက်လုပ်အာပေါဲဗတိုက်ဟေၚ်ရဂှ် အဲမိက်ဂွံဟီုဏာရ။
-အလန်လကြဴအိုတ်ဏံ နကဵုဂကောံဒပ်ရပ်လွဟ် သ္ပစၞးကဵုကောန်ဂကူမန်မွဲ စဵုကဵုဒှ် ညံၚ်ကဵုဒပ်ပၞာန်ရခေၚ် AA ဂွံအုပ်ဓလီုအလုမ်ဂကူမန်မာန်ဂှ် ရန်လဝ်နွံဒၟံၚ်ဟာ၊ ဗီုလဵုနွံရော။
တၚ်ရန်တၟံညံၚ်ဂွံဒှ် ဗီုဒပ်ပၞာန်ရခေၚ်(AA) နွံမံၚ်ဟာဟီုတှ်ေ အရာဏံဂှ် ဆေၚ်ဆက်ဒၟံၚ်ကဵု ကောန်ညးဍုၚ်ကွာန်မန်တအ် ပေၚ်ၚ်ရ။ ယဝ်ရညးဍုၚ်ကွာန်တအ် နွံဒၟံၚ်ပၟိက်ဏောၚ်တှ်ေ က္ဍိုပ်သ္ကိုပ်ပရေၚ်ပၠန်ဂတးပိုဲဂှ်တှ်ေ ဆက်ကၠောန်အာဏောၚ် အဲစှ်ေလဝ်စိုတ်ရ။ ပရေၚ်ညးဍုၚ်ကွာန်တအ် ပံၚ်တောဲပါလုပ် ဟွံမွဲမွဲသာ်ဂှ် ဓမံက်ရုပ်ရဴသွပ်လ္ပအ်ပိုဲ ဟွံဂွံရ။ မွဲဒမြိပ်အဲဟီုဒၟံၚ်ဏံဂှ် အုပ်ဏာနိဂီုရ။ အဲဂွံအခေါၚ် ဟီုသွဟ်ဗီုဏံဂှ်လေဝ် တၚ်ဏာဂုဏ်ကဵု ဌာန်ပရိုၚ်သြၚ်လောန်တိုၚ်(မ်) ဗွဲတၟေၚ်ရဂှ် မိက်ဂွံဟီုဏာရ။