က္ဍိုပ်သ္ကိုပ်ပၞာန် သ္ကိုပ်ဗိုလ်ဇၞော်မေန်အံၚ်လှာၚ် သီကေတ်လဝ်အဝဵုကၟိန်ဍုၚ် နကဵုဇြဟတ်လွဟ်ဂှ် သၞာံ၂၀၂၂ ၜိုန်ရစၟတ်သမ္တီလဝ် နဒဒှ်သၞာံၜိုဟ်လလံကီုလေဝ် ပ္ဍဲအခိၚ်သၞာံဏံအိုတ်ဂှ် ပဋိပက္ခပရေၚ်ပၞာန် အလုံမွဲကၟိန်ဍုၚ် သာတုဲသ္ကာတ်မြဟ်တိုန်ကၠုၚ်ရ။ ဟိုတ်ဂှ်ရ အကာဲအရာ ပေါဲသဳကၠဳ စပ်ပရေၚ်ၜိုဟ်လလံ နူလပါ်ကံၚ်ဇြဳပၞာန် ဓမံက်ဒၟံၚ်ရုၚ်ရဴကီု၊ ပရေၚ်ၜိုဟ်လလံကံၚ်ဇြဳပၞာန် မဒုၚ်လဝ်သ္ဇိုၚ် ပ္ဍဲလတူသၞောဝ် ၂၀၁၈ ကေုာံ လိက်ကသုက် NCA ဂှ် ဒှ်ဗလးပရေၚ်ၜိုဟ်လလံ ဍာံစၟတ်မာန်ဟာ၊ ကေုာံအကာဲအရာပ္ဍဲဗလးတိ ဗီုလဵုပရေၚ်တၞဟ်ခြာ ဒၟံၚ်နွံရော။ စပ်ကဵုအကာဲအရာဏံတုဲ သၟာန်သွဟ်လဝ်ကေုာံ သ္ဂံၚ်သလိုၚ်ယျဝ်အံၚ် ညးမပါလုပ်ဗော်ဒုၚ်ကာ က္ဍိုက်က္ဍိုပ်ဗဟဵု ဒပ်ဒဳမဝ်ကရေတ်တေတ် ကွးဘာဂမၠိုၚ် ဆေၚ်ရာကဵုအလုံကၟိန်ဍုၚ်ဗၟာရ။
-အလန်ကၠာအိုတ်ဏံ သၞာံ ၂၀၂၂ ဏံဂှ် ဒှ်သၞာံပရေၚ်ၜိုဟ်လလံရ ကံၚ်ဇြဳပၞာန်ဟီုဒၟံၚ်ဂှ် အတိုၚ်လဟီုညးကဵု ပရောက္တဵုဒှ်ဒၟံၚ် ပ္ဍဲဗလးတိဇေတ်တ်ဂှ် က္တဵုဒှ်တၞဟ်ခြာဒၟံၚ်ဇၞော်ကဵုဇြဟတ်ရ။ ပ္ဍဲလတူဏံ သ္ၚဳဂၠိပ်ပါ်ပါဲကဵုညိ။
ကၠာအိုတ်ဏံ မိက်ဂွံဟီုမွဲဂှ် ပရေၚ်ၜိုဟ်လလံဟီုဂှ် ဒှ်မအရေဝ် ပရေၚ်ဍုၚ်ကွာန်ပါလုပ်ဒၟံၚ် မွဲမရ။ ဟိုတ်ဂှ်ရ ပရေၚ်ၜိုဟ်လလံဂှ် ဟွံကၠောန်သ္ပ ပရေၚ်ဆဵုဂဗသဳကၠဳမွဲသာ်တုဲ ဂွံပရေၚ်ၜိုဟ်လလံ ဟွံမာန်ရ။ ဆၜိုတ် ပရေၚ်ဒေါံပန်ပှော်ရ ဂွံမာန်ဏောၚ်။ သွက်ဂွံဂွံ ပရေၚ်ၜိုဟ်လလံဂှ်တှ်ေ ဝါတ်ဂါတ်ကွေံကွေံဏောၚ်။ ပရေၚ်ၜိုဟ်လလံဟီုဂှ် ပေါဲဗတိုက်ရပ်လွဟ်တအ်၊ ပေါဲပၞာန်တအ် ဟၟဲဂှ် ဒှ်ပရေၚ်ၜိုဟ်လလံဟွံသေၚ်ရ။ ပရေၚ်ၜိုဟ်လလံဟီုဂှ် ပဋိပက္ခမၞုံဒၟံၚ် ပ္ဍဲဍုၚ်ဇကု၊ ပြသၞာ ပ္ဍဲဍုၚ်ဇကုသီဖအိုတ်ဂှ် ပသောၚ်သ္အးထောံမာန်ဟေၚ်မှ ကၟိန်ဍုၚ်ပိုဲ က္လိဂွံ ပရေၚ်ဗၠးၜးမာန်ဏောဂှ် အဲပတှ်ေကေတ်လဝ်ရ။ အခိၚ်ပိုဲရံၚ်အာ လၟေၚ်ပရေၚ်ၜိုဟ်လလံ ကၟိန်ဍုၚ်နာနာတအ်ဂှ်လေဝ် အလဵုအသဳ ညးဍုၚ်ကွာန်ပအပ်ကဵုလဝ်ဂှ်ဟေၚ်ရ ကၠောန်သ္ပသဳကၠဳ ပရေၚ်ၜိုဟ်လလံဏံရ။ တုဲပၠန် ပိုဲတအ်ဂွံကေတ်ပရေၚ်ၜိုဟ်လလံဏံရ။ ယဝ်ရဒးဟီု ပရေၚ်ဆဵုဂဗပိုဲဏောၚ်တှ်ေ သွက်ဂွံဂွံ ပရေၚ်ၜိုဟ်လလံကဵုဒပ်ပၞာန်ဏံဂှ် နွံခြာတၟာသ္ၚောဲဏီဏောၚ်ဂှ် အဲညာတ်ကေတ်ရ။
မုဒှ်ရောဟီုတှ်ေ ပ္ဍဲလက်ထက်အလဵုအသဳ NLD တေံဂှ် ပ္ဍဲပေန်လုၚ် ၂၁ ဗွဝ်ပိုဲဂှ် ပေါဲသဳကၠဳပရေၚ်ဍုၚ်ကွာန်ပိုဲ နွံဒၟံၚ်ရ။ ပေါဲသဳကၠဳပရေၚ်ဍုၚ်ကွာန် ကဆံၚ်ကောန်ဂကူတအ် ပိုဲကၠောန်လဝ်ရ။ အခိၚ်ကၠောန်ဂှ်လေဝ် ဒပ်ပၞာန်ရ သ္ပပခက်ပလာပ်ပထုဲ၊ ဒပ်ပၞာန်ဂှ်ရ သ္ပကဵုဒၟံၚ်ပရေၚ်ဆိုအ်ဗဏောၚ်ဟီုတှ်ေ သွက်ဂွံသဳကၠဳ ပရေၚ်ၜိုဟ်လလံကဵု ဒပ်ပၞာန်ဏံဂှ် အဲထေၚ်ကေတ်တှ်ေ သ္ၚောဲဒၟံၚ်တၟာဂလိုၚ်ဏီ အဲညာတ်ကေတ်ရ။ ဟီုတှ်ေ ယဝ်ရမိက်ဂွံကၠောန်သ္ပ ပရေၚ်ၜိုဟ်လလံဏောၚ် အဲညာတ်ကေတ်ဂှ်တှ်ေ လောဲဒၟံၚ်ရ။ ဆဂးဂှ် ပ္ဍဲတ္ၚဲဏံ သၟန်ပါၚ်ကံၚ်ဇြဳပၞာန်ဟီုဒၟံၚ်ပရေၚ်ၜိုဟ်လလံရ။ ဆဂး ကလေၚ်ရံၚ်အာ ပ္ဍဲကၟိန်ဍုၚ်စမ်။ အသိၚ်ပေါဲဗတိုက်ပိုဲ သာတုဲသၠုၚ်တိုန်ကၠုၚ်ဒၟံၚ်တုဲ ကောန်ညးဍုၚ်ကွာန်ပိုဲတအ် ဒှ်ဒၟံၚ်အကာဲအရာ အာစိုပ်ဒၟံၚ်ဒဒိုက် ဇၞော်ကဵုဇြဟတ်ရ။ ဟိုတ်ဂှ်ရ ပ္ဍဲလၟေၚ်ပရေၚ်ၜိုဟ်လလံဂှ် ယဝ်ရပရေၚ်ၜိုဟ်လလံ ညးဍုၚ်ကွာန် ပါလုပ်ဟွံသေၚ်ပုဟ်တှ်ေ ပရေၚ်ၜိုဟ်လလံဏံဂှ် ဂွံဒှ်ပရေၚ်ၜိုဟ်လလံ ခိုၚ်ဗိုန်တန်တဴအာဍာ်ဇမၠိၚ်မာန်ဂှ် ဒှ်ဟွံမာန်ရ။ ဒၟာနူဂှ်ရ မိက်ဂွံအုပ်နိဂီုဂှ်တှ်ေ ပရေၚ်ၜိုဟ်လလံ ဒပ်ပၞာန်ဟီုဂးမံၚ်တ္ၚဲဏံဂှ် အဲထေၚ်ကေတ်တှ်ေ။ နွံဒၟံၚ် ခရာတၟာသ္ၚောဲဏီရဂှ် ထေၚ်ကေတ်ရ။ တ္ၚဲဏံ ဒပ်ပၞာန်ဟီုလဝ် သၞာံ ၂၀၂၂ ဒှ်သၞာံ ပရေၚ်ၜိုဟ်လလံရ။ နူစတမ်တေံရ ပေါဲဗတိုက်သ္ကာတ်မြဟ်ဒၟံၚ်ရ။ ဒဵုလၟုဟ်လေဝ် ပေါဲဗတိုက် သ္ကာတ်မြဟ်ဒၟံၚ်ဖိုဟ်ရ။ ဟီုတှ်ေ ရံၚ်ကဵုပိုဒ်ဏံတုဲ နွံဒၟံၚ်ပၟိက်ကဵု ပရေၚ်ၜိုဟ်လလံဟာ ဟၟဲပၟိက်ပုဟ်ဟာဂှ် အဲထေၚ်ကေတ်တှ်ေ။ ဒှ်သွဟ် ပြာကတ်တီကၠးဒၟံၚ်ရဂှ် အဲထေၚ်ကေတ်ရ။
-ဟီုတှ်ေ ပ္ဍဲလတူ ကံၚ်ဇြဳပၞာန်သဳကၠဳဒၟံၚ်ပရေၚ်ၜိုဟ်လလံကဵု ဂကောံရပ်လွဟ်ကောန်ဍုၚ်အရၚ် (၁၀) ဂကောံဂှ် ဗီုလဵုညာတ်ကေတ်ရော။
တုဲမွဲပၠန်ဂှ် ပ္ဍဲအရာကံၚ်ဇြဳပၞာန် ဓမံက်ရုပ်ရဴ ပရေၚ်ၜိုဟ်လလံဂှ် ဟီုလဝ်အာအတိုၚ်လၟေၚ်ဂၠံၚ်တရဴ သၞောဝ် ၂၀၀၈ ကဵုလိက်ကသုက် NCA ရ၊ လပါ်ညးတအ်ဂှ် စပ်ကဵု ဂကောံဇြဟတ်ကောန်ဍုၚ်အရၚ်တအ်တုဲ ပံက်လဝ်တြၚ် ပရေၚ်ၜိုဟ်လလံရဂှ် ဟီုလဝ်ရ။ ဆဂးဂှ် လၟုဟ်ပိုဲတအ် သဳကၠဳဒၟံၚ် ကေုာံဂကောံထ္ပက်လဝ်စၟတ်တဲ ပရေၚ်ဒေါံပန်ပှော် (၇) ဂကောံရ။ ကၠာဂှ်သဳကၠဳဒၟံၚ် မွဲမွဲဂကောံရ။ လၟုဟ်ဏံ ဂကောံထ္ပက်လဝ်စၟတ်တဲသီု (၇) ဂကောံ သီုဖအိုတ် ဆဵုဂဗ မွဲစွံသီုဖအိုတ်ဏောၚ် ဟီုဗက်ဂှ် လၟုဟ်ဏံ ဍေံတအ်ဟွံဒှ်ဒတုဲဏီပုဟ်ဂးတုဲ ကလေၚ်ပလန်ကဵုနၚ်လဝ်ပရိုၚ်ဂှ် ဂွံမိၚ်လဝ်ရ။ ရံၚ်အာကဵုပိုဒ်ဏံတုဲတှ်ေ ဍေံဂှ်မိက်ဂွံသဳကၠဳအာ မွဲဂကောံတုဲ မွဲဂကောံဟေၚ်ရ။ ဒၟာနူဂှ်ရ ယဝ်ရမိက်ဂွံသဳကၠဳ ပရေၚ်ၜိုဟ်လလံဏောၚ်တှ်ေ သဳကၠဳကေတ်မွဲမွဲဂကောံ ဟွံဂွံပုဟ်။ တ္ၚဲဏံပိုဲဆဵုဂဗ သဳကၠဳသီုကဵုညးဖအိုတ်မှ ဂွံဂၠာဲသွဟ်မာန်ရ။ ဟိုတ်ဂှ်ရ သဳကၠဳမွဲမွဲဂကောံရ။ ဍေံတအ်ဂွံတၚ်တုပ်စိုတ်ရ။ ဆဂးဂှ်လေဝ် တၚ်တုပ်စိုတ်ဂွံနၚ်လဝ်ဂှ် ကဵုဂကောံလဵုလေဝ် ဟီုထ္ၜးဟွံဂွံ။ ညးလဵုလေဝ် ဟီုဟွံဂွံရ မပ္တမ်ဗီုဏံ လုကဴသဳကၠဳဒၟံၚ် နကဵုသၞောတ်ဗ္ၜတ်အပိုၚ်ခြာဗီုဏံတှ်ေ ပရေၚ်ၜိုဟ်လလံဂှ် သ္ၚောဲလတူသ္ၚောဲမံၚ်ဏီရ။
ကဵုဂကောံ ဟွံဂွံထ္ပက်လဝ်စၟတ်တဲတအ်ရော ပရေၚ်ရေၚ်တၠုၚ် သွက်ဂွံသဳကၠဳ ပရေၚ်ၜိုဟ်လလံဍေံတအ် ဒှ်ကမၠောန်ကီုဟာ ကလေၚ်ရံၚ်စမ်ညိ။ အတိုၚ်ပိုဲတအ် တီလဝ် သီုညးဖအိုတ်ဂှ်ရ။ အတိုၚ်တီဒၟံၚ် သီုအလုံဍုၚ်ရ။ ဟွံဒှ်ကမၠောန်ပုဟ်။ လၟုဟ်ဂှ် ဍေံသဳကၠဳကဵု “ဝ” အဓိကရ။ သဳကၠဳကဵုမိုၚ်ဠာရ။ ဆၜိုတ်ဂှ်ရ သဳကၠဳမာန်လဝ်ရ။ ဂကောံသှ်ေနူဂှ်တှ်ေ မုလေဝ်ဂွံလဝ်တၚ်တုပ်စိုတ် ကၠးကၠးတၟးတၟးဟီုဂှ် ဟၟဲပုဟ်။ လၟုဟ်လေဝ် “ဝ” ဂှ် ဒှ်ဒေသဂွံအခေါၚ်အုပ်ဓုပ်အလဵုဇကုရ။ နကဵုဍေံ အခေါၚ်သွက်ဂွံကဵုဟၟဲပုဟ်။ အရာတအ်ဏံဂှ် ပရေၚ်ဍုၚ်ကွာန်ဍေံတအ် ဗၠေတ်တ်ဟေၚ်ရ။ ဖိုလ်အဆက်ဏံဂှ် ဍေံတအ်ဒးဒုၚ်ဏောၚ်ဂှ် မိက်ဂွံဟီုရ။ တုဲနွံမွဲပၠန်ဂှ်တှ်ေ ပ္ဍဲအခိၚ် ဓမံက်ရုပ်ရဴပေါဲသဳကၠဳ ပရေၚ်ၜိုဟ်လလံပိုဲဂှ် သွက်ဂကောံဇြဟတ် ပါလုပ်ဒၟံၚ်ပ္ဍဲပြသၞာဏံသီုဖအိုတ် ဂွံဆဵုညာတ်မာန်ဂှ် ပၟိက်နွံဒၟံၚ်ရ။ ပ္ဍဲအခိၚ်ကၠာတေံ ကၠာဟွံဂွံစိုပ် ၂၀၂၁ တေံဂှ် ဗွဲတၟေၚ်တှ်ေ ဒှ်ပြသၞာ ဂကောံဇြဟတ်ပၠန်ဂတး ရပ်လွဟ်ကောန်ဍုၚ်အရၚ်ကဵု ဒပ်ပၞာန်ရ။ ဆဂးအခိၚ် ၂၀၂၁ တုဲအာဂှ် ဗီုပြၚ်ပရေၚ်ဍုၚ်ကွာန်ပိုဲ ပြံၚ်သၠာဲကၠုၚ် ဗီုပြၚ်တၟိရ။ လၟုဟ်တှ်ေ NUG ဟီုဂှ် မံက်တိတ်ကၠုၚ်ယျ။ PDF တအ်နွံကၠုၚ်ရ။ ပရေၚ်ၜိုဟ်လလံဂတဏံ ယဝ်ရ မိက်ဂွံဒက်ပ္တန် ပရေၚ်ၜိုဟ်လလံ သွက်ကၟိန်ဍုၚ်ဏောၚ်တှ်ေ အဲထေၚ်ကေတ်ရ။ NUG ပိုဲလေဝ် ညံၚ်ဂွံပါလုပ်ဂှ် ပၟိက်နွံကၠုၚ်ရ။ ကာလဂှ်မှ ပိုဲဂွံက္လိဂွံသွဟ်ရ။ ဗီုဂှ်ဟွံသေၚ်တှ်ေ ညးဂှ်လေဝ် ပါလုပ်ဟွံဂွံပုဟ်ဂးတုဲ ညးလဵုလေဝ် အာပရေၚ်သဳကၠဳ ပရေၚ်ၜိုဟ်လလံဟွံဂွံပုဟ်ဂှ် အဲညာတ်ကေတ်ရ။
-အကာဲအရာဏံဂှ် ဒှ်ဗလးပရေၚ်ၜိုဟ်လလံ ဍာံဇေတ်မွဲမာန်ဟာ၊ သာ်လဵု သ္ၚဳဂၠိပ်ညာတ်ကေတ်လဝ်ရော။
အဲညာတ်ကေတ်ဂှ်တှ်ေ ပ္ဍဲအခိၚ်သဳကၠဳ ပရေၚ်ၜိုဟ်လလံဂှ် ယဝ်ရ အာအတိုၚ်သၞောတ်သ္ဇိုၚ် ၂၀၀၈ တှ်ေ ဂွံပရေၚ်ၜိုဟ်လလံ ဟွံမာန်ရ။ ပ္ဍဲလက်ထက် NLD ဍေံလေဝ် ဍေံဟီုလဝ်ရ။ ကလေၚ်ပလေဝ် သၞောဝ် ၂၀၀၈ဏောၚ် ဟီုလဝ်ရ။ ဆဂးဂှ် အရာဍေံမိက်ဂွံပလေဝ်ဂှ် ဒှ်အကာဲအရာ ပိုဲနွံပၟိက်ဂှ် ဟွံသေၚ်ပုဟ်။ ပိုဲတအ်ဂှ် စၞးဒးကလေၚ်ပလေဝ်သၞောဝ် ၂၀၀၈ ဂှ် ကလေၚ်ချူဓဇက်သၞောဝ်တၟိဂှ် သာတုဲ လောဲမံၚ်ဏီ ထေၚ်ကေတ်ရ။ ယဝ်ဒးဟီုတှ်ေ ပ္ဍဲကဵုဗွိုၚ်သၞောဝ် ၂၀၀၈ ဂှ်တှ်ေ ဆလအ်လေဝ် ကၟိန်ဍုၚ်ပိုဲ ၜိုဟ်သြိုဟ်ဟွံသေၚ်ရ။ လၟုဟ်လေဝ် နကဵုပိုဲတှ်ေ သၞောဝ်သ္ဇိုၚ် ၂၀၀၈ဂှ် အဲထေၚ်ရ။ အလုံညးဍုၚ်ကွာန်ပိုဲသီုဖအိုတ်လေဝ် ဟွံဒုၚ်တဲပုဟ်။ သၞောဝ် ၂၀၀၈လေဝ် ပလီုပါဲတးလဝ် တုဲဒၟံၚ်ရတှ်ေ ဍေံတအ်မိက်ဂွံအာဒၟံၚ် အတိုၚ်ပ္ဍဲသၞောဝ်သ္ဇိုၚ် ၂၀၀၈ ဂှ်တှ်ေ ဗီုလဵုသ္ပလေဝ် ဂွံသဳကၠဳ ပေါဲပရေၚ်ၜိုဟ်လလံ ဂွံဟွံမာန်ပုဟ်ဂှ် အဲညာတ်ကေတ်ရ။
-အလန်လကြဴအိုတ်ဏံ ပ္ဍဲလတူဗလးအကာဲအရာဏံဂှ် နကဵုကံၚ်ဇြဳပၞာန် သာတုဲကၠောန်ရေၚ်တၠုၚ် သၠုၚ်ပတိုန် လၟေၚ်ကမၠောန် ပရေၚ်ၜိုဟ်လလံမာန်ဟာ။ သာ်ဂှ်ဟွံသေၚ်တှ်ေ သွက်ဂွံကၠောန်ဗဒှ်ပေါဲရုဲမာဲ သ္ပကဵုညံၚ်ကံၚ်ဇြဳပၞာန် ဂွံလုပ်ကဵုသၞောဝ်မာန်ဂှ် သာတုဲ ဗတိုက်သရိုဟ်ကၠုၚ် ဒေသဇြဟတ်ပရေၚ်ပၠန်ဂတးတဴတက်မံၚ်ဂှ် မာန်ကၠုၚ်ဟာ၊ ဗီုလဵုညာတ်ကေတ်ရော။
ဍေံဂှ် နွံပၟိက်ကဵု ပရေၚ်ၜိုဟ်လလံဟွံသေၚ်ပုဟ်။ သွက်ဂွံဓလေတ်ပါဲ ပရေၚ်ကြေပ်ဂြတ်ပရေၚ်ဍုၚ်ကွာန် မၞုံဒၟံၚ် ပ္ဍဲဍေံတအ်တ္ၚဲဏံတုဲ ကၠောန်သ္ပဒၟံၚ် ပရေၚ်ဆဵုဂဗသဳကၠဳရ။ ရံၚ်အာကဵု ပရေၚ်ဆဵုဂဗသဳကၠဳတအ်လေဝ် ဒှ်ပရေၚ်သဳကၠဳ နွံကဵုကြက်ဟွံသေၚ်ပုဟ်။ ဟိုတ်ဂှ်ရ အခေါၚ်အရာ ဍေံတအ်ကၠောန်သ္ပလေဝ် ဟၟဲပုဟ်။ ဆက်တုဲ ဍေံတအ်ကၠောန်အာဒၟံၚ် ဂတတေံဏီတှ်ေ သာတုဲပိုဲသ္ၚောဲခြာ နူပရေၚ်ၜိုဟ်လလံဏီရ။ သွက်ဂွံခါတ်အကာဲ အကာဲအရာက္တဵုဒှ်ဒၟံၚ် တ္ၚဲဏံဂှ် နွံဒၟံၚ်ပၟိက်ရ။ ဍေံတအ် နွံပၟိက်ကဵု ပရေၚ်ၜိုဟ်လလံဍာံဍာံရဟာ၊ ဗီုဂှ်ဟွံသေၚ်တှ်ေ ဍေံတအ် မိက်ဂွံဖန်ဗဒှ် ပေါဲဗတိုက်ဟာဟီုဂှ် အဲထေၚ်ကေတ်ရ။ ရံၚ်ကေတ် အကာဲအရာလၟုဟ်တုဲ တီကေတ်မာန်ရ။
ယဝ်ရ ကၠောန်ပရေၚ်ၜိုဟ်လလံဏောၚ်တှ်ေ ဗီုကဵုအဲဟီုလဝ် တုဲကၠုၚ်နူကၠာဂှ်ရ လောဲလောဲရ။ ဒပ်ဍေံတအ် တ္ၚဲဏံသီုဖအိုတ် နူကဵုဒၞာဲပိုဲနွံဒၟံၚ်လၟုဟ်သီုဖအိုတ်ဂှ် သွက်ဂွံကလေၚ်ဆုတ် နွံမံၚ်ပၟိက်ရ။ လလောၚ်တြး ပရေၚ်ဒေါံပန်ပှော် အလုံမွဲကၟိန်ဍုၚ်တုဲ ဒပ်သီုဖအိုတ်ဂှ် သွက်ဂွံဆုတ်ကလေၚ် ပၟိက်နွံဒၟံၚ်ရ။ တုဲတှ်ေ သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန်သီုဖအိုတ် ညံၚ်ဟၟဲကဵုပရေၚ်ယောၚ်ယာ သီုကဵုဒဝ်အံၚ်သာန်သုကျဳပိုဲဂှ် နွံဒၟံၚ်ပၟိက်ရ။ ကၠောန်သ္ပကၠုၚ် ဗီုဏံဏောၚ်တှ်ေ ပိုဲတအ်ဂှ် ဍေံတအ် နွံပၟိက်ကဵုပၚ်ေၜိုဟ်လလံရဂှ် ပိုဲပတှ်ေကေတ်ဂွံရ။ ဟွံကၠောန်သ္ပဗီုဏံတုဲ ဆက်ဓမံက်မံၚ်ရုပ်ရဴ ပေါဲဗတိုက်ဏံဏီတှ်ေ ။ ဆက်တုဲ ပျဲပျာံဍဵုဍိုက်ဒၟံၚ် ကောန်ညးဍုၚ်ကွာန်ဏီတှ်ေ အဲထေၚ်ကေတ်ရ။ သာတုဲသ္ၚောဲခြာ နူပရေၚ်ၜိုဟ်လလံတုဲ အရာဏံဂှ် ဒှ်အရာဍေံတအ် ရုဲစှ်ကေတ်ဒၟံၚ် သွက်အနာဂတ်ဍေံတအ်ရဂှ် ဒးဟီုရ။ ပ္ဍဲကဵုကၟိန်ဍုၚ်ဗၟာဂှ်တှ်ေ ဗီုလဵုပလေဝ် ဂွံဆက်အာမွဲစွံကဵု ဒပ်ပၞာန်ဏံဂှ် ဒှ်ဟွံမာန်ပုဟ်။ ဒပ်ပၞာန်ဏံအုပ်နိဂီုမှ ပိုဲတအ်ဂွံပရေၚ်ၜိုဟ်လလံဏောၚ်ဂှ် အဲညာတ်ကေတ်ရ။