တၚ်ဆက်စၠောံသၟာန်သွဟ်လဝ်ကဵု ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU။
ကံၚ်ဇြဳပၞာန်သီအဝဵုဂှ် သွက်ဂွံက္လိဂွံပၞော်တိတ် ပရေၚ်ဍုၚ်ကွာန်တုဲ ပ္တိတ်ကၠုၚ်ဇြဟတ် သွက်ဂွံကၠောန်ဗဒှ် ပေါဲရုဲမာဲ ပ္ဍဲသၞာံ ၂၀၂၃ ကၠုၚ်စိုပ်ဏံရ။ အခိၚ်လၟုဟ်ဏံမ္ဂး ကံၚ်ဇြဳပၞာန်ဂှ် ပလေဝ်ပလေတ်ကၠုၚ် ပရေၚ်ကံက်စရၚ်မာဲ ကေုာံစၟတ်သမ္တီ ဌာန်ဒ္တန်ရုၚ်မာဲ ပ္ဍဲဂြိုဟ်ဍုၚ် ပ္ဍဲတိဍာ်ကံၚ်ဇြဳ နေပျဳတဝ် ကေုာံ ရးဒေသကေုာံပွိုၚ်ဍုၚ်လ္ၚဵု မပါလုပ်သီုဍုၚ်လဂုၚ် ဟၟဲကဵုပေါဲဗတိုက်တအ် သွက်ပေါဲရုဲမာဲရ။ ဟိုတ်ဂှ်ရ ပ္ဍဲလတူ ပေါဲရုဲမာဲ ကံၚ်ဇြဳပၞာန် ကၠောန်ဗဒှ်ဏံဂှ် နကဵု KNU သာ်လဵုညာတ်ကေတ်ရော။ သွက်ဂွံဒုၚ်အာတဲ ပေါဲရုဲမာဲ ကံၚ်ဇြဳပၞာန်ကၠောန်ဗဒှ် ပ္ဍဲတိဍာ် KNU ထိၚ်ဒဝ်လဝ် နွံဒၟံၚ်ဟာ။ ဂလာန်ပရိုၚ်သာ်လဵု မိက်ဂွံဟီုကဵု ဗော်ပရေၚ်ဍုၚ်ကွာန်ကရေၚ် လုပ်ပေါဲရုဲမာဲတအ်ရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ် ကေုာံဖဒိုဝ်သဝ်တဝ်နဳ ညးမၞုံကဵုအခေါၚ်ဟီုဂး ဗော်သွးကောန်ဂကူကရေၚ် KNU ရ။
-အလန်ကိုပ်ကၠာအိုတ်ဏံ ပ္ဍဲလတူပေါဲရုဲမာဲကံၚ်ဇြဳပၞာန် ကၠောန်ဗဒှ်ဂှ် နကဵုဗော်သွးကောန်ဂကူကရေၚ် KNU ဗီုလဵုညာတ်ကေတ်ရော။
အရာဏံဂှ် နွံဒၟံၚ်ဗီုဏံရ။ နူကဵုဂကောံပၞာန်ပ္ကီုပရာပ်ဂှ် အခိၚ်ဍေံတအ် သီကေတ်အဝဵုဂှ် အကာဲအရာ အတိုၚ်ဍေံတအ်ထေၚ်လဝ် ဟွံသေၚ်မွဲသာ် က္တဵုဒှ်ဂတးကၠုၚ်ဒၟံၚ်ဟီုဂှ် ဍေံတအ် သ္ပဒၟံၚ်စၟတ်သမ္တီရ။ ဟိုတ်ဂှ်ရ ပ္ဍဲမုက်လိက်ကၟိန်ဍုၚ်နာနာဂှ် ဗီုလဵုပလေဝ် ဆုဲတိုန်အာဂတတေံဟွံဂွံ ဒၞာဲလဵုလေဝ် ဟွံဂွံဒုၚ် သ္ပစၟတ်သမ္တီရ။ ပ္ဍဲပရေၚ်ဍုၚ်ကွာန်လေဝ် ဍေံတအ် ဟွံဂွံဒုၚ်ပံၚ်တဲဗန်ကအ်ရ။ ပရေၚ်ကၟာတ်လဒဵုစဵုဒၞာ ပရေၚ်ပိုန်ဒြပ်လေဝ် သ္ကာတ်မြဟ်တိုန်ကၠုၚ်ဂှ် ဒှ်ဓဝ်ဍာံ ဓလေတ်ပါဲဟွံဂွံရ။ ပ္ဍဲကဵုဂှ်ပၠန် အတိုၚ်ဍေံတအ်ထေၚ်လဝ် ဟွံသေၚ်မွဲသာ် ပရေၚ်ဒစဵုဒစးပၠန်ဂတး ညးဍုၚ်ကွာန်ဂမၠိုၚ် ဇၞော်ကဵုဇြဟတ် က္တဵုဒှ်ကၠုၚ်ဂှ် ပိုဲတအ် ဒးဆေၚ်မံၚ်မုက်ကဵု ပရေၚ်ကြေပ်ဂြတ် ဇဳဒိုဟ်တုဲ အတိုၚ်ပရေၚ်ဍုၚ်ကွာန် စိုပ်အာအကာဲအရာ ဂၞဴဍောတ်ဂၞဴဇၞော်ကၟာတ်တုဲတှ်ေ ဂွံပၞော်တိတ် ဍောတ်တ်မွဲမာန်ဟာ ဂးတုဲ ဂၠာဲကၠုၚ်ပၞော်တိတ်ရ။ ပ္ဍဲအရာဂၠာဲကၠုၚ်ဗီုဏံဂှ် ဂွံဆဵုကေတ်ၜါတၚ်ရ။ မွဲတၚ်ဂှ် ပရေၚ်ၜိုဟ်လလံ ဒုၚ်ဆယၟုဂှ် ပ္တိတ်ဇြဟတ်တုဲ ကၠောန်ရ။ ဆဂးဂှ် မုလေဝ်ဟွံဒှ်ကၠုၚ်ကမၠောန်ပုဟ်ဂှ် တၟအ်မၞိဟ်ဂမၠိုၚ် တီမံၚ်ရ။ မွဲတၚ်ပၠန်ဂှ် ပ္တိတ်ကၠုၚ်ဇြဟတ် ကၠောန်ပေါဲရုဲမာဲပတောံရ။ အရာတအ်ဏံဂှ်လေဝ် ဗွဲတၟေၚ်တှ်ေ ဂကောံဒပ်ပၞာန်ဂှ် ပြိုက်ဂစိုတ်ဒၟံၚ်ညးဍုၚ်ကွာန် အရိုဟ်ဒဒှ်တ္ၚဲ အခိၚ်ဍေံတအ်ကၠောန်ကၠုၚ် အကာဲအရာ အလုံညးဍုၚ်ကွာန်သီုဖအိုတ် ဒုၚ်တဲဟွံမာန်သက်က်ဂှ် ဍေံတအ်လေဝ်ဒှ်အာ ညးဟွံလုပ်ကဵုသၞောဝ်တုဲတုဲရ။ ပ္ဍဲအခိၚ်ထပ်သီကေတ်အဝဵုဂှ် မုလေဝ်သက်ဂွံဟၟဲဂှ်ရ ဍေံကၠောန်ကၠုၚ်ဗီုဏံဂှ် အခေါၚ်ဍေံကၠောန် ညိဓဝ်လေဝ်ဟၟဲရ။ အခေါၚ်ကၠောန်ဟၟဲ ဗီုဏံ ကၠောန်သ္ပကၠုၚ်ဗီုဏံဂှ် မုလေဝ် ဟွံလုပ်ကဵုသၞောဝ်ရ။ စိုပ်အာ အကာဲအရာ ပိုဲဒုၚ်တဲ ဟွံဂွံမွဲရ။ အရာဏံဂှ် ပိုဲဟီုလဝ်သောၚ်ၚ်ကၠးကၠးရ။
-ကံၚ်ဇြဳပၞာန်ဂှ် ပ္ဍဲပေါဲရုဲမာဲ ကၠုၚ်စိုပ်ဏံ သုၚ်စောဲအာသၞောတ် PR သၞောတ်သ္ပစၞး ဗ္ၜတ်စှ်ေစှ်ေဏောၚ် ဟီုဂးလဝ်ရ။ ပ္ဍဲလတူဏံ ဗီုလဵုသ္ၚဳဂၠိပ် ညာတ်ကေတ်ရော။
သၞောတ် PR ဂှ် ယဝ်ရ ဒးဟီုတှ်ေ။ ကံၚ်ဇြဳပၞာန်ဂှ် သီကေတ်အဝဵုရ။ သီလဝ်အဝဵုဂှ် သီလဝ်အဝဵုဏောၚ်ဟွံဟီုတုဲ ထိၚ်လဝ်အဝဵုဏောၚ် ဟီုဒၟံၚ်ဗီုတေံ ဗီုဏံဂှ် စွံလဝ်ဗီု ညံၚ်ကဵု ၂၀၀၈ နွံဒၟံၚ်ညံၚ်ညံၚ်တုဲ ဒှ်ဒၟံၚ်အကာဲအရာ ကၠောန်မံၚ်ရ။ ဆဂးတၚ်တၟေၚ်ဂှ် သၞောတ် PR ဟၟဲပ္ဍဲကဵု ၂၀၀၈ဂှ် ပၠုပ်စုတ် သီုကဵုတၚ်ရန်တၟံနွံနွံ အရာဏံဂှ် ဒှ်ပရေၚ်ဆက်စပ် ညိဓဝ်လေဝ်ဟၟဲရ။ မုလေဝ် ဒှ်ဂုဏ်ဖဵုဟွံသေၚ်ရ။ သရဂှ်တၞဟ် ဂဥုဲဂှ် တၞဟ် ညးဍုၚ်ကွာန်တအ်လေဝ် သၞောတ် PR ဟီုဂှ် မုရော တီဒၟံၚ်ညးသ္ကအ်လေဝ် ဟွံသေၚ်ပုဟ်။ ဟီုတှ်ေ ဗက်ကၠောန်သ္ပဒၟံၚ် အရာဒှ်ဟွံမာန်ရဂှ် ပိုဲဒးဟီုရ။
-ပ္ဍဲတိဍာ် KNU ထိၚ်ဒဝ်လဝ်ဂှ် ဒုၚ်အာတဲ ပေါဲရုဲမာဲကံၚ်ဇြဳပၞာန် ကၠောန်ဗဒှ်ဏံဟာ၊ ပ္ဍဲလတူဏံ ဗီုလဵုကဵု တၚ်လစွံစိုတ်ရော။
စပ်ကဵုပေါဲရုဲမာဲတုဲ ပ္ဍဲဝၚ်ပၠန်ဂတးကောန်ဂကူကရေၚ်ပိုဲ မွဲဒမြိပ်ဂှ် မွဲလှ်ေလေဝ် ကေၚ်ဒစဵုဒစးကၠုၚ်လဝ် ဟၟဲပုဟ်။ ဆန္ဒညးဍုၚ်ကွာန်ဂှ် ဒှ်အဓိကရ။ ဆဂးဂှ် ပ္ဍဲအလန်ဏံ မွဲအလန်ဂှ် ကၠောန်ပေါဲရုဲမာဲဂှ် အခေါၚ်ဍေံကၠောန် ညိဓဝ်ဟၟဲပုဟ်လေဝ်။ အလဵုဍေံတအ်ဂှ် ဒှ်အာ ညးဟွံလုပ်ကဵုသၞောဝ် ကဆံၚ်ဏံတုဲတုဲရ။ ကၠောန်ဏာလဝ် ညံၚ်ကမၠတ်ဒမၠတုဲဂှ်ရ အရာဍေံတအ်ကၠောန်ဏာလၟုဟ်ဏံ မုလေဝ် သွက်ဂွံဒုၚ်တဲမာန် ဟၟဲပုဟ်လေဝ်။ ဂုဏ်နူဂှ်ရ ပိုဲဖျေံလဝ် သ္ဂုတ်သွာတ်တုဲတုဲဒၟံၚ်ရ။ လလောၚ်လေဝ် လလောၚ်တြးလဝ် တုဲတုဲဒၟံၚ်ရ။ ပေါဲရုဲမာဲပတောံဏံဂှ် ဟိုတ်နူဒှ်ပေါဲရုဲမာဲ ဗၠးၜးဗဗွဲဓဝ်မာန်ဟွံသေၚ်ဂှ်ရ သွက်ဂွံဒုၚ်တဲ ပေါဲရုဲမာဲဏံမာန် ညိဓဝ်လေဝ်ဟၟဲပုဟ်ဂှ် ပိုဲဟီုလဝ်တုဲတုဲဒၟံၚ်ရ။
-ယဝ်ရကံၚ်ဇြဳပၞာန်ကၠောန်ကၠုၚ်ပေါဲရုဲမာဲ ဗွဲအနိၚ်အထက်တှ်ေ အကာဲအရာပၞာန် အကာဲအရာ ပရေၚ်ဍုၚ်ကွာန် ဗီုပြၚ်လဵု ဆက်နွံအာမာန်ရော။
နူကဵုဂကောံပၞာန်ပ္ကီုပရာပ်ယဝ်ရ ကၠောန်ကၠုၚ်ပေါဲရုဲမာဲ နကဵုနဲဗွဲအဓမ္မဏောၚ်တှ်ေ နဲကလေၚ်ပလန်တဲကဵုပေါဲရုဲမာဲ မွဲဂကောံကဵု မွဲဂကောံဂှ် ဟွံတုပ်သၟဟ်ညးသ္ကအ်ရ။ ဟိုတ်နူဂှ်ရ အဲမိက်ဂွံဟီုဂှ် အရာဏံ ကၠောန်သ္ပကၠုၚ် ဗွဲအနိၚ်အထက်တှ်ေ ပရေၚ်ယှုက်ထုဲ ပ္ဍဲပရေၚ်ဍုၚ်ကွာန် ဗွဲမဂၠိုၚ် က္တဵုဒှ်ကၠုၚ်ဏောၚ်။ ဖိုလ်အဆက် က္တဵုဒှ်ကၠုၚ်ဗီုဏံ သီုဖအိုတ်ဂှ်လေဝ် ကံၚ်ဇြဳပၞာန် ဒးကေတ်တာလျိုၚ်ဏောၚ်ဂှ် အဲမိက်ဂွံဟီုရ။
-အလန်လကြဴအိုတ်ဏံ ဗော်ပရေၚ်ဍုၚ်ကွာန်ကရေၚ် လုပ်ပေါဲရုဲမာဲ ကံၚ်ဇြဳပၞာန်ကၠောန်ဗဒှ်ဏံဂှ် မုမိက်ဂွံဟီုကဵုရော။
လကြဴအိုတ် ယဝ်ရဗော်ပရေၚ်ဍုၚ်ကွာန်ကရေၚ် လုပ်ပေါဲရုဲမာဲ နွံကၠုၚ်တှ်ေ မုပိုဲမိက်ဂွံဟီုရောမ္ဂး ဗွဲတၟေၚ်တှ်ေ ပ္ဍဲလောကဗော်ပရေၚ်ဍုၚ်ကွာန်ဂှ် အရေဝ်နွံမံၚ် မွဲပါၚ်ရ။ ဒတုဲဖိုလ်ဗော်ကဵု ဒတုဲဂုဏ်ဖိုလ်ဍုၚ် ယဝ်ပြိုၚ်ကၠုၚ်တှ်ေ ဒးကဵုဖျုန်ကဵု ဒတုဲဖိုလ်ဍုၚ်ဏောၚ်ဟီုဂှ် နွံမံၚ်ဏောၚ်လေဝ်။ ဣဏံဂှ် မၞိဟ်ဗွဲမဂၠိုၚ် ဟီုဂးဒၟံၚ်ရ။ အဲမိက်ဂွံဟီုဂှ် ဗွဲတၟေၚ်တှ်ေ ဗော်ပရေၚ်ဍုၚ်ကွာန် ကရေၚ်တအ် ပ္ဍဲအခိၚ်လၟုဟ်ဏံ အလုံညးဍုၚ်ကွာန်တအ်သီုဖအိုတ် ဒစဵုဒစးပၠန်ဂတးဒၟံၚ်ကဵု ဂကောံကံၚ်ဇြဳပ္ကီုပရာပ်ပၞာန်ဂှ် ပိုဲတအ်ဟွံဒုၚ်တဲ အကာဲအရာဏံတုဲ ဗီုဇကုမိက်ဂွံဒှ် ဇကုကၠောန်မံၚ်ဂှ် အရာဏံဂှ် ဒှ်အရာညးဍုၚ်ကွာန်ပ္တိုန်ဒုဟ်၊ ညးဍုၚ်ကွာန် ဟွံသ္ပစၟတ်သမ္တီ၊ ဗၠိုက်ဍာ်ပါၚ်ညးဍုၚ်ကွာန်တအ်ဏောၚ်ဂှ် ပိုဲဒးထံက်ထ္ၜးကဵု သောၚ်ၚ်ကၠးကၠးဏောၚ်။ လကြဴအိုတ် ယဝ်ရဒးဟီုဏောၚ်တှ်ေ ဟွံရံၚ်ကဵုပၟိက်ဆန္ဒ ညးဍုၚ်ကွာန်တအ်ဏောၚ်တှ်ေ ဝၚ်ဇကု ဇကုချူအာဏောၚ်ဂှ် အရာဏံ ဒှ်အာအကာဲအရာ နဲလဵုလေဝ် ဂွံထ္ၜးမုက်ဟွံဂွံရ။