လဂုၚ်- ဒဳဇြေမ်ဗာ(၃၁)
သွက်ဂွံကၠောန်ဗဒှ်ပေါဲမိပ်မြဟ် ဗ္တံကၠောံသၞာံဂးတုဲ ကံၚ်ဇြဳပၞာန်ရးလဂုၚ်ဂှ် သီရုပ်ကဵုလဝ် အသံအမိၚ် တိတ်အခိၚ်ဗ္တံဟွံဂွံ လလောၚ်တြးလဝ် နကဵုသၞောဝ်ဥပဒေ လၟေတ်ရာဇဝတ် ၝောံပိုဒ်-၁၄၄ ရဂှ် ညးအုပ်ကာထ္ပက်လဝ်စၟတ်တဲ စၞးသ္ကိုပ်ဝန်ဇၞော်ရးလဂုၚ်တုဲ လလောၚ်တြးပ္တိတ်လဝ်ရ။
နကဵုအစဳဇန်အလဵုအသဳ ရးဒေသဇၞော်လဂုၚ် သၟဝ်တဲကံၚ်ဇြဳပၞာန်ဂှ် ဟိုတ်နူစဳဇန်လဝ် သွက်ဂွံကၠောန်ဗဒှ် ပေါဲသ္ဘၚ်ကၠောံသၞာံ ပ္ဍဲဒၞာဲဒယှ်တှ်ပြာကတ် ပ္ဍဲကဵုဍုၚ်လဂုၚ် (Countdown Party) ဂှ်ရ ရုပ်သီကၠုၚ်လဝ်ရဂှ် ဟီုသ္ဂးလဝ်ရ။
သွက်ဗ္တံကၠောံသၞာံဂှ် ပွမပန်ပၟတ်ပ္ကဴ ပ္ဍဲဗလးညးဍုၚ်ကွာန်ကီု ကၠောန်ဗဒှ်အာပေါဲ Stage Show တအ်ကီုဂှ်ရ အမိၚ်အသံ တိတ်ဗ္တံဟွံဂွံ ပ္တိတ်လဝ် အတိုၚ်သၞောဝ်ဥပဒေ လၟေတ်ရာဇဝတ် ၝောံပိုဒ်-၁၄၄ ဂှ် ပါဲတးပလီုလဝ် နူကဵုစၟတ်တ္ၚဲ (၃၁.၁၂.၂၀၂၂) စဵုကဵုစၟတ်တ္ၚဲ (၁.၁.၂၀၂၃) အခိၚ် (၄)နာဍဳရဂှ် ဓမံက်ထ္ၜးလဝ်ရ။
ပ္ဍဲဍုၚ်လဂုၚ်ဂှ် တုဲကၠုၚ်မွဲၜါတ္ၚဲဏံ ဗုမ်ခတိုဟ်လဝ် ပ္ဍဲကဵုဖျာပေါဲကျောက်မြောၚ်ကီု ဟိုတ်နူပရေၚ်ဗုမ်ခတိုဟ်လဝ် ပ္ဍဲဒၞာဲမၞိဟ်ကောံဂှ်ရ မၞိဟ်ဒးဒုၚ်ဇီုကပိုက် ချိုတ်အာလဝ်နွံတုဲ ပရေၚ်ဖံၚ်ခတိုဟ်ဂမၠိုၚ်ဏံဂှ် ဂကောံဇြဟတ်ပရေၚ်ပၠန်ဂတးတအ် ကၠောန်သ္ပလဝ် ဟွံသေၚ်တုဲ ဂကောံပျူသဝ်ထဳ သၟဝ်တဲကံၚ်ဇြဳပၞာန်တအ် ကၠောန်သ္ပလဝ်ရဂှ် ဂကောံပၠန်ဂတးဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဒၞာဲမၞိဟ်ကောံ ဗ္တံကၠောံသၞာံဏံလေဝ် ဂကောံသၟဝ်တဲကံၚ်ဇြဳပၞာန်ဂမၠိုၚ် ဖံက်ခတိုဟ်ဗုမ်တုဲ ညံၚ်ညးဍုၚ်ကွာန်ဂမၠိုၚ် ဂွံဇီုကပိုက် က္လိဂွံဘဲဝပ်ဂှ် အကာဲအရာကၠောန်သ္ပကၠုၚ် နွံမာန်ဒၟံၚ်ဂှ်ရ နကဵုညးဍုၚ်ကွာန်ဂမၠိုၚ် သွက်ဂွံမံၚ်တန်တဴအာ ပ္ဍဲသ္ၚိဇကုဇကုဂှ် ညးတာလျိုၚ် ဂကောံပရေၚ်ပၠန်ဂတးဍုၚ်ဇၞော် လဂုၚ်မွဲတၠဂှ် ဟီုသ္ဂးလဝ်ရ။
သွက်ပေါဲသ္ဘၚ်မိပ်မြဟ်ဂးတုဲ ပ္ဍဲရးဒေသဇၞော် ကေုာံပွိုၚ်ဍုၚ်တၞဟ်သ္အာၚ်ဂမၠိုၚ် ကံၚ်ဇြဳပၞာန်ရုပ်သီကဵုလဝ် အမိန်တိတ်ဗ္တံဟွံဂွံဂှ် ဟၟဲလဝ်ဏီရ။
ပရိုၚ် – သြၚ်လောန်တိုၚ်(မ်)