“ဟိုတ်နူ ဖိုလ် NDAA ဏံတုဲ ပရေၚ်ပၠန်ဂတးက္ညၚ် ကၟိန်ဍုၚ်ဗၟာဂှ် သာတုဲကြပ်ကၠုၚ်ဒၟံၚ်ကဵု ပေါဲအံၚ်ဇၞးရဂှ် ပိုဲခါတ်ကေတ်အကာဲရ”

တၚ်ဆက်စၠောံသၟာန်သွဟ်လဝ်ကဵု ဥူတာန်သိုဝ်နာၚ်

အက်ဥပဒေ ပရေၚ်စဵုဒၞာကောန်ဂကူ အလဵုအသဳအမေရိကာန် NDAA မပြဌာန်ပၠုပ်စုတ်လဝ် Burma Act ဆက်စပ်ဒၟံၚ်ကဵု ပရေၚ်ကၟိန်ဍုၚ်ဗၟာဂှ် ဒဒှ်ရဒှ်ပရေၚ်ကဵုဇြဟတ် ကုပရေၚ်ပ္ကီုပရာပ်ကီု သီုဒှ်ပရေၚ်ဇီုဒၟံၚ်ကဵုအခေါၚ်အဝဵုဏောၚ်ဂးတုဲ နူလပါ်ကံၚ်ဇြဳပၞာန် ဒစဵုဒစးကၠုၚ်ဒၟံၚ် ဇၞော်ကဵုဇြဟတ်ရ။ ဟိုတ်ဂှ်ရ ပ္ဍဲလတူဥပဒေ NDAA ဂှ် မုဟိုတ် ကံၚ်ဇြဳပၞာန် ဂွံဒစဵုဒစးဒၟံၚ် သ္ကာတ်တ်မြဟ်ဟ်ရော၊ ဖိုလ်အဆက်သၞောဝ်ဥပဒေ NDAA ဗီုလဵုနွံကၠုၚ်မာန်ရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ဥူတာန်သိုဝ်နိုၚ် ညးသ္ၚဳဂၠိပ်ပါ်ပါဲပရေၚ်ဍုၚ်ကွာန်ရ။

-အလန်ကိုပ်ကၠာအိုတ်ဏံ မုဟိုတ် ကံၚ်ဇြဳပၞာန် ဂွံဒစဵုဒစးဒၟံၚ်ကဵု အက်ဥပဒေပရေၚ်စဵုဒၞာကောန်ဂကူ အလဵုအသဳအမေရိကာန် NDAA ဂှ်ရော။ ပ္ဍဲလတူဏံ ဗီုလဵုညာတ်ကေတ်ရော။

ကြဴနူကၠတ်ထဝ်ကဆံၚ်လတူ ကၠတ်ထဝ်ကဆံၚ်သၟဝ် တုပ်ကၠုၚ်စိုတ်ကဵု NDAA တုဲဗက် ကိစ္စသမ္မတဗိုၚ်ဒေန် ထ္ပက်ကၠုၚ်စၟတ်တဲဂှ် ပ္ဍဲကၟိန်ဍုၚ်ဗၟာတှ်ေ သွက်စကစဂှ် ဒှ်ကိစ္စဒးဒုၚ်ထ္ပက်ဒး ယွီုပရေၚ်ဍုၚ်ကွာန်ရ။ ဟိုတ်နူဂှ်လေဝ် တ္ၚဲဏံ စပ်ကဵု NDAAဂှ် ဒဒှ်ရဒစဵုဒစး သ္ကာတ်တ်မြဟ်ဟ်ဂှ် ဗက်ပလံၚ်ဗစိုပ်ဒၟံၚ်လိက်၊ တိတ်ကၠုၚ်မ္ၚးဏံတုဲ ဟီုဂးဓမံက်ထ္ၜးဒၟံၚ် တၚ်လစွံစိုတ် မပ္တံဗီုဏံ ကၠောန်သ္ပကၠုၚ်ရ။ ကၠောန်သ္ပဗီုဏံဂှ် ဍေံ​တၟေၚ်တၟဟ်မံၚ် ဟွံသေၚ်ရ။ ပ္ဍဲကဵုတၚ်ကံၚ်ဇြဳပၞာန်ဟီုဏာ တၚ်ဒှ် အဓိကဂှ်တှ်ေလေဝ်။ မွဲတၚ်ဂှ်တှ်ေ ဥပဒေ NDAA ဂှ် လုပ်စိုပ်ပြံက်စောန်ဒၟံၚ် အခေါၚ်အဝဵုကၟိန်ဍုၚ်ဗၟာရဂးတုဲ ဍေံတအ် သောၚ်ကလးကဵုလဝ်ရ။ ဟီုတှ်ေ စကစဂှ် ဒှ်အလဵုအသဳ ပိုၚ်ပြဳအခေါၚ်အဝဵုကၟိန်ဍုၚ်ဗၟာ ဟီုဂှ် အလုံမွဲဂၠးကဝ် ကၟိန်ဍုၚ်သ္ပလဝ်စၟတ်သမ္တီဂှ် နွံပိကၟိန်ဍုၚ်ဓဝ်ရ။ ရုယှာမွဲ၊ ကြုက်မွဲ၊ အိန္ဒိယမွဲ ကၟိန်ဍုၚ်သှ်ေနူဂှ် အလုံမွဲဂၠးကဝ် ညးတအ်ဟွံဂွံသ္ပလဝ် စၟတ်သမ္တီပုဟ်။ အေဂှ် ပ္ဍဲဒၞာဲလဵုပြာကတ်ရောတှ်ေ ပ္ဍဲကုလသမဂ္ဂ ဂၠးကဝ် စပ်ကဵုဒၞာဲအလဵုအသဳကၟိန်ဍုၚ်ဗၟာတုဲ ကဵုညးလဵုရော ဟီုဂှ် ကုလသမဂ္ဂ ဟွံဂွံဖျေံလဝ် သ္ဂုတ်သွာတ်ဏီရ။ ဆဂးဂှ် ဥူကျဝ်မိုဝ်ထောန် ကေၚ်ယိုက်ဂၠေၚ်ဒၟံၚ် တာလျိုၚ်အခိၚ်ကၠာတေံဂှ်ရ သွက်ဂွံဆက်ကဵုအာတာလျိုၚ် နဒဒှ်သၞာံဒုတိယဂှ် ဖျေံလဝ်သ္ဂုတ်သွာတ်ရ။ ဟိုတ်ဂှ်ရ နတဲယဝ်ရဒးဟီု တၚ်လစွံစိုတ်ကၟိန်ဍုၚ်နာနာမ္ဂး ပရေၚ်ပိုၚ်ပြဳအခေါၚ်အဝဵုကၟိန်ဍုၚ်ဗၟာဂှ် စကစဟွံပိုၚ်လဝ်ပုဟ်ဂှ် ပိုဲဒုၚ်ဂိုၚ်ကေတ်ဂွံရ။ ပ္ဍဲလတူဏံ ဝန်ဇၞော်ပရေၚ်ဍုၚ်သ္အာၚ် စကစဒုၚ်ဟွံမာန်ဂှ် ဍေံဂွံတၟေၚ်တၟဟ်ဒၟံၚ် ကွေံကွေံဟွံသေၚ်ရ။ သ္ပလေဝ်ဟွံသ္ပလဝ် စၟတ်သမ္တီကဵု ဍေံတအ်ပုဟ်တှ်ေ။

-လကြဴဏံမွဲပၠန်ဂှ် စပ်ကဵုပရေၚ်ကၟိန်ဍုၚ်ဗၟာတုဲ ဗီုလဵုညာတ်ကေတ်လတူ ဥပဒေပရေၚ်စဵုဒၞာကောန်ဂကူ အလဵုအသဳအမေရိကာန် NDAA ပြဌာန်ပၠုပ်စုတ်လဝ် Burma Act ဆေၚ်စပ်ကဵု ပရေၚ်ကၟိန်ဍုၚ်ဗၟာဂှ်ရော။

ပ္ဍဲလိက်ကသုက် NDAA ဂှ် ကိစ္စစကစ ဒးဂိခအံၚ်လောန်ဒၟံၚ်ဏံဂှ် ဂကောံဍေံတအ် စောတ်စောဲလဝ် ဂကောံပ္ကီုပရာပ် မပ္တံကဵုဂကောံ NUG,CRPH,PDF တအ်ဂှ် ဍေံတအ် စၟတ်သမ္တီလဝ် ဂကောံပ္ကီုပရာပ်တုဲတှ်ေ ဒစဵုဒစးဒၟံၚ်ရ။ ညးဂၠးတိတအ်ဂှ် ကၠိုဟ်တီမံၚ်ပရောဏံရ။ ပ္ကီုပရာပ်ဒၟံၚ်ဂၠးကဝ်ဂှ် ဒှ်ဂကောံပရေၚ်ဂီုကၠီုကံၚ်ဇြဳပၞာန်ရ။ ဇေတ်ဇေတ်တေံ ဒးဒုၚ်ဒဝ်စဵုဒၞာဒၟံၚ် ပရေၚ်ပ္ကီုပရာပ်ဂှ် ဒှ်ဂကောံ NUG,CRPH ကေုာံ EAO တအ်ရဂှ် ညးဂၠးတိတအ် ကၠိုဟ်တီဒၟံၚ်ရ။ အရာဏံမွဲဂှ် ဟွံဒုၚ်တဲသ္ပစၟတ်သမ္တီ ပရေၚ်ပိုၚ်ပြဳအခေါၚ်အဝဵု ကံၚ်ဇြဳပၞာန်ကီု မွဲဒမြိပ်ဓဝ်ဂှ် လၟုဟ်ဏံ အတိုၚ်ဓမံက်ထ္ၜးလဝ် ပ္ဍဲ NDAAဂှ်တှ်ေ ဓမံက်ထ္ၜးလဝ် ဒဒှ်ရသ္ပစၟတ်သမ္တီကဵု NUG ကေုာံ EAO, PDFတအ် ဗွဲမလုပ်သၞောဝ်ရ။ တုဲပၠန်ဂှ် ရီုဗၚ်ထံက်ပၚ်အာ ဂကောံတအ်ဂှ်ဏောၚ် ဓမံက်ထ္ၜးလဝ်ဂှ်ရတှ်ေ ဒှ်ဒၟံၚ်အကာဲအရာ ထ္ပက်ယွီုပရေၚ်ဍုၚ်ကွာန် ကံၚ်ဇြဳပၞာန်သၟးဟေၚ် ဟွံသေၚ် ပရေၚ်ပၞာန်လေဝ် ဒးဒုၚ်ထ္ပက်ကလိုဟ်လဝ် ယွီုရ။ ဟိုတ်ဂှ် နကဵုဍေံတအ် ဒုၚ်ဟွံမာန်ဒၟံၚ်ရ။

-အလန်လကြဴအိုတ်ဏံ အက်ဥပဒေ ပရေၚ်စဵုဒၞာကောန်ဂကူ အလဵုအသဳအ​မေရိကာန် NDAA  ဂှ် ဖိုလ်ဍေံ ဗီုလဵုနွံကၠုၚ်မာန်ရော။

ဖိုလ်ဍေံဂှ် မုနွံကၠုၚ်ရောတှ်ေ ကၠာတေံ ညးဍုၚ်ကွာန်တအ် ဒးဒစဵုဒစးဒၟံၚ်ကဵု ကံၚ်ဇြဳပၞာန် နကဵုလွဟ်ဂြိုပ်၊ နကဵုဒူတအ်ရ။ ဆဂးဂှ် ပ္ဍဲပရေၚ်ပရော ပေါဲဗတိုက်ဂှ် ပရေၚ်ညးဍုၚ်ကွာန် ကလိုက်ကၟဵုကီု သီုပရေၚ် PDF တအ် လုပ်ပေါဲဗတိုက်ဂှ် သၠုၚ်ဂၠိုၚ်တိုန်ကၠုၚ်ဗက် ပိုဲဂှ် နူကဵုဂှ်မွဲကဆံၚ် လၟုဟ်ဏံတှ်ေ ဟိုတ်နူပရေၚ်ပတိတ်ဇြဟတ် နူ NUG တုဲ ဗ္ဂပ်ကဵုလွဟ်ကဵု ဂကောံဇြဟတ်တအ်ဂှ် ၜိုတ် ၄၀ တၟံကၠံ သၠုၚ်တိုန်ဒၟံၚ် ဗွဲမလောန်ရ။ ဟီုတှ်ေ ပ္ဍဲအခိၚ်ခြာဟွံလအ်ဏံလေဝ် NUG က္ဍိုက်က္ဍိုပ်တုဲ ဒှ်အခိၚ်ပလေဝ်ပလေတ်ဒၟံၚ် အရၚ် PDF ဂွံစထ္ပက်ပၞာန်ပလန်တဲရ။ ပ္ဍဲဗီုအခိၚ်လၟုဟ်ဏံဂှ် နွံဒၟံၚ်ပၟိက်ကဵု ပရေၚ်ရီုဗၚ် နူဍုၚ်နာနာရ။ ကၟိန်ဍုၚ်နာနာလေဝ် ရီုဗၚ်ဒၟံၚ်ရ။ ဆဂး နွံဒၟံၚ်ပၟိက်ဂၠိုၚ်အိုတ်ဂှ် ဒှ်သြန်ဘဏ္ဍာကဵု လွဟ်လက်နက်ရ။ တၚ်နွံပၟိက်သြန်ဘဏ္ဍာကဵု လွဟ်လက်နက်ဂှ် ပြဌာန်ကၠုၚ် သၞောဝ်ဥပဒေ NDAA ဏံ ကဵုနဲကဲကွတ်ပညာဏောၚ်၊ လွဟ်လက်နက်ဂှ် ဟွံကဵုပုဟ်။ ကဵုရီုဗၚ်ပရေၚ်သြန်ဘဏ္ဍာဏောၚ်ဟီုတုဲ ပြဌာန်ကဵုကၠုၚ် သြန်ဒဝ်ဠာ ၄၉၀ ပြကောဋိကိုတ်ပြၚ်ဂှ်လေဝ် သွက်တၚ်နွံပၟိက် ပရေၚ်ပၠန်ဂတးက္ညၚ်ပိုဲ၊ သွက်ပေါဲအံၚ်ဇၞး ပရေၚ်ပၠန်ဂတးက္ညၚ် ဂွံစိုပ်ဒတုဲ ပြဟ်ဟ်မာန်ဂှ် ဒှ်ဇြဟတ်ဓရိုတ် ဇၞော်ကဵုဇြဟတ်ရ။ ဟိုတ်ဂှ်ရ နကဵုကံၚ်ဇြဳပၞာန်ဂှ် လၟုဟ်ဏံတှ်ေ လကိုတ်တ္ၚဵုဒၟံၚ် တၚ်ပြဌာန် ပါလုပ်ပ္ဍဲ NDAA ဂှ်တုဲ ဒစဵုဒစးဒၟံၚ်ရဂှ် ပိုဲဒုၚ်ဂိုၚ်ကေတ်လဝ်ရ။ ဟိုနူဖိုလ် NDAA ဏံတုဲ ပရေၚ်ပၠန်ဂတးက္ညၚ် ကၟိန်ဍုၚ်ဗၟာဂှ် သာတုဲ ကြပ်ကၠုၚ်ဒၟံၚ်ကဵု ပေါဲအံၚ်ဇၞးရဂှ် ပိုဲခါတ်ကေတ်အကာဲရ။