သေတ်ဒိုဲ၊ ဂျာန္နဝါရဳ (၂)
ပ္ဍဲတွဵုရးရခေၚ် ကြဴနူဒပ်ပၞာန်ရခေၚ် (AA) ကဵုဒပ်ကံၚ်ဇြဳပၞာန်တံ ဒေါအ်ဒေၚ်အာ ပရေၚ်ပန်ပှော်ၜါလ္ပာ်တုဲဂှ် သွက်ပေါဲရုဲမာဲဂှ် ကံၚ်ဇြဳပၞာန် ကဵုကၠုၚ်ဇြဟတ်ဂရိုဟ် ကုညးဍုၚ်ကွာန်ပါဲဒဴဘဲပၞာန်တံတုဲ သ္ကဵုကလေၚ်စဴဒၟံၚ်ဌာန်ဒၟံၚ်တံ အနိၚ်အထက်ဂှ် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ ကေုာံ သၟာပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ်ဂှ် ဒေါအ်လဝ်ပရေၚ်ပန်ပှော်တုဲ ပေါဲဗ္တိုက်ဟွံမွဲကီုလေဝ် နကဵုညးပါဲဒဴဘဲပၞာန်တံ သ္ဂောံစဴဌာန်ဒၟံၚ်ဂှ် ဟွံပြေပြံၚ်ကီု၊ ပရေၚ်ဆက်စၠောံအာကၠုၚ် ဟွံပြေပြံၚ်ကီု ကေုာံ သွက်ပရေၚ်စသုၚ်မံၚ်စံၚ်ဗိုက်လ္တက်တံတုဲ ဂွံကလေၚ်ကၠောန်ကမၠောန်တြေံတံဂှ် အရာဟွံပြေပြံၚ်တံ နွံဒၟံၚ်ရ။
ဆ္ဂး ပ္ဍဲတွဵုရးရခေၚ်ဂှ် ကံၚ်ဇြဳပၞာန် ကံက်စရၚ်မာဲ သွက်ပေါဲရုဲမာဲကီု၊ ကဵုဇြဟတ်ဂရိုဟ်အနိၚ်အထက် ကုညးဍုၚ်ကွာန်ပါဲဒဴဘဲပၞာန်တံတုဲ ကဵုကလေၚ်စဴဒၟံၚ်ဌာန်ဒၟံၚ်တံကီုဂှ် ကၠောန်ဒၟံၚ်ဆက်က်ရောၚ် သၟာပရေၚ်ဍုၚ်ကွာန်ဝှ်ကြံၚ် ဥူဖေတာန် ဟီုရ။
“ပ္ဍဲကွာန်ဗွဲမဂၠိုၚ်ဂှ် သ္ၚိတံဟွံမွဲရပုဟ်လေဝ်၊ သွက်ဂွံကၠောန်စ ပ္ဍဲတွဳဗွိုၚ်တံဂှ် ဟွံပြေပြံၚ်ရပုဟ်၊ သွက်ဂွံအာ ပ္ဍဲဒဵုဂြိုပ်တံဟီုတှ်ေ မာၚ်တံနွံဒၟံၚ်၊ ဗ္ဒိုပ်ဍေံတံ နွံဒၟံၚ်၊ ဒေါအ်ပန်ပှော်တုဲ အပ္ဍဲပွိုၚ်မွဲဂိတုဂှ် အပြံၚ်အလှာဲနွံကၠုၚ် တၟာဂလိုၚ်ရ၊ ကံၚ်ဇြဳပၞာန် သွက်ဂွံကၠောန်ပေါဲရုဲမာဲဂှ် ကံက်ကၠုၚ်စရၚ်မၞိဟ်၊ တုဲတှ်ေ ကဵုညးဍုၚ်ကွာန်ပါဲဒဴဘဲပၞာန်တံ စဴဌာန်ဒၟံၚ် အတေၚ်တံ နွံကၠုၚ်ရ၊ ညးဍုၚ်ကွာန်ပါဲဒဴဘဲပၞာန်တံ ဒှ်ဒၟံၚ်ဒဒိုက်ကွေံကွေံရ၊ မုဟိုတ်ရောမ္ဂး ပ္ဍဲရခေၚ် အကာဲအရာစပ်ကဵုဘဲပၞာန်ဂှ် ဟွံမွဲရပုဟ်၊ ဒဒှ်ရကၠောန်ဗဒှ်ပေါဲရုဲမာဲဂွံယျ ရဴဝွံ ကံၚ်ဇြဳပၞာန် ဖန်ဗဒှ်ကၠုၚ်ဒၟံၚ် အကာဲအရာသီုညးဖအိုတ် စၟဳစဂွံ သာ်ဏံရောၚ်ဂှ် ပိုယ်တံ ခယျကေတ်ရ” သာ်ဝွံ ဥူဖေတာန် ဟီုရ။
ဒပ်ပၞာန်ရခေၚ် (AA) ကေုာံ ဒပ်ကံၚ်ဇြဳပၞာန်တံဝွံ ၜိုန်ရဒေါအ်လဝ်ပန်ပှော် နကဵုတၚ်ထ္ၜးဟိုတ် စပ်ကဵုပရေၚ်ဗ္စာရဏာမၞိဟ်တံကီုလေဝ် ဒၟါနူထ္ပက်လဝ်လိက်ကသုက် ချိုတ်တ်ပၠိုတ်တ် ဟွံမွဲဂှ်ရ ပေါဲဗ္တိုက်ကလေၚ်မွဲဝါပၠန်တံ ဒှ်ကၠုၚ်ဂှ် ဒးဂွိၚ်ဒၟံၚ်ရောၚ် ညးသ္ဂးရ။
ယဝ်ရကၠောန်ဗဒှ်ပေါဲရုဲမာဲမ္ဂး သွက်ဗော်ရခေၚ်ဂှ် ဒှ်ကၠုၚ်အကာဲအရာ ခိုဟ်ဟ်မာန်ကီုလေဝ် ပရေၚ်ညးဍုၚ်ကွာန်တံဂှ် ညံၚ်ဂွံပြေပြံၚ်သောၚ်ကလးကိုပ်ကၠာတုဲ ကၠောန်ထေက်ဂှ်လေဝ် ဥူဖေတာန် ဟီုလဝ်ရ။
ၜါလ္ပာ် ကၠောန်သ္ပကဵုကေတ်ပ္ညဳလဝ်ညးသ္ကအ်တုဲ ပေါဲဗ္တိုက်တံ ဒေါအ်အာကီုလေဝ် သွက်ဂွံကေလၚ်ဒက်ပ္တန်ဒေသဂှ် နွံပၟိက်ဒၟံၚ်ကဵု အရာမကၠောန်ၜိုတ် ဗွဲမစိုပ်တရဴတံဏီတုဲ သွက်ဂွံကလေၚ်ကဵုအခေါၚ်လုပ် ကုဂကောံ NGO မကဵုဒၟံၚ်အရီုဗၚ် ပရေၚ်ဗ္စာရဏာမၞိဟ်တံမာန်ဂှ်လေဝ် နွံဒၟံၚ်ပၟိက်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးပါဲဒဴဘဲပၞာန်မွဲတၠ ဟီုရ။
“အခိၚ်လၟုဟ်ဂှ် မိက်ဂွံကၠောန်ပေါဲရုဲမာဲတုဲ ကၠောန်ထောံမွဲတဲဓဝ်ဂှ် ညးဍုၚ်ကွာန်တံ မုဂွံကၠောန်စရော၊ တၟးဇးခိုဟ်ကၠုၚ်ဂှ် မူစိသတ္တာဟမှ ဟွံမွဲဏီပုဟ်လေဝ်၊ အေဂှ် သွက်ဂွံထ္ၜး ဒဒှ်ရပြေပြံၚ်ဒၟံၚ် လွာဲဂှ်လေဝ် ဟွံလောဲသွာပုဟ်၊ ရံၚ် လ္ပာ်ညးဒေသတံကီု၊ ပေါဲရုဲမာဲဂှ် ကၠောန်ကေတ်အတေၚ်ဂွံဟာ” သာ်ဝွံ ညးဒေသမျံက်ဥူ မရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်မွဲတၠ ဟီုရ။
ပ္ဍဲတွဵုရးရခေၚ် ဒပ်ကံၚ်ဇြဳပၞာန် ကဵု ဒပ်ပၞာန်ရခေၚ် (AA) တံ က္တဵုဒှ်ပေါဲဗ္တိုက်ကလေၚ်မွဲဝါတုဲဂှ် ပ္ဍဲဂိတုနဝ်ဝေမ်ဗာ (၂၆) တေံ ၜါလ္ပာ်ဒေါအ်လဝ်ပန်ပှော်ရ။
ဒၟါနူဒေါအ်ပန်ပှော်လဝ်ဂှ်ရ လၟေၚ်တ္ၚဲ ပရေၚ်ချိုတ်၊ ဂွံဝပ် ကေုာံ ဒးဒုၚ်ရပ်တံဂှ် ဒေါအ်ဒေၚ်အာလဝ်တုဲ ဂၠံၚ်တိုက်၊ ဂၠံၚ်ဍာ် မကၟာတ်လဝ် ပ္ဍဲသ္ကုတ်သၟဝ်ကျာရခေၚ်တံဂှ်လေဝ် ဒပ်ကံၚ်ဇြဳပၞာန် ကလေၚ်ပံက်ကဵုလဝ်ရ။
ဆ္ဂး အခေါၚ်ယိုက်ဏာနၚ်ဂဥုဲဇဗ၊ အခေါၚ်ယိုက်ဏာနၚ် ကပေါတ်ပရေၚ်သိုၚ်ခၞံ သွက်ပရေၚ်ဖောအ်ဗြေဝ်ဒေသ ကေုာံ ကၠေၚ်စၞပၟတ်တံဂှ်ကဵု အခေါၚ် NGO တံ အာကၠုၚ်ကဵုရီုဗၚ်တံဂှ် ကၟာတ်လဝ်ဖိုဟ်တုဲ ညးဒေသမဒးဒုၚ်ရပ်လဝ် ဆက်စပ်ကဵု AA တံဂှ်လေဝ် ဒဵုကဵုတ္ၚဲဏံ ကလေၚ်ဗလးကဵုဟွံမွဲဏီဂှ်ရ အကာဲအရာကလေၚ်ကြံၚ်မ္ၚိုဟ်တုဲ ပေါဲဗ္တိုက်တံ ထပ်ဒှ်ကၠုၚ်ဂှ် ညးဒေသတံ ဂွိၚ်ဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)