“ယဝ်ပေါဲဗတိုက်ဒှ်တှ်ေ အတိုၚ်စိုတ်ဒှ်ဂှ် ပန်ဂစိုတ်ဒၟံၚ်ညးဍုၚ်ကွာန်တအ် နွံရ။ ပရေံအိုတ်ဂှ်တှ်ေ ရပ်ကေတ်လဝ် စဵုကဵု ၂၀၊ ၃၀ တၠတုဲ သုၚ်စောဲဒၟံၚ် နဒဒှ်ကၟာၚ်ဒုၚ်ဒၞာမၞိဟ်ရ”

တၚ်ဆက်စၠောံသၟာန်သွဟ်လဝ်ကဵု ကိုသာန် ညးတာလျိုၚ်လလောၚ်ပရိုၚ် ဒပ်ပၞာန်စဵုဒၞာညးဍုၚ်ကွာန်၊ ခရိုၚ်ဗိက် တံဒပ်လၟိဟ်(၁)

ဒပ်ပၞာန်စဵုဒၞာညးဍုၚ်ကွာန်၊ ခရိုၚ်ဗိက် တံဒပ်လၟိဟ်(၁)ဂှ် ပ္ဍဲဂိတုဒဳဇြေမ်ဗာတုဲကၠုၚ်ဏံ ဗက်အာဆဵုဂဗကဵု ညးဍုၚ်ကွာန် ပ္ဍဲရးဒေသတၞၚ်သဳ၊ ပွိုၚ်ဍုၚ်ပဠဝ်တုဲ ကၠောန်သ္ပသောၚ်ကလးသဳကၠဳလဝ် ပ္ဍဲလတူလၟေၚ်ကမၠောန် ပရေၚ်အုပ်ဓုပ်၊ ပရေၚ်ဂီုကၠီု၊ ပရေၚ်စဵုဒၞာရ။ ဟိုတ်ဂှ်ရ စပ်ကဵုအကာဲအရာ ဒးဆဵုဂဗကဵုညးဍုၚ်ကွာန်ကီု၊ တၚ်ညးဍုၚ်ကွာန်ဂမၠိုၚ် ပတိုန်ထ္ၜးကီု၊ အကာဲအရာပၞာန် ပ္ဍဲအခိၚ်လၟုဟ်ဏံကီု၊ တၚ်ခက်ခုဲညးဍုၚ်ကွာန် ပါဲဒဴဘဲပၞာန် ဒးဆေၚ်ဒၟံၚ်မုက်ကီုတအ်ဂှ် သၟာန်သွဟ်လဝ်ကဵု ကိုသာန် ညးတာလျိုၚ်ပရေၚ်လလောၚ်ပရိုၚ် ဒပ်ပၞာန်စဵုဒၞာညးဍုၚ်ကွာန်၊ ခရိုၚ်ဗိက် တံဒပ်လၟိဟ်(၁) ရ။

-အလန်ကိုပ်ကၠာအိုတ်ဏံ အကာဲအရာပၞာန်ၜါလပါ်ကဵု ကံၚ်ဇြဳပၞာန် ပ္ဍဲအခိၚ်လၟုဟ်ဏံ ဗီုပြၚ်လဵုဆက်နွံဒၟံၚ်ရော။

အကာဲအရာပၞာန်အခိၚ်လၟုဟ်ဏံ ၜိုဟ်သြိုဟ်ဒၟံၚ်ညိညရ။ ပ္ဍဲပရေၚ်ပၞာန်ဂှ် ပရေၚ်ပၞာန်ပြံၚ်လှာဲကၠုၚ်ဂှ် နူလပါ်ဍေံတအ် နကဵုဗီုပြၚ်ထ္ပက်ပၞာန်ဟွံသေၚ်တုဲ ဍေံတအ်ပြံၚ်ကၠုၚ် ဗီုပြၚ်ပၞာန်ဒုၚ်ဂှ် သ္ကုတ်လကြဴဏံ နွံကၠုၚ်ရ။ ဍေံတအ်ဟွံသုၚ်စောဲ ဗီုပြၚ်ပၞာန်ထ္ပက်တုဲ ကေတ်လဝ်ဒၞာဲ မွဲမွဲဒၞာဲ ချိုတ်တ်ပၠိုတ်တ်တုဲ ဒှ်မံၚ်ဗီုပြၚ် မၚ်ဒၟံၚ် အခိၚ်ပိုဲကၠုၚ်ဗတိုက်ရ။ အကာဲအရာပၞာန်ဂှ် ပြံၚ်လှာဲကၠုၚ်ဗီုပြၚ်ဏံရ။ ဃောဂိတုဒဳဇြေမ်ဗာ စၟတ်တ္ၚဲ (၉) စၟတ်တ္ၚဲ(၁၀)ဂှ် ပိုဲအာဗတိုက်လဝ် ပ္ဍဲဍုၚ်ပဠဝ်မာန်လဝ်ရ။ ဟိုတ်နူလပါ်ပိုဲ ထ္ပက်စှ်ေကၠုၚ်ပၞာန် ဗီုဏံတုဲ လပါ်ဍေံတအ် သုၚ်စောဲကၠုၚ်ဗီုဏံရ။

-ပရေၚ်ပြုပြေၚ်ပၞာန်ကဵု ပရေၚ်ဗပေၚ်ဇြဟတ်ပၞာန် နူလပါ်ကံၚ်ဇြဳပၞာန်တအ်ဂှ် ကၠောန်ရေၚ်တၠုၚ်ကၠုၚ် ဗီုပြၚ်လဵု ဂွံညာတ်ကေတ်ဒၟံၚ်ရော။

ပရေၚ်ဗပေၚ်ဇြဟတ်ပၞာန်ဂှ် ကၠောန်ကၠုၚ်ဒၟံၚ်ဗွဲမဂၠိုၚ်ရ။ ကၠာတေံတှ်ေ ပ္ဍဲဗ္ဒပ်ပလဂှ် နွံၜိုတ် ၃၀ ဓဝ်ရ။ လၟုဟ်တှ်ေ ဍေံတအ် ထပ်ဗပေၚ်လဝ်ဇြဟတ်ရ။ ပ္ဍဲဒၞာဲဍေံတအ် ဖျေံလဝ်ဒပ်ဂှ်တှ်ေ လွဟ်ကီု၊ ဇွောံမကီု၊ ဇြဟတ်ပၞာန်ကီု ကၠောန်ကၠုၚ်ပရေၚ်ဗပေၚ်ဇြဟတ် လတူနူအတိုၚ်အခိၚ်ပကတိ ၜိုတ်ကဝက်ပြၚ်ၚ်ရ။ ကၠောန်သ္ပဒၟံၚ် ပရေၚ်ဗပေၚ်လဝ်ဇြဟတ်ပၞာန် ပရေၚ်ဗပေၚ်ဇြဟတ်လွဟ်ရ။ အခိၚ်ဍေံတအ် ဗပေၚ်ဇြဟတ်ပၞာန်ဂှ် ဍေံတအ် ပ္ဍဲလပါ်ပိုဲဏံ ဒၟာနူဒှ်ဒၟံၚ် ဗလးက္ၜဳတုဲ လုပ်ကၠုၚ်ကဵုဂၠုၚ် နူလပါ်က္ၜဳရ ဂၠိုၚ်ဒၟံၚ်။ ထ္ပက်ကရောၚ်ပၞာန်တုဲ လုပ်ကၠုၚ်ဂှ် ဟၟဲပုဟ်။ ပဠဝ်ဂှ်တှ်ေ လုပ်ကၠုၚ်ကဵုဂၠုၚ်ရ။ ကၠောန်ဒၟံၚ် ပရေၚ်ဗပေၚ်ဇြဟတ်ပၞာန်ရ။ ဟိုတ်နူ ဒပ်ပၞာန်ဗပေၚ်ဒၟံၚ်ဇြဟတ်ပၞာန်တုဲ အခက်ခုဲဗီုလဵုနွံရောတှ်ေ ပိုဲအာတြးလဝ် ဟွံဂွံရပုဟ်။ ဟိုတ်နူ ကရောၚ်ပၞာန်ဍာ်နွံဒၟံၚ်တုဲ ပိုဲအာ ဒဵုကဵုတရဴဍာ်ဟွံမာန်ဏီရ။ တၚ်ခက်ခုဲမွဲဂှ် နွံရ။

-တုဲပၠန် ပ္ဍဲကဵုဂိတုဒဳဇြေမ်ဗာဂှ် အကာဲအရာဗက်ဆဵုဂဗဒၟံၚ်ကဵု ညးဍုၚ်ကွာန် ပ္ဍဲကဵုပွိုၚ်ဍုၚ်ပဠဝ်၊ ပ္ဍဲလတူပရေၚ်ဆဵုဂဗဏံ လစွံစိုတ်ညးဍုၚ်ကွာန် ကောန်ညးဒေသတအ် ဗီုပြၚ်လဵုနွံရော။

အဖဝ်ညးဍုၚ်ကွာန်တအ် အဓိကဂှ်တှ်ေ ၜိုတ်ကွာန်ပိုဲအာစိုပ်မာန်ဂှ် ပိုဲအာရ။ သာတုဲ ညံၚ်ပိုဲ ဂွံက္လိဂွံ ပရေၚ်ထံက်ဂလာန်လပါ်ပိုဲဂှ် ပိုဲဗက်စန်ဒက်ရ။ ညးဍုၚ်ကွာန်တအ်ဂှ် ဒးဟီုဂလာန်စန်ဒက်ရ။ ပြသၞာညးတအ်က္တဵုဒှ်ဒၟံၚ်ဂှ် သ္ဇိုၚ်စှ်ေစှ်ေ ၜိုတ်သ္ပမာန် ဘိုၚ်ရီုသောၚ်ကလးကဵုရ။ ကၠောန်လဝ်အရာတအ်ဏံရ။ နူလပါ်ညးဍုၚ်ကွာန်တအ်လေဝ် ဒၟာနူမိက်ဂွံဆဵုဂဗကီု၊ မိက်ဂွံတက်ကျာကီု ဂးတုဲ ကော်ဘိက်ကၠုၚ်ပိုဲလေဝ် နွံရ။ ယဝ်ရညးဍုၚ်ကွာန်တအ် ကော်ဘိက်ကၠုၚ်ပိုဲ ဗီုဏံတှ်ေလေဝ် ပိုဲအာတုဲ ကၠောန်သ္ပလဝ် ပရေၚ်ဆဵုဂဗသဳကၠဳပ္ညဳပ္ညပ် အကာဲအရာ က္တဵုဒှ်ကၠုၚ်မာန်ဂှ် နွံရ။

ပ္ဍဲကဵုဂဗုတ် ညးဍုၚ်ကွာန်တအ်ဟီုထ္ၜးတအ်ဂှ်တှ်ေ ကိစ္စတိဍာ်ကီု ပြသၞာအဓိကဂှ်တှ်ေ ကိစ္စဂဥုဲၜူမာဲရ။ ပ္ဍဲဒၞာဲညးတအ်ဂှ် ဂဥုဲၜူမာဲ ပြးဂွံဒၟံၚ်ယျ ဟွံခိုဟ်ပုဟ်လေဝ်။ အရာတအ်ဏံဂှ် ဗီုလဵုဂွံထိၚ်ဒက်ရော။ ကိစ္စစပ်ကဵုဂဥုဲၜူမာဲဏံဂှ် ဂၠိုၚ်အိုတ်ရ။ ချပ်ဂၞန်လဝ် ဂၠိုၚ်ဒၟံၚ်ရ။ သှ်ေနူဂှ်တှ်ေ နကဵုညးဍုၚ်ကွာန်မွဲမွဲတၠ ဗီုပြၚ်လဵုဂွံရီုဗၚ် PDF ပိုဲ နဲလဵုဂွံကဵုရီုဗၚ်ရောဟီုဂှ် ညးတအ်ပတိုန်ထ္ၜးကၠုၚ်လဝ်ဂှ် နူကဵုလပါ်ပိုဲကလေၚ်သဳကၠဳကဵုလဝ် နွံရ။ အရာတအ်ဏံရ ဂၠိုၚ်မံၚ်။

-သ္ကုတ်လကြဴဏံ ဗီုပြၚ်လဵု ဒပ်ကံၚ်ဇြဳပၞာန် ကလိလောန်ကၠုၚ်ဒၟံၚ် ပ္ဍဲလတူကောန်အရာပ်ညးဍုၚ်ကွာန် ပ္ဍဲရးတၞၚ်သဳ နွံဒၟံၚ်ရော။

ပ္ဍဲလတူကောန်အရာပ်ညးဍုၚ်ကွာန်တအ်ဂှ် ပေါဲဗတိုက်ဒှ်ကၠုၚ်ယျတှ်ေ သုၚ်စောဲကၠုၚ်ကၟိုၚ်ကောန်မၞိဟ်ရ။ ဒှ်ယျဏောၚ်တှ်ေ ဍေံတအ်ဂှ် ဓဇက်ရပ်ကေတ် မၞိဟ်နွံကရပ်ဂှ်ရ။ ပရေၚ်သုၚ်စောဲ နဒဒှ်ကၟိုၚ်ကောန်မၞိဟ်ဂှ် ကၠောန်ဒၟံၚ်ဂၠိုၚ်အိုတ်ရ။ တုဲပၠန် ပရေၚ်စံၚ်ပလီုသ္ၚိတအ် ကၠောန်ဒၟံၚ်ဗီုဂှ်ရ။ တုဲပၠန်ယဝ်ဒှ်ပေါဲဗတိုက်တှ်ေ အတိုၚ်စိုတ်ဒှ်ဂှ် ပရေၚ်ပန်ဂစိုတ်ဒၟံၚ် ညးဍုၚ်ကွာန်တအ် နွံရ။ ဆဵုပ္ဍဲဂၠံၚ်ဍာန်လေဝ် လပန်တှ်ေပန်ဂှ်ရ။ ပရေံအိုတ်ဂှ် ရပ်ကေတ်ကောန်အရာပ် ဒဵုကဵု ၂၀၊ ၃၀ တၠတုဲ သုၚ်စောဲမံၚ်နဒဒှ်ကၟိုၚ်မၞိဟ်။  ကလိလောန်ဒၟံၚ် အရာဏံဂှ် ဂၠိုၚ်အိုတ်ရ။ ဒၟာနူကၠောန်ရေၚ်တၠုၚ်ဒၟံၚ်ကဵု ဒလာန်တအ်အဓိကဂှ်ရ ဍေံတအ်ရပ်ရ။ ဟွံပေၚ်စိုတ်ကဵု ပူဂဵုလေဝ် ထံက်ပၚ်ဒၟံၚ် PDF ဏောၚ်ဟီုဂး ပၞောန်လပုဟ်တဲတုဲ  စကာကဵုရပ်လေဝ် နွံဒၟံၚ်ရ။

-ညးဍုၚ်ကွာန်ပါဲဓလေတ်ပၞာန် ပ္ဍဲကဵုရးတၞၚ်သဳတအ်ရော အခိၚ်လၟုဟ်ဏံ ဗီုလဵုဒးဆေၚ်ဒၟံၚ်မုက်ကဵု ပရေၚ်ခက်ခုဲရော။ သွက်ညးတအ် နွံပၟိက်ဒၟံၚ်ကဵု ပရေၚ်ရီုဗၚ်သာ်လဵုရော။

အကာဲအရာညးပါဲဓလေတ်ပၞာန် အဓိက ပြဟ်ဟ်ဏံ ညးတအ်ကလေၚ်စဴ ဟွံဂွံဏီပုဟ်တှ်ေ  ဒးပါဲဓလေတ်မံၚ် သီုအလုံ ကၟိန်အိန်ထံၚ်ရ။ ပ္ဍဲကဵုဂှ် မုညးတအ် နွံဒၟံၚ်ပၟိက်အဓိကရောတှ်ေ ပရေၚ်စသုၚ်မံၚ်စံၚ်ဗိုက်လတက်ရ။ ကမၠောန်လေဝ် ကၠောန်ဟွံဂွံပုဟ်လေဝ်။ ညးတအ်ဂှ် အဓိကဍေံ ပ္ဍဲပရေၚ်စသုၚ်မံၚ်စံၚ်ဂှ် အခက်ခုဲနွံဒၟံၚ်ရ။ နူကဵုဗ္ဒပ်ပါဲဓလေတ်ပၞာန် ကၠောန်ရေၚ်တၠုၚ်ကဵုဒၟံၚ်ဂှ်တှ်ေ နွံဒၟံၚ်ရ။ ဒုၚ်ဒါန်သြန်တုဲ ပါ်ပရအ်ကဵု ဇွောံမဂှ် နွံရ။ ဟွံရုမ်ဂပ်ပုဟ်လေဝ်။

မၞိဟ်ဟလိုၚ်ဏောၚ်တှ်ေ သြန်ဒါန်ဟွံရုမ်ဂပ်ဂှ် ဒှ်ဒၟံၚ်ရ။ ခက်ခုဲဇွောံမဗီုဏံဂှ် နွံရ။ ယဝ်ရဒးဟီုကဵု ပရေၚ်ထတ်ယိုတ်ဏောၚ်တှ်ေ PDF ပိုဲပံက်လဝ်ဗ္ဒမ်ပရေၚ်ထတ်ယိုတ်ရ။ ကဵုလဝ်ပရေၚ်မၚ်မွဲရံၚ်စံၚ် ပရေၚ်ထတ်ယိုတ်ရ။ ၜိုန်ရမၚ်မွဲကဵု ပရေၚ်ထတ်ယိုတ်ပေၚ်ၚ်ဟွံမာန်ကီုလေဝ် ၜိုတ် ၈၀ တၟံကၠံဂှ် ပိုဲကဵုလဝ်ရ။ နကဵုပရေၚ်ရံၚ်စံၚ်ထ္ၜလဘာ်ဏံဂှ် အဓိကဂှ်တှ်ေ ညံၚ်ပရေၚ်စိုတ်ဓာတ်ညးတအ် ဟွံဂွံလီုလာ်ယောၚ်ယာအာဂှ် ပိုဲကၠောန်ကဵုဒၟံၚ်ဂှ်တှ်ေ ပေါဲမိပ်မြဟ်တအ် ကၠောန်ကဵုလဝ်ဗွဲမဂၠိုၚ်ရ။ နွံပၟိက်ဒၟံၚ်အဓိကဂှ်တှ်ေ သွာၚ်ဇွောံမစၞစကဵု ဗွိုက်လတက်ရ။ ညးလ္ၚဵုဂှ်လေဝ် မံၚ်ဒၟံၚ် ပ္ဍဲသ္ၚိမသကလောကောဒေံ နွံဗ္ဒာဲကရပ်ဂှ်ရ။ လ္ၚဵုဂှ်တှ်ေ ကၠုၚ်မံၚ်ဒၟံၚ် ပ္ဍဲဗ္ဒပ်ပါဲပၞာန်ရ။

-နကဵုခရိုၚ်ဗိက်တံဒပ်လၟိဟ် (၁) ဂှ် ဖျေံလဝ်သန္နိဌာန် ပ္ဍဲပရေၚ်ပၠန်ဂတးက္ညၚ်ဏံ ဗီုလဵုနွံရော။ ဟီုထ္ၜးကဵုညိ။

ပိုဲတအ်ဂှ် ဒဵုကဵုစိုပ်ဒတုဲ ဒးကၠောန်ဂှ်ရ။ လုကဴပရေၚ်ပၠန်ဂတးဏံ ဟွံတုဲဒှ် လုကဴဟွံဂွံ ဖေတ်ဒရေဝ်ပိုဲနွံပၟိက်ဏီတှ်ေ အာဒဵုကဵုလအိတ်ဏောၚ်ဂှ် ပိုဲဖျေံလဝ်သန္နိဌာန်ရ။

-နဒဒှ်အလန်လကြဴအိုတ်ဏံ စပ်ကဵုပရေၚ်ပၠန်ဂတးက္ညၚ်တုဲ မုမိက်ဂွံဗ္ကန်ကဵု မိမညးဍုၚ်ကွာန်တအ်နွံရော။

မိက်ဂွံဟီုဗ္ကန်ကဵုညးဍုၚ်ကွာန်တအ် ဂလာန်လကြဴအိုတ်ဂှ် ဟိုတ်နူဒှ်ဒၟံၚ်ပေါဲ အလန်လကြဴအိုတ်တုဲ ပံၚ်တောဲပါလုပ်ကဵု ဍိုက်က်ပေၚ်ၚ်ညိ။ ပံၚ်တောဲပါလုပ် မွဲကရောံကဵု ကောန်လပါ်ညးဍုၚ်ကွာန် က္ဍတ်ပါ်တိတ်ကၠုၚ် နူညးဍုၚ်ကွာန်တအ်ဂှ်ညိ။ အဲမိက်ဂွံဟီုဆၜိုတ်ဏံရ။