မတ်မလီု-ဂျာန္နဝါရဳ(၅)
ပ္ဍဲကဵုကောန်ထံၚ်ကံၚ်ဇြဳပၞာန် ဗလးကဵုလဝ် နူထံၚ်စာတ် ကေုာံအချုက် မၞုံပ္ဍဲတွဵုရးဍုၚ်မန် တၞဟ်ဟ်တအ်ဂှ် ကောန်ထံၚ်ပရေၚ်ဍုၚ်ကွာန် မွဲတၠလေဝ် ဟွံပါကၠုၚ်ရဂှ် ဂွံတီကေတ် နူကဵုဌာနက္ဍိုက်က္ဍိုပ်ထံၚ်တွဵုရးရ။
ကံၚ်ဇြဳပၞာန်ဂှ် နဒဒှ်စၟတ်သမ္တီ တ္ၚဲဗၠးၜးရတုဗိုတ် မရနုက်ကဵု (၇၅) ဝါ ကၠုၚ်စိုပ် ပ္ဍဲဂိတုဂျာန္နဝါရဳ စၟတ်တ္ၚဲ (၄) တ္ၚဲဏံဂှ် ကဵုကၠုၚ်အခေါၚ်ဗၠးၜး ကုကောန်ထံၚ်တြုံ ဗြဴ ၄၁၂ တၠ နူကဵုထံၚ်စာတ် ကေုာံအချုက် မၞုံပ္ဍဲတွဵုရးဍုၚ်မန် တၞဟ်ဟ်တအ်ရ။
ညးဂွံအခေါၚ်ဗၠးတိတ်တအ်ဂှ် ဒှ်ကောန်ထံၚ် တြုံဗြဴ နူကဵုထံၚ်စာတ် ကေုာံဗ္ဒပ်အချုက်ထံၚ် (၁၁)ဗ္ဒပ် မၞုံပ္ဍဲတွဵုရးဍုၚ်မန်တုဲ ပ္ဍဲကဵုဂှ် ကောန်ထံၚ်တြုံ (၃၂၇)၊ ကောန်ထံၚ်ဗြဴ (၈၅) တၠပါလုပ်ဒၟံၚ်ရ။
ပ္ဍဲကဵုအခေါၚ် ကံၚ်ဇြဳပၞာန်ဗလးပ္တိတ်ကဵုဂှ်မ္ဂး ကောန်ထံၚ်ပရေၚ်ဍုၚ်ကွာန်ဟွံပါလုပ်တုဲ ညးဒးဒုၚ်ဒၟံၚ်ဒုဟ်ဒဏ် တၞဟ်သ္အာၚ်တအ်ဟေၚ် ပါလုပ်ဒၟံၚ်ရဂှ် ညးတာလျိုၚ်ဌာနက္ဍိုက်က္ဍိုပ်ထံၚ် တွဵုရးဍုၚ်မန်မွဲတၠ ဟီုသ္ဂးလဝ်ရ။
ကောန်ထံၚ်တြုံဗြဴ ကံၚ်ဇြဳပၞာန်ကဵုအခေါၚ်ဗၠးတိတ်တအ်ဂှ် အတိုၚ်သၞောဝ်ဥပဒေလၟေတ်ရာဇဝတ် ၝောံပိုဒ် ၄၀၁၊ လစှ်ေၝောံပိုဒ် (၁) ဂှ်မ္ဂး ယဝ်ရ ထပ်ကလိလောန် ဒုဟ်ဒဏ်မွဲအလန်ပၠန်မ္ဂး သ္အာၚ်နူဒုဟ်ဒဏ်က္လိလောန်လဝ်ဂှ်တုဲ ဒုဟ်ဒဏ်သွက်ဂွံဒးဒုၚ် သှ်ေဒၟံၚ်လၟုဟ်ဏံလေဝ် ဒးဆက်ဒုၚ်အာရောၚ်ဂှ် ကံၚ်ဇြဳပၞာန် လလောၚ်တြးလဝ်ရ။
ကံၚ်ဇြဳပၞာန်သီအဝဵုဂှ် နဒဒှ်တ္ၚဲစၟတ်သမ္တီ တ္ၚဲဗၠးၜးရတုဗိုတ် မရနုက်ကဵု (၇၅) ဝါဂှ် ကဵုကၠုၚ်အခေါၚ်ဗၠးၜး ကုကောန်ထံၚ်တြုံဗြဴ ဒးဒုၚ်ဒၟံၚ်ထံၚ် နူကဵုထံၚ်စာတ်၊ အချုက်ထံၚ် ကေုာံဗ္ဒပ်တၞဟ်ဟ် မၞုံပ္ဍဲအလုံကၟိန်ဍုၚ် (၇၀၁၂) တၠရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ