ၜဳကလေၚ်၊ ဂျာန္နဝါရဳ (၂၀)
ဗ္ဒိုပ်ဗၠာဲသၟိၚ်ၝောံဍုၚ် ကေုာံ ရုၚ်ဌာနက္ဍိုက်ပ်ပရေၚ်အုပ်ဓုပ်ကာနာနာပွိုၚ်ဍုၚ် သီုကဵုပါလုပ် တမ်ဒပ်ကံၚ်ဇြဳပၞာန် (၂) ဒပ် ဖျေံသ္ဇိုၚ် အပ္ဍဲပွိုၚ်ဍုၚ်ၜဳကလေၚ်ဂှ် ပ္ဍဲဂိတုဂျာန္နဝါရဳ (၁၈) တုဲကၠုၚ်တေံ ဗ္တိုက်လဝ်ကဵုဒရုၚ်ရောၚ် ဂကောံဒပ်ပၠန်ဂတးဂစေံအသီ (HRS) လလောၚ်ပ္တိတ်လဝ်ရ။
ပ္ဍဲတ္ၚဲဂှ် ၜိုတ် (၁၁) နာဍဳဂှ် ဂကောံဒပ်ပၠန်ဂတးဂစေံအသီ (HRS) ကေုာံ တမ်ဒပ် KNLA တံ ဗဂပ်လဝ်လွဟ်ဇၞော် ၆၀ မမ ပန်မ ပ္ဍဲဒရုၚ်တုဲ ထောံမခတိုဟ်ဗ္တိုက်လဝ် ဗ္ဒိုပ်ဗၠာဲသၟိၚ်ၝောံဍုၚ်ၜဳကလေၚ် ကေုာံ ရုၚ်ပရေၚ်အုပ်ဓုပ်ကာနာနာ မၞုံဍုၚ်ၜဳကလေၚ်ဂှ်ရ။
ပ္ဍဲပရေၚ်ဗ္တိုက်ဏံဂှ် ဗၠာဲသၟိၚ် (၃) တၠ ကလိဂွံလဝ်ဝပ်သ္ကာတ်မြဟ်လဝ်တုဲ ပ္ဍဲကဵုပရေၚ်ဗ္တိုက် ရုၚ်သ္ကိုပ်အုပ်ဓုပ်ကာနာနာပွိုၚ်ဍုၚ်ဂှ် မၞိဟ်ဇီုကပိုက်ဒး ဟွံမွဲကီုလေဝ် စမြိုၚ်လ္ၚဵု ဇီုကပိုက်လီုလာ်အာလဝ်ဂှ် ဂကောံဒပ်ပၠန်ဂတးဂစေံအသီ (HRS) သ္ဂးရ။
ဂကောံဒပ်ပံၚ်ကောံဂှ်ဝွံ ပ္ဍဲလဒေါဝ်တ္ၚဲ ၜိုတ် (၁၂) နာဍဳဂှ် ထပ်ဗ္တိုက်လဝ် တမ်ဒပ်လၟိဟ် ခလရ (၈) ကံၚ်ဇြဳပၞာန် မဖျေံသ္ဇိုၚ် ဍုၚ်ၜဳကလေၚ်ဂှ် နကဵုဒရုၚ်တုဲ ပ္ဍဲပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန် (၁) တၠ ချိုတ်အာလဝ်ရ။
သ္အာၚ်နူဂှ်ပၠန် ပ္ဍဲဇိုၚ်သဝ်တ္ၚဲ ၜိုတ် (၅) နာဍဳကဝိုက်ဂှ်လေဝ် အခိၚ်ထပ်ဗ္တိုက် တမ်ဒပ်လၟိဟ် ခမရ (၃) ကံၚ်ဇြဳပၞာန် မၞုံဗ္ဒါဲတၟိုန်ကဇြာၚ် ဍုၚ်ၜဳကလေၚ်ဂှ် ဒၟါနူဒတုံဗ္တိုဟ်ထ္ကးအာလဝ် အပ္ဍဲၝောံခန်ဒပ်ပၞာန် မကၠောန်ဗဒှ်ဒၟံၚ်ကောံဓရီုဂှ်ရ သီုကဵုပါလုပ်ဗဵုအကြာပ် (၃) တၠဂှ် ကောန်ဒပ်ကံၚ်ဇြဳပၞာန် (၈) တၠ ဇီုကပိုက်ဂွံလဝ်ဝပ်ရ။
ညးအုပ်ကာခရိုၚ်သဓီု KNU ပဒိုဝ်သဝ်ဨနာၚ်ဂှ် အကာဲအရာ ကောန်ဂကောံဒပ်ကံၚ်ဇြဳပၞာန် မဇီုကပိုက်ချိုတ်အာလဝ် အပ္ဍဲပရေၚ်ဗ္တိုက် ဂကောံဒပ်ပံၚ်ကောံတံ ဗွဲလစှ်ေဂှ် ဂၠိုက်ဂၠါဲဒၟံၚ်ဖိုဟ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ကလေၚ်ပန်ပှော်လဝ်တံ ကၠောန်လဝ်ကီုလေဝ် လ္ပာ်ဂကောံဒပ်ပံၚ်ကောံ KNLA တံ ဇီုကပိုက်အာလဝ်ဟွံမွဲမွဲသာ် ဆုတ်ကလေၚ်ကၠုၚ်မာန်လဝ်ဂှ် ဂွံတီကေတ်ရ။
ပ္ဍဲသၞာံတုဲကၠုၚ် ဂိတုမာတ် ၂၈ တေံဂှ်လေဝ် ဂကောံဒပ်ပံၚ်ကောံ KNLA တံ ထောံလဝ်မခတိုဟ် ဗ္တိုက်လဝ် နကဵုဒရုၚ် ကုရုၚ်အုပ်ဓုပ်ကာနာနာ ကေုာံ ဗ္ဒိုပ်ဗၠာဲသၟိၚ်ၝောံဍုၚ်ၜဳကလေၚ်တံဂှ်ရ ညးဒုၚ်ကာရုၚ်ပရေၚ်အုပ်ဓုပ်ကာနာနာ (၄) တၠ ကေုာံ ညးဒုၚ်ကာကဝ်မယှေန် (၁) တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)