ဝါလေန်တာန်၊ ဂျူလာၚ် (၂၁)
ပ္ဍဲဗ္ဒိုပ်အာတရဴပြေလၟောၚ် အေန်ဒိုဝ်နဳယှာ မၞုံပ္ဍဲတ္ကအ်ဗာလဳဂှ် ခြာဟွံလအ်ကၠုၚ်ဂှ် ဂွံဆဵုလဝ် ယဲ ဇိုၚ်ကေုာံပါၚ် (Foot-and-mouth disease) FMD ဂှ်တုဲ ဒဒှ်ရကၠောန်ၜိုတ်သၠုၚ်ပ္တိုန်လဝ် အစဳဇန်သ္ဂောံစဵုဒၞါဂှ်ရောၚ် နျူဇြဳလာန် မစုက်ဒၟံၚ်ကဵု ဗ္ဒါဲပၞောန်ပယျဵုဒၞက်ဂှ် ဟီုဂးလဝ် ပ္ဍဲတ္ၚဲဗုဒ္ဓဝါလက္ကရဴဂှ်ရ။
“ခြာဟွံလအ်ကၠုၚ်ဂှ် ဂွံဆဵုလဝ် FMD ပ္ဍဲဒၞါဲအာတရဴ ဗာလဳဂှ်တုဲ အပ္ဍဲသတ္တာဟ မလောန်ကၠုၚ်တံဂှ် ကမၠောန်ပရေၚ်စဵုဒၞါပိုယ်တံ ပ္ဍဲပယျဵုဂှ် ကၠောန်ၜိုတ်လဝ်တုဲဒှ်ဣရ” သာ်ဝွံ ဝန်ဇၞော်ပရေၚ်တဵုလွဳ ကေုာံ ပရေၚ်ဂီုကၠီုဇဳဝ ဒါမဳယာန် အိုဝ်ကိုဝ်ရာ ဟီုဂးလဝ်ရ။
“သွက်ဂွံစဵုဒၞါ ပရေၚ်ဂီုကၠီု ပရေၚ်ပိုန်ဒြပ် ကၟိန်ဍုၚ်နျူဇြဳလာန်ဂှ်တုဲ ဇၟာပ်ပ်မၞိဟ် သွက်ဂွံပါလုပ်ကၠောန်ၜိုတ် နကဵုသတိတံဂှ် ဖ္တိုက်ဖ္အောဝ်လဝ်ရ” သာ်ဝွံ သ္ဂးရ။
ယဲ ဇိုၚ်ကေုာံပါၚ်ဂှ်ဝွံ ဒှ်ဂကူစၟယဲ မလေပ်ကၠောံထၞာန် တိရစ္ဆာန်တံတုဲ သ္ကဵုဇီုကပိုက်ကၠေံမာန်ရ။
ပရေၚ်ကၠောံထၞာန်စၟယဲ ပ္ဍဲနျူဇြဳလာန်ဂှ် ဇီုကပိုက်ကၠေံ ကုပွမပလံၚ်ပ္တိုန် ကပေါတ်တိတ်နူဍာ်တှ်၊ ဗၞိက်တိတ်နူဖျုန်ကၠိက် ကေုာံ ဖျူန်ဗ္ကေတ်တံ စဵုကဵုဂိတု ဟွံသေၚ်မ္ဂး ကဵုသၞာံ သ္ကာတ်တ်မြဟ်ဟ် နွံမာန်ရောၚ်ဂှ် ဂွံတီကေတ် နူကဵုဌာနဝန်ဇၞော် ကမၠောန်သ္ဇိုၚ်ကွတ်စက်တံရ။
Biosecurity New Zealand ဝွံ သွက်မၞိဟ်မစိုပ်ကၠုၚ် နူအေန်ဒိုဝ်နဳယှာ အပ္ဍဲသတ္တာဟဏံကဵု သွက်ကၟုဲမအာဝေၚ် ဗာလဳတံဂှ် ဆက်မိတ်လဝ်ကဵု ကိရိယာ မဗိုက်လ္တက်ဂွံ ညံၚ်ကဵုဒၞပ် မသ္အးဇ္ၚးကဵုဝဳရုသ်တံတုဲ ဂစိုတ်ကဵုစၟယဲတံဂှ်ရ။
သ္အာၚ်နူဂှ်ပၠန် နျူဇြဳလာန်ဝွံ သီုထံက်ပၚ်ကဵုဒၟံၚ် ကုအေန်ဒိုဝ်နဳယှာ ကိရိယာ ထိၚ်ဒက်စၟယဲမာန်တံဂှ်ရ။
Ref: Reuters