ၜဳကလေၚ်၊ ဂျာန္နဝါရဳ (၂၈)
ပ္ဍဲတွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ကွာန်ဒိုက်ယိတ်ကုန် လ္တူဂၠံၚ်ကွဳစက် လ္ဂုၚ်−မတ်မလီုဂှ် ဟိုတ်နူကွဳစက်ကံၚ်ဇြဳပၞာန်တံ ဒးဒုၚ်ဗ္တိုက်ဗ္တိုဟ်မာၚ်ဂှ်ရ ကောန်ဂကောံဒပ်ကံၚ်ဇြဳပၞာန် (၃) တၠချိုတ်တုဲ (၁) တၠ ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျာန္နဝါရဳ (၂၇) ပယျာံဂယး ဗၞတ် (၁၀) နာဍဳဂှ် ဒပ်ပံၚ်တောဲ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုဟ်မာၚ်ဗ္တိုက်လဝ် ကုရေၚ်ကွဳစက်ကံၚ်ဇြဳပၞာန် (၁၀) ဖ္ဍိုက်ပါ နူကဵုကျာ်ထဝ် မဒဳလုပ်ကၠုၚ် အပ္ဍဲပွိုၚ်ဍုၚ်သဓီုဂှ်ရ။
ကြဴနူဒးဒုၚ်ဗ္တိုက်ဗ္တိုဟ်မာၚ်တုဲဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ် ပရေၚ်ပန်ပှော် မွဲလ္ပာ်ကုမွဲလ္ပာ်တုဲ နူကဵုတမ်ဒပ်ဖျေံသ္ဇိုၚ်ကံၚ်ဇြဳပၞာန်တံဂှ် ပန်ပှော်လဝ် နကဵုလွဟ်ဇၞော်တံ ဟွံပိုတ်သ္ကုတ်ရ။
ကြဴနူပရေၚ်ပန်ပှော်ဂှ်တုဲ ဒပ်ကံၚ်ဇြဳပၞာန်ဝွံ လုပ်စိုပ်ကၠုၚ် အပ္ဍဲကွာန်ဒိုက်ယိတ်တုဲ စံၚ်ပလီုလဝ် သ္ၚိဒၟံၚ် ညးဒေသ (၃) မတုဲ သ္ၚိမွဲမဂှ်လေဝ် ပန်ပလီုဏာလဝ် နကဵုလွဟ်ဇၞော်ဂှ် သ္ဂးရ။
ဟိုတ်နူပရေၚ်ပန်ပှော်ဏံတုဲ ဂၠံၚ်ကွဳစက် လ္ဂုၚ်−မတ်မလီုဂှ် ကၟာတ်ဆိုအ်အာလဝ်တုဲ ၜိုတ်အခိၚ်တ္ၚဲစေၚ် ဂၠံၚ်ကလေၚ်ပံက်အာလဝ်ဂှ် ဂွံတီကေတ်ရ။
ပ္ဍဲဂိတုဂျာန္နဝါရဳ (၁၀) တုဲကၠုၚ်တေံဂှ်လေဝ် လ္တူဂၠံၚ်ကွဳစက် လ္ဂုၚ်−မတ်မလီု ကွာန်ဒိုက်ယိတ်ဂှ် ရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်ဗ္တိုဟ်မာၚ်ဂှ်ရ ကွဳစက် (၂) ဖ္ဍိုက် လီုလာ်လဝ်တုဲ ကောန်ဂကောံဒပ်ကံၚ်ဇြဳပၞာန် (၇) တၠ ဟွံအောန် ဇီုကပိုက်ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)