အေဿတာန်ပဝ်(လ်) ၊ ဂျူလာၚ် (၂၃)
ယူကရုၚ် ကေုာံ ရုယှာတံဝွံ ဟိုတ်ဒၟါနူကၟာတ်လဒဵုလဝ် ပရေၚ်ပလံၚ်ပ္တိုန်သြောံ ၜဳလမ္စံက်တုဲ အကြေပ်ဂြတ် ဇွောံမစၞစဂၠးကဝ် မက္တဵုဒှ်ကၠုၚ်တံဂှ် ညံၚ်ဂွံအောန်စှ်ေသက်သာအာ ရန်တၟံသာ်ဏံတုဲ ပ္ဍဲတ္ၚဲသိုက် သွက်ဂွံထ္ပက်စၟတ်တဲ တၚ်တုပ်စိုတ် မဝါတ်ဂါတ်မွဲဂှ် စဳဇန်လဝ်ရောၚ် ဂွံတီကေတ်ရ။
ဗွဲကြဴကၟိန်ဍုၚ်ရုယှာ သၠိုၚ်လုပ်ၜက်ၜေတ် ဍုၚ်ဇိုၚ်ဝုတ်ဒိုဟ် အပ္ဍဲဂိတုဖေဖဝ်ဝါရဳတုဲဂှ် တၚ်တုပ်စိုတ် မဒှ်ကိုပ်ကၠာအိုတ် အကြာၜါလ္ပာ် မက္တဵုဒှ်ဒၟံၚ် ပေါဲပၞာန်ဂှ်ဝွံ မွဲကရောံ ၚုဟ်မးဇွောံမစၞစဂၠးကဝ် မသၠုၚ်တိုန်ကၠုၚ်ဂှ် မၞိဟ်ဂမၠိုၚ် နူကၟိန်ဍုၚ်ဝါတ်ခါဲအိုတ်ဂၠးကဝ်တံ ဒးဆေၚ်ဒၟံၚ်မုက်ကဵု ကုပွမကၞောဝ်ကၠောဝ်ဗျဵုတံရ။
ညးအုပ်ကာနာနာ ကုလသမဂ္ဂ အာန်တိုဝ်နဳယိုဝ် ဂူတာရက်(သ်)ဂှ်ဝွံ သွက်အခန်ကၞာ သ္ဘၚ်ထ္ပက်စၟတ်တဲ ပ္ဍဲနန် ဒေါမ်မာဗာခဳ မဒှ်စရာဲကျာ်သြဳ အေဿတာန်ပဝ်(လ်) မၞုံပ္ဍဲကလိုဟ်ၜဳ ဗဿဖိုဝ်ရာပ်(သ်) ဂှ်တုဲ ပ္ဍဲတ္ၚဲဗြဴဗ္တိဏံ စိုပ်ဍုၚ်တူရကဳရောၚ်။
“သွက်ဇွောံမစၞစဂၠးကဝ် ဂွံရုမ်ဂပ်တုဲ တၚ်တုပ်စိုတ် စပ်ကဵုပရေၚ်ပလံၚ်ပ္တိုန်သ္ၚု ပၟိက်ဇၞော်တံဂှ် သမ္မတတူရကဳ ကဵု ညးအုပ်ကာနာနာ ကုလသမဂ္ဂ မေဿတာဂူတာရက်(သ်) တံ မွဲကရောံကဵု ဂကောံညးစၞးယူကရုၚ်ကဵု ရုယှာတံဂှ် ထ္ပက်အာစၟတ်တုဲ ပ္ဍဲအေဿတာန်ပဝ် (လ်) ရောၚ်” သာ်ဝွံ ညးမၞုံအခေါၚ်ဟီုဂး က္ဍိုပ်သ္ကိုပ်တူရကဳဂှ် ဟီုလဝ်ရ။
ပ္ဍဲသၞေဟ်က္ၜၚ် ယူကရုၚ်တံဂှ် က္ၜၚ်ပၞာန်ရုယှာတံကဵု မာၚ်တိုပ်တိဂမၠိုၚ် ကၟာတ်လဒဵုလဝ် လျိုၚ်တာန် ဂျူၚ် ကေုာံ သြောံ တၞဟ်ဟ်သ္အာၚ်တံ စဵုကဵု (၂၅) ပြကောဋိကိုဋ်တုဲ ကိယေဗ်ဂှ် သွက်ဂွံဝေၚ်ပါဲ ပရေၚ်ဗ္တိုက် သီုကုန် သီုဍာ် မသ္ဇက်ဒးဂွိၚ်ဂွါဲဖေက်လကိုတ်တံဂှ် စဳဇန်လဝ်ရ။
သၞာဲဒဴတူရကဳ ကေုာံ ကုလသမဂ္ဂဂမၠိုၚ် ပ္ဍဲပေါဲသဳကၠဳတိုက်ရိုက် မဒှ်အလန်ကိုပ်ကၠာအိုတ် အကြာဂကောံညးစၞး ပရေၚ်ပၞာန်ၜါလ္ပာ်တံ မတိုန်စိုပ်လဝ် ပ္ဍဲအေဿတာန်ပဝ်(လ်) သတ္တာဟတုဲကၠုၚ်တေံဂှ် ပြဟ်ဟ်ဏံ မူအပြောံ ပရေၚ်သောၚ်ကလး ဟွံတီတိုန်စှ်ေမွဲ မံက်တိတ်ကၠုၚ်လဝ်ရ။
သွက်ဂွံထ္ပက်စၟတ်တဲ လိက်ကသုက်တုပ်စိုတ်ၜါလ္ပာ် ဗွဲမလုပ်သၞောဝ်မာန်ဂှ် အပ္ဍဲသတ္တာဟဏံ သွက်ဂွံထပ်ဆဵုဂဗဂှ် ရန်တၟံလဝ်တုဲ သမ္မတရုယှာ ဗလာဒဳမာပူတေန်ဂှ် ပရေၚ်ပလံၚ်ပ္တိုန်သြောံဍုၚ်ညး မကၟာတ်ထောံလဝ်တံဂှ်လေဝ် သွက်ဂွံရပ်စပ်သောၚ်ကလးဂှ် တၚ်တုပ်စိုတ်သာ်လဵုဟွံဟီု ဒဒှ်ရစၟဳစလဝ်ဂှ် ကဵုလဝ်သတိ ပ္ဍဲတ္ၚဲအၚါဂှ်တုဲ သ္ကဵုလဇုဲလဇကၠေံ ပေါဲသဳကၠဳဂှ်ရောၚ် ဘပဠလဝ်ရ။
ပေါဲဗ္တိုက်လလအ်ပွိုၚ် မသုန်ဂိတုဏံဝွံ ပ္ဍဲကဵုဒေသရှ်တိခိုဟ်အိုတ်ပ္ဍဲယူရောပ် မၞိဟ်မကၠောန်ပ္တိတ် သြောံဂၠိုၚ်အိုတ်ဂၠးကဝ်တံ ဗ္တိုက်ဒၟံၚ်ညးသ္ကအ်ရ။
သြောံကြပ်သီုဖအိုတ်ဂှ် တတ်ကၠောံၜဳလမ္စံက်ဂှ်တုဲ ပလံၚ်ပ္တိုန်ဒၟံၚ် မ္ၚး ဒေသတံတွဵုတုဲ ဝန်ဇၞော်ပရေၚ်ဍုၚ်သ္အာၚ်တူရကဳ ဒဒှ်ရသ္ပစၟတ်သမ္တီ ပရေၚ်ဂွိၚ်ဂွါဲပူတေန်ဂှ် ဟီုဂးလဝ်ရ။
“အခါမသောၚ်ကလးပြသၞာဏံဂှ် နူကဵုယူကရုၚ်ဂှ် ပံက်ကဵုဂၠံၚ်တရဴ ပလံၚ်ဗစိုပ် သြောံ၊ ကၠေၚ်ကဴသၟိၚ်တ္ၚဲတံ သၟးဟွံက ဗၞိက်တိတ်နူရုယှာတံလေဝ် ဒးပံက်ကဵုကီုရောၚ်၊ ဗၞိက်တိတ်နူရုယှာတံဂှ် ဟိုတ်ဒၟါနူ တပ်ဒဏ်ကၟာတ်လဒဵုလဝ်တုဲ ဟွံဇီုကပိုက်ကီုလေဝ် ပွမကၟာတ်ဆိုအ်ဗ ပ္ဍဲပရေၚ်ပလံၚ်ဗစိုပ်ဂၠံၚ်ဍာ်၊ သၞောတ်တိုက်သြန် ကေုာံ တၚ်ဒုၚ်လျိုၚ်တံဂှ် မၞုံဒၟံၚ်ရ၊ အမေရိကာန် ကဵု အဳယူ သွက်ဂွံရုပ်သီ အရာတံဏံဂှ် ကဵုလဝ်ကတိရ”သာ်ဝွံ သ္ဂးရ။
တူရကဳ ကောန်ဂကောံနေတဝ်ဂှ်ဝွံ မွဲဒမြိပ်ပဋိပက္ခ မက္တဵုဒှ်ဒၟံၚ်ဂှ် ဒှ်ကၟိန်ဍုၚ် မၞုံပရေၚ်ဆက်ဆောံ ခိုဟ်ဟ်မိုဟ်ဟ် ကုမဝ်သကဝ် ကဵု ကိယေဗ် မွဲဍုၚ်ရ။
Ref: Bangkok Post