ဝါယှေန်တာန်၊ ဂျူလာၚ် (၂၄)
စပ်ကဵုပရေၚ်ဗလး က္ၜၚ်ကျာဗ္တိုက်အမေရိကာန် ကုဍုၚ်ယူကရုၚ် နွံဟွံမွဲဂှ်တုဲ အမေရိကာန် ဂၠါဲဒၟံၚ်နဲကဲရဂှ် ညးမၞုံအခေါၚ်ဟီုဂး သ္ၚိဗုဂှ် ဟီုလဝ်ကဵု အ္စာပရိုၚ်တံ ပ္ဍဲဂိတုဂျူလာၚ် (၂၂) ဂှ်ရ။
အလဵုအသဳ ဗိုၚ်ဒေန်ဂှ် သွက်ဂွံပအပ်ကဵု ယူကရုၚ် က္ၜၚ်ကျာဗ္တိုက်( Jet) တံမာန် အခိၚ်မကၠောန်သ္ပဒၟံၚ် ပွမလ္ၚတ်ဂၠိုက်ဂၠါဲ ပဏာမဗွဲကိုပ်ကၠာဂှ် ကိစ္စဏံဝွံ ဒှ်အရာသ္ဂောံကၠောန်ၜိုတ် လွာဲလွာဲဏံ ဟွံသေၚ်ပုဟ်ဂှ် ဂျောန် ညးမၞုံအခေါၚ်ဟီုဂးသ္ၚိဗု ဟီုလဝ်ကဵု အ္စာပရိုၚ်တံ ပ္ဍဲပေါဲသောၚ်ကလးမွဲဂှ်ရ။
အခိၚ်မဗ္တိုက်ဒၟံၚ်ကဵု ရုယှာဂှ် အရီုဗၚ်ထံက်ပၚ်အမေရိကာန် သွက်ယူကရုၚ်တံဂှ် သၠုၚ်ပ္တိုန်ကၠုၚ်လဝ်တုဲ သွက်ယူကရုၚ် ဒဵုကဵုအခိၚ်လၟုဟ် အမေရိကာန် ထံက်ပၚ်ကဵုလဝ် ဒဝ်ဠာ (၈.၂) ဗဳလျာန်ဣရ၊ သွက်စက်ဗရုသာဲ (Drone) ဂှ် ဒဝ်ဠာ (၁၀၀) ပြကောဋိကိုဋ်၊ သွက်ဂွံစဵုဒၞါ ပွဗ္တိုက်တံဂှ် အပံၚ်ဒဝ်ဠာ (၂၇၀) ပြကောဋိကိုဋ် ထံက်ပၚ်ကဵုလဝ်တုဲ တၚ်နၚ်လစှ်ေ အရီုဗၚ်လွဟ်လက်နက်အမေရိကာန် မတိတ်လက္ကရဴအိုတ် သွက်ယူကရုၚ်ဂှ် ထ္မံက်ပ္တိတ်ဟီုဂးလဝ်ရ။
ဟိုတ်နူကဵု သမ္မတအမေရိကာန် ဂျဵုဗိုၚ်ဒေန် ကဵုအခေါၚ်တုဲ က္ၜၚ်ကျာမထိၚ်နကဵုစက် Phoenix Ghost နူ ကုမ္ပဏဳ ပုဂ္ဂလိက ယူကရုၚ် AEVEX Aerospace LLC ဂှ် လၟိဟ်က္ၜၚ်ကျာ (၅၈၀) ဖ္ဍိုက် ကလိဂွံအာရောၚ် ညးမၞုံအခေါၚ်ဟီုဂး သ္ၚိဗု ဟီုဂးလဝ်ရ။
ပ္ဍဲအစဳဇန်ဏံဂှ် သွက်အရီုဗၚ်ပရေၚ်စဵုဒၞါတၞဟ်ဟ်တံဂှ် စဵုကဵု (၁၇၅) ပြကောဋိကိုဋ် ဒဝ်ဠာ တၞီလုပ်ရောၚ်ဂှ် သ္ၚိဗု ထ္မံက်ထ္ၜးလဝ်ရ။
သၞောတ်ကမ်လှောဝ် အမၠံက်ပဆုဲပြံၚ်ဏာမာန် ကဆံၚ်သၠုၚ် ဟိုၚ်မာ(သ်) (HIMARS) ဂှ်ကဵု လွဟ်လက်နက်တၞဟ်ဟ် ကောန်ဍုၚ်ယူကရုၚ်တံ မရပ်စပ်စကာဒၟံၚ် ပ္ဍဲဗလးမုက်ပၞာန်တံ ပါလုပ်ရောၚ်ဂှ် ဝန်ဇၞော်ကာဍုၚ်သ္အာၚ် အမေရိကာန် အာန်တိုဝ်နဳယိုဝ် ဗလေန်ကာန် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
လက္ကရဴ ပၞာန်ဂၠးကဝ်ဒုတိယတုဲဂှ် အခိၚ်ရုယှာ ဂ္စါန်ဒၟံၚ် သွက်ဂွံဗ္တိုက်ယူကရုၚ် နဒဒှ်ပဋိပက္ခ ယူရောပ်မပရေံအိုတ်ဂှ် သြန်ဂအုံအမေရိကာန်တံ ထပ်မံက်တိတ်ကၠုၚ်ဣရ။
ယူကရုၚ်ဝွံ ပ္ဍဲကဵုပွမရုန်ဂ္စါန် သ္ဂောံကလေၚ်ဗ္တိုက်ဂှ် ကဵု သ္ဂောံကလေၚ်သီတိဍာ်တံဂှ် ဒးဗ္ဒါဲဒလာဲဒၟံၚ် လွဟ်လက်နက် နူဍုၚ်ပလိုတ်ဂမၠိုၚ်တုဲ ကောန်ဒပ်ညးတံဝွံ လ္တူဍုၚ်ရုယှာဂှ် သကဵုလီုလာ်ဆောံလေၚ်ကၠေံ မဇၞော်ကဵုဇြဟတ်တံ မၞုံကၠုၚ်မာန်ရောၚ် သမ္မတယူကရုၚ် ဇြဳလာန်သကဳ ဟီုဂးလဝ်ရ။
Ref: Reuters