ၜိုန်ရဖအောန်ဖျေံ ပမာဏဒးလှာဲလှုဲ မဂွံနၚ်နူကဵုဗၞိက်ပလံၚ်ပ္တိတ်တံကီုလေဝ် အရာစိုပ်တရဴ လ္တူပရေၚ်ပိုန်ဒြပ်ဂှ် နွံကၠုၚ်ဟွံမာန်

နေဗျဳဒဝ်၊ ဂျူလာၚ် (၁၅)

တၟံကၠံ ဒးလှာဲလှုဲ ဂွံနၚ်နူကဵုဗၞိက်ပလံၚ်ပ္တိတ် နူကဵုတိုက်သြန်ဗဟဵု ကံၚ်ဇြဳပၞာန် မသၞောတ်ဗ္ၜတ်လဝ်ဂှ် ၜိုန်ရပြံၚ်လှာဲထောံ စဵုကဵု ၅၀ တၟံကၠံကီုလေဝ် လ္တူပရေၚ်ပိုန်ဒြပ်ကၟိန်ဍုၚ်ဗၟာဂှ် ပွမစိုပ်တရဴတံ နွံဟွံမာန်ပုဟ်ဂှ် တၠပညာပရေၚ်ပိုန်ဒြပ်တံကဵု တၠကမၠောန်ဗၞိက်ပၠောပ်ဗၞိက်ပ္တိတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဝွံ သြန်ဂွံနၚ်နူဗၞိက်ပလံၚ်ပ္တိတ် ၆၅ တၟံကၠံ အတိုၚ်ၚုဟ်တိုက်သြန်ဗဟဵု မစၟတ်လဝ် အပ္ဍဲတ္ၚဲကၠောန်ကလောန်မွဲတ္ၚဲ ဟွံဒေါအ်ဟွံဂွံ ဒးသၠာဲကဵုဏောၚ်ဂှ် တုဲကၠုၚ် နူဂိတုနဝ်ဝေမ်ဗာ သၞာံတုဲတေံ စၞောန်ပ္ညုၚ်လဝ်ရ။

သ္အာၚ်နူဂှ်ပၠန် သှ်ေ ၃၅ တၟံကၠံဂှ် အပ္ဍဲပွိုၚ် ၃၀ တ္ၚဲ အလဵုဇကုတံ ဗီုဒးစိုတ် အခေါၚ်ရပ်စပ်သုၚ်စောဲနွံတုဲ လှဲပြံၚ်ကဵုညးတၞဟ်ကီု၊ သွံတြး ပ္ဍဲကဵုတိုက်သြန်ဂွံလဝ်လာၚ်ဇြေန် AD တံမာန်ဂှ် လလောၚ်ပ္တိတ်လဝ်ရ။

ဆ္ဂး တိုက်သြန်ဗဟဵု ကံၚ်ဇြဳပၞာန်ဂှ် စၞးတၚ်စၞောန် ဒးလှာဲသြန် မဂွံနၚ်နူဗၞိက်ပလံၚ်ပ္တိတ် ၆၅ တၟံကၠံဂှ် ၅၀ တၟံကၠံဂှ် ဒးလှာဲသြန်ဒ္ကေဝ်ဗၟာ အတိုၚ်ၚုဟ်မစၞောန်လဝ်ရောၚ် ပ္ဍဲဂိတုဂျူလာၚ် ၁၃ တေံ လလောၚ်ပ္တိတ်လဝ်ရ။

တၠပညာပရေၚ်ပိုန်ဒြပ်မွဲတၠဂှ် ကံၚ်ဇြဳပၞာန် ဖအောန်ဖျေံသာ်ဏံဂှ်ဝွံ ဒၟါနူသွာၚ်ဗၞိက်ပလံၚ်ပ္တိတ် စှ်ေဒၟံၚ်တုဲ ကၠောန်လဝ်မဒှ်ကီုလေဝ် နဲကဲစိုပ်တရဴဟွံသေၚ်ပုဟ်ဂှ် ပါ်ပါဲလဝ်ရ။

“ဍေံဂှ်တှ်ေ ဟိုတ်နူဗၞိက်ပလံၚ်ပ္တိတ်တံ အောန်စှ်ေကၠုၚ်တုဲ ဖအောန်ဖျေံကဵုလဝ်ဂှ် ဂွံဆဵုကေတ်ရ။ ဍာံဍာံဂှ် အလဵုပဝ်လသဳဏံဂှ် ဒှ်ဒၟံၚ်ပဝ်လသဳ ဂစိုတ်ဒၟံၚ်ဗၞိက်ပလံၚ်ပ္တိတ်တံဏံဂှ်ဏောၚ် ညာတ်ရ။ ဒးသွံကဵုဍေံတံ တွဵုဏောၚ်ဟီုတုဲ အာကၠောန်လဝ်တုဲ ဗၞိက်ပလံၚ်ဂှ် စှ်ေကၠုၚ်သိုက်က်ရ။ ဒှ်သဘဴဖအောန်ဖျေံကဵုလဝ် ၅၀ တၟံကၠံဂှ် ချိၚ်ခယျကေတ်ရ။ ဒးဟီုတပ်ပ်မ္ဂး ဗီုကဵုကၠာတေံ ယဝ်ရဗလးကဵု သြန်ဂွံနၚ် နူဗၞိက်ပလံၚ်ပ္တိတ်တံဂှ်မ္ဂး ၜိုတ် (၂၀) (၂၅) တၟံကၠံ ဂၠိုၚ်အိုတ်ရ အလဵုအသဳထိၚ်မ္ဂး ခိုဟ်ဏောၚ်။ ကၠာတေံမ္ဂး ပ္ဍဲကဵုၚုဟ်နှေန်လှာဲလှုဲတံဂှ် သြန်ဂွံနၚ်နူကဵုဗၞိက်ပလံၚ်ပ္တိတ်တံဂှ် သၠုၚ်အိုတ်ရ။ ဟီုမ္ဂး လၟုဟ်ဂှ် ဗလးကဵု (၅၀) တၟံကၠံကီုလေဝ် သှ်ေ (၅၀) တၟံကၠံဂှ် အတိုၚ်တီလဝ်ဂှ်ရ မ္ၚးဏံဂှ်လေဝ် အရာမသွံရာန်ဒၟံၚ် နကဵုၚုဟ်မ္ၚးတံဏံ ဒၞါဲလှာဲလှုဲကံၚ်တာတံဂှ်လေဝ် ဗက်ကၟာတ်လဝ်ရ။ မၞိဟ်ကၠောန်ဒၟံၚ်ပရေၚ်သွံရာန် နကဵုၚုဟ်မ္ၚးမ္ၚးဏံဂှ်လေဝ် ဗက်ရပ်ဒၟံၚ်ဟီုတှ်ေ မွဲလ္ပာ်တေံ ဗလးကီုလေဝ် မွဲလ္ပာ်ဂှ် ကလေၚ်ဓရတ်လဝ် သာ်ဏံဒှ်ဒၟံၚ်ရ၊ ဟီုမ္ဂး ဖအောန်ဖျေံကဵုလဝ် ညိညဂှ် နွံတှ်ေနွံဏောၚ်။ ဆ္ဂး နဲကဲစိုပ်တရဴကွေံကွေံဂှ် ဟွံသေၚ်ပုဟ်” သာ်ဝွံ သ္ဂးရ။

ဍုၚ်ဗၟာဝွံ နကဵုဗၞိက်ပလံၚ်ပ္တိတ်ဂှ် ဟိုတ်နူပလံၚ်ပ္တိတ်ဒၟံၚ် ဗၞိက်တိတ်နူပရေၚ်တဵုလွဳတံ အဓိကဂှ်ရ အခိၚ်လၟုဟ်ဂှ် ဒၟါနူဒှ်အခိၚ်ကသီုဂှ်ရ ၜိုန်ရဖအောန်ဖျေံထောံ သာ်ဏံကီုလေဝ် သွက်ကဏ္ဍဗၞိက်ပလံၚ်ပ္တိတ်ဂှ် အရာမစိုပ်တရဴတံ နွံဟွံမာန်ပုဟ်ဂှ် ညးဆက်ဟီုရ။

တၠကမၠောန်ဗၞိက်ပၠောပ်ဗၞိက်ပ္တိတ်မွဲတၠဂှ်လေဝ် ကံၚ်ဇြဳပၞာန် ဟိုတ်နူဖအောန်ဖျေံကဵုလဝ်တုဲ ၜိုတ်ဗၞတ်ညိညရ သက်သာတုဲ လ္တူအလုံပရေၚ်ပိုန်ဒြပ်ဍုၚ်ဗၟာမွဲဂှ် ဟွံစိုပ်တရဴပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လၟုဟ်ဂှ် ဒှ်အာ (၅၀) (၅၀) တှ်ေ သွက်သၟာဗၞိက်ပလံၚ်ပ္တိတ်တံဂှ် အောန်အိုတ်မ္ဂး သက်သာအာ (၁၅) တၟံကၠံရ။ ပိုယ်တံဂှ် ကဏ္ဍဗၞိက်ပၠောပ်ဗၞိက်ပ္တိတ်တံသၟး ဟွံသေၚ်ပုဟ်။ အလုံပရေၚ်ပိုန်ဒြပ်ကၟိန်ဍုၚ်မွဲဂှ် အခက်အခုဲဍေံကဵုဍေံ နွံဒၟံၚ်ညးသ္ကအ်အိုတ်ရ။ ဗၞိက်ပလံၚ်ပ္တိတ်ဍုၚ်သ္အာၚ်မွဲဓဝ် ဟွံသေၚ်ပုဟ်။ ပ္ဍဲကဵုဗၞိက်အပ္ဍဲဍုၚ်တံဂှ်လေဝ် အခက်အခုဲ သာ်ဏံနွံဒၟံၚ်ကီုရ။ တိဍာ်ဟွံၜိုဟ်သြိုဟ်၊ ပရေၚ်ပလံၚ်ဗစိုပ်တံ ခက်ခုဲကီု၊ ပ္ဍဲကဵုဒၞါဲလ္ၚဵုတံမ္ဂး ဂၠံၚ်တံဂှ် ကၟာတ်ဒၟံၚ်ဂှ်ကီု၊ ဒေသလ္ၚဵုတံမ္ဂး တဵုလွဳဟွံမာန် ကၠောန်ပ္တိတ်ဟွံမာန်တံ နွံဒၟံၚ်ရ။ ပရေၚ်ပိုန်ဒြပ်ဂှ်တှ်ေ တော်ကဵု ၚုဟ်ဒဝ်ဠာတံ တော်ကဵု (၅၀) (၅၀) တံ ဟွံဂွံပုဟ်။ လၟုဟ်ဂှ် အ္စာဗေဒၚ်လေဝ်ဟွံဒးသၟာန်၊ အ္စာသဳအိုဝ်ရဳတံလေဝ် ဟွံဒးသၟာန်ရ။ အလုံကမၠောန်ပရေၚ်ပိုန်ဒြပ်မွဲဂှ် ဇၟာပ်ပ်ဒိုဟ်ဂှ် အခက်အခုဲတံ နွံဒၟံၚ်အိုတ်ရ၊ ဟိုတ်ဂှ်ရ ၜိုတ်ကၠာတေံဂှ် ဟွံခိုဟ်ပုဟ်” သာ်ဝွံ သ္ဂးရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ သွက်ဂွံထိၚ်ဒက်ကဏ္ဍဗၞိက်ပလံၚ်ပ္တိတ်ဂှ်တုဲ လာၚ်ဗၞိက် ဟွံဒးအာတ်ပ္တိုန်လာၚ်ဇြေန်ကၠာတေံဂှ်လေဝ် စနူဂိတုဨပရဴ (၁) တုဲကၠုၚ်ဏံတုဲ စၞောန်ပ္ညုၚ်ကၠုၚ် သွက်ဂွံအာတ်ပ္တိုန်လာၚ်ဇြေန်ဗၞိက်ပလံၚ်ပ္တိတ်တံရ။

ဆ္ဂး ကဏ္ဍဗၞိက်ပလံၚ်ပ္တိတ် ဍုၚ်ဗၟာဂှ်ဝွံ ပ္ဍဲသၞာံဏံ ဂိတုဨပရဴ ကဵု ဂိတုမေ အပ္ဍဲပွိုၚ်ၜါဂိတုဏံ ပ္ဍဲကဵုကဏ္ဍဗၞိက်ပၠောပ်ဗၞိက်ပ္တိတ်ဂှ် နွံပၟိက်ဒၟံၚ် သြန်မေရိကာန်ဒဝ်ဠာ ၁၂၀၀ ပြၚ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး ဌာနဝန်ဇၞော်ကူသာန်သွံရာန် ကေုာံ ပရေၚ်ပိုန်ဒြပ်တံရ။

ဍုၚ်ဗၟာဝွံ ဗၞိက်ပလံၚ်ပ္တိတ်တံဂှ် မ္ၚးနူကဵုသ္ၚု၊ ကပေါတ်တိတ်နူသ္ၚု၊ ၜဲနာနာ၊ သတ်ကၠေၚ်တိတ်၊ သြောံဂန်၊ ရဝ်ဗာ ကေုာံ ဗၞိက်တိတ်နူဍာ်တံသၟးဟွံက ဗၞိက်တိတ်နူ ပရေၚ်တဵုလွဳတၞဟ်ဟ်တံဂှ်လေဝ် ပလံၚ်ပ္တိုန်သွံတြးဒၟံၚ် ဍုၚ်ကြုက်၊ ဍုၚ်သေံ သီုကဵုဍုၚ်သ္အာၚ်တၞဟ်ဟ်တံရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media