က္ဍိုပ်သ္ကိုပ်ပၞာန် ကဵုဒၟံၚ်ဒမြိပ်အရေဝ် သွက်ဂွံထပ်ပပဵုပ္တိုန်အာယုက်ကာလကာတၟေၚ်

နေဗျဳဒဝ်၊ ဂျူလာၚ် (၁၅)

ဂလာန်က္ဍိုပ်သ္ကိုပ်ပၞာန်ဟီု သွက်ဂွံရေၚ်တၠုၚ် သွက်ပရေၚ်ဂီုကၠီု ကေုာံ ပရေၚ်ၜိုဟ်လလမ် အလုံမွဲကၟိန်ဍုၚ်ဂှ် တၚ်နွံပၟိက် မဒးကဵုက္ဍိုပ်တံ နွံဒၟံၚ်ဏီရောၚ်ဂှ်ဝွံ ဒှ်အကာဲအရာ သ္ဂောံထပ်ပပဵုပ္တိုန်အာယုက်ကာလကာတၟေၚ်ရောၚ်ဂှ် ညးခါတ်အကာဲပရေၚ်ဍုၚ်ကွာန်တံ ဟီုရ။

ပ္ဍဲကဵုကောံဓရီုအလဵုအသဳကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုဂျူလာၚ် ၁၃ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် စပ်ကဵုလၟေၚ်ကမၠောန်ဂတ (၅) သာ်တုဲ ထ္မံက်ပ္တိတ်ဟီုဂးလဝ်ရ။

က္ဍိုပ်သ္ကိုပ်ပၞာန်ဂှ် ပ္ဍဲကဵုလၟေၚ်ကမၠောန်ဂတဂမၠိုၚ် တၚ်ပၟိက်ဇၞော်အိုတ်ဂှ် တၞဟ်နသ္ဂောံဂွံ ပရေၚ်အုပ်ဓလီုသၞောဝ်ဓဝ်ဂှ်ကဵု ပရေၚ်ညိၚ်ဝတ်သာယာ သွက်ဂီုကၠီုဘဝပရေၚ်ပိုန်ဒြပ်ညးဍုၚ်ကွာန်တံဂှ် ဒှ်တၚ်ဒးကဵုက္ဍိုပ်ရောၚ်ဂှ် သ္ဂးရ။

သၞာံဏံ အပ္ဍဲပွိုၚ် ၇ ဂိတုဏံ ပရေၚ်ဖံက်ဗ္တိုဟ်ပလီုပလာ် က္တဵုဒှ်လဝ် ၄၈၉ ဝါတုဲ မၞိဟ်ချိုတ်အာ ၇၈၀ ပြၚ် နွံလဝ်တုဲ လၟေၚ်ဒဒှ်ပကီုပရာပ်တံ အောန်စှ်ေအာကီုလေဝ် ဆက်က္တဵုဒှ်ဒၟံၚ်ဂှ် ဂွံဆဵုကေတ်ဒၟံၚ်ရောၚ် ညးဆက်ဟီုလဝ်ရ။

ဟိုတ်ဂှ်ရ စပ်ကဵုပရေၚ်ဂီုကၠီု၊ ပရေၚ်ညိၚ်ဝတ်ၜိုဟ်လလမ် ကေုာံ ပရေၚ်သၞောဝ်အုပ်လဒံတံဂှ်တုဲ သွက်ဂွံထ္မံက်ရုပ်ရဴပေၚ်ၚ်မာန်ဂှ် တၚ်နွံပၟိက်တံ နွံဒၟံၚ်ဏီရောၚ် က္ဍိုပ်သ္ကိုပ်ပၞာန် ဟီုဂးလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူယျေဝ်ထောန်ဂှ် အာယုက်ကာလကာတၟေၚ်ဂှ် ကြပ်အိုတ်ဒၟံၚ်ကီုလေဝ် ဟိုတ်နူပရေၚ်ညိၚ်ဝတ် အပ္ဍဲဍုၚ်ဟွံမွဲဏီဂှ်ရ ဂလာန်က္ဍိုပ်သ္ကိုပ်ပၞာန်ဝွံ ထပ်သ္ဂောံပပဵုပ္တိုန် ၆ ဂိတုပၠန် မဒှ်ရောၚ်ဂှ် သ္ၚဳဂၠိပ်လဝ်ရ။

“ညး (က္ဍိုပ်သ္ကိုပ်ပၞာန်) ဂှ် အခိၚ်တေံ ဟိုတ်နူအကာဲအရာ ညးဍုၚ်ကွာန်အလုံဍုၚ်တံ ဂွံကဵုမာဲ ဗၠးဗၠးၜးၜး ဟွံမွဲဏီဂးတုဲ ကေတ်ပပဵုပ္တိုန်လဝ်အာယုက်။ ပပဵုပ္တိုန်လဝ်အာယုက်တုဲ လၟုဟ်ကြပ်ပေၚ် ၆ ဂိတုဂှ် လၟုဟ်ရံၚ်ကေတ်မ္ဂး အကာဲအရာဂှ် ဟွံခိုဟ်ကၠုၚ်ပုဟ်။ ဟိုတ်နူဟွံခိုဟ်ကၠုၚ်ဂှ်ရ သ္ဂောံပပဵုပ္တိုန်အာယုက်ဂှ်ရနွံ” သာ်ဝွံ ညးသ္ဂးရ။

ကၟိန်ဍုၚ်ဝွံ နကဵုတၚ်ထ္ၜးဟိုတ် အကာဲအရာဓမ္မတာဟွံသေၚ်ဂှ်တုဲ နကဵုကံၚ်ဇြဳပၞာန် မကေတ်ပပဵုပ္တိုန်လဝ်အာယုက် နူကဵုကောံဓရီုဂီုကၠီုစဵုဒၞါ မကော်လဝ် ပ္ဍဲဂိတုဂျာန္နဝါရဳ ၃၁ တုဲကၠုၚ်တေံဂှ် ကၠုၚ်စိုပ် ပ္ဍဲဂိတုဂျူလာၚ် (၃၁) တေံ အိုတ်ရဏောၚ် မဒှ်ရ။

ညးအုပ်ကာလၟိဟ် (၁) ဗော်တောတက်ကောန်ဂကူကရေၚ်ဍာဲ (KNPP) ဥူအံၚ်သာန်မျေတ်ဂှ်လေဝ် နကဵုကံၚ်ဇြဳပၞာန် သွက်အဝဵုဂွံတန်ကြန်ဂှ် ကၠောန်အာမွဲနဲမွဲဗီုဏောၚ်မဒှ်တုဲ သွက်ဂွံဆက်ထိၚ်အာအဝဵု မဟွံလုပ်သၞောဝ်ဂှ် ချိုတ်ပၠိုတ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပရေၚ်သီအဝဵုဂှ် ပ္ဍဲဂိတုဂျူလာၚ်ဏံ အိုတ်ဏောၚ်ဟီုဟီု၊ ဍေံတံ ညံၚ်အဝဵုဂွံတန်ကြန်ဂှ် မွဲနဲမွဲဗီု ကၠောန်ကၠုၚ်တွဵုဏောၚ်။ ဗလးထောံအဝဵုလးလးဂှ် ဟွံမွဲပုဟ်။ သၞောဝ်သ္ဇိုၚ်ဂှ်လေဝ် နွံဒၟံၚ် ပ္ဍဲတဲဍေံတံရ။ ပ္ဍဲကဵုသၞောဝ်သ္ဇိုၚ်ဂှ် ဗီုလဵုစၞောန်ပျးစၞောန်ပျး၊ လၟုဟ်ဂှ်လေဝ် လောန်ၜက်အာ နူကဵုသၞောဝ်သ္ဇိုၚ်တုဲမှ ဍေံတံ သီလဝ်အဝဵုရ။ ဟီုမ္ဂး ဍေံတံဂှ် နွံဒၟံၚ်ပ္ဍဲတဲဍေံတံရတုဲ ဗီုဒးစိုတ်ရ။ ဟိုတ်ဂှ်ရ သွက်ဂွံဆက်ထိၚ်အာ အဝဵုမဟွံလုပ်သၞောဝ်ဂှ် ချိုတ်ပၠိုတ်ဒၟံၚ်ဏောၚ်” သာ်ဝွံ သ္ဂးရ။

က္ဍိုပ်သ္ကိုပ်ပၞာန်ဂှ် ပ္ဍဲကဵုရးသက်ကိုၚ်၊ တွဵုရးချေၚ် ကေုာံ တွဵုရးကရေၚ်ဍာဲတံဂှ် ဟိုတ်နူက္တဵုဒှ်ဒၟံၚ် အကာဲအရာပရေံအိုတ်ဂှ်ရ သွက်ဂွံကၠောန် ပရေၚ်ဂီုကၠီု လ္တူနူကဵုဏံဂှ် နွံပၟိက်တုဲ အခိၚ်ယိုက်ဂၠေၚ်တာလျိုၚ်ပရေၚ်ဂီုကၠီုဂှ် ကောန်ဒပ်ဗၠာဲသၟိၚ်တံ ဇီုကပိုက်ချိုတ်ဂျိုၚ်တံ နွံလဝ်ရောၚ် ဟီုပ္တိတ်ဏာလဝ်ရ။

ပ္ဍဲကဵုလၟေၚ်ကမၠောန်ဂတဂမၠိုၚ် မဒှ်တၚ်လက္ကရဴအိုတ် ယဝ်ရရေၚ်တၠုၚ် ဗွဲမဗဗွဲကဵု တၚ်စၞောန်ပျး စပ်ကဵုကာလကာတၟေၚ်တံတုဲမ္ဂး ကလေၚ်ကၠောန်ဗဒှ် ပေါဲရုဲမာဲဒဳမဝ်ကရေဇြဳဗော်ဇဳတုဲ သွက်ဂွံကလေၚ်ပအပ်အဝဵု ဇရေၚ်ဗော်ဂွံဇၞးတံဂှ် ဒးကဵုအာက္ဍိုပ် ကုပရေၚ်ဂီုကၠီု ကေုာံ ပရေၚ်ညိၚ်ဝတ်တံရောၚ်ဂှ် ညးသ္ဂးလဝ်ရ။

ဆ္ဂး အလုံမွဲကၟိန်ဍုၚ်ဂှ် နူကဵုပရေၚ်ပၠန်ဂတးတဝ်စၞေဟ်လွဟ်လက်နက် ကုဒပ်ကံၚ်ဇြဳပၞာန်ဂှ် စဵုကဵုဖန်ဗဒှ်ကၠုၚ် ပၞာန်ထ္ပက်ပေါဲဗ္တိုက်တံမာန်တုဲ တိဍာ်လ္ၚဵုတံဂှ် ဂကောံဇြဟတ်ပၠန်ဂတးတံ သီဂိုၚ်ဂွံလဝ်ရ။

အတိုၚ်ဂလာန် ဂကောံသုတေသန ISP-Myanmar ဂှ်မ္ဂး နူကဵုဒပ်ပၞာန်သီလဝ်အဝဵု စဵုကဵုဂိတုမေ သၞာံဏံဂှ် အလုံမွဲကၟိန်ဍုၚ် ပေါဲဗ္တိုက်အပံၚ် ၉၅၀၀ ပြၚ် က္တဵုဒှ်လဝ်ရောၚ် ပ္ဍဲဂိတုဂျောန် (၃၀) တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI